Levítico 26
26
Kasukuq runakunata Señor Dios bendecisqanmanta
(Dt 7.12-24; 28.1-14)
1Aman idolokunataqa ruwakunkichishchu. Nitaqmi sayachinkichishchu rumimanta ruwasqa pilarkunatapas nitaq rumimanta otaq k'aspimanta tallasqa kaqkunatapas. Aman chay falso dioskunapa ñawpaqninpiqa qonqorikunkichishchu paykunata yupaychanaykichispaqqa. Noqaqa Señor Diosniykichismi kani.
2*Samana p'unchawniykunata waqaychaychis. Saynallataqyá tolderamanta ruwasqa *tabernáculo temploytapas respetaychis. Noqaqa Señor Diosniykichismi kani.
3Sichus kamachisqaykunata ruwayman churankichis hinallataq leyniykunatapas kasukuspa kawsankichis chayqa, 4noqa Señor Diosmi tiempollanpi parachimusaq. Hinaqtinmi chakraykichispi tukuy tarpusqaykichispas allinta rurunqa. Saynallataqmi chakraykipi kaq sach'akunapas allinta rurunqa. 5Saynallataqmi trigoykichistapas erankichis asta uvas pallanaykichis tiempokama. Uvastañataqmi pallankichis kawsaykunata tarpunaykichis tiempokama. Hinaqtinmi qankunaqa saksanaykichiskama mikhunkichis. Saynapin allpaykichispi hawkalla tiyankichis. 6Noqan qankunataqa hawkayaypi kawsachisqaykichis. Hinaspapas *nacionniykichismantan chinkachisaq manchakuypaq phiña animalkunata. Manañan guerrapas chaypiqa kanqachu. Saynapin qankunaqa mana pipa manchachisqan hawkalla puñukunkichis. 7Saynallataqmi qankunaqa enemigoykichis runakunatapas qatikachaspa, *espadawan guerrapi wañuchinkichis. 8Qankunaqa pishqallan pachak runakunata qatikachankichis. Pachaktaqmi chunka waranqa runakunata qatikachanqaku. Saynapin qankunaqa enemigoykichis runakunata espadawan guerrapi wañuchinkichis. 9Noqa Señor Diosmi qankunataqa yanapasqaykichis. Hinaspan mirachisqaykichis, ancha ashkallaña kanaykichispaq. Saynapin noqaqa qankunawan *pacto ruwasqayta cumplisaq. 10Qankunapa cosechaykichisqa anchallañan kanqa. Chayraykun ñawpaq watakunapi cosecha waqaychasqaykichista orqomunkichis, chayllaraq cosechasqaykichista waqaychanaykichispaq.
11Noqaqa qankuna ukhupin tiyasaq. Hinaspapas manan millakusqaykichishchu. 12Noqaqa qankunawanmi kasaq. Noqaqa qankunapa Diosniykichismi kasaq. Qankunañataqmi noqapa llaqtay kankichis. 13Noqa Señor Diosmi Egipto nacionmanta orqomuraykichis, saynapi manaña paykunapa *esclavon kanaykichispaq. Imaynan toromanta yugonta pashkanku libre kananpaq, saynatan qankunapatapas esclavo kasqaykichismanta libramuraykichis, saynapi manaña manchakuspa kawsanaykichispaq.
Mana kasukuq runakunapaq Diospa phiñakuyninmanta
(Dt 28.15-68)
14Sichus qankuna mana kasuwankichishchu nitaq kamachisqay leykunatapas ruwayman churankichishchu, 15aswanqa kamachisqaykunata mana kasukuspa, saruchakunkichis hinallataq kamachisqay leykunatapas mana cumplinkichishchu chayqa, qankunawan *pacto ruwasqaytan mana imaman tukuchishankichis. 16Chayraykun noqaqa qankunata tukuy imaymana castigokunawan hinallataq fiebre onqoykunawan castigasqaykichis. Chay onqoykunan qankunataqa tulluyachisunkichis hinallataq ñawiykichistapas ñawsayachinqa. Saynallataqmi chay onqoykunaqa asta wañuchisunkichis ima. Hinaspapas qankunaqa yanqapaqmi tarpunkichis. Chay tarpusqaykichistaqa enemigoykichismi mikhunqa. 17Noqaqa qankunapa contraykichispin kasaq. Chaymi enemigoykichispas vencesunkichis. Qankunataqa cheqnisuqniykichis runakunan dominaspa kamachisunkichis. Hinaspapas qankunaqa mana pipa qatikachasqanmi manchakuymanta yanqapuni ayqekunkichis.
