Juan 18
18
Qaiconlec, ca' qaicoñi' so Jesús
(Mateo 26.47-56; Marcos 14.43-50; Lucas 22.47-53)
1Ca co'na' ime 'naac dajo, ca' so Jesús eec, nauequetecto saua lapaxaguinatqa, taita'gue da laseego so ñaachi leenaxat Cedrón. Hua'ño'yi so nanecse loma', ca' so Jesús taugui, liỹaata'pe saua lapaxaguinatqa. 2So Judas só'maq ỹahotaque ỹaano so Jesús qai'neeta iuana so nanecse loma'. Ma' so Jesús 'xoico' quen hueeta'ñi yi'maxare, lapoota'guita saua lapaxaguinatqa. 3Ca' so Judas ỹovira'a yi'maxare. Qam 'ue so nalliripi chaqai saua nouaataxanaq lase' neloxoỹa' cañi no'ueenaxanaxaqui qanelarerec queso lashillipi na netaxaỹaxanqajanqaipi chaqai na fariseoipi. Qam ỹaatqajam naloochiguiñi na lo'goxonqateripi, chaqai ne'xateta na lcoỹeraxanqateripi. 4Qam so Jesús ma' mashic ỹa'deentari' dá'ogue dá'maq 'neeta ma'le, ca ca'guit, ca inato', 'naaco':
—¿Negue' cá'maq daañitaque?
5Ca saua'maxare 'neraco':
—Sedaanqataque ca Jesús, le'ec yi Nazaret.
Ca' so Jesús 'naaco':
—Chaqaỹim na'taxare.
Ca' so Judas só'maq ỹaano so'maxare, ỹalequetauguilo saua'maxare. 6Ca co'na' so Jesús 'naac: “Ỹim na'taxare”, ca saua'maxare qoshii', ca sá'ogue huaañi. 7Ca lotqai liỹa inate' so Jesús saua'maxare:
—¿Negue' cá'maq daañitaque?
Ca saua'maxare 'neraco':
—Sedaanqataque ca Jesús, Nazaret le'ec.
8Ca so'maxare 'naaco':
—Shi'gue shinac caqamiri quiyim chaqaỹim. Ca no'm daañitaque aỹim, qam 'xañiuec na iỹaripi ñaqai eec.
9'Naaco' dajo, qaiyi ipaquichigui dá'maq 'naaco' na'le so Jesús: “Quená'maq nañaañim ñi qota'a, qaica ca na'laañi.” 10Co'na'le, ca' so Simón Pedro, ma' 'uo' so lecat, ca no'viguishiguimo', ca ỹouaxanec aso loicse lque'la so leenaxat Malco. So'maxare lelaatec so la'gaxala' na netaxaỹaxanqajanqaipi quena' qaretaxaỹa'pegue' ñi qota'a. 11Qam so Jesús 'naaco' queso Pedro:
—Liỹa pilaxachirigui shichirigui aca lahi' na lecachi'. Ma' no'm ñi qota'a ỹovirau'a nqai'en da ñi'guenaxac, 'ec nqai'en aca naqana chim, ca' ¿se ipaguigui quet nqaishin da'maxare?
So Jesús qailoxoỹaxañiguit so la'gaxala' na netaxaỹaxanqajanqaipi
(Mateo 26.57-58; Marcos 14.53-54; Lucas 22.54)
12Co'na'le, ca so neetaho nouaataxanaq, liỹaatac so lashi, chaqai so nouaataxanaq quena judioipi, iconlec so Jesús, ca' coñite' naua laua'. 13Co'na' ime, ca qaỹauegueu'a yi la'a' so Anás. Ca so Anás chi ladonaxanec so Caifás, ca chaqaiso' só'maq lashi na netaxaỹaxanqajanqaipi queso ñaaxa. 14Chaqaiso' so Caifás só'maq 'naaco' na'le queso judioipi quiyim paguec la'maxa queso qomyipi quiyim 'oonoqui' ca qom ileualec na lauo' laseripi.
