Juan 21
21
So Jesús nachaxanalo saua siete lapaxaguinatqa
1Ca co'na' ime dajo, ca so Jesús lotqai liỹa nachaxanalo saua lapaxaguinatqa hua'ñi yi lahi aso latogot late'ogue' hua'ñi yi Tiberias. Ca dá'maq 'neeto' na' nachaxanalo, 'neetasa': 2Saua'maxare lapoota'ta' saua Simón Pedro, Tomás só'maq qaỹamata'gue huaayo'lec, Natanael só'maq na'ño' yi Caná huaugui yi Galilea, chaqai saua llaalqa so Zebedeo, chaqai saua liỹa' dos lapaxaguinatqa so Jesús. 3Ca' so Simón Pedro 'naaco' quesaua'maxare:
—Ỹim ashic, soqoinaxan nallin.
Ca saua'maxare 'neraco':
—Qomi' qai'neeta qami' qariỹa.
Ca' que' renojonyigui aso qom lahi' huaxaỹaqse. Qam queso pe qaica ca laleguecsegue'. 4Ca co'na' mashic richiguiñi, ca nachaxano' so Jesús hueeto'ot so lemanaxa, qam so lapaxaguinatqaipi se ỹa'den quiyim chaqaiso' so'maxare. 5Ca so'maxare 'naaco' quesaua'maxare:
—Ñaaqaipi, ¿meca roqoiñicshiguii?
Ca saua'maxare 'neraco':
—Qaica.
6Ca' so Jesús 'naaco' quesaua'maxare:
—Naxaigue na loic ana rahiri na ralliguiguii, qaiyi 'ue ca ralliguicshiguii.
Ca chaqaida 'netetegue. Ime, ca' se ishite' quiyim naviquishiguim so naleguec quiyi huaxaỹaq, ma' mashic ỹapaguelec so hueetagui nallin. 7Ca só'maq napaxaguinatec só'maq paguec lqo'itaxat so Jesús, 'naaco' queso Pedro:
—¡Chaqaida da qara'gaxala'!
Ca co'na' 'qaachigui dajo so Simón Pedro, ca' lotqai liỹa ỹañiñi saua loho, (ma' naqate'o' na'le). Ca renotañigui so huaxaỹaq. 8Ca' saua liỹa' napaxaguinatqa ỹoviraqtereta aso lahite' queso lemanaxa, ỹauequesa'ta so naleguec no'qaachigui quena nallin, ma' 'uo' ca cien metros leseeque'ejta so lemanaxa. 9Ca co'na' ỹovirereta quiyi 'laua, ca natenterelec so norec nodaachiguiñi lpoqo qailliitalec so nallin, chaqai qai'neeta 'ue so pan hueeta'anyi. 10Ca' so Jesús 'naaco' quesaua'maxare:
—Ñaqa vii caua nalliñi' nodohiri' quená'maq chita'gue naviguiita.
11Ca' so Simón Pedro renojñigui aso qom lahi', ca nauecta'a yi lemanaxa so naleguec ỹaatqajam no'qaachigui quena nodaachiguiñi lodegaxat nallin. Ỹovi' ciento cincuenta y tres so nallin daachiguiñi lodegaxat. 'Eno'm ỹaatqajam 'xoic, qam se ỹasectaqta'gue so naleguec. 12Ca' so Jesús 'naaco' quesaua'maxare:
—Ỹalahi, qui'ii.
Ca qaica ca inat so'maxare queso napaxaguinatqaipi negue' so'maxare, ma' ỹa'den quiyim chaqaiso so qara'gaxala'. 13Co'na'le, ca' nqo'neho' so Jesús, ca ỹacona so pan, ca imeenec quesaua'maxare. Ca' chaqaida 'ne'tegue qai'neeta queso nallin.
14Ca' quedajo, ca ỹovi' tres quiyim so Jesús nachaxanalo saua lapaxaguinatqa co'na' ime quiyim liỹa nca'leuec.
So Jesús retaqata'pegue' so Simón Pedro
15Ca co'na' ime so lqui'ỹaxague', ca' so Jesús inato' so Simón Pedro:
—Qami' Shimoñi', qami' llaalec so Jonás, ¿paguec rqo'chita aỹim quenauajo?