18Sichus tukuy kaykunawan qankunata castigashaqtiypas mana kasukunkichishchu chayqa, astawanraqmi qanchis kutitaraq huchaykichismanta castigasqaykichis. 19Saynallataqmi paytukusqa kaynikichistapas mana imaman tukuchisaq. Parapas manan paramunqachu. Saynapin allpaykichispas ancha ch'akillaña kaspa, rumi hinaraq chuchullaña kanqa. 20Qankunaqa yanqapaqmi tukuy kallpaykichiswan llank'ankichis. Chakraykichispi tarpusqaykichispas manan rurunqachu. Nitaqmi fruta sach'akunapas rurunqachu.
21Sichus tukuy kaykunawan qankunata castigashaqtiypas mana kasukunkichishchu, aswanqa noqapa contraypi kankichis chayqa, astawanraqmi qanchis kutitaraq huchaykichismanta castigasqaykichis. 22Saynallataqmi noqaqa kachaykamusqaykichis montepi tiyaq phiña animalkunata, wawaykichiskunata mikhunanpaq hinallataq animalniykichiskunatapas tukunanpaq. Saynapin qankunaqa mana wawayoq kaspa pisiyankichis. Purisqaykichis ñanniykichiskunapas purunyapunqan.
23Sichus tukuy kaykunawan qankunata castigashaqtiypas mana kasukunkichishchu, aswanqa noqapa contraypi kankichis chayqa, 24noqa kikiypunin qankunapa contraykichispi kaspay, qanchis kutitaraq huchaykichismanta castigasqaykichis. 25Noqaqa enemigoykichiskuna guerrapi wañuchisunaykichistan permitisaq, qankunawan pacto ruwasqayta mana kasukusqaykichisrayku. Sichus guerramanta llaqtaykichis ukhuman ayqekunkichis chaypas, manchakuypaq onqoykunatan apachimusaq, (saynapi ashka runakunata wañuchinanpaq). Hinaspapas noqaqa enemigoykichiskunamanmi entregasqaykichis.
26Saynallataqmi mikhunaykichis cosecha kawsaykunatapas chinkachisaq. Hinaqtinmi chunka warmikuna ch'ulla hornollapi pisi t'antallataña ruwanqaku. Hinaspan medisqallata t'antata qosunkichis. Ichaqa manan saksankichishchu.
27Sichus chaykunata pasashaspapas, mana kasukuspa, hinalla contraypi kankichis chayqa, 28noqapas qankunapa contraykichispin kasaq. Hinaspan anchata phiñakuspa, qanchis kutitaraq huchaykichismanta castigasqaykichis. 29Hinaqtinmi ancha muchuy kaqtin, qankunaqa qari wawaykichistapas hinallataq warmi wawaykichistapas mikhukapunkichis. 30Alto moqokunapi idolokunata yupaychanaykichis capillaykichiskunatan destruisaq. Incienso q'oshñichinaykichis *altartakunatan mana imaman tukuchisaq. Saynallataqmi idoloykichiskunatapas p'akisaq. Hinaspan chay p'akisqay idolokunapa hawanman wañusqa cuerpoykichistapas churasaq. Saynapin noqa Señor Diosqa rikuchikusaq qankunapaq ancha phiñakusqayta. 31Llaqtaykichiskunatan purunman tukuchisaq. Idolokuna yupaychanaykichis templokunatan thuñichisaq. Hinaspapas noqa Señor Diosman presentamuwasqaykichis sumaq q'apaq *ofrendakunatapas manañan chashkisqaykichishñachu.
32Saynallataqmi tiyasqaykichis nacionniykichistapas thuñichispa, mana imaman tukuchisaq. Chaymi enemigoykichiskunapas chayman tiyaq hamuspanku admirasqallaña kanqaku. 33Noqaqa enemigoykichis runakunawanmi qatikachachisqaykichis *espadawan wañuchisunaykichispaq. Chayraykun nacionniykichispas ch'inñipunqa; hinallataq llaqtaykichispas purunyapunqa. Saynapin qankunaqa huk law nacionkunaman ch'eqechisqa kankichis. 34Hinaqtinmi allpaykichispas watan-watan purmaspa samakunqa, enemigoykichis runakunapa nacionninpi tiyanaykichiskama. Saynapin allpaykichisqa mana pipas tarpuqtin, watan-watan samanqa. 35Qankunaqa chay allpapi tiyashaspaykichismi, samana watakunapi mana samachirankichishchu. Sapa soqta wata cumplirukuqtinmi qanchis kaq watapi allpaykichistaqa samachinaykichis karan. Chayraykun mana samachisqaykichisrayku, allpaykichisqa chay purmasqan watakunapi samakunqa.
