2 Tesalonika 2
2
A Bakovi ni Longotaro a Vinara
1Mua e huriki a turagu, ngane mete ge vakalongo mua vona e Isu Kristo a Bakovi Dagi ge hamule valai, ge gale palupu hita. Mete taki tora mua, 2nahea ge ruru a vurene mua vona a ngavana propet, a ngavane huriki ranga, a raukea ni taki ta mete herea, ri gi taki ta e Bakovi Dagi i hamule valai pali. 3#1Tim 4:1; 1Ion 2:18; 4:3Naha ni longo mai ria, a vuhuna a parava iea i uka ma ge bele tavula. I muga, e huriki ala kupo bara ri tagege, ri longotaro a nitana Vure. Muri, a bakovi ni longotaro a Vure bara i bele kavakava, ra bakovi iea bara i vurua na kanono. 4#Ese 28:2; Dan 11:36A bakovi iea bara i gegea a Vure, i gege e huriki a vure taminga lobo, ra maka maki e huriki a bakovi a ngatavine ri kavurike bala. Bara i taki e huriki ri gi kavurike ia kunana. Bara i made pololilo na roho na Vure, i taki e huriki ta ia a Vure.
5Na tahuna a made turane mua, a taki mua vona pali a ngava nga. Mu tabana ni luhoi, o i uka? 6-7A naro ni longotaro a vinara i leho kapiloho pali. Mu lohoka vona a maki i pesi karia a dalana bakovi hale. A bakovi hale iea bara i bele kavakava na parava a Vure i vulakia ge bele vona. Pali a viri i pesi karia a dalana bara i pesi kari mavonga ge harena na tahuna a Vure ge takia ge lobo. 8#Ais 11:4; Kap 19:15 Muri a bakovi ni longotaro a Vure bara i bele kavakava. Muri e Isu a Bakovi Dagi bara i valai na nipara dagi, bara i rabalakia na nipara dagi iea, ge mate. Bara i rabalakia na bangona a bakovi hale iea.
9 #
Kap 13:11-13
Na tahuna a bakovi ni longotaro a Vure i bele kavakava, bara i leho na nitora ne Satan. Bara i rata a maka nitamina nivakasiri legelege. 10Bara i rata a naro hale i kupo ni tami e huriki ri laho na dala na vuranga. Re huriki nga bara ri vurua, a vuhuna ri marikoi a ngava muholi ge korimule ria. 11I mavonga, a Vure i vakahale a niluhoi ne ria, ri gi longo mai a ngava taminga kunana. 12I mavonga kunana a Vure ge pelekado e huriki lobo i uka ma ri luhoi torea a ngava muholi, ri ngaru a naro hale.
Mu Pesi Tora
13 #
Epe 1:4; 2Tes 1:3 Mua e huriki a turagu, e Bakovi Dagi i ngaru hateka mua. Mete luhoi vakaroro mua, lakea i kamumu hateka mete ge kavurikea a Vure, a vuhuna a Vure i vulaki mua, ge korimule mua. I vulaki mua pali na tahuna i ratarike a hunu a malala. A dala i korimule mua vona i maea: Na nitora na Hanu Kiripiripi, i rata mua mu malamala na matana. Mu luhoi torea a ngava muholi. 14A Vure i ngaru mu gu made na bagetua na nitora ne Isu Kristo a Bakovi Dagi ne hita, lakea i gale palupu mua pali na Velenga Kamumu, ra mi tovo mua vona. 15I mavonga, mua e huriki a turagu, mu pesi tora. Mu muri mai a vinara mete tovo mua vona, turana vinara mete here puru na raukea.
16E Isu Kristo a Bakovi Dagi ne hita, turana e Tamane hita, ra viri i ngaru hateka hita, i rata a naro kamumu ne hita, i luke vakaroro hita, si pasimata vona a maki kamumu ge habi ne hita muri ma, 17ru gu vakatora a hatene mua, ru gu tuhori mua mu gu rata a naro kamumu, a ngava kamumu.
Currently Selected:
2 Tesalonika 2: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.