Efésios 1
1
1Hita, Paulo-no, Jesus Cristo nurrerno, Hoyakalu halujyawakako tshinanu, nyonatlo twu yonawahlo, Hoyakalu hayinetene tshinanu. Hixa Éfeso hajenhi, Cristo Jesus munanhahohnekanatatshinhi tshinanu nyonatlo.
2Hoyakalu henekachale hihlenu yoptotatshinephi, kihlehchinikanurunephi Wuru Hoyakaluya hiyrunu Wutsrukate Jesus Cristo tshinanuya.
Jesus Cristo Tshinanu Wimwaleru Wiwejinri Piranapni
3Himalwutkalurni Wutsrukate Jesus Cristo Hoyakalute, himalwutkalurni Wutsrukate Jesus Cristo Hiru. Hoyakalu honra ptowru hixatshri kihleru wiwejinri tshinanupa tenhohne hwatshri heneklewatatshri, hixa Cristo-ymalunwu tshinanu.
4Wan-rixa Hoyakalu. Xye tshiji hmuyakotkanuklunuwa hnuretlu Cristo himwatshinepwu wixyawaka. Hnuretna, yine potukalune rixyawakapna hike mixkanepni Hoyakalu yhaleya, klu tshinanu ruchinikwu Hoyakalu.
5Xye tshiji hiyakotkoklunu pnutekananuko Hoyakalu nurehchinikanuxnawa wale hiturune rixkajyawakapwu Jesus Cristo-ya, walenuko wixyawakapa. Wan-rixa klu tshinanu Hoyakalu haluklu wan-rixahchinikanuxyawaka.
6Wimalwutanru Hoyakalu renekachale renejya tshinanwu. Ruhlenu renekachale tsru potuko hixa nwaka ruchinikanrexinri wan-rixachata wuchinikanretjeru Jesus tshinanu.
7Wuchinikanretjeru Jesus hiwekkakwu waleko hihraha tshinanu rupnale tshinanu. Rupnale hiknokatkalu wektunu, Hoyakalu hihlenu henekachale tsrur-potuko tshinanu.
8Hi psokananru himatkalewlu hiyrun-koxa rimatjemle renekanru hixa tshinanu.
9Rimatkakwu Hoyakalu hihchinikanu pirana, mitshikananu yohimakanatkaluru pirana. Waleko ralujyawaka tshinanu wan-rixa klu tshinanu wan-rixahchinikanuta Hoyakalu, Cristo-yma kamrurewatatshrini.
10Rapokpapkoluxinixka Hoyakalu heneklu Cristo htowuxyawakaplu ptowru potuko. Ptowru potuko tenhohne hwatshri hiyrun-koxa ptowru potuko tshiji hwatshri htowuxyawakapa.
11Hoyakalu ptowru potuko rixahchinikanuxyawaka kamhatshrini. Hiyáhoni Cristo-ymalunwu wixyawaka tshinanu wnuretka, xye tshiji hiyakotkoklunu pnutekananuko, Hoyakalu halujyawaka tshinanu, Hoyakalunerune wixyawakapa.
12Hiyáhoni hixa mitshikananu Cristo halixatshinwu himalwutanru Hoyakalu ruhlenu tsrur-potuko tshinanu.
13Wale tshinanu hix-koxa halikak-potukananu tokantshi yijnakotatshinhi, munanhatkalu Cristo, kihle piranalu potuko hiwekkaklewatatshri pirana yijnakotatshinhi. Waneya hixa halixatshinhi rutakamta rimaxikolu Hoyakalu waleko Hiwejikaluru, runkakletleru.
14Hoyakalu Hiwejikaluru renekna rayinetene hmunanhiynawa ptowru potuko Hoyakalu hinkakletakanatanru hyoptoxyawakapna rayinetene, haté wali yoptoletanru psol-potuko wyoptotanrupa. Hiyáhoni rimalwutko Hoyakalu hiyrunu rimathetko ruhlenu.
Paulo Hanjihohneyehitna Cristo Halixatshine Twu Yonawahlo Yoptotatshinepa Piranapni
15Wale tshinan-koxa hixa Wutsrukate Jesus halixyawaka njempiranyehita hiyrun-koxa hixa pimrine potukalune Cristo halixatshine hichinijyawaka pirana njemini,
16hi nutuk-poyahnutletlu Hoyakalu hixa tshinanu. Nanjihohnexini nuchinikhi nanjihohneyehjexyawakhi.
17Nanjijetlu Wutsrukate Jesus Cristo Hoyakalute, waleni Hirtshi ptowru potuko royaknu, renejyawakaphi himatkaltshi Hoyakalu Hiwejikaluru henekanwu hiphujetlewatatshri rimathexikolupa halikakalutu pirana Hoyakalu yehiya.
18Hoyakalu nanjijeta hkotpukahchinikanuxyawakaphi waneya hixa himukata himatletlu hma mahijeruxyawakanupa Hoyakalu nurexyawakhi tshinanupa. Hiyrun-koxa himaxyawakaplu hi psokananru wyoptotanrupa wiwejinri pirana halixatshine tshinanu, potukalune Jesus halixatshine tshinanupa.
19Hiyrun-koxa wimaxyawakaplu hi psokananru hpixkonu, wmixkotjeru, hixa Cristo halixatshinwu hwatshinetkawu tshinanu. Wan-rixa kamrureta Hoyakalu hpixkonuyma.
20Hoyakalu hekhitlu hpixkonu Cristo hipuktshi riwekkajinixkalu waneya Hoyakalu hituplatlu Jesus hpotukle sreta tenhohne hpixkonuyma.
21Ten-hajene ptowruneko tsrukakalune pnute, tsru hitakkalurkaka pnute, ptowru hixkolkaka pnute tsru potni wale, Jesus Cristo. Hi xye hohnepka ptowru potuka yokanatatshripni seyni ptowru hinatshri hohnepa koxa pnuterutni Jesus Cristo.
22Hiyrun-koxa Hoyakalu hitaklu Cristo ptowru potuko towutatshri rixyawaka hiyrun-koxa reneklu Cristo ptowru potuko Cristo halixatshine hapatjetatshine tskala hwatshri rutsrukateknin-wale.
23Cristo halixatshine hapatjetatshine Cristo mane yaholukni wanna. Satkaka halixatshri Cristo mane psojitekni wale. Cristo-ni ptowru potuko nikat-kamruretatshri psol-potuko.
Currently Selected:
Efésios 1: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
