Mateus 24
24
Hoyakalupji Kopalaxikowakapa Piranapni
1Waneya Hoyakalupji ruchpajinixka Jesus, rasruklene hekhitlu Hoyakalupjikaka.
2Seyni Jesus wla tshinatkana:
— Hetluhe xyepjikaka? Halikaka ntshinhi, ptowruka hetleru hkoptalhako hi satukna sotlu hwahohokakanu.
Salewaktshi Yinuwakle Piranapni
3Waneya Jesus Oliveiras mriji tuplaxini, rasruklene yanwakatlu wannapkani. Waneya repomhatkaluna Jesus, wla htshinna:
— Kasruklewakleru, hikluhe wan-rixanu? Klunerhe rakaxrikletanu rekhixyawakaplu xye ptowru potuko hakanhapiraxinpatka? Hanhe wixa himatletanru punyawaka xye tshijne nikawnini hohnepatka?
4Waneya Jesus hihitna, wla htshina:
— Xakoka hike yokwijetanhi.
5Klu tshinanu hixo hiphujewnanu hita hiwakaya wla tshinatshripa, “Hita Cristo-no” waneya hixolune hyokwijetanna.
6Hjeminiplu hiylakaklu ho pa tshijnekaka yahotkakle pirana hi hpikanu. Klu tshinanu xye ptowruko hakanhanu seyni hi hnikawnalepnitshi.
7Pa neruymako hyahotkakanu satu neruko. Pa tshijneko yahotanru satupni. Natshipni. Hixo poktshi hiyolikanu.
8Xyekaka mturu tshino yinuwakle pixkalutni.
9— Seyni xye ptowruka hnapu, hsalewnakakko, hiylatko, ptowru tshijne hajene hahnanutanhi hita tshinanu.
10Waneklu papkopa hixolune yine hiknoka halixletanu, yine kamnikakanu, rahkakakanna,
11Hoyakalu tokanu hinkakletatshine yahole hakanhanu, hixolune yine hyokwijetanna.
12Hektutu kkamhaklerune hixolewniywaka tshinanu, yine hituk-hamotkakletanu.
13Seyni poyehitahchinikanutatshri haté hmahle papko, riwekanu.
14Hiyrun-koxa kihle piranalu potuko Hoyakalu pohirewaxyawaka pirana psol-tshijneko hpohixika, pa nerkaka himaxyawakaplu waneya waneklupatkani xye tshijne nikawninripatka.
Tsru Salewaktshi Piranapni
15— Hixa hexinixkalu Hoyakalupji hahnanutkaluru himtukpotlewatatshri, Hoyakalu tokanu hinkakletatshrini Daniel-ni tshinyawaka, hixa himathethatatshinhi xako himatjemanru.
16Waneyakni katukta Judeia hwanu, rasukanu, hipjita hyanu.
17Katukta teno pantshi hohowaka hwanu, hi hserpikanu rejnunkate pantshi hajeru rawapyawakapa.
18Campo hwatshri koxa hi satkapanu himkalu rawapyawaka.
19Hi pa himtukalutu retanna suxone kamchirone waneklu hohnepa, hiyrun-koxa hachiwhenetatshinepni!
20Hoyakalu hanjitanu hapnanuxikalur-hohne ho katshikleru papkolu hma makanhiywakanupa xyekaka.
21Klu tshinanu tshiji rawanu salewaktshi tsrupotpákolu. Hikeklu hohne wane pixkalutu salewaktshi rawapa xye tshijne yinuwajikolukananuko haté xawakni hiyrun-koxa wane pixkalutu salewaktshi hikeklu hohne hakanhanutnaka.
22Seyni Hoyakalu hma masatkanumkalu salewnikolu papkopa, hikemka hiwekanu. Seyni Hoyakalu nuretanune tshinanu, hmasatanru salewaktshiklu papkopa.
23Waneya waneklu papkopa yineru wane htshinini: “Haha hetanru Messias!”, ho wane htshinini: “Hawlalu! ” — hi halixanru.
24Klu tshinanu hixolune Messias minjene hiyrun-koxa Hoyakalu tokanu hinkakletatshine minjene hakanhanu hiyakolukaka hiyrunu himyekaklewatatshri kamhatshine hyokwijexyawakapna yine. Rumukatkamka haté Hoyakalu nurrene hyokwijetanu.
25Hichinikanru xye, wane ntshinhi ptowru potuka hmuphujewnaknukawa.
26— Hiyáhoni satu wla tshininiphi: “Hawlalu, potshkewaka rawa” — hi wane hyanu. Ho satu wla tshininiphi: “Hewitkalu, hitoko hruko rawa” — hi halixanru.
