Lukas 3
3
E Ioanes i Pelekado a Dala
(Mateo 3:1-12; Markus 1:1-8; Ioanes 1:19-28)
1E Kaiser Tiberius i matakari pali na pida i ravulu a polona i lima (15), e Ponsius Pilato i matakari o Iudea. E Herod i matakari o Galili, e turana e Pilip i matakari o Iturea o Trakonitis. E Lisanias i matakari o Abilene. 2E Anas e Kaipas rua a prister dagi. Na tahuna iea a nitana Vure i valai ne Ioanes, e tune Sakarias, na tahuna i made na tabeke i ngeki. 3#Apo 13:24Lakea e Ioanes i laho lae na maka tanga tabukoi na naru e Iordan, i vara e huriki ri gi pulo a vilone ria, ni gi vahilolo, lakea a Vure ge puga vuroki a vilo hale ne ria. 4#Ais 40:3-5Hosi, e Isaia a propet i vakalongo muga ne Ioanes, i here maea:
“A lohona viri i gale dagi na tabeke i ngeki i ta maea,
‘Mu pelekadoa a dala ne Bakovi Dagi.
Mu pelekadoa a dala ge laho vona ge kiripiripi.
5Mu kelitagu a maka maloku.
Mu keli tarida a maka lolo, a maka kupona.
Mu kado a maka dala marogorogo, ri gi kiripiripi.
Mu kavitagu a hini i golugolu, ge bila.
6Muri e huriki lobo bara ri masia a naro a Vure ge korimule hita vona.’”
7 #
Mat 12:34; 23:33 I kupo e huriki ri valai ge vahilolo ria e Ioanes, lakea i taki ria, “Mua a tuna mata! E rei i taki mua mu gu ha vona a rongova ne Bakovi Dagi? 8#Ion 8:33,39Naha ni luhoi mua, ge mua a hamone Abraham, mu gu malamala pali. Naha ni luhoi mavonga, a vuhuna a Vure i kara ni pulo a kedo nga, ge ria e huriki a hamone Abraham. I vai a kanena narone mua? Mu rata taro a naro kamumu ge vakasiri mua mu pulo muholi a vilone mua. 9#Mat 7:19A kira i tabuli tabukoi pali na vuhuna kai. A kai i uka kanena kamumu, bara ni tolo puru, ni rungani.”
10Lakea e huriki ri nanea, “Mi gi pulo navai a vilone mia?”
11E Ioanes i koli, i ta maea, “A viri i tahoka a varakia i rua, ge habia tara na viri i bala a varakia. A viri i tahoka a maki ni kani, ge habi ranga na viri i uka maki ni kani.”
12 #
Luk 7:29
I ranga e huriki a mari ni bole a takis ri valai ge vahilolo ria e Ioanes, lakea ri nanea, “Mari ni tovo, pali mia? Mi gi pulo navai a vilone mia?”
13Lakea e Ioanes i taki ria, i ta maea, “Mu bole kunana a takis ni taki mua vona mu gu bole, pali naha ni bole tavula tabu ranga.”
14Muri e huriki a nugumaheto ri nanea, “Pali mia? Mi gi pulo navai a vilone mia?”
Lakea i taki ria i ta maea, “Naha ni vakamangenge e huriki ri gi habi a moni ne mua. Naha ni padi virihi tavula e huriki na ngava, ri gi kona mua. Mu maru vona a moni ni kona mua vona.”
15E huriki ri pasimata ne Kristo ge valai. Ri luhoi e Ioanes, ma ge ia kunana a viri a Vure i rudu vilia ge korimule e huriki. 16#Apo 13:25Lakea e Ioanes i koli, i ta maea, “Iau a vahilolo mua na naru. Pali a viri tara i tabukoi ge valai, i tuhaka hateka nau. Iau i uka ma a bakovi kamumu ga puga vuroki a mota na vahapolo vona. Na tahuna i valai, bara i vahilolo mua na Hanu Kiripiripi, a kanono. 17Ngane i tabukoi bara i kalipida e huriki a bakovi kamumu, a bakovi hale, i manga a bakovi i leho na hania na vit i kalipida a vit, a luluna. Bara i bole e huriki a bakovi kamumu, ge ru ria na tanga kamumu, i manga a bakovi i leho na hania i ru kadolu a vit pololilo na roho na vit. Pali bara i bole e huriki a bakovi hale, i voro puru ria na kanono, i manga a bakovi i leho na hania na vit i bole a lulu, i voro rike na kanono. Ra kanono iea, i uka nilobona.”
