Juan 17
17
So Jesús nqouagaxainlec so lapaxaguinatqaipi
1Ca co'na' ime 'naac dajo, ca' so Jesús ra'ishiguim quena piguim, ca 'naaco':
—Qami' ita'a, mashic sovita yi ỹaloqo' quiyim maqachiñi' najo qachaalqui', qaiyi qai'neeta ná'maq qachaalqui' imaqachin aqami'. 2Ma' qami' 'ỹaañitem na qachaalqui' da lquesaxanaxa quiyim idaanlec ná'ogue na qomyipi, quiyim ỹa'ue da lca'laxa sqaica lqodoc ná'ogue ná'maq 'ỹaañitem. 3Ca' dajo nca'laxa sqaica lqodoc chicqochigui quiyim qaiuañiraxaua', quiyim ỹaatqajam qaqamite' qami' qota'olec, chaqai na qachaalqui' Jesucristo ná'maq qami' nelachi'.
4Ma' ỹaatqajam semaqachintac qami' nagui quiyim seuetalec na 'laua, chaqai mashic somat dá'maq yilachirelec. 5Ca' nagui, qami' ita'a, sahotaque sentau'a na rahi'i', chaqai 'ỹaañitem aỹim dá'maq imaqachic na' ñaqai sento'ot qami' na' saqa'leca na 'laua.
6Ca nauá'maq qami' rca'acshichi' quena 'laua, ca' nañaañirim, naua'maxare sa'deenaxanaxaneguelo aqami'. Ma' ralamqachichi' naua'maxare, ca' qami' nañaañirim, ca naua'maxare na'xaỹaxanteta da ra'qaachiqui'. 7Ca nagui ỹa'deene' quiyim ná'ogue ná'maq nañaañi' chicqo'ot qami'. 8Ma' ỹim saanema dá'maq ra'qaachiqui' nañaañirim. Chaqai naua'maxare iconchiguit, chaqai retane' quiyim llic sachicqo'ot qami', chaqai huerelec quiyim ỹim relaachiqui'.
9Ỹim ñi'xoresene'tot qami' quenaua'maxare. Mese ñi'xoresentacot qami' quená'ogue na qom hueetalec na 'laua, ta'ta'a quená'maq nañaañi', ma' ralamaxarichi' na'maxare. 10Ná'ogue ná'maq hueetaỹot ralamaxarichi', chaqai ná'maq viisaxauot ỹalamaxaret. Chaqai dá'maq imaqachic re'oq quenaua'maxare.
11Ỹim totqa senalec na 'laua, qam naua'maxare no'ueendalec na 'laua. Ma' ỹim shic saiquena, qaiyi qoma'que quecá'maq senqata'ñi. Qami' ita'a, ma' qami' co'teeta, vise'e da rquesaxanaxa'e' quiyim quepaqataxañiseguelec ná'maq nañaañi', qaiyi ná'ogue neconta'ta', 'neesari' maỹim caqami'. 12Ma' na' ñaq iỹareta'pe quena 'laua, seloqota'a quen ná'maq nañaañi', sahote'e da rquesaxanaxa'e' chaqai squepaqataxanteguelec quen. Chaxasa qaica ca na'laañi, ta'ta'a só'maq shi'gue na'laaxaic, qaiyi ipaquichigui dá'maq 'nerac yaua naneresañi na'qaatqa.
13Ma' nagui shicpegue' qami', qam nagui ma' ñaqai seuetalec na 'laua, ca' shinac dajo, qaiyi naua'maxare 'xoic ca netoonaxague' 'nejem da ñitoonaxac. 14Ỹim saanema naua'maxare da ra'qaachiqui', qam ná'maq qomyipi hueetalec na 'laua noquii'alo naua'maxare, ma' naua'maxare tot ỹo'ueete' na loic na 'laua, ma' 'neete'm aỹim sqa saỹapegueu'a na loic na 'laua. 15Se sashiilaxanta'que quiyim naqachi' quena 'laua, ta'ta'a quiyim quepaqataxañirelgoto queso na'ỹaapec. 16Ma' ỹim mesqai ỹaatqajam ỹa'a' na 'laua, ca naua'maxare qai'neeta mesqai ỹaatqajam la'aate' na 'laua. 17Ca ỹoochira'oga ma'le na'maxare, qaiyi ralamaxarichi', chicqochigui nqai'ñi' dá'maq lliqueta; da ra'qaachiqui' dá'maq lliqueta. 18'Nejem aỹim quiyim yilachirougui na qomyipi hueetalec na 'laua, ca qai'neeta ỹim selarouguilo naua'maxare na qomyipi hueetalec na 'laua. 19Naua'maxare sauaxate' quiyim ñañaanot aqami', qaiyi naua'maxare qai'neete' nañaantot aqami', quiichigui nqai'ne' da lliqueta.
20Qam mesqainauate' sashiilaxanlgoto caqami', qai'neeta ná'maq huelec aỹim ma'le, ma' 'xaỹa ca la'qaategue' naua'maxare. 21Qami' ita'a, sashiila'e' quiyim ná'ogue na'maxare ỹaatqajam neconta'; quiyim 'ec 'oonoqui', na'deetau'alo qomi', 'nejem dá'maq 'ñiisari' caỹim, chaqaỹim caqami'. Quiyim ỹaatqajam necone'ejta', qaiyi ná'maq qomyipi hueetalec na 'laua huelec quiyim qami' yilachi'. 22Dá'maq imaqachic nañaañirim, ca' chaqaida dá'maq saanema naua'maxare, qaiyi 'ec 'oonoqui', 'neete'm qomi' 'ec qomi' 'oonoqui'. 23Ỹim quenaua'maxare, chaqai qami' caỹim, qaiyi naua'maxare ỹovirera'a quiyim 'ec 'oonoqui', qaiyi quedajo, ca' na qomyipi hueetalec na 'laua retan quiyim qami' yilachi', chaqai quiyim ỹaatqajam 'xoriñi', 'nejem dá'maq re'xorenataxanaxa'e' caỹim.
24Qami' ita'a, qami' nañaañi' naua'maxare, ca' ỹim sahotaque quiyim cá'maq senta'ñi qai'neete' naua'maxare neesa'ñi, qaiyi iuanta dá'maq imaqachic nañaañi'; ma' ỹaatqajam yi'xoriñi' shi'gue na' saqa'leca na 'laua. 25Qami' ita'a 'maxaraic dá'maq 'viichi', na qomyipi hueetalec na 'laua se ỹauanapega qami', qam ỹim seuañiraxaua', chaqai nauajo shi'gue ỹa'deene' quiyim qami' yilachi'. 26Mashic sa'deenaxanaxaneguelo qami' naua'maxare, qam qaiyiita shiquetalec sa'deenaxanaxanta'peguelo, qaiyi dá'maq re'xorenataxanaxa'e' caỹim hueetauguilo naua'maxare, chaqai quiyim ỹim seuetauguilo naua'maxare.
Currently Selected:
Juan 17: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.