Lucas 11
11
So Jesús rapaxaguinataxanegue ca 'neeta da qouagaxainaxac
(Mateo 6.9-15; 7.7-11)
1'Uo' so na'xa'a so Jesús 'uo' ca hueeta'ñi, nqouagaxaintac. Ca co'na' ỹomat da nqouagaxainaxac, ca 'uo' so lapaxaguinatec 'naapego':
—Qarapaxaguiñi' queca shinqa'tegue ca qanqouagaxainaxac, 'nejem da 'ne'tegue so Juan co'na' ỹapaxaguin so lapaxaguinatqaipi.
2Ca' so Jesús 'naaco':
—Ma' nqouagaxaiñii, ca 'ñiỹaco':
Qami' qota'olec ñiiso'ot na piguim,
qaỹapacqajnauec qaimaqachin da qadeenaxachi'.
Ñaq nelachiriño' ma'le ca ro'ueenataxanaxaqui',
qaiyi qaỹo'uet quena 'laua cá'maq vi'saque, 'nejem dá'maq qaỹo'ueetetac quena piguim.
3Nañaañiroxorom ca qonoq nala'guit na na'xa'a.
4Chaqai palaxachi' na qarasauaxaset, ma' qomi' qai'neeta sapalaxataq ná'ogue ná'maq se no'uen ca 'neeta'pegue coqomi'.
Chaqai sqa shiñichiguita qomi' ca qane'guenaxac, qaidaata quiyim 'ootaxañiseguelgoto qomi' queca se no'uen.
5So Jesús qai'neeta 'naaco':
—Saloqojnaxanaxagui quiyim 'ue ca 'óna caqamiri 'ue ca namígo. Ca' quiyim pe lauel, ca qoyicpegue' ca la'a', ca 'naac: “Ñamígo, vite ỹa'ualqa tres paañi'. 6Ma' 'ue ñi ñamígo chita'gue noviro quiyi ỹa'a', chicqotauec. Qam ỹaatqajam qaica quet cá'maq noq quiyim saanem.” 7Chaqai saloqojnaxanaxa quecá'maq liỹa, chaqai saat pa'aataho, ca 'naac: “Yaap, se yidaxañi'sac; na lasom napootagui, chaqai naua ỹaalqa llapaata'anto quena ỹoma'. Ca' se seshit ñi'laxashiguim quiyim 'ue ca saañiraxarom.” 8Ca' ỹim shinac qaiyiita quet ne'laxashiguim, qam mesqaida quiyim so'maxare namígo. Qam ỹo'uet, qaiyi totqai queeta da ledaxanataxanaxac, ca ỹaanem cá'ogue cá'maq ỹouentaque. 9Vichiguiño' ỹim nagui shinapegalo qamiri: Shiilaxañii, ca' ñi qota'olec ỹaanema qamiri ca viñitaque; miitaxañii, qaiyi nachiỹa ca michitaque; ca ỹotogoxou'a ca lasom, ca' qaỹauate'oga. 10Ma' ca rashiilaxan, icoñiguit ca rashiilaxantaque. Chaqai ca remiitaxan, ca' ỹanata ca imitetaque. Chaqai ca ỹotogoxouo ca lasom, ca qaỹauate'oga.
11¿Ca' 'uo' ca neta'a ishit quiyim ỹaanem ca qa' ca llaalec quiyim rashiilaxanaque ca pan? ¿loqo'm ỹaanem ca qai'guaalo quiyim qaỹashiilatac queca nallin? 12¿Loqo'm ca llaalec quiyim roỹaxanaque ca lco'ue', ca' ỹaanem ca pa'lotoxoic? 13No'm qamiri nogoraqa, qam 'yiiñii quiyim 'ỹaañim ca lo'yaxanec ca qachaalaxahipi, ¡huose'quet ñi qata'ahi neeto'ot na piguim ỹaanem ca Espíritu Santo quecá'maq rashiilaxanaque!
So Jesús qohintapega 'ue so le'ec lecmaxaic lotaua
(Mateo 12.22-30; Marcos 3.19-27)
14So Jesús ỹo'deetape'oguiyi so ne'ec lecmaxaic mashic qaicaua naua la'qaatqa nqai'en so ỹale. Qam co'na' inoxonec so ne'ec lecmaxaic, ca lotqai ishit retaqa só'maq qaicaua caua la'qaatqa. Ca' so qomyipi i'laxa dajo. 15Qam 'uo' na 'naac queso qomyipi:
—Dajo ỹale ỹo'deetapeguec na ne'ec lecmaxaiquipi, da'maxare ro'ootaxantapega da lquesaxanaxa so lashi na ne'ec lecmaxaiquipi, leenaxat Beelzebú.
