Rut 1
1
So Elimelec chaqai saua llaalqa co'na' neesa'ñi yi Moab
1-2Quesaua ñaxari co'na' so llaalqaipi so Israel qareloqota'a quena nashillipi quená'maq ishit imit ca nasauaxaset, ca 'uo' so na'xa'a quiyim 'uo' so nqopaaxa lodegaxat quesá'ogue so qoyintalec 'laua. Ca 'uo' so ỹale na'ñi yi Belén, yi'maxare huaugui yi 'laua Judá. So ỹale leenaxato' Elimelec, (loqo'm ñi qota'olec caỹim, nashi), so'maxare quepegue' quiyim cocho'qui' na'ñi yi liỹa 'laua leenaxat Moab, liỹaaterec aso loua Noemí (loqo'm maqachaqai) chaqai saua dos llaalqa Mahlón (loqo'm ne'ne') chaqai so Quelión (loqo'm ralolaxauaic). Ca saua'que nera'ñi yi Efrata, da liỹa leenaxat Belén. Ỹovijta yi Moab, ca' chaqaiyi nera'ñi.
3Qam 'uo' so na'xa'a, ca' ileu so Elimelec só'maq loua aso Noemí. Ca aso'maxare no'ueena'guita saua dos llaalqa. 4Ca saua'maxare co'na' mashic qo'xoiqa, ca' o'ñiguita saua 'aalo nera'ñi yi Moab. Aso 'óna quesaua'maxare leenaxato' Orfa (loqo'm pil), ca' aso liỹa leenaxat Rut (loqo'm nqo'itqate). Qam co'na' ỹovirerec saua diez ñaxari, 5ca qai'neete' ileue' saua Mahlón chaqai so Quelión. Co'na'le, ca' aso Noemí nodaguiñi, qaica ca loua chaqai qaicaua caua llaalqa.
Aso Noemí chaqai aso Rut taategue da Belén
6Ca 'uo' so na'xa'a na' ñaqai neesa'ñi yi Moab, ca' aso Noemí 'qaateguelec quiyim ñi qara'gaxala' 'uo' da le'xorenataxanaxa quesó'maq lalamaxareteripi, ca' qaica nqai'en so nqopaaxa. 7Ca aso'maxare 'uo' da la'deenataxanaxac quiyim pila yi 'laua Judá, ca liỹareterec saua latel, quere'e yi 'laua neesalec. 8Qam co'na' mashic queesa'gue so nayic, ca 'naaco' quesaua latel:
—Mohi, pilliu'alo caua la'aate' caua qachi'illii. Ca' ñi qara'gaxala' ñaqai queeta da lqouagaxa caqamiri, 'nejem dá'maq 'ñiita'guelo qomi' qare'xoriñii chaqai yaua ỹaalqa, 9chaqai quiyim ỹa'maxarenta quiyim liỹa o'ñii, ca' ra'maxaichiguiñi queca ra'aari.
Ime, ca' aso Noemí niquinto, nqo'goxoguita. Qam na'le, ca' noỹene' saua'maxare. 10Ca 'neraco':
—¡'E'! ¡Qomi' sahoqotaque qolaxague qami' quecá'maq 'laua pillita!
11Ca' so Noemí lotqai 'naaco':
—¡Pilliuo quet, qamiri ỹaalole! ¿Negue' quet cá'maq 'neeta quiyim viitaque quiigue aỹim? Ma' ỹim nagui, ca' tot qaica ca ỹaalec quiyim o'ñiiguita quet qamiri. 12Mohi, pilliu'alo caua ra'aachiri. Ma' mashic ỹim qo'xoỹom quiyim liỹa quet so'on. Ca 'enquetqai 'ue ca ñaquitaxac quiyim quenajo pe so'on, ca' quiyim 'ue ca liỹa ỹaalec, 13ca' ¿lotqai qamiri nauaañii'alo quet quiyim ỹi', ca' o'ñiiguita caua'maxare? Ca vire'ta queta' sqo'ñii nauaañita'alo. 'E', qamiri ỹaalole, qaica ma' 'neeta quet dajo. Ñi qara'gaxala' ỹo'uet da i'xoric lodegaxat, qam paguec quet ca i'xoric quiyim sa'ajantac ca re'xoriguii qamiri.
14Ca saua'maxare lotqai liỹa noỹene', vire'ta na' aso Orfa niquine'e' aso ni'ỹoqoro, ca qo'goq. Qam aso Rut no'ueenañi caso Noemí. 15Co'na'le, ca' aso Noemí 'naaco' caso'maxare:
—'Ajñi', aso ro'naxaua'e' pil, pila ca la'a' quiyi 'laua chaqai na nqolaquipi quiyi'maxare. Mo'e', quitegue, pillira'a ca ra'aachi'.
16Qam aso Rut 'naaco' caso'maxare:
—¡Se yashiila'e' quiyim salachi' chaqai quiyim ñoỹootec caqami'! Ma' ỹim cá'maq 'itegue saigue, chaqai cá'maq ñira'ñi sena'ñi. Ca iuo' cá'maq qauochi' laseripi, chaqai ca qota'olec caqami' chaqaica cá'maq qota'olec caỹim. 17Yileua'ño' cá'maq relauqachi', ca' chaqaica cá'maq sahotaque qayishina'ñi. ¡Ca' ñi qara'gaxala' ỹaatqajam se ỹala'gue quiyim ỹa'ue ca ñouaxanaxaset quiyim shique'e qami', ca' chi ñoỹooteteco' caqami' ma' chi yileu!
18Ca' aso Noemí co'na' retan aso Rut quiyim qaica nemaq quiyim ỹahotaque quegue, ca' ỹaxanñi tot qaica ca 'naapega. 19Ca' quiyi, ca niỹareta'pe saua'maxare, queesa'gue so nayic, chi ỹoviresau'a yi Belén.
Ca co'na' ỹovirero quiyi Belén, ca' ỹaatqajam 'xoic da le'laxa so qomyipi na'ñi yi na'a'. 'Naaco' quen na 'aallipi:
—¿Mesqano' anajo ana Noemí?
20Qam aso'maxare 'naaco' quen queso qomyipi:
—Sqai 'ñiỹac quiyim aỹim maqachaqai. 'Ñiỹaco' quiyim aỹim chicoxoi, ma' ñí'maq qota'olec ñí'maq sqaica ca qalanac 'xoic nqai'en da ỹachicoxo. 21Na' shique'e najo ỹaatqajam no'qaachiguilo naua ñapoquenal, qam nagui yapil, ca' co'chiichiguilo, ma' ñi qara'gaxala' chaqai 'negue dá'maq shinta. Ca' ¿chi'negue ma' 'ñiỹac ỹim maqachaqai? Ma' ñi qara'gaxala' ñí'maq sqaica ca qalanac ỹa'ue da ñouaxanaxaset chaqai da ỹachicoxo.
22Ca chaqaido' da 'neeta da lopilaxac aso Noemí, chicqota'gue da Moab, liỹaatac aso Rut asó'maq late, lase yi Moab. Ỹovite' quiyi Belén co'na' taañi quiyim qanaqat ana la na nanecse, leenaxat cebada.
Currently Selected:
Rut 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.