رُوتْ 3
3
رُوتْ دَ بُواْوَظْ أَوُرِنْ بُغُنْ حَڟِ
1وَتَرَانَ نَعُواْمِ مَامَرْ مِجِنْ رُوتْ تَثٜىٰ وَ رُوتْ «یَتَ، يَا كَمَاتَ إِنْ نٜىٰمَ مِكِ مِجِ، دُواْمِنْ كِسَامِ غِدَا عِنْدَ ذَاكِ هُوتَ؞ 2غَاشِ بُواْوَظْ وَنْدَ يَيَرْدَ مِكِ كِكَيِ تَكَالَ بَايَنْ مَتَ مَاسُيِمَسَ عَيْكِ دَنْغِنْمُ نٜىٰ نَكُسَ؞ كِسَوْرَرَ؞ يَوْ دَ يَمَّ ذَيْبُغَ حَڟِنْ بَلٜىٰ أَوُرِنْ بُغُنْ حَڟِ؞ 3سَبُواْدَ حَكَ سَيْكِيِ وَنْكَ، كِشَاڢَ مَنْ ڧَنْشِ، كِكُمَسَا رِغَرْكِ مَڢِے ݣَوْ؞ سَعَنً كِتَڢِے عِنْدَ يَكٜىٰ بُغُنْ حَڟِنْسَ، عَمَّا كَدَ كِيَرْدَ يَغَنْكِ سَيْ يَغَمَثِ دَ شَا دُكَ؞ 4كِلُورَ سُواْسَيْ دَ عِنْدَ يَݣُونْتَ؞ سَعَنً كِجٜىٰ كِبُوطٜىٰ ذَنٜىٰنْ رُڢُوَرْسَ، كِݣُونْتَ أَوَجٜىٰنْ ڧَڢَاڢُنْسَ؞ شِے كُوَ ذَيْ ڢَطَا مِكِ أَبِنْدَ ذَاكِيِ؞»
5سَيْ رُوتْ تَأَمْسَ تَثٜىٰ «ذَنْيِ دُكْ أَبِنْدَ كِكَ ڢَطَا مِنِ؞»
6رُوتْ كُوَ تَغَنْغَرَ ذُوَا وُرِنْ دَ عَكٜىٰ بُغُنْ حَڟِ، تَكُمَيِ دُكْ أَبِنْدَ مَامَرْ مِجِنْتَ تَعُمَرْثٜىٰتَ؞ 7دَ بُواْوَظْ يَغَمَثِ دَ شَا، يَنَ ثِكِنْ جِنْ دَاطِنْسَ، سَيْيَنٜىٰمِ وُرِے يَݣُونْتَ كُسَدَ تُلِنْ حَڟِنْ دَ عَكَتَارَ؞ سَعَنً رُوتْ تَذُواْ أَ حَنْكَلِ، تَبُوطٜىٰ ذَنٜىٰنْ رُڢُوَرْسَ تَݣُونْتَ أَوَجٜىٰنْ ڧَڢَاڢُنْسَ؞ 8دَ ڟَكَرْ دَرٜىٰ بُواْوَظْ يَڢَرْكَ أَ ڢِرْغِثٜىٰ، يَجُويَ سَيْ يَغَ مَثٜىٰ عَݣُونْثٜىٰ كُسَدَ ڧَڢَاڢُنْسَ؞ 9يَيِ تَمْبَيَ يَثٜىٰ «وَثٜىٰثٜىٰ كٜىٰ؟» سَيْ تَأَمْسَ «نِے ثٜىٰ بَيْوَرْكَ رُوتْ؞ كَرُڢٜىٰنِ دَ ذَنٜىٰنْ رُڢُوَرْكَ دُواْمِنْ كَيْ دَنْغِ نٜىٰ نَكُسَ؞»