16'Uo' na liỹa chi i'guen, ỹashiilatac quiyim 'ue ca ỹachaxan ca netanec se qaiuanapega chicqo'ot nqai'en na piguim. 17Qam so'maxare mashic ỹa'deentari' dá'maq la'deenataxanaxac, ca 'naaco':
—Canchaqaica nashi no'm ỹoretecchi ca relaataxan, ca' ca 'óna nco'ỹa'e' ca liỹa, ca' ca'maxare tai'a quiyim nimiguiñi; chaqai caua neta'al quiyim ỹoretecchi nco'uaata'ta', qai'neeta nimi'iñi. 18Ca' da 'neeta qai'neeta so na'ỹaapec, no'm ỹoretecchi na queeta'pegue', ca ¿negue' quet ca 'neeta quiyim queeta ca lquesaxanaxa? Qam dajo shinac, ma' qamiri 'ñiỹac quiyim aỹim so'deetapeguec na ne'ec lecmaxaiquipi quiyim so'ootaxantapega da lquesaxanaxa so Beelzebú. 19Qam no'm chaqaida 'neeta, ¿negue' ca ỹaanem ná'maq queeta'pegueto qamiri ca nquesaxanaxa quiyim ỹo'daauec na ne'equipi? Vichiguiño', chaqaina na'maxare quiyim re'oq quiyim qamiri o'miitac. 20Qam chaqaida da lquesaxanaxa ñi qota'olec da so'ootaxantapega quena ne'ec lecmaxaic, qam dajo ichoxot quiyim qamiri novitalo da lo'ueenataxanaxac ñi qota'a quiyim mashic ỹoiquentac ná'ogue najo.
21Quena' 'ue ca qom quesaxanaxaic quiyim naloochiguiñi na lo'goxonaxat, ca reloxoỹa'a ca na'a', ca cá'ogue ca cochiitapega qaica ca i'guentau'a. 22Qam no'm novi' ca liỹa ỹale paguec ca la'ñaxac queso'maxare, ca loxonec. Ime, ca' rouootaxana'gue ná'ogue na lo'goxonqateripi ná'maq pe'eetapega, ca' chaqa ỹoiquentac ná'maq louootaxanqateripi.
23Ma' cá'maq noỹootec caỹim, ca' chaqaica ca pa'guenaxaua; chaqai ca mese llapoonaxanaxaua, ca' chaqaica ca reuacqataxan.
Ca ne'ec lecmaxaic quena' pila ca chicqa'ñi
(Mateo 12.43-45)
24Quena' ca ne'ec lecmaxaic quena' eec queca qom, queeta'guelo naua nomaate' rashivijlgoto, idaantaque ca nco'matqa'. Qam quena' sqaica ca ỹanata, ca ra'deenataxantac: “'Maxaraic sopila ca ỹa'a' cá'maq sachicqotougui na' ñinoxonec.” 25Qam quena' novita so rapila, iuanejlec sojo ỹale 'ec ca 'imec ỹaatqajam qai'lequeta chaqai qaỹa'maxachichiguiñi. 26Ca eec, que'ogalo saua liỹa' siete paguec leleguemqa' queso'maxare, ca saua'que tarougui so ỹale. Ca ỹovita quiyim sojo ỹale paguec la'aaxa da 'neetari' quecá'maq 'auaxaic.
Dá'maq re'qoota quiyim llic na'maxa
27Ca co'na' ñaq ỹa'xatetac dajo so Jesús, ca 'uo' aso 'aalo hueetaugui so qomyipi, ỹaualaq, 'naaco':
—¡Ỹaatqajam chalego loyaco' acá'maq 'aalo quiyim co'ỹegue qami', chaqai iỹaxat qami'!
28Qam so'maxare 'naaco':
—¡Qam ỹaatqajam chalego loyac cá'maq 'xaỹa da la'qaatec ñi qota'olec chaqai ỹaatqajam ỹo'uet!
