1 Tesalonicenses 1
1
So Pablo chaqai so nauegaxauaripi ilajta aso lere só'maq mashic icoñiguit da na'qaatec Tesalónica laseripi
1Aỹim Pablo chaqai Silvano chaqai Timoteo selatalo qamiri ana ilaata na qarqaỹaripi quená'maq mashic icoñiguit da na'qaatec neeta'ñi na na'a' Tesalónica, ná'maq na'deetau'a ñi qota'olec chaqai so qara'gaxala' Jesucristo. Ma' sahotaque quiyim coñiguit da qouagaxa chaqai da na'maxa chicqo'ot ñi qota'olec chaqai so qara'gaxala' Jesucristo.
Ỹaatqajam naloqojnaxanaxat da lpi'ỹaxac yi Tesalónica laseripi
2Ca chaqai 'neetari' quiyim saanqatacot da qana'aachic ñi qota'a caqamiá'ogue, chaqai se scouaqa'ahi qamiri queda qanqouagaxainaxac. 3Ỹaatqajam ỹauanchiguilo qomi' ñi qota'olec quena' so'leentaxanqatac caqamiri, ma' 'xoic da rpi'ỹaxaguii quena' 'ueenataxañii, chaqai queda re'xorenataxanaxahi, ca' 'xoic da re'xoriguii, chaqai ỹaatqajam na'ñaxachii quiyim 'taxachichiguiñi da naquitaxaguii queso qara'gaxala' Jesucristo. 4Qamiri ỹaqaỹa', ñi qota'a ỹaatqajam ỹauoteguelo qamiri, chaqai ỹaatqajam sa'deenqata quiyim qamiri lca'acse'. 5Ma' na' qomi' sa'xataq caqamiri da na'qaatec chicqaugui da nca'laxa, mese nodaachiriñi naua chi qara'qaatqa, ma' qai'neeta da lquesaxanaxa so Espíritu Santo, chaqai ỹaatqajam sa'deenqata quiyim dá'maq sa'xatqatac ỹaatqajam lliqueta. Qamiri 'yiiñita dá'maq qana'maqataxac na' salecqatauguilo qamiri, ma' sahoqotaque quiyim ra'maxaiñi.
6Ca' qamiri quedá'maq 'ñiita ỹaatqajam quiijlec da qano'ueenataxac chaqai da no'ueenataxac so qara'gaxala' Jesús na' coñiguit da na'qaatec, ca' so Espíritu Santo ỹaanema qamiri da netoonaxaguii, 'eno'm 'xoic da re'xoriguii. 7Ca' chaqaida dá'maq 'neeta quiyim 'ue na ra'ilgoto chaqai ỹadenaxate' qamiri ná'ogue ná'maq mashic icoñiguit da na'qaatec quená'maq neetalgoto yaua 'lauari Macedonia chaqai yi Acaya. 8Ma' qamiri chicqotouguilo quiyim qoỹoqo'tegue da na'qaataxac so qara'gaxala' Jesús. Chaqai sqaiyiita yi Macedonia chaqai yi Acaya, ma' qai'neeta na qomyipi neetalgoto naua qoỹoqote'ogalo 'lauari ỹa'den da rpi'ỹaxaguii quiñi qota'a. Vichiguiño' nagui se ỹouen quiyim liỹa sa'xatqatac dajo. 9Ma' chaqaina na'maxare ỹa'xatetac dá'maq 'neeta na' sovitaxalo qamiri, chaqai ỹa'xatetac dá'maq 'neeta da rquelolaxahi coqomi', chaqai dá'maq 'neeta na' quiỹa'ahi na nashiilec nqolaquipi, ca' quiilec 'ueenataxañiỹot ñí'maq ỹaatqajam qota'a nca'leetauec, mesqai chi nadenqatec. 10Chaqai na'maxare qai'neeta ỹa'xatetac dá'maq 'neeta quiyim huaanaxañitac quiyim rapil chicqashiguim so Jesús, só'maq llaalec ñi qota'a, só'maq mashic ileu, qam ñi qota'a liỹa nca'laxatec. Ca' chaqaiso só'maq nca'laxaterec qomi' ma'le quecá'maq chalego lecaic nouaxanaxaset na qomyipi naỹalecna.
Currently Selected:
1 Tesalonicenses 1: MCV91
Highlight
Share
Copy
Want to have your highlights saved across all your devices? Sign up or sign in
Antiguo Testamento Corto y Nuevo Testamento en Mocoví, La'qaatqa ñi Qota'olec - Qota'olec Novita Na Qomyipi © Sociedad Bíblica Argentina, 1988, 1991.