Ca' so Pedro 'naaco':
—Ajá'a, qami' ỹa'gaxala', qami' 'yiiñi' quiyim yqo'chiraxaua'.
Ca 'naaco' so Jesús:
—Cha'regue quelollita na ilo qagreta llaalqaipi.
16Ca' lotqai pilalec inat liỹa:
—Qami' Shimoñi', qami' llaalec so Jonás, ¿rqo'chiriua'?
Ca so Pedro 'naaco':
—Ajá'a, qami' ỹa'gaxala', qami' 'yiiñi' quiyim yqo'chiraxaua'.
Ca 'naapego':
—Cha'regue cochi'ta ana ilo qagretaipi.
17Ca lotqai liỹa renataxan, 'naaco':
—Qami' Shimoñi', qami' llaalec so Jonás, ¿rqo'chiriua'?
Ca ỹaatqajam 'ue da lachicoxo so Pedro, ma' mashic tres qainat quiyim nqo'ta so'maxare. Ca 'naaco':
—Qami' ỹa'gaxala', qami' ná'ogue 'yiiñi'. Qami' 'yiiñi' quiyim yqo'chiraxaua'.
Ca' so Jesús 'naaco':
—Cha'regue cochi'ta ana iloipi qagretaipi. 18Ỹaatqajam lliqueta da shinac caqami', quiyim na' ñaqai qami' ne'necolec, quena' no'viichi' ñi'riñi naua qatoohi', ca 'viiquiñi'sac cá'maq sham 'itegue. Qam ma' ỹovita quiyim qami' qo'xoic, ca 'ỹaañirec naua rqai'laqajchi', ca ỹoqa'a ca ilamo'guelo qami' caua qatoohi', ca' raviquitegue cá'maq sqa viisaque quiyim 'itegue.
19Ca co'na' 'naac dajo, so Jesús ỹahotaco' quiyim ỹa'deenaxanaxanegue dá'maq 'neeta ma'le da lelauaxa so Pedro, chaqai dá'maq 'neeta quiyim imaqachin ñi qota'olec. Co'na' ime, ca 'naapego' so'maxare:
—¡Co'uaachitegue aỹim!
Só'maq nqo'itaxat napaxaguinatec
20Ca co'na' nqohilec so Pedro, ca idaana'guit coỹaretaho só'maq napaxaguinaxaua paguec lqo'itaxat so Jesús, ma' chaqaiso' só'maq huaqate'o' na'le co'na' que'eeta'pe, ca' chaqaiso' só'maq renataxano' na'le: “Qami' qara'gaxala', ¿negue' cá'maq ỹaano qami' ma'le?” 21Ca co'na' so Pedro iuañi'chiguit, ca inato' so Jesús:
—Qami' ỹa'gaxala', qam nase'e, ¿negue' cá'maq 'neeta ma'le?
22Ca' so Jesús 'naaco':
—No'm ỹim sahotaque quiyim da'maxare queeta nca'leetauec, chi ỹovireta'a ma' liỹa yapil, qam ¡qami' 'xañisac; ma' qami' sqa 'irapegueu'a! Qam qami' quitegue aỹim.
23Ca' queugui so nqaỹaripi da na'qaatec quiyim se ileu so napaxaguinaxaua. Qam so Jesús mesqai 'naaco' queso'maxare quiyim se ileu. Ta'ta'a quiyim 'naac: “No'm ỹim sahotaque quiyim da'maxare ñaq nca'leetauec, toco' ma' ỹovita quiyim liỹa yapil, qam ¡qami' mesqa 'irapegueu'a!”
24Ca' chaqaiso só'maq napaxaguinatec só'maq ỹa'xatetac dá'ogue dajo, chaqai chaqaiso só'maq ỹiriñi. Ca' qomi' sa'deenaq quiyim ỹaatqajam llic dá'maq 'naac.
25Chaqai 'xoic na liỹa ỹo'uet na'le so Jesús, qam quetqai ná'ogue qoỹiriñi 'onatac nqohin, peeta'a se nalolec ná'ogue na 'laua na lerellipi quiyim qoỹiriñi. Ajá'a, ca chaqaida 'neeta dajo.
Currently Selected:
Juan 21: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.