Éxodo 16

Israelpa miraynin runakunaman Señor Dios mikhuyta qosqanmanta

1Israelpa miraynin runakunaqa llapallankun Elim nisqa lugarmanta lloqsiranku. Hinaspan ch'inñeq desierto lugarpi kaq Sin nisqa lugarman chayaranku. Chay Sin nisqa lugarqa kashan Elim lugarwan hinallataq Sinaí lugarwan tupaqninpin. Paykunaqa Egipto nacionmanta lloqsimusqanku ishkay kaq killapa chunka pishqayoq p'unchawnin pasaruqtinmi, chay lugarmanqa chayamuranku. 2Chay ch'inñeq desierto lugarpin Israelpa miraynin llapallan runakunaqa Moisespa contranpi hinallataq Aaronpa contranpi 3khaynata rimaranku:

—Allinmi kanman karan Señor Dios Egipto nacionpi wañuchiwaqtinkuqa. Chay nacionpiqa mankakunapa ladonpi tiyayuspan aychatapas, mikhunatapas saksanaykukama mikhurayku. Ichaqa qankunaqa yanqan noqaykutaqa orqomuwarankiku, kay ch'inñeq desierto lugarpi yarqaymanta wañuchiwanaykikupaq, nispanku.

4Hinaqtinmi Señor Diosqa Moisesta niran:

—Noqan hanaq pachamanta parata hina mikhunata parachimusaq. Ichaqa runakunaqa sapa p'unchawmi, lloqsispanku chay p'unchawllapaq mikhunataqa huñumunanku. Saynapin noqaqa yachasaq, kamachisqaykunaman hinachus kawsashanku icha manachus chayta. 5Ichaqa soqta kaq p'unchawpiqa dobletan huñumunanku. Hinaspapas chay huñumusqankutaqa wayk'uspankun, ishkay p'unchawpaq waqaychananku, nispa.

6Hinaqtinmi Moisesqa Aaronpiwan Israelpa miraynin llapallan runakunata khaynata niranku:

—Kunan tardeykuytan yachankichis, Egipto nacionmanta orqomusuqniykichisqa Señor Dios kasqanta. 7Qankunaqa paqarin tutallamantan yachankichis Señor Diosqa Tukuy Atiyniyoq kasqanta. Señor Diosqa yachanmi paypa contranpi mana allinkunata rimasqaykichistaqa. ¿Pitaq noqaykuri kayku, contraykupi rimanaykichispaqrí? nispa.

8Hinaspapas Moisesqa nillarantaqmi khaynata:

—Señor Diosqa uyarinmi paypa contranpi rimapakusqaykichista. Chaymi payqa tardeman aychata qosunkichis. Paqarin tutallamantataqmi t'antata qosunkichis. ¿Pitaq noqaykuri kayku contraykupi rimanaykichispaqrí? Qankunaqa manan noqaykupa contraykupichu rimashankichis, aswanqa Señor Diospa contranpin, nispa.

9Chaymantan Moisesqa Aaronta niran:

—Israelpa miraynin llapallan runakunata khaynata nimuy: “Señor Diospa ñawpaqninman ashuykuychis. Paymi uyarirun contranpi rimapakusqaykichista”, nispa.

10Hinaqtinmi Aarón Israelpa miraynin llapallan runakunata rimapayashaqtin, llapallanku ch'inñeq desierto lawman qawariranku. Hinaspan Señor Diospa k'anchariyninta phuyu ukhupi rikhurishaqta rikuranku. 11Hinaqtinmi Señor Diosqa Moisesta khaynata niran:

12—Noqaqa Israelpa miraynin runakunapa reclamawasqankutan uyarini. Saynaqa paykunatayá khaynata nimuy: “Qankunaqa tardeykuytan aychata mikhunchis. Paqarin achikhaytataqmi t'antata saksanaykichiskama mikhunkichis. Saynapin qankunaqa noqaqa Señor Diosniykichis kasqayta yachankichis”, nispa.

13Chay tardeykuytan campamentopa muyuriqninman ashkallaña yuthukuna hunt'aykuran. Paqarisnintin tutallamantataqmi campamentopa muyuriqninman iphu para hina shullamuran. 14Chay shullamuq iphu para pasaruqtintaqmi, chay ch'inñeq desierto lugarpiqa rit'i hina yuraqllaña taksa bolachakuna enteron pampapi qeparan. 15Chayta rikuspankun Israelpa miraynin runakunaqa mana yacharankuchu imas chay kasqantaqa. Chayraykun khaynata ninakuranku:

—¿Imataq kayrí? nispanku.

Chaymi Moisesqa paykunata niran:

—Kayqa mikhunaykichispaq Señor Diospa qosusqaykichis t'antan. 16Kaymi Señor Diospa kamachisqanqa: “Qankunaqa mikhuy atinallaykichistan huñumunaykichis. Qankunaqa sapanka runapaqmi ishkay kilota hina pallakamunaykichis, sapanka familiaykichispi hayk'a runakunas kasqanman hina”, nispa.

17Chaymi Israelpa miraynin runakunaqa Señor Diospa kamachisqanman hina ruwaranku. Wakinmi ashkata pallakamuranku, wakinñataq ashllata. 18Paykunaqa sapankamankun mikhuy atinallankuta pallamuranku. Chayraykun chay pallamusqankuta mediqtinkuqa mana puchuranchu ashkata pallamuqmanqa. Nitaqmi faltaranpashchu pisilla pallamuqmanpas.

