Mateus 18
18
Kat-pothe Hijhakaluru Hoyakalu Pohirewaxyawakaya Piranapni
1Waneklu papko Jesus hasruklene yanwakatlu Jesus, waneya repomhaluna, wla htshinna:
— Katnihe hijhakalur-potu tenhohne pohirewaxyawaka tshinanu?
2Waneya satu mturu hkachita Jesus, hyopkakkaklu wanna hanikajite.
3Waneya wla htshina:
— Halikaka ntshinhi, mturune pixka hma mixkanuklunu, hikeklu hohne tenhohne pohirewaxyawaka hjihlokanu.
4Hiyáhoni katukta mujhakotu hikahwajnawa xye mturu pixka, walekni hijhakalur-potu tenhohne pohirewaxyawakaya.
5Hiyrun-koxa katukta hihle yoptoletlu xye mturu nhiwaka tshinanu hit-koxa hyoptotanu.
Himtuwna Halixlekakatshri Piranapni
6— Seyni katukta himtuwna halixlekakna nalixjene mtserkakanewa, kihlepotmaklu tsru sotlu rostunojixikowaka waneya mar powha ruknojikowaka.
7Hektupotna rixje yine xye tshijne hajene hektuwkakatshine. Hi rumukata himaletkota hitspetkalurukaka. Seyni hektumkalu wale yineru kojwakahchinikanrewatatshri!
8Pimyo ho pijixi tshinanu pumtuwnini, pkastakanru, puknokanru. Klu tshinanu kihlepotmaklu mtsoji ho myape hiwekkakko, hepi myolu ho hepi jixiru tshitshmero hikeklu hohne mnikawnakatupa hiknokko.
9Hiyrun-koxa piyhale tshinanu pumtuwnini, pkochpakanru, puknokanru. Klu tshinanu kihlepotmaklu pa yhalepkalutu hiwekkajikowaka, hepi yhaleru tshitshmero hiknokko.
Ovelha Pupjetatshro Piranapni
10— Xako hi heyikanru satu nyi mturune klu tshinanu wane ntshinhi, hiwejikalune Hoyakalu towrene tenhohne hajene wanna tshinanu psol-hohneko rethojitluna Nuru tenhohne hajeru.
11[Klu tshinanu Jeji Whene xye tshijne hinatka riwekkajyawakaplu pupjetatshri.]
12— Klu hkahwaka hixa? Satu jeji cem ovelha rimwini seyni sato ramtajini, hi he pimri hiprane noventa e nove, ruknokamtanu kahnete poktshi rujhapyawakaplo pupjetatshro?
13Waneya rukchijiniplo ovelha hamhakanatatshro, hpoyikowpotuta. Halikaka ntshinhi, wale himuwpotuta wala hamhakanatatshro tshinanu, pimri hiprane noventa e nove mamhakane pnute rukchijyawaklo tshinanu.
14Waneko pixka rix-koxa Hirtshi tenhohne hajeru, hi raluklu satu mturu hamhiywaka.
Hanu Rixa Hepixletka Moletkakatshri Hektuntshi Hwaleru
15— Satu pimole himtuwnayehixinipyi, pyanwakatanru pekhixyawakaplu rektunu. Seyni pixa tsonu wane yanu hiyáhoni hixapkapatkani, wale hiyrunu pixa. Waneya hyijnakoxinipyi, pukchikmoletatka psatkaklu pimole.
16Seyni hma yijnakotkanuklunupyi, waneya ho satu ho hepi yineru pixayma panikanu, pkamhiywakaplu Hoyakalu tokanu tshinyawaka, wla tshinatshri: “Hepi ho mapa yine hektutu hiphujetatshine tokanu hpoyehixika ptowru piranako.”
17Seyni hma yijnakotkanuklunupna wanna koxa, punkakanna hapatjetatshine. Hapatjetatshin-koxa hi hyijnakoxini waneya judeu mixkatu ho jijhawenrukleru pixka pikahwakanru.
