1 Korin 2
2
A Ngava na Kai Tavalavala
1Mua e huriki a turagu, hosi na tahuna a bele ne mua, a vara mua na nitana Vure, i uka ma a vakaholi, ga vara mua na maka ngava na lohokanga dagi. 2Na tahuna a made turane mua, a koi ni tovo mua na ngava legelege. A ngaru ni tovo kunana mua na ngava ne Isu Kristo, i mate na kai tavalavala. 3#Apo 18:9; 2Ko 10:1Na tahuna a made turane mua, a uka a kinigaonga. A mangenge, i vakulu a tagagu. 4#1Tes 1:5A nitagu, a ngavagu i uka ma a ngava moro moro ga lalu mua vona. Pali na tahuna a vara mua, a nitora na Hanuna Vure i vakasiri i muholi a nitagu. 5I bele mavonga, i uka ma mu gu luhoi tora na na lohokanga na malala. Mu gu luhoi tora na nitora na Vure.
A Lohokanga na Vure
6Pali e huriki ri koru rike pali ni luhoi torea e Kristo, iau a vara ria na lohokanga. Pali a lohokanga a vara ria vona i uka ma a lohokanga na malala, i uka ma a lohokanga ne huriki a bakovi dagi na malala, re huriki ri gi mate. 7A lohokanga a vara ria vona, a lohokanga kapiloho na Vure. A lohokanga iea, a Vure i luhoi purua muga na maki lobo ni ratarike, ge vakabagetu hita vona. 8E huriki a matakari na malala, i uka tara viri ge matakilaka vona a ngava iea. Bara ri matakilaka vona, i uka ma ri gi paditatea na kai tavalavala e Bakovi Dagi, ra i bagetu hateka. 9#Ais 64:4Ni here hosi maea,
“I uka tara viri ge matai,
i uka tara viri ge longo,
i uka tara viri ge longo visi na hatena
a maka bagetua kamumu a Vure i kado puru, ge habi ne huriki ri ngaru hatekea.”
10Pali ngane a bagetua kamumu nga, a Vure i vakasiri ne hita na limana Hanuna, a vuhuna a Hanuna Vure i matai kado kamumu a maki lobo. I mavonga kunana, a niluhoi kapiloho na Vure, a Hanuna i lohoka kamumu vona.
11uka tara viri ge lohoka vona a niluhoi na viri tara. A hanuna bakovi iea, ra i made pololilo vona kunana, i lohoka vona. I mavonga kunana a niluhoi na Vure. A Hanuna Vure kunana i lohoka na niluhoi na Vure. 12A Vure i habi ne hita a Hanuna. I mavonga, i uka ma si luhoi manga e huriki na malala ri luhoi. Na naro iea, si matakilala a maka maki a Vure i habi tavula ne hita. 13Si vakalongo e huriki vona a maki nga a Vure i habi tavula ne hita. Si vakalongo, i uka ma si ta na ngava na lohokanga na malala. Si ta na ngava i habi ne hita a Hanuna Vure. Si tuveve polo ne huriki a tara na Vure a pelegona ngava na Vure.
14E huriki a bakovi i uka ma i tabuli ne ria a Hanuna Vure i uka ma ri luhoi tora a nitovo na Hanuna Vure. A nitovo nga, ri luhoi ta a ngava manga manga. I uka ma ri longokilala, a vuhuna a ngava nga, bara i longokilala kunana e huriki a Hanu Kiripiripi i tabuli pololilo ne ria. 15A viri i tahoka a Hanu Kiripiripi bara i luhoi kado a maki lobo. Pali i uka tara viri ge kara ni pelekado a narona. 16#Ais 40:13I manga a ngava ni here hosi, i maea,
“E rei ge lohoka na niluhoi na Bakovi Dagi, ge tovoa?”
Pali hita, si lohoka vona a niluhoi ne Kristo.
Currently Selected:
1 Korin 2: bnp
Highlight
Share
Copy
Want to have your highlights saved across all your devices? Sign up or sign in
© 2011 Wycliffe Bible Translators, Inc. All rights reserved.