Markus 16
16
E Isu i Mahuri Mule
(Mateo 28:1-8; Lukas 24:1-12; Ioanes 20:1-10)
1I lobo pali a Parava Nimalo lakea e Maria Magdala, e Maria kinane Iakop, e Salome to kona a mangisipa to go biri a kuline Isu vona. 2Na hatelanga, na mugana parava na vik, to laho lakea na babe. 3Lakea to vanana, “E rei ge kule talea ne teu a kedo ni kule kari a ngavana babe vona?”
4Na tahuna to bele, to masia a kedo ni kule vuroki pali. Ra kedo iea i dagi hateka. 5Na tahuna to dili na babe to masia a riau i rodo a varakia keakea i made na tabeke na limana kanene tou, lakea to turutu.
6A bakovi iea i ta rike, i ta maea, “Naha ni mangenge. Iau a lohoka vona moto matakanea e Isu o Nasaret, ra ni paditata na kai tavalavala. I mahuri mule pali na matenga. I uka a hini koea. Moto masia a murina ni vakatabuli vona rira. 7#Mat 26:32; Mrk 14:28Ngane moto vano, moto vakalongo e huriki a murimuri vona turana e Petrus, moto ta maea, ‘E Isu i muga lakea o Galili. Mu vano mu masia vonga, i manga a ngava i taki muga mua vona.’”
8To turutu, i vakulu a tagane tou na mangea. Lakea to ha taroa a babe, to nunu hamule. Pali i uka ma to vakalongoa tara viri, a vuhuna to mangenge hateka.
E Maria Magdala i Masia e Isu
(Mateo 28:9-10; Ioanes 20:11-18)
9E Isu i mahuri mule na matenga na hatelanga na mugana parava na vik. I bele taro ne Maria Magdala, ra ngatavine e Isu i lili tala vona hosi a hanitu i polorua. 10Muri e Maria Magdala i vano ge vakalongo e huriki a murimuri ra ri rakoli vona ri tatangi. 11Na tahuna e Maria i vakalongo ria vona i masia e Isu i mahuri mule, ri luhoi ia ta i tatami.
E Isu i Bele na Murimuri Vona ala Rua
(Lukas 24:13-35)
12Muri e Isu i bele tabu na murimuri vona ala rua na tahuna ru lalaho na dala, ta ru gu lakea na tanga tara. Pali i uka ma i mata manga ia muga. 13Lakea ru hamule, ru vakalongo e huriki a murimuri ranga. Pali ria ranga ri luhoi ta a ngava taminga kunana.
E Isu i Rudu e Huriki a Murimuri
(Mateo 28:16-20; Lukas 24:36-49; Ioanes 20:19-23)
14 #
1Ko 15:5
Muri e Isu i bele taho e huriki a murimuri vona ala ravulu a polona i taku na tahuna ri kani. I tahate ria, a vuhuna i uka ma ri luhoi tora, ri gigi tora hateka, i uka ma ri luhoi e huriki ri masia na tahuna i mahuri mule pali.
15 #
Apo 1:8
Muri i taki ria, “Mu lakea na tanga lobo na malala, mu vakalongo e huriki lobo na Velenga Kamumu. 16#Apo 2:38E rei a viri i luhoi tora iau, ni gi vahilolo, a Vure bara i korimulea. Pali e rei a viri i koi ni luhoi tora iau, bara i velu. 17#Apo 2:4; 8:7E huriki ri luhoi tora iau bara i bele ne ria a naro nga: Bara ri lili tala e huriki a hanitu na ragu. Bara ri ta na ngava karaba. 18#Luk 10:19; Apo 28:3-6Bara ri nugu a mata na limane ria, ri ninu a naru hale i uka ma ge vakahale ria. Bara ri ru a limane ria ne huriki ri giloa, bara ri tavaga.”
E Isu i Sike na Hunu
(Lukas 24:50-53; Apostolo 1:9-11)
19 #
Apo 1:9-11; 2:33-34 E Isu a Bakovi Dagi i vara lobo e huriki a murimuri vona. Muri ni bole sike na hunu i made turana a Vure, na limana a kanena. 20#Apo 14:3; Hib 2:3-4Muri e huriki a murimuri ri vano, ri lakea na tabeke lobo na malala, ri vara e huriki na Velenga Kamumu. E Bakovi Dagi i tuhori ria i vakatora a ngava vona na maka nivakasiri.
Currently Selected:
Markus 16: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.