Na qomyipi hualoxonyipi rashiilaxantaque quiyim qaỹo'uet ca netanec se qaiuanapega
(Mateo 12.38-42; Marcos 8.12)
29Ca' ỹaatqajam noquiiquetauec na qomyipi lapou'a so Jesús. Ca' so'maxare retaqa, 'naaco':
—Na qomyipi nagui ỹaatqajam hualoxonaq, chaqai roỹaxantaque quiyim 'ue ca qaỹachaxanem netanec se qaỹauanapega, qam se qoỹaanem. Chaqaisoota so netanec queso la'qaataxanqajnec ñi qota'a, leenaxat Jonás. 30Ma' chaqai 'nejem da 'neeta so Jonás chi letanec nqohin so qomyipi na'ñi yi Nínive, ca' chaqaida 'neeta ma'le najo ỹale llaalec chi letanec nqohin na qomyipi hueetauguilo nauajo na'xata'. 31Qam quecajo pa'aatec na'xa'a, ma' qaimit na qomyipi hueetauguilo nauajo na'xata', ca' aso nashi na'gue da 'guiñi, aso'maxare nachajñi ma'le ichoxot ca lasauaxaset najo qomyipi. Ma' aso'maxare chicqa'gue da ỹaatqajam qoỹoqo'tegue 'laua quiyim na'xaỹaxana ca la'deenec so nashi Salomón, ca' nagui hueetauguilo qamiri dá'maq ỹapacauec queso Salomón. 32Ca' ná'maq neeta'ñi yi na'a' lodegaxat Nínive qai'neeta nachajñi ma'le quecajo pa'aatec na'xa'a, ma' ỹovita quiyim qanimit na qomyipi hueetauguilo nauajo na'xata', ca ichoxot quiyim 'ue ca lasauaxaset. Ma' ná'maq na'ñi yi Nínive ỹalate' naua no'ueenataxaco co'na' qara'qaataxanem queso Jonás queda la'qaatec ñi qota'olec, qam nagui hueetauguilo qamiri dá'maq ỹapacauec queso Jonás.
Ca ncoỹeraxanaxaqui coỹarelec ca qom
(Mateo 5.15; 6.22-23)
33Qaica ca copata'a aca lcoỹeraxanaxaqui, ca' ỹa'ue ca ỹana'ñi quiyim ỹoxojñi loqo'm ỹapolec. Qaidaata quiyim ỹanashiguim aca'maxare, qaiyi canchi inoxono, ca re'qojlec. 34Naua qanqote' chaqainaua naua 'neete'm aca ncoỹeraxanaxaqui coỹarelgoto qomi'. Qam no'm naua nqochichi' lo'yaxanqa, ca' qamirá'ogue viisaugui ca 'ec lauaq. Qam naua nqochichi', no'm se no'viiñi, ca ná'ogue na no'ueenataxaqui' hueetaugui na napalaxa. 35Rovichirari'o' 'neeto' aca rcoỹeraxanaxagui'i' 'ec ca napalaxa. 36Ma' no'm dá'ogue da no'ueenataxaqui' re'qojlec, ca' sqaica ca napaltalec, ca ná'ogue re'qojlec nqai'ñi', 'nejem quena' qaicoỹarelec aqami' caso ncoỹeraxanaxaqui lauaq.
So Jesús nelaxa so fariseoipi chaqai so napaxaguinataxanaripi queda nelaataxanaxac
(Mateo 23.1-36; Marcos 12.38-40; Lucas 20.45-47)
37Ca co'na' ỹomat da letaxaỹaxac so Jesús, ca 'uo' so fariseo ỹauec so'maxare quiyim lqui'ỹaxaua queca la'a'. Ca' so Jesús inoxono, ca nqa'xanñi, reloqojlec ca nqui'ỹaxala'. 38Ca' so fariseo ỹaatqajam 'ue da le'laxa, ma' iuanchigui so Jesús quiyim se ipacqajanchigui quiyim quiỹo' naua lqai'laqate' quena' sham que'e. 39Qam so qara'gaxala' 'naaco':
—Qamiri fariseoipi, 'auaxañii co'taxachii na pa'aauec cana ne'taxaguii chaqai ca peguet rqui'ỹaxaguii, qam na pa'aauo quena re'taxanatallii ra'ñichigui quena chigoqchiỹaugui da rocataxaguii chaqai ná'ogue na se no'uen. 40¡Ỹaatqajam sqaico' ca ra'deenataxanaxaguii! ¿Qamiri sqa 'yiiñiỹo' peeta'a quiyim cá'maq ỹo'uet quena pa'aauec, qai'neeta ỹo'uet quena pa'aauo? 41Ca' vichiguiño' qamiri quiyim chitaxanataxañii, qam 'ỹaañiuec cá'maq pa'aauo, qaiyi ná'ogue co'teeta.
