Kə̀fàʼ 28

Iyiə yə i kə fyi nə̀ Pôl a mbwòʼ ə̀ Maltà

1Ghè kə bù kwùm tsə anə iŋgwùŋə nə̀ iyiə ibɛbə ìliy yiy kamə fyi dzə̂ nə̀ wè lìy. Ghě bù kəli fyi kə nə̀ ghu kə twoŋə ìnaʼ i ghè yə̀ dzwì kə dzɛmə̀ na tsîy nəniy nə̀ à də̀ Maltà. 2Abù iwe yiy kaʼ tsə nəniy ani nìə̀, ufəb wiy ŋge də̀ sòʼo. Aghee inaʼ i ghè yə̀ kə ŋge dè ŋwò ghəd nə̀ fòŋ ìdzòŋə̀ yìy, ghu pìə̀ tsə uvələ nə̀ ghè zwaa. 3Pôl ə zù kwoə bə̀ ùkə̀m u ŋkàʼ, yəə u pìə̀ nyi yə̂ anə intsə, mbam fyi bə̀ ate, nə̀ unək wiy mə dzwùm fyi bə̂ we, bu baŋ tsìy kə anə ukwe u Pôl. 4Abù aghee inaʼ i ghè yə̀ tsəb kôʼ yə̂ nəniy ghii, ghu dzày tsə anə iwè nə̀, “Wù wə̀ ndzə̀m də̌ wù wə̀ ù wiy nəniy aghû yìy, yəə ù də kə̀ pfə nəway anə dzwî, zə̌ fə ghu twoŋə nə̀ à də̌ zə̌ fə isaʼ i tsitsi yiy, fə kî wiy kə ŋwò we.” 5Pôl ə wəd màʼà nyi yə̀ mbam yə anə intsə nə̀ ì kə̀ zəŋi nəway we nə̀ ìyiə ìbɛbə yiy. 6Ghu tsə̀ŋə̀ mòʼò kə nə̀ ù kì mwè ŋwò, moo nə̀ ù kì bvə̀ pfə ŋwò. Yəə ghu tsəŋə̀ lia yə̂ kə we, kòʼò wày nə̀ iyiə ìliy yiy fyiə nə̀ we, ghu kàm kaʼ ani dzày nə̀, “Wù wə̀ də̀ fəzə̌.” 7Izəd i wù wə̀ ù kə də nəniy tuw kiy anə mbwòʼ ì ghè yə̀ dzwî kə dzɛmì na nəniy kə də̌, Publiyùs. Ù kə kwu kəloʼo, kə kwùlì də̌ anə lòʼo kə ghè kə də nəniy ate. Publiyùs kə də̌ wù dzòŋə̀ wìy, u ŋgwam na ghəd a ndàw we anə məntsukə inti. 8Tè Publiyùs kə nə̀ŋ anə ukày, ù dzàŋə̀ nəniy uwe wiy nə̀ ŋwûkəfəntwà kiy. Pôl ə tsìy nyi kwoʼ yə̀ ani zù twoŋə zuw we, u gaʼ tsə awo azoŋə̀ we, gwùŋì tsə, wù ùghè wə̀ ə taw kə. 9Abù ayiə yə̀ tsìy ŋwò tsə nəniy, aghê ə bòʼò bə̀ aghè dzaŋə àdzə̀m akə̀lə̀ Pôl, u zəŋi taw kə ghu. 10Aghee inaʼ i ghè yə̀ kə ŋge nyiə̀ ghə̀d nə̀ ndə̀mə̀ ndə̀mə̀ tə ufyiə tiy, nyə̀ sòʼò ghə̀d nə̀ ŋkwiʼi miy. Abù ghè byay tsə nəniy iwe yiy ani nyi kə anə kəmfə̀n, ghu nyiə̀ ghə̀d nə̀ ufyiə wiy nə̀ ghè ŋwoə̀ nə̀ ùghe wiy.