27Klu tshinanu rawrakle pixka rixanu, pa sreta hyinuwaka hawraklexini haté pa sreta hohne rapokhawrakletsatanu. Waneko pixka rixanu Jeji Whene tshinkaluru hapojinri hohnepa.
28— Hanukta rawamanetanuna hipnatshripni wane rapatjexinna maylune.
Jeji Whene Hininri Hohnepa Piranapni
29— Xye hohne hajeru salewaktshi nikawninipa, waneklutka rutshpokanu tkatshi, hi katalupni ksuru, katahirine tenhohne hijrujini, hiyrun-koxa tenhohne hajerkaka hiyolikkako.
30Hiyáhoni tenhohne Jeji Whene himaxikolepa hakanhini waneya psol-tshijne nerkaka htshiyahatanna kaheknanuwlu tshinanu. Waneya Jeji Whene retanna, hohimkohi rapojini royaknuyma tsru pixkonuyma koxa.
31Kowi hima hajpokoklunpatka Hoyakalu yokanatanna htowrene hiwejikalune tenhohne hajene ptowru sretako rapatjexyawakapna Hoyakalu nurrene ptowru sreta tshijne hichpajikatshine.
Figueira Piranapni
32— Xawakni himatanru xye yapkaklu pirana figueira pirana: Hyinuwaka hiptsheklesurexinixka hiyrun-koxa rerotewapluxinixka, himatlu hi howukatkalu mhalu.
33Wane koxa rixanu, hexinpatkalu xyekaka himatanutka hi howukatkalu rakanhiywakapa Hoyakalu pohirewaxyawaka hatatjewa hiphaptostsitkalu.
34Halikaka wane ntshinhi, xyekaka wan-hixa hiphujewnaletanu hmupnaknuhnapukawna xawakni mupnakanewa.
35Tenhohne, tshij-koxa nikawnanu seyni ntokanu hikeklu nikawnanu.
36— Hike himatlu wale hohne hi hipapkoluko rakanhiywakapa xyekaka. Hiwejikalune Hoyakalu towrene tenhohne hajene hi himatlu, hi Whentshiko himatlu seyni Hirtshi tsonupka himatlu.
37Noé-klu papko pixka rixanu Jeji Whene tshinkaluru hapojinri papkopa.
38Klu tshinanu ptowrunniko yinni hniknina, rurnina, hhanunrowatnina, hhanuruwatnina, Noé-ni tsro kanawatlo jihlojinriklu potukananuko;
39hi hkahwaknina hahyekachalu seyni runatka hahyekachalu, ptowrunnika yinni hnikata. Waneko pixka rixanu Jeji Whene hapojinri papkopa.
40Waneya hepi jejine campo hwatshinepni, satu hanikko, satupni hiknokamtkona.
41Hiyrun-koxa hepi suxone trigo-ji yojitatshinepa, sato hanikko, satopni hiknokamtkona.
42Hiyáhoni hislahinri klu tshinanu hixa hi himatlu Hitsrukate hapojinri hohnepa.
43Himatjemanru xye: kapjiru himatahnaputkamkalu katshowhuru, ruslahapjitanumkatka himka retachatanru hipji hyotpujyawakapa.
44Hiyáhoni hkakonjetanu xako klu tshinanu Jeji Whene tshinkaluru hinanu hma kakonuxinri papko.
Hepi Hixatshine Towrertshine Piranapni
45— Katnihe towrertshi ptowutkolu, kahchinikanuru? Waleni towrertshi rutakko htowutjerupji rinoxyawakapa hiyrunu pimrine towrertshine reneka niklexyawakapa niklu papkokaka.
46Hihlewahchinikanyehitkalurni wale towrertshi htowutjeru hininipa retamtlu wan-rixa kamrurekanata.
47Halikaka wane ntshinhi, wan-hixatshri towrertshi rutakko ptowruka htowutjeru himwaleru htowuxyawakapa.
48Seyni towrertshi wla htshinahchinikanuxini rajiya: “Ha hohamokpotukananutkalu ntowutjeru.”
49Waneya hyinuwaka hiylakletna towrertshine. Hiyrun-koxa hnika, rura, jimekleruneyma.
50Hiyáhoni towrertshi towutjeru hma kahwajinitu hohne runanu. Hma malpokoxinutu hohne runanu.
51Htowutjeru hapnokatpotutanru towrertshipni. Waneya tsru tshiyahlu hiyrunu haskiyhiru yehi ruknokkona Hoyakalu halixatshine hixachatatshineyma.
Currently Selected:
Mateus 24: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