42¡Ỹaatqajam 'xoraiqolqa qamiri fariseo! Ma' qamiri 'ỹaañiỹot ñi qota'olec aca 'oono'lli' laue cana diez quena nalequetenaxanaxat ỹo'uet quiyim lo'daxaraic na lahita na neuolec chaqai ná'ogue ana liỹa nalequetenaxanqate. Qam se na'xaỹaxañii queca nalamqataxaguii chaqai da re'xorenataxanaxahi quiñi qota'olec. Ca' chaqaida 'viichii quet, qam se couahi'e quiyim 'viichii da liỹaripi.
43¡Ỹaatqajam 'xoraiqolqa qamiri fariseo! Ma' qamiri rqo'itaxachii quiyim nqa'xañitañigui ná'maq ỹaatqajam 'ue da lichoxoric cañi lapoxoqui na judioipi, chaqai ỹaatqajam qaỹa'maxate'teguelo qamiri quena' 'ue ca qaiquin queca nayic.
44¡Ỹaatqajam 'xoraiqolqa qamiri napaxaguinataxana' quena naqataxaquipi chaqai na fariseoipi, ma' 'ñiitapega qamiri 'maxaraqa! Qam 'ñiitam aca napal lahi' se re'oq, ca' na qomyipi chi qauaateguelec, qam se ỹa'den.
45Ca 'uo' so retaqa quesaua napaxaguinataxana' quena naqataxaquipi, 'naaco':
—Qami' napaxaguinataxanaq, ca' quedajo 'xachi' qai'neeta ỹovira'ogalo qomi' quiyim qomi' qarayilqochichi'.
46Qam so Jesús 'naaco':
—¡Ỹaatqajam 'xoraiqolqa qamiri qai'neeta, ma' paxaguinataxañita'pegue na naqataxaquipi! Ma' ỹoxoilec ca liỹa quiyim i'xat cana' tot qaica ishit i'xat, qam qamiri sqo taanaxañiỹau'a da nesallaxa cada 'oono'lli' rpalaaqachii.
47¡Ỹaatqajam 'xoraiqolqa qamiri! Ma' no'xoñitecshiguim na lahi' so letaxaỹaxaquiripi ñi qota'a ỹalauat so 'auaxaic qataa'illipi. 48Ca' quedajo 'viichii chaqaida re'oq nqai'en quiyim qamiri ỹaatqajam 'maxariñita dá'maq ỹo'uet so 'auaxaic qataa'illipi. Ma' só'maq qataa'illipi ỹalauat so qomyipi, ca' nagui qamiri chi no'xoñishiguim na lahiripi.
49Vichiguiño' ñi qota'olec queda la'deenaxanaxa 'naac: “Selata ma'le na ỹa'qaataxanqajanqaipi chaqai ca ilaatqaipi, ca 'uo' ma'le ca qaỹalauat, chaqai ca liỹaripi, ca' qaỹocantac.” 50Ca' najo qomyipi hueetaugui nagui, ñi qota'olec ro'laxana'pegue' ma'le ná'ogue na leuoripi só'maq la'qaataxanqajanqaipi shi'gue qaỹalauat, chicqochi'ñi nqai'en na' ñaqai chita'gue qaỹo'uet na 'laua. 51Ca' chicqochi'ñi nqai'en co'na' qaỹalauat so Abel, ca chi ỹovireta'a ca nalauataxac so Zacarías, na' qaỹalauat huaugui añi no'ueenaxanaxaqui late'ogue' yí'maq na'ñi aso ncopatoxonaxalate. Ca' vichiguiño' shiñiỹapegaxaua' quiyim ñi qota'olec ro'laxana'pegue' ma'le da lelauaxa so qomyipi quenajo qomyipi hueetaugui nagui.
52¡Ca' vichiguiño' 'xoraiqolqa qamiri napaxaguinataxana' quena naqataxaquipi! Ma' qamiri npa'xañilec aso lauaatqate ñi lasom da na'deenaxanaxa, qam sqai noxoñiho qamiri chaqai sqa shiñiho quiyim inoxono ná'maq ỹahotaque inoxono.
53Ca co'na' ime ỹa'xat dajo so Jesús, ca ná'maq napaxaguinataxanaripi quena naqataxaquipi chaqai na fariseoipi, ỹaatqajam ro'ỹa so'maxare. Ca' quiyi, ca se qoỹaxanac quiyim 'xoic na nenataxanaxac. 54Qaỹahotaque quiyim qaỹachiguiñi so'maxare, quiyim no'm 'ue ca la'qaatec se ỹa'maxañi, ca' chaqaica qaỹachigoxochichigui quiyim qaỹa'ue ca qaimaxalec lasauaxaset so'maxare.
Currently Selected:
Lucas 11: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.