Pôl ŋwò tsə a Maltà zù a Lûm

11Abù ndzoŋə tiy tsiy tsə nəniy ìti, ghee nìy kə kəmfə̀n, kə ŋwô bə̂ anə inaʼ i Àlèzandà. Izəd i mfə̀n kə ghà kə̀ kə twoŋə nə̀ à də “Ùzə̀ wə̀ u də nəniy awindzə̀ yìy.” Kə kə də̀ anə inaʼ yə dzwì kə dzɛ̀mì na nəniy anə sòŋə fə mbùw ùfəb. 12Ghè zù kwùm tsə anə inaʼ i Sìlakòs, bwuni tsə awote anə mə̀ tsukə ìnti. 13Ghě ŋwò tsə awo bàŋ zù kəmfə̀n a mbwòʼ ə̀ Legìyùm. Abù tsutsu wə, zoŋ kaʼ tsə ani tsìy nə̀ ì ŋwò kwoʼ bə̀ a bə̀d kə itəŋ kiy. Anə məntsukə ìmbè ghě zù fyi kə a inaʼ i Pùtìyolùs. 14Ghě zù kòʼ aghê liy awote ghu bɛmə awò Yesù. Ghu bwoʼ ghəd nə̀ wokiy nə̀ ghè dòʼò tsə nə̀ ghu ivən imòʼ. Ghèe ŋwò kə awote zù a Lûm. 15Abù aghû yə̀ ghu kə bɛmə nəniy Zə̀kìy a Lûm ghu zuw tsə nə̀ ghè bê ŋwò, aliy yiy bù ani bù kpe nìy ghə̀d anə bekəivən kə Apayùs, àliy yiy də̀ a lòʼo kə ndaw tiy kə də nəniy ate ìti aghê kə bê dzə̀ dyòʼò tsə nəniy awote anə kə̀mə̀ fə sòŋə̀ ani kpe nə̀ ghə̀d. Abù Pôl kòʼ tsə ghu, ayiə ghè yə̀ dzwàb we anə fôŋ, u nyə̀ zòŋə k-a-zə̀.

Pôl nàʼà ntwùm ə̀ Kə̀zə̀ a Lûm

16Abù ghè zû kwùm tsə nəniy a Lûm, ghu nyiə̀ yə̀ Pôl nə̀ ndaw nə̀ ù mùə̀ ate nə̀ noŋə we, sǔgôʼ tiy kyìŋə̀ we.

17Abù ntsukə tsìy tsə nəniy inti, Pôl ə twoŋə na bə̀ ŋgəd tə ghě Dzû tə̀liy tiy. Abù ghu dzəŋə bə̂ nəniy, u dzìy a ghu nə, “Awizə̂ yamə, me kə kə̀ zəŋi dzə̂ iyiə i bɛbə yiy nə̀ aghě ŋgàŋ yìy, moo ani byɛbi màʼa biə kə nə̀ tě ŋgàŋ asəsə yiy kə nyiə̀ na nəniy awò ŋgàŋ. Yəə i kə kwuni de kə ghii, ghu kwi fè na yə̀ mìə̀ a ndàw ntsaʼ a Yèlusalèm. Nìy nyiə̀ tsìy yə̀ mìə̀ awò àghě Lûm yìy. 18Ghu bəb nə̀ mə ba byɛbi kyìə̀? Abù ghu kôʼ tsə nə̀ mə kə̀ zəŋi bɛb dzə̂ iyiə ìliy yiy, kòʼ sòʼò nə̀ mə kə̀ byɛbi nəway iyiə ìliy yiy yə ghu nə wiy maʼà mìə̀, ghu liə ani nyəli màʼà mìə̀. 19Ŋgəd tə aghě Dzû tìy kwuni twe. Yəə ghu kə kwuni twe nə̀ ghu kə miə nyəli màʼà, mə bwoʼ yə̀ kə̀wo nə̀ ghu twum bə̂ mìə̀ akə̀lə̀ Kaʼisà tə ù saʼ nsàʼ ì ghè yə̀. Mə kə kwu dzə̀ way iyiə ìliy yəə mə nə dzày nə̀ aghee inaʼ yam yiy zəŋi bɛb ŋwô. 20À yù də ighe mə dziy nə̀ mə kôʼ bə̂ ghà tə̀ mə dzəŋi bə̂ nə̀ ghà. I ba də̌ nə̀ ghu miə kwû na anə təntsaʼ bòʼ wù wə̀ aghee Islàel yìy moʼò nəniy nə̀ ù nì bè ŋwò.” 21Ŋgəd tə aghě Dzû tə̀ mee â Pôl a we nə, “Awizə̂ ŋgàŋ àliy yiy kamə twâ bə̂ dzə̂ ŋwàʼà kə̀ liy kiy fə kə dzîy iyiə ìliy kwùmə̀ bə̀ nə̀ wò. Ghè kamə kôʼ soʼò aghee ŋgàŋ àliy yiy ghu bû fə̀ nə̀ ntwum ìlìy kwùmə̀ bə̀ nə̀ wò, moo dzìy bə̀ ìyiə ìbɛbə ìliy yiy kwùmə̀ bə̀ nə̀ wò. 22Ghè liə ŋwô ani zuw iyiə yə wò kwu nəniy ani dzày. Ghè kwu ŋwô nə̀ anə lòʼo tədzə̀m, aghê tsəŋə̀ dzìy kə àyiə bɛbə yiy anə dzəŋə kə wò də nəniy ate.” 23Ghu səay tsə ntsuk fə ghu kwu ani bù təm dzəŋi ate nə̀ Pôl. Abù ntsuk fə ghè fə kpe tsə nəniy, ndə̀mə̀ ùtuw u ghu wiy kə bù ŋwò anə lòʼo kə Pôl kə muə nəniy ate. Pôl tyi dè ghu nə̀ àyiə ntwum yə ù nìʼà nəniy yəə Zə̀kìy saʼa nəniy aghee we yiy ate. Ù nìy fyi kə ayiə anə ulàŋ u Musîs, nìy fyi kə sòʼò àyiə anə uŋwàʼà wə̀ aghee ntwùm ə̀ Kə̀zə̀ yìy kə twâ tyi dè â ghu. U khu kə dzəd nə̀ ghu bɛmə kə â Yesù. 24Ŋgəd tə ghě Dzû tə̀ liy tiy kə bɛmə nyiə̀ nə̀ ayiə yə Pôl dzìy nəniy à də̀ ayiə àsoŋə̀ yìy. Àliy yiy kə kwuni kə̀ bɛmə dzə̂ ayiə we a dziy yiy. 25Yəə ghu kə də kə̀ bɛmə ayiə yə ghu dzə̀m, ghu kaʼ ani sàlì ŋwò. Pôl kwuni dzày tsə nə̀, “Zwàykə̀zwekiy kə dzày ìyiə ìsoŋə̀ yìy anə yiə yə ù kə dzây bə̂ awò nə̀ təli ghii asəsə yiy abidzɛ̀mə̀ Ìzayà, 26a we nə,