18Halikakni ntshinhi:
— Klunerukta pimaletanu xye tshijneya, Hoyakalu himaletanru tenhohneya. Hiyrun-koxa klunerukta pitshitanu xye tshijneya, Hoyakalu hitshitanru tenhohneya.
19— Hiyrun-koxa wane ntshinhi: Yáholu hepi yineru xye tshijne hajenhi pa hchinikanurune hixa hanjirexinru, Nuru tenhohne hajeru kamhanru hixa tshinanu.
20Klu tshinanu hanukta rapatjexyana hepi ho pnute yine nhiwaka tshinanu, wane koxno Hita.
Hi Pejnu Kata Nujhalu Namtakahchinikanuxyawakanru Nomole Piranapni
21Waneya Pedro yanwakatlu Jesus repomhiywaklu, wla htshinru:
— Tsru Hixikatshriwa, hi pejnu kathe namtakahchinikanyehitanru nomole hita nwaka hektutu kamhatshri? Haté sete katlahe namtakahchinikanyehixinri?
22Jesus hihitlu, wla htshinru:
— Wane ntshinyi, hi sete katapka tsonu pamtakahchinikanyehixinri seyni setenta kata sete kata pamtakahchinikanyehixinri.
Hepi Towrertshine Deve-tatshine Piranapni
23Klu tshinanu tenhohne pohirewaxyawaka satu phuru pixka rixa, conta-kaka haluk-hihleretatshri.
24Waneya mitshikananhapka, satu htowreru hix-potuko proji deve-tatshri phuru nwaka ranikka.
25Hma mumukata wenutlexyawaklu tshinanu, phuru hichankakjixlu deve-tatshri ptowru rimwaleru haté jeji ruchanjiynawakwa, hhanunro hiyrunu hiwhen-koxa ruchankakjixlu rumukata wenutlexyawaklu h-deve-leru.
26Waneya deve-tatshri yoptsojitamta wale sreta, hipokananu ranjitlu, wla htshinru: “Pkahwakayakatanutshi, pa hohne psoluka n-deve-leru nwenutanyi.”
27— Hiyáhoni phuru hetwamonutatkalu, ruchya-conta-tetlu, waneya ruchotatkalu.
28Seyni ruchpajini wale jeji, hyoptotlu satu kamrurtshi repirexinri. Wale jeji hi hixo proji deve-tlu. Wanepnawaka hkachiplatanru, hkowchiwjitlu, waneya hwenutjixlu wla htshinru: “Pwenutanno p-deve-xyano!”
29— Waneya deve-tatshri yoptsojityehitlu, hipokananu ranjitlu, wla htshinru: “Pkahwakayakatanutshi, pa hohne psoluka n-deve-leru nwenutanyi.”
30— Seyni hi raluka wan-hixleta. Hiyáhoni hyatka, preso rutakjixlu haté rumukata wenutletlu h-deve-leru psoluka.
31Seyni pimrine towretshine hexiniklunru, rimyekahchinikanutna. Waneya phuru nwaka hyatkana psoluka runkaklexyawakapna.
32Waneya phuru tomhalu towrertshi h-deve-tjeru, wla htshinru: “Hektutu kamhatshriyi! Hipokananu panjixyawakno tshinanu p-deve-leru psoluka nuchyata.
33Hi he pix-koxa hijhalu petwamonuxyawaklu p-deve-tjeru hita pixka?”
34— Hiyáhoni phuru jihekanuwpotuta. Preso rutakjixlu hsaletpotuxyawakapluna haté rumukata wenutletlu h-deve-leru psoluka.
35Waneko pixka rixanu Nuru tenhohne hajeru himole hektunu hma mamtakahchinikanyehitkanuklunupa halikaka.
Currently Selected:
Mateus 18: mpdBiblia
Highlight
Share
Copy
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
