2 Reyes 1
1
(1.1 So na'ñi yi Moab npa'guene'e' yi na'ñi yi Israel.)
Da lelauaxa so nashi Ocozías
2Ca 'uo' so na'xa'a, ca' so Ocozías najño', chicqoshi'ma añi nqote ñi pa'aashiguim lauo' quiyi la'a' lodegaxat na'ñi yi Samaria, ca' ỹaatqajam coñirqatam. Ca co'na'le, ca ỹa'uo' so lelaatec quiyim renataxana so lashiilec lqolac Baal-zebub, qohinac qota'olec quiyi Ecrón, ma' ỹahotaque ỹa'den quiyim imeuec ma'le. 3Qam so lelaatec piguim le'ec ñi qara'gaxala' 'naaco' queso Elías só'maq na'ñi yi Tisbe:
—Mo'e', naxachira'guit na lelaatqaipi ñi nashi ñí'maq na'ñi yi Samaria. Ca nachi'o' ma'le, 'ñiraco': ¿Peeta'a qaica ca qota'olec quena la'a' na llaalqaipi so Israel, vichiguiño' qarenataxana quen ñi nashiilec nqolac Baal-zebub ñí'maq qohinac qota'olec quiyi Ecrón? 4Chaqai 'ñirapega qai'neeta quiyim ỹim na'gaxala' da ỹa'qaatec quiñi Ocozías 'neetasa' quiyim totqai ñishiguim ma'le queca lomala', ta'ta'a quiyim ileu.
Ca' so Elías eec, ca' ỹo'uet dajo. 5Qam so nelaatqaipi co'na' rapila so nashi, ca' so nashi inatetaco' so qomyipi, 'naaco':
—¿Chi'neco' ma' rapilliuo?
6Ca' so qomyipi 'naaco':
—'Ue so qom ỹanaxatoxoguit, ca 'naac coqomi' quiyim yapilaxa cá'maq nashi qarela', ca' shinqapega da 'naac ñi qara'gaxala', 'neetasa': ¿Qaico' ca qota'olec quena Israel quiyim qami' laataxañita quiyim qainat ca nashiilec nqolac Baal-zebub, cá'maq qohinac qota'olec quiyi Ecrón? Ca' quedajo 'viichi', ca' tot ne'laxachirishiguim quena romalachi', ta'ta'a quiyim rillivi'.
7Ca' so nashi inato' so qomyipi:
—¿Negue' cá'maq 'neeto' cá'maq no'ueenataxac cajo ỹale cá'maq ỹanaxata'guita qamiri, ca 'naac dajo?
8Ca saua'maxare 'neraco':
—So ỹale isecỹac loshicmaxa saua loho, chaqai loshicmaxa so nosaataxaqui.
Ca' so nashi ỹaualaq, ca 'naaco':
—¡Chaqaica ca Elías cá'maq na'ñi yi Tisbe!
9Ca chaqa'ma' ila' so nouaataxanaq lashi chaqai so cincuenta nalliripi. Ca co'na' ỹovi' so qomyipi, ca' so Elías nqa'xantañi cana roto aso quemaralec qa' ladocai. Ca' so nouaataxanaq lashi 'naaco' queso'maxare:
—¡Qami' netaxaỹaxaqui, ñi qarashi 'naac quiyim renochirec!
10Ca' so Elías 'naaco':
—No'm ỹim letaxaỹaxaqui ñi qota'olec, ca' nagui, ca' najñi ca norec chicqashiguim, ca ỹavigaxat qami' chaqai na nallichi'ipi.
Ca' so norec chaqa'ma' najñi queda piguim, ca sá'ogue ỹavicañi nqai'en so qomyipi.
11Ca' so nashi lotqai liỹa ila' so liỹa nashi chaqai so cincuenta nalliripi, ca so qomyipi eec, quepegue' so Elías. Ca 'naaco':
—¡Qami' netaxaỹaxaqui, ñi qarashi 'naac quiyim chaqa'ma' nenochiriñi!
12Ca' so Elías 'naaco' queso'maxare:
—No'm ỹim letaxaỹaxaqui ñi qota'olec, ca najño' ca norec quena piguim, ca ỹavigaxat qami' chaqai na cincuenta nallichi'ipi.
Ca chaqa'ma' najñi so norec, ca ỹavicañi nqai'en sá'ogue so qomyipi.
13Ime, ca' so nashi lotqai liỹa ila' so nouaataxanaq lashi, liỹaatac so cincuenta nalliripi. Qam sojo nouaataxanaq lashi ỹaatqajam quiishi'ma so Elías quiyi neeta'ñi. Ca co'na' ỹovishi'ma, ca' ỹa'dooto naua le'cootal, ca ne'xoresene'tot, 'naaco':
—Qami' netaxaỹaxaqui, qouaquiric richillira'a da ñachaalataxac chaqai na cincuenta relaataxai'ipi. 14Ma' 'au najñi so norec quena piguim, ca' ỹaviquerañi nqai'ne' saua dos nouaataxanaq lashil chaqai so nalliripi. Qam ỹim ñi'xoresene'tot qami' quiyim qouaquiric.
15Co'na'le, ca' so lelaatec piguim le'ec ñi qara'gaxala' 'naaco' queso Elías:
—Mo'e', quitegue, totaxan ro'chi'i'.
Ca' so Elías nenojñi, ca' quegue so nouaataxanaq lashi qaỹauega'a so nashi. 16Ca 'naaco':
—Da la'qaatec ñi qara'gaxala' 'neetasa': Ma' mashic vite ca relaachiqui' quiyim renataxana ñi Baal-zebub, ñí'maq qohinac qota'olec quiyi Ecrón, ta'ta'a quiyim 'eco' sqaica qota'olec nqai'ñi' quena Israel quiyim qainat, vichiguiño' nagui, ca' tot ne'laxachirishiguim quena romalachi', ma' rillivi'.
17Ca' chaqaida 'neeta, ca' so Ocozías ileu, ma' 'naaco' ñi qara'gaxala' queso Elías. Qam ma' so Ocozías qaica ca llaalec, ca' qoỹano quiyim nashi so lqaỹa Joram. Ca' dajo viichigui na' ỹovite' saua dos ñaxari quiyim nashi so llaalec so Josafat, leenaxat Joram, nashi quiyi Judá.
18Ca dá'maq liỹa na'qaataxac so Ocozías chaqai quedá'maq ỹo'ueeto' na'le, qoỹeretañi caso lere naneraxalate na nashillipi quiyi Israel.
Currently Selected:
2 Reyes 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.