19Hinaqtinmi Moisesqa khaynata niran:

—Manan ni pipas kay pallamusqaychis mikhunataqa paqarisnintin p'unchawpaqqa waqaychananchu, nispa.

20Ichaqa wakin runakunaqa manan Moisespa kamachisqantaqa kasukurankuchu. Aswanmi paqarisnintin p'unchawpaq wakin mikhunataqa puchukuranku. Hinaqtinmi chay mikhuna waqaychasqankuqa anchata asnariran uru-urusqanrayku. Chaymi Moisesqa paykunapaqqa anchata phiñakuran.

21Paykunaqa sapa p'unchawmi sapankamanku mikhuy atisqallankuta pallamuranku. Chay mikhunataqa tutallanmantan pallamuranku, inti lloqsimuspa chulluchisqanrayku. 22Ichaqa viernes kaq p'unchawpitaqmi dobleta otaq tawa kilota hina sapankamanku pallamuranku. Chaymi Israelpa miraynin llapallan runakunapa jefenkunaqa Moisesman willaq riranku. 23Hinaqtinmi Moisesqa paykunata khaynata niran:

—Señor Diosmi kamachikamun khaynata: Paqarin p'unchawqa sábado p'unchawmi, noqa Señor Diosta yupaychawanaykichispaq sapaqchasqa p'unchaw. Chayraykun imatapas wayk'ukunaykichis kaqtinqa, kunan wayk'ukuychis. Saynallataq imatapas t'impuchinaykichis kaqtinpas, kunan t'impuchiychis. Ichaqa imapas puchuqtaqa paqarinpaqyá waqaychaychis, nispa.

24Hinaqtinmi Israelpa miraynin runakunaqa Moisespa kamachisqanman hina cumpliranku. Hinaspan mikhuna puchuqta paqarisnintin p'unchawpaq waqaycharanku. Hinaqtinmi chay mikhunaqa mana asnaranchu nitaq ururanpashchu. 25Hinaqtinmi Moisesqa khaynata niran:

—Kunanqa Señor Diosta yupaychanapaq sapaqchasqa sábado p'unchawmi. Saynaqa mikhuna waqaychasqaykichistayá mikhuychis. Manan kunanqa imatapas campopiqa tarimunkichishchu. 26Qankunaqa soqtantin p'unchawmi pallamunkichis mikhunataqa. Ichaqa qanchis kaq sábado p'unchawpiqa manan ni imatapas campopiqa tarimunkichishchu, nispa.

27Ichaqa Israelpa miraynin wakin runakunan qanchis kaq (sábado) p'unchawpi mikhuna pallakuq riranku. Ichaqa manan ni imatapas campopiqa tarimurankuchu. 28Chaymi Señor Diosqa Moisesta khaynata niran:

—¿Hayk'aqkamataq qankunari mana kasukunkichishchu noqapa leyniykunata hinallataq kamachisqaykunatapas? 29Yuyariychisyá; noqa Señor Diosmi samanaykichispaq sábado p'unchawtaqa qoraykichis. Chayraykun noqaqa viernes kaq p'unchawpi qoykichis ishkay p'unchawpaq t'antataqa. Chaymi qanchis kaq p'unchawpiqa mana ni pipas campamentomantaqa lloqsinanchu. Aswanmi llapallanku may kasqallankupi kananku, nispa.

30Hinaqtinmi Israelpa miraynin runakunaqa qanchis kaq p'unchawpi samaranku.

31Israelpa miraynin runakunaqa chay mikhuna pallasqankutan suticharanku “maná t'anta” nispanku. Chay manaqa yuraqmi karan; culantro mukhu hinan karan; mielniyoq torta hinan karan. 32Chaymantan Moisesqa Israelpa miraynin runakunata khaynata niran:

—Señor Diosmi kayta kamachimun: “Ishkay kilota hinayá chay ‘maná’ nisqa t'antataqa jarraman hunt'aychis. Hinaspa mirayniykichiskunapaq waqaychaychis, saynapi Egipto nacionmanta orqomuspay, kay ch'inñeq desierto lugarpi qankunaman mikhuchisqay t'antata rikunankupaq”, nispa.

33Hinaqtinmi Moisesqa wawqen Aaronta khaynata niran:

—Qanqa mankachata hap'ispayki, chayman waqaychay ishkay kilo hinata chay “maná” nisqa t'antata. Hinaspa Señor Diospa ñawpaqninman churay, saynapi mirayniykichiskunapaq waqaychasqa kananpaq, nispa.

34Chaymi Aaronqa chay “maná” nisqa t'antata churaran tablamanta ruwasqa baúl hina *arcapa ñawpaqninman, saynapi Moisesman Señor Dios kamachisqanman hina waqaychasqa kananpaq. 35Israelpa miraynin runakunaqa tawa chunka watantinmi “maná” nisqa t'antata mikhuranku, Canaán allpapa tupaqnin lugarman chayanankukama. Chay Canaán allpaqa paykunapa tiyanankupaq allpan karan. 36Chay tiempokunapin ishkay kilo medidataqa suticharanku “*gomer” nispanku. Chunka gomertañataqmi suticharanku “*efa” nispanku.

Currently Selected:

Éxodo 16: QEAÑT

Highlight

Copy