1 Tessalonicenses 3
3
Paulo, Timóteo Yokanaxinri Piranapni
1Hiyáhoni hi pnute wakotatka hix-yehi wyiywaka wujhahchinikanuta hixapka Atenas poktshi wutujyawakapa.
2Waneya Cristo tshinanu wmoletanru, Timóteo tshinkaluru, wyokanatatka. Wale Hoyakalu kamrure kamhajetatshrini, wikamrurewatanruni, kihle piranalu potuko hiwekkaklewatatshri pirana, Cristo pirana hinkaklewlu tshinanu. Wyokanatlu hpoyahokajyawakaphi hiyrun-koxa repixyawakaphi halixle pirana tshinanuya.
3Hi satukna yineru himaletkotka halixlu piranaya xye salewaktshikaka tshinanuya. Klu tshinanu hix-potuko himatlu xye salewaktshikaka Hoyakalu hitshrerni hixa tshinanu.
4Klu tshinanu hix-yehi wwakanaxini, wunkakatkahi waneyapwu salewaktshi, xawakni wakanhayehitjeru salewaktshi pixkalutu. Hiyrunu hixa himatlu wane potuko rixatka.
5Hiyáhoni wale tshinanu nmakotahchinikanutkan-tshinanu Timóteo nyokananwakathi hixa halixle pirana nimatyehixyawakapa. Nimaxyawakaplu ho kamtshi kyahtalewakleru yahtaletatkahi xawaka ho wmahijeru kamrurewletatkahe hixa tshinanu.
6Seyni xawakni hix-yehi ruchpajyatka Timóteo waneya hewi rapokatka. Runkakwu hixa pirana, kihler-pirana halixlewle pirana hichiniklewle pirana. Runkakwu hixa hichinikpotuxyawakwu pirana. Hix-hima hi hituk-hichinikletwu. Hixa haluk-hetlepotutwu, hixa waluk-hetlexyawakhi pixka.
7Hiyáhoni Cristo tshinanu wmoletanune hixa halixle pirana tshinanu wuhlehchinikankakatka ptowruka wsalewakluya hiyrun-koxa wkojwakahchinikanuxinriya.
8Xawakni halikaka wiweka Tsru Hixikatshriwa Cristo poyehiwa halixlekajyawakhi pirana tshinanu.
9Hiyáhoni xawakni wpoyahnutlu Hoyakalu wane pnutetka hixa tshinanuya. Wpoyahnuwata wpoyikowle wyoptoleru Hoyakaluya hixa tshinanuya.
10Ptowru hohneruka hohohne, hoyetshno koxa wanjipotutlu Hoyakalu wumukata hetlepotuxyawakhi wtseruxyawakaplu halixle hmahaxinri.
Paulo Tessalônica Hajene Ranjihohneyehixyawaka Piranapni
11Wanjitlu wuru Hoyakalu hiyrun-koxa Wutsrukate Jesus hkosekhapoxyawakwu wapkapyehixyawakaphi.
12Wanjitkoxlu Tsru Hixikatshriwa Hoyakalu htseruwnakajyawakhi hichiniklewlu piranaya. Hixkakluko hichinikkajinripa hiyrun-koxa pimrine ptowruneka hichinikpotuxinripa. Hixa wuchinijyawakhi pixka hixanna pimrine.
13Waneypakni hmixkotahchinikanutanhi potukalune hixyawakapa, mukolukanuwnakanephi Wuru Hoyakalu hetanu, runinipa Wutsrukate Jesus ptowruneka hpotukatanuneymakananuko.
Currently Selected:
1 Tessalonicenses 3: mpdBiblia
Highlight
Copy
Compare
Share
Want to have your highlights saved across all your devices? Sign up or sign in
NT
Primeira edição 2008
©Missão Novas Tribos, Sanford, FL
Gênesis
ISBN 978-85-98634-82-1
ISBN Digital 978-65-993898-6-3
©2017 Missão Novas Tribos do Brasil
