Rɔmɛri̧ Túlɓay
Túlɓay
Sêe ka Pôl kaw ɗé mbété nɛ́ hí̧ njuku a láɓulaw a Rɔmri̧, ké kaw ɔrɔ gɔ́rɔ́ a bɔʼɔ a sáyké a ɓil nzáʼapéna a mɛ̌. Ké zi ɓá ké sé ka̧ tísiri a Rɔm, a ké zi ka̧rú bɔʼɔké mbêw yá ɓáy rá̧ ŋgboro a ríŋa sêe, sé ka̧ tísiri a Espany, ɓay a sé tɔ́ʼɔ Bélaɓay karú (gáŋké 15:22-24). Gáŋ ɓay a ɓil mbété a mɛ̌, saɓay sé tûl mɔny gɔ́rɔ́ a mɛ̌, rá̧ tɔ́ʼɔhɛ̧ a mɛ̌ hí̧ njuku a láɓulaw a pûkéri.
Mbété a Pôl hí̧ Rɔmɛri̧ tɔ́ʼɔ gáŋ ɓayri ka Pôl tɔ́ʼɔ. Ké mára̧ gáŋ ɓayké a sa: «Gáŋvbôn kó njuku ɓá njuku a ndáráké, ka ŋgboro a láɓulaw hí̧ Zezú, láɓulawké nɔ́ mbêw yáŋ ma.» (1:17).
Ké tɔ́ʼɔ gáŋ ɓayri sáy:
Tí ka gáŋké 1 sé ka̧ 8, saɓay sé tûl lá nzáʼa sé tûl sáŋna rá̧ láɓulaw hí̧ Gáŋvbôn, ka Zezú ŋgburu ŋgboroké. Egilize a Rɔm, mára̧ njukuri ka zi tí too ɓá Juyífri yáy. Dáy Juyífri erú ɓá ŋgɛ̧́náké a tísiri a Rɔm, njuku a há̧narí̧ ziŋ láɓulaw, dáy a tɔ́ŋ péna niŋa a sáŋna a Juyífri dát. Nǎŋnɔ́ tɔ́ʼɔ ɓá njukuri ka zi tí ɓá Juyífri yá, ka a láɓulaw, belɓá kú tɔ́ŋ niŋ péna a sáŋnaké kɔ́ lé? Vbí ɓayké nɔ́, kí tûl a Egilizeri ɓá ŋgɛ̧́náké. Dáy Pôl sa ɓá njukuri too ka tísiri, kaw ɓá ɓéké njukuri: Juyífri rá̧ njukuri ka zi tí ɓá Juyífri yáy. A tu ɓá sáŋna a há̧na zi ma lú ɓéké a njuku yá. Dáy njuku a tísiriri too ma ziŋ pɛ̧́na ka ŋgboro a hí̧ndɔ̂ʼɔ a Têm Pukí, ɓayhí̧lé Zezú Kiris ŋgburu ŋgboro sé gel a Gáŋvbôn hí̧ kuriri.
Tí a gáŋké 9 sé ka̧ 11 saɓay sé tûl káwa a gun Izirayɛ́lri, njuku a Gáŋvbônri̧ rá̧ njuku láɓulawri. Ɓá báŋa dii, láɓulaw a njuku a Kirisri erú ka sɛ̧wké ka tísiri a Juyífri. A tu ɓá Juyífri too zi láɓulaw yá. Pôl sa ɓá Gáŋvbôn zi kuriri a kaw kó kuriri dát ɓá njuku a mɛ̌. Sêe a há̧na, kú e tu kuu njuku a ǎ̧wrí̧ too, béla a Gáŋvbôn ka tɔ́ʼɔ ka ŋgboro a Zezú Kiris.
Tí a gáŋké 12 sé ka̧ 15 saɓay sé tûl káwa a ɓil Egilize a Zezú Kiris. Pôl sa báŋ ɗél Gáŋvbôn rá̧ ziŋ káwa a vónáké kuu njuku a fékéri. Ké saɓay hí̧ njukuri ka erú ka láɓulaw a kpúnáké ɓá kú hí̧ndɔ̂ʼɔ hí̧ njukuri ka zi kpú a ɓil láɓulaw yáy. Gáŋvbôn ten njukuri too a ɓil ɓéké rá̧ ɓil hûl. Dáy a ŋgɛŋnɛ́, kú erú ka ŋgboro niŋ law mbêw a bazeŋ a kuriri rá̧ kuu Kiris ka ŋgboro a hí̧ndɔ̂ʼɔ a Têm Pukí.
Mbété a Rɔmɛri̧ ɔrɔ ka hɛ̧namari̧ ɓá ŋgɛ̧́náké (gáŋké 16). Ké kɛ̧́ rɛŋ a wɔ̧rɔ̧́njukuri rá̧ wûnynjukuri ɓá ŋgɛ̧́náké. Njuku láɓulaw í̧ŋásá̧ri̧ kaw ɗɛ́ŋ kuu njuku a láɓulaw a sénɛ́ri̧.
Currently Selected:
Rɔmɛri̧ Túlɓay: pnz
Highlight
Copy
Compare
Share
Want to have your highlights saved across all your devices? Sign up or sign in
© 2023 CABTAL