E Ioanes i Vahiloloa e Isu
(Mateo 3:13-17; Markus 1:9-11)
18E Ioanes i vara na ngava i kupo na Velenga Kamumu, i taki tora e huriki a bakovi a ngatavine ri gi pulo a vilone ria.
19 #
Mat 14:3-4; Mrk 6:17-18 Pali i tahatea a hariki e Herod na hini i parangi tabu e Herodias, e girihine tarina. I tahate tabua na maka naro hale ranga i rata. 20Lakea e Herod i ratea a naro i hale hateka na maka naro hale muga. I lakavua e Ioanes, i ru dilia na bavi.
21Muga ne Ioanes ni ru dili na bavi, na tahuna i vahilolo e huriki ala kupo, e Isu tara ni vahilolo. Na tahuna e Isu i vasileki, a hunu i mata ka, 22#Ion 1:32lakea a Hanu Kiripiripi i puru valai i manga a balu, i toka langa vona. Muri a lohona viri i ta valai meli na hunu, i ta maea, “Ioe e Tugu, a hategu. A vivi hateka vomu.”
E Huriki e Tubune Isu
(Mateo 1:1-17)
23 #
Luk 4:22; Ion 6:42 E Isu i vakatubu a leho vona na tahuna i tahoka a pida i ravulu tolu. E huriki ri luhoi ia ta ia e tune Iosep.
E Iosep ia e tune Heli.
24E Heli e tune Matat. E Matat e tune Levi. E Levi e tune Melki. E Melki e tune Ianai. E Ianai e tune Iosep. 25E Iosep e tune Matias. E Matias e tune Amos. E Amos e tune Nahum. E Nahum e tune Esli. E Esli e tune Nagai. 26E Nagai e tune Mat. E Mat e tune Matias. E Matias e tune Semein. E Semein e tune Iosek. E Iosek e tune Ioda. 27E Ioda e tune Ioanan. E Ioanan e tune Resa. E Resa e tune Serubabel. E Serubabel e tune Siltel. E Siltel e tune Neri. 28E Neri e tune Melki. E Melki e tune Adi. E Adi e tune Kosam. E Kosam e tune Elmadam. E Elmadam e tune Er. 29E Er e tune Iosua. E Iosua e tune Elieser. E Elieser e tune Iorim. E Iorim e tune Matat. E Matat e tune Levi. 30E Levi e tune Simion. E Simion e tune Iuda. E Iuda e tune Iosep. E Iosep e tune Ionam. E Ionam e tune Eliakim. 31E Eliakim e tune Melea. E Melea e tune Mena. E Mena e tune Matata. E Matata e tune Natan. E Natan e tune Davit. 32#Rut 4:17-22E Davit e tune Iesi. E Iesi e tune Obed. E Obed e tune Boas. E Boas e tune Salmon. E Salmon e tune Nason. 33E Nason e tune Aminadab. E Aminadab e tune Admin, e Admin e tune Arni. E Arni e tune Hesron. E Hesron e tune Peres. E Peres e tune Iuda. 34E Iuda e tune Iakop. E Iakop e tune Isak. E Isak e tune Abraham. E Abraham e tune Tera. E Tera e tune Nahor. 35E Nahor e tune Serug. E Serug e tune Reu. E Reu e tune Peleg. E Peleg e tune Eber. E Eber e tune Sela. 36#Vuh 11:10-26E Sela e tune Kainan. E Kainan e tune Arpaksad. E Arpaksad e tune Sem. E Sem e tune Noa. E Noa e tune Lamek. 37E Lamek e tune Metusela. E Metusela e tune Enok. E Enok e tune Iared. E Iared e tune Mahalalel. E Mahalalel e tune Kainan. 38#Vuh 4:25-26E Kainan e tune Enos. E Enos e tune Set. E Set e tune Adam. E Adam e tuna Vure.
Currently Selected:
Lukas 3: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.