36Qankuna Israelpa miraynin runakunamantan wakinta enemigoykichis runakuna huk law nacionkunaman apanqaku (esclavo kanankupaq). Chay apasqa kaq runakunamanmi noqaqa sonqonkuman ancha manchakuyta churasaq. Hinaqtinmi sach'apa rap'in urmaykamuqtinpas manchakuymanta ayqekunqaku, imaynan guerrapi peleaspa enemigoykichismantapas ayqekunkichis chay hinataraq. Chaymi mana pipa qatikachasqan laq'akusparaq ayqekunkichis. 37Imaynan guerramantapas ayqekushankichisman hinaraqmi mana pipa qatikachasqan qankunapura ayqekuspa sarunakunkichis. Hinaspapas manan ni mayqenniykichispas enemigoykichispa ñawpaqninpiqa defendekuyta atinkichishchu. 38Qankunaqa huk law nacionkunapin wañunkichis. Hinaspapas enemigoykichiskunapa nacionninpin tukukunkichis. 39Qankunamanta puchuqkunapas tukuy huchakuna ruwasqankuraykun, enemigoykichispa nacionninpi wañuspa ismupunqaku. Imaynan ñawpaq abueloykichiskunapas wañuspa ismuranku, saynatan paykunapas wañuspa ismunqaku, abuelonkupa mana allinkuna ruwasqankurayku.
40Ichaqa sichus mana allinkuna ruwasqankumanta wanakunqaku hinallataq abuelonkupa mana allin ruwasqankutapas reconocekunqaku hinallataq traicionawasqankutapas reconocekunqaku hinallataq contraypi rebelakuspa kasqankutapas reqsikunqaku chayqa, paykunataqa perdonasaqmi. 41Ichaqa huchankumanta mana wanakuspa, noqapa contraypi kasqankuraykun, paykunataqa (nacionninkumanta qarqospa), enemigonkupa nacionninman apachisaq, saynapi rumi sonqo kayninkupas chaypi llamp'uyananpaq. Saynapin tukuy mana allinkuna ruwasqankuta chaypi reconocekunqaku. 42Hinaqtinmi noqa Señor Diosqa Jacobwan, Isaacwan hinallataq Abrahamwan pacto ruwasqayta yuyarisaq. Noqaqa paykunamanmi prometerani Canaán allpata qonaypaq. Chay promesa ruwasqaytan noqaqa yuyarisaq. 43Huk law nacionpi Israelpa miraynin runakuna tiyashanankukaman, chay Canaán allpaqa chayraq samanqa, purmasqanrayku. Hinaspapas paykunaqa kamachisqaykunata despreciaspankun, leyniykunatapas cheqnikuranku. Chayraykun paykunaqa tukuy mana allinkuna ruwasqankumanta ñak'ariywan paganqaku.
44Saynata enemigonkupa llaqtanpi ñak'arishaqtinkupas, noqa Señor Diosqa manan paykunataqa qonqasaqchu nitaqmi cheqnikusaqchu nitaqmi dejasaqchu wañuspa chinkanankutapas. Saynapin paykunawan pacto ruwasqayqa mana yanqapaqchu kanqa. Noqaqa Señor Diosniykichismi kani. 45Aswanmi noqa Señor Diosqa paykunamanta yuyarisaq, ñawpaq abueloykichiskunawan pacto ruwasqayrayku. Noqaqa llapallan nacionkuna rikunanpaqmi paykunataqa Egipto nacionmanta orqomurani. Hinaspan paykunawan huk pactota ruwarani, saynapi Señor Diosnin kanaypaq. Noqaqa yupaychasqanku Señor Diosmi kani, nispa.
46Kay kamachikuykunata, leykunata hinallataq reglamentokunapas Señor Diosmi Moisesman Sinaí orqopi qoran, Israelpa miraynin runakunaman willananpaq.
Currently Selected:
Levítico 26: QEAÑT
Highlight
Share
Copy
Want to have your highlights saved across all your devices? Sign up or sign in
Antiguo Testamento Quechua del Este de Apurímac © Sociedad Bíblica Peruana, 2020.
Mosoq Testamento Quechua del Este de Apurímac © Publicado por © 2013 Wycliffe, Inc.
Publicado por © 2013 Liga Bíblica, Internacional