So Pedro 'naac quiyim se iuanapega so Jesús
(Mateo 26.69-70; Marcos 14.66-68; Lucas 22.55-57)
15So Simón Pedro chaqai so liỹa napaxaguinatec co'uaatesalec so Jesús. Ca' so liỹa napaxaguinatec lauanatec so lashi na netaxaỹaxanqajanqaipi. Ca vichiguiño' so'maxare liỹaataho so Jesús quiyim inoxona'a yi nasoxoc so nashi. 16Qam so Pedro no'ueena'oga ñi lasom, pa'aatauec. Ca' quedajo, ca nenoxonec só'maq lauanatec so lashi na netaxaỹaxanqajanqaipi. Ca 'naapego' aso neloxoỹaxa quiñi lasom quiyim inoxonaqto so Pedro. 17Ca' so neloxoỹaxa quiñi lasom inato' so Pedro:
—¿Mesqai qami'o' qai'neeta lapaxaguinatec sojo ỹale?
Ca' so Pedro 'naaco':
—'E', mesqaỹim.
18Qam 'xoico' ca no'oomaxa na'le, ca' so nelaatqaipi chaqai so nouaataxanyipi ỹo'ueeto' so lole', ca sá'ogue netontac, qam nachaatetañi. Ca' so Pedro ỹalequetaugui qai'neeta so qomyipi, netontac queso norec.
So lashi na netaxaỹaxanqajanqaipi inatetac so Jesús
(Mateo 26.59-66; Marcos 14.55-64; Lucas 22.66-71)
19Ca só'maq lashi na netaxaỹaxanqajanqaipi inatetac so Jesús negue' sauá'maq lapaxaguinatqa, chaqai negue' cá'maq rapaxaguinataxanta'pegue. 20Ca' so Jesús 'naaco':
—Aỹim ỹaatqajam ñachaxanta quená'ogue na qomyipi quena' setaqa, ca chaqai shintari' quena' sapaxaguinataxan cana lapoxoqui na judioipi chaqai cañi no'ueenaxanaxaqui quena Jerusalén, ñí'maq lapoxoqui ná'ogue na judioipi. Ca' ỹim qaica quet cá'maq ỹa'qaatec soxotetañi. 21Ca' ¿chi'negue ma' yinachi'sac? Nachi' quet ná'maq na'xaỹaxantapiguiỹa', ca na'maxare ỹa'xat cá'maq 'neeta ca ỹa'qaatec. Ma' na'maxare ỹa'den dá'maq sa'xatetac quen.
22Ca co'na' so Jesús 'naaco' dajo, ca' so nouaataxanaq le'ec ỹalequetaho ma' neloxoỹaq cañi no'ueenaxanaxaqui, ỹouaxañigui na lashic so Jesús. Ca 'naaco':
—¿Dajo 'ñirac quiyim pilaxachichiguit da la'qaatec ñi lashi na netaxaỹaxanqajanqaipi?
23Ca' so Jesús 'naaco':
—No'm 'ue ca ỹa'qaatec se ỹa'maxañi, ca 'xachi' cá'maq 'neeta cá'maq se ỹa'maxañi. Qam no'm ỹa'maqachiguiñi dá'maq shinac, ca' ¿chi'negue ma' youaxañi'?
24Ca' so Anás ila' so Jesús coñireta'ta' nqai'ne' naua laua', ilata so Caifás, só'maq lashi na netaxaỹaxanqajanqaipi.
So Pedro lotqai liỹa noqollictegue so Jesús
(Mateo 26.71-75; Marcos 14.69-72; Lucas 22.58-62)
25Ca so Pedro ñaqaida nachaatetañi netontac queso norec. Ca lotqai liỹa qainat, qohinaco':
—¿'Eco' qami' qai'neeta lliquisaugui so lapaxaguinatqaipi da ỹale?
Ca so Pedro noqollictegue, 'naaco':
—'E', mesqaỹim.
26Ca lotqai qainato' queso lelaatec so lashi na netaxaỹaxanqajanqaipi só'maq chi lauo' le'ec so ỹale só'maq so Pedro nouaxanec na'le aso lque'la:
—¡'Eco' seuana qami' na'le quiyi nanecse loma' riỹa'isac da'maxare!
27Ca lotqai liỹa noqolliguit so Pedro. Ca' quiyi, ca noỹeno' so huaqa'e.