‘Zù dzày yə a ghu nə,

ghà nî tsəŋə zwulə, zwulə kwùnə̀, kwuni zuw kyilə way.

Ghà ni tsəŋə fwələ, fwə̀lə̀ kwùnə̀ kwuni kòʼò kyilə way.

27Aŋwòə ghà kwu ukwəli u təfòŋ,

Utswuŋi ghii wiy kwôʼ dòʼò ŋwò,

asə ghii yiy fɛ̂b doʼò soʼò.

Bəə à mə̀ də wày aghii, təə ghu mə də ani kòʼ tə̀loʼo,

Utswuŋi u ghu wiy mə də ani zuw ayiə, ghu mə də sòʼò ani zuw kəli ayiə.

Ghu mə də ani kyèmì bù akə̀lə̀ mìə̀,

Mə mə də ani zəŋi taw kə ghu.’

28Ghà kwu ani kəli tsə nə̀ Zə̀kìy liə ŋwô ani ibii fyi aghû yə̀ ghu də wày aghee Dzû. Ghà kwu ani kəli tsə sòʼò nə̀ ghu kî byemə ŋwǒ ntùmə̀ Kə̀zə̀, Zə̀kìy ki bii fyi ghu.” 29#28.29 Ùŋwàʼà ù liy wiy kwu ŋwô kəmə̀ fə̀Abù Pôl dzày tsə nəniy ayiə yə, aghee Dzû yə̀ ə ŋwò tsə awote nə̀ ghu zwaʼà yə̀ ŋwò anə iwè nə̀ fòŋ tə̀ ŋəmə tiy. 30Pôl ə dòʼò a ndàw yə ù kə də tsə nəniy ate a Lûm anə tə ŋə̀mə̀ ìbè. U tsəə ndàw ìghè yə̀. U nìy ŋgwamə nia aghû yə̀ ghu kə bê nəniy akə̀lə̀ we ani bù kòʼ we. 31U nàʼà ntwùm ə̀ Kə̀zə̀ nə̀ fòŋə̀ ìtaw yìy, kwùmə̀ yə̀ nə̀ àyiə yə Zə̀kìy saʼa nəniy aghee we yiy ate, u tyi dè sòʼò àyiə kwùmə̀ yə̀ nə̀ Mwe ə̀ mbyi Yesù Kə̀litò. U zəŋə àyiə yə àdzə̀m anə fòŋ ìtaw yìy, wè lìy kə kə̀ bwiy na nəway we.

Currently Selected:

Kə̀fàʼ 28: isu

Highlight

Compare

Copy