10سَيْ بُواْوَظْ يَثٜىٰ «يَهْوٜىٰهْ يَ أَلْبَرْكَثٜىٰكِ، یَتَ؞ دُواْمِنْ وَنَّنْ أَمِنْثِنْ دَ كِكَ نُونَ وَ دَنْغِنْمُ يَنْذُ يَڢِ وَنْدَ كِكَ رِغَا كِنْ نُونَاوَ مَامَرْ مِجِنْكِ؞ غَمَا بَكِنٜىٰمِ سَوْرَيِبَ، كُواْ شِے مَيْ أَرْزِڧِ نٜىٰ كُواْ تَلَكَ نٜىٰ؞ 11دُواْمِنْ حَكَ یَتَ، كَدَ كِدَامُ، ذَنْيِ كُواْمٜىٰنْ دَ كِكٜىٰ بُڧَاتَ؞ غَاشِمَا كُواْوَ أَغَرِنَّنْ يَسَنْ ثٜىٰوَ كٜىٰ مَثٜىٰ مَيْ كِرْكِ ثٜىٰ؞ 12غَسْكِيَ نٜىٰ، نِے دَنْغِ نٜىٰ نَكُسَ، عَمَّا كُمَ أَݣَويْ وَنِ مُتُمْ نَكُسَ ڢِيٜىٰ دَنِے؞#رُوتْ 2.20 13يَنْذُ دَرٜىٰ نٜىٰ، كِجِرَا حَرْ غَرِ يَوَايٜىٰ؞ دَ سَڢٜىٰ ذَنْ تَمْبَيٜىٰشِ كُواْ ذَيْثِكَ حَكِّنْ دَنْغِ نَكُسَ؞ إِنْ كُوَ ذَيْ يِ، تُواْ، سَيْيَثِكَ؞ عِدَنْ كُوَ بَايَسُواْ، نَا ضَنْڟٜىٰ مِكِ دَ سُونَنْ يَهْوٜىٰهْ مَيْ رَيْ ذَنْثِكَ؞ كِݣُونْتَ أَنَنْ حَرْ وَايٜىٰوَرْ غَرِ؞» 14سَيْ رُوتْ تَݣُونْتَ كُسَدَ ڧَڢَاڢُنْسَ حَرْ سَاڢِيَ؞ عَمَّا تَتَاشِ تُنْ حَصْكٜىٰنْ وَايٜىٰوَرْ غَرِ بَيْ إِسَ أَغَانٜىٰ دَ ڢُسْكَرْ مُتُمْبَ، تَكَامَ حَنْيَ؞ تَايِ حَكَنٜىٰ دُواْمِنْ بُواْوَظْ بَايَسُواْ مُتَنٜىٰ سُسَنْ ثٜىٰوَ مَثٜىٰ تَذُواْ وُرِنْ بُغُنْ حَڟِ؞ 15سَيْ بُواْوَظْ يَثٜىٰ مَتَ «كِكَٰوُاْ ڠَلٜىٰنْكِ كِشِمْڢِطَا أَنَنْ؞» تَا كُوَ شِمْڢِطَا، سَيْيَطِبَ مُودُ عَشِرِنْ نَهَڟِنْ بَلٜىٰ يَظُبَ مَتَ؞ سَعَنً يَ أَظَ مَتَ، سَيْتَكُواْمَ ثِكِنْ غَرِ؞ 16دَ تَكُواْمَ غِدَا سَيْ مَامَرْ مِجِنْتَ تَتَمْبَيٜىٰتَ تَثٜىٰ «یَتَ، يَيَ عَكَيِ؟»
رُوتْ كُوَ تَڢَطَا وَ نَعُواْمِ دُكَنْ أَبِنْدَ بُواْوَظْ يَيِ مَتَ؞ 17تَاڧَارَ دَ ثٜىٰوَ «بُواْوَظْ يَثٜىٰ بَذَيْ بَرْنِ إِنْكُواْمَ حَنُّ وُاْڢِ وُرِنْكِبَ، سَيْيَطِبَ حَڟِنْ بَلٜىٰ نَنْ يَبَانِ؞»
18نَعُواْمِ تَثٜىٰوَ رُوتْ «كِجِرَا، یَتَ، كِغَا أَبِنْدَ ذَيْڢَرُ؞ بُواْوَظْ بَذَيْ هُوتَبَ سَيْ يَوَرْوَرٜىٰ كُواْمٜىٰ؞»
Currently Selected:
رُوتْ 3: hauAS
Highlight
Copy
Compare
Share
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020