So Jesús qailoxoỹaxañiguit so nashi Pilato
(Mateo 27.1-2, 11-14; Marcos 15.1-5; Lucas 23.1-5)
28Ca' so Jesús qaỹachigoxochichi'ñi yi la'a' so Caifás, ca qaỹauegueu'a yi la'a' so nashi Pilato. Qam mashic richiitegueñi, ca' so judioipi se inoxona'a yi nasoxoc so nashi, ma' ỹouetete'e quiyim napio'xot da nachaalataxac. Ma' chi no'ueenataxac dajo, ma' no'me', ca se ishit que'e queso na'ic hueetougui so na'xa'a quena' qaỹo'leente so na'xa'a quena' qoyique'e yi Egipto. 29Vichiguiño' so nashi Pilato nenoxonec, ca inato' so qomyipi, 'naaco':
—¿Negue' cá'maq maxaiteguelec quiyim lasauaxaset da ỹale?
30Ca 'naaco' so qomyipi:
—Quetqai mesqai sauaqhuaic, ca se ñauegaxau'a quet qami'.
31Ca 'naaco' so Pilato:
—Viguii qamiri da'maxare, ca' dohilec ná'maq naqataxaquipi hueeto'oto qamiri, ca' chaqai michii qamiri.
Ca' so judioipi 'naaco':
—Qam ma' qomi' judío lase' qaica ca qana'qaatec quiyim 'ue ca salauataq.
32Ca' queda, ca ipaquichigui dá'maq 'naaco' na'le so Jesús quedá'maq 'neeta ma'le quiyim ileu. 33Ca' so Pilato lotqai liỹa inoxono quiñi lauo', ca roỹaxane'oga so Jesús, ca inat:
—¿Qami'o' na' qami' lashi na judioipi?
34Ca' so Jesús 'naaco':
—¿Dajo chi renataxanaxaqui', loqo'm 'ue ca liỹa la'qaataxanaxac caỹim?
35Ca' so Pilato 'naaco':
—¿Qa' ỹim quet judío le'ec? Ná'maq chi qauochi' laseripi chaqai na lashi na netaxaỹaxanqajanqaipi, ca chaqaina ná'maq ỹaano qami' caỹim. ¿Nega'ỹo' cá'maq 'viichi' se ỹa'maxañi?
36Ca' so Jesús 'naaco':
—Da ỹo'ueenataxanaxac quiyim ỹim nashi sqai huelec na 'laua. Ma' queta' chaqaida 'neeta, ca ná'maq coỹareta'pegue' aỹim shi'gue quet nco'ua nco'uahilec, qaiyi se qayayaano quena judioipi. Qam dá'maq ỹo'ueenataxanaxac quiyim aỹim nashi sqai huelec na 'laua.
37Ca' so Pilato 'naaco' queso'maxare:
—¿Ca' llic quiyim ỹaatqajam qami' nashi?
Ca' so Jesús 'naaco':
—Ỹim nashi, chaqaida dá'maq 'ñirac. Ñanaỹa na 'laua na' ñi'qaañi, ma' sahotaque sa'xat dá'maq lliqueta. Ca ná'ogue ná'maq huelec dá'maq lliqueta, ca na'xaỹaxana dá'maq sa'xat.
38Ca' so Pilato 'naaco':
—¿Chi negue' cá'maq lliqueta?
So Jesús qoỹaanec quiyim qaỹalauat
(Mateo 27.15-31; Marcos 15.6-20; Lucas 23.13-25)
Ca co'na' ime da lenataxanaxac, ca' so Pilato liỹa inoxone'oga so judioipi, ca 'naaco':
—Ỹaatqajam qaica quet cá'maq sanata lasauaxaset dajo ỹale. 39Qam qamiri 'ue da qatoiguii quiyim 'ue ca sosouec quena ncoñiitecseripi quena' ỹovire'oga yi na'xa'a quena' qaỹo'leente ca na'xa'a quena' qoyique'e yi Egipto. ¿Viitaque quiyim sosouec da lashi na judioipi?
40Ca lotqai sá'ogue ỹaualqagui, 'naaco':
—¡'E', mesqai so'irec dajo ỹale! ¡Ta'ta'a ca Barrabás so'irec!
Qam so Barrabás cuataxai.
Currently Selected:
Juan 18: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.