عُواْبَدِيَ 1
1
1غَا سَڧُوانْ عُبَنْغِجِ يَهْوٜىٰهْ وَنْدَ أَنَّبِے عُواْبَدِيَ يَغَنِ عَثِكِنْ رُعُيَ غَمٜىٰدَ ڧَسَرْ عٜىٰدُوامْ؞#عِشـ 34.5-17؛ 63.1-6؛ إِرْمِ 49.7-22؛ هِظْ 25.12-14؛ 35.1-15؛ عَمُواسْ 1.11-12؛ مَلْ 1.2-5
أَنَّبْثِنْ ڢَاطُوَرْ عٜىٰدُوامْ
أَنْ عَيْكَ دَ طَنْ سَڧُواْ غَ أَلْعُمَّيْ،
مُنْ كُمَجِ سَڧُوانْ دَغَ يَهْوٜىٰهْ ثٜىٰوَ
«تَاشِ! مُهَوْرَ مُيَاڧِ عٜىٰدُوامْ!»
2إِنْجِ يَهْوٜىٰهْ،
«غَاشِ، ذَنْ مَيْدَكِ ڧَنْڧَنُوَ
عَثِكِنْ سَوْرَنْ أَلْعُمَّيْ،
ذَاعَ رٜىٰنَكِ بَكَطَنْبَ؞
3غِرْمَنْ كَنْكِ يَرُوطٜىٰكِ، يَا كٜىٰ عٜىٰدُوامْ،
مَيْ ذَمَ أَ مَڢَكَا أَدُوڟٜىٰ،
مَيْ ذَمَ عَكَنْ مَنْيَنْ تُدَّيْ؞
أَ ذُوثِيَا كِنَ ثٜىٰوَ
‹وَظَيْ عِيَ سَوْكَرْ دَنِے ڧَسَا؟›
4كُواْ دَ كِنْ تَاشِ سَمَ كَمَرْ غَغَّڢَ،
كُواْ دَ كِنْ يِ غِدَاجٜىٰنْكِ ثِكِنْ تَوْرَرِنٜىٰ،
دَغَ ثَنْ ذَنْجَاكِ ڧَسَا؞
نِے يَهْوٜىٰهْ نَا ڢَطَا!
5«عِدَنْ ٻَرَيِ سُنْ شِغَ غِدَنْكِ،
عِدَنْ یَنْ ڢَشِ سُنْذُواْ دَ دَرٜىٰ،
أَيْ، ذَاسُ طَوْكِ كَوَيْ أَبِنْدَ سُكٜىٰسُواْ نٜىٰ؞
عِدَنْ مَاسُ غِرْبِنْ یَیَنْ إِنَبِے سُنْيِ غِرْبِے،
أَيْ، ذَاسُبَرْ وَطَنْسُ دُواْمِنْ مَتَلَوْتَ؞
عَمَّا كٜىٰ عٜىٰدُوامْ، تَاكِ تَا ڧَارٜىٰ!
6عَمَّا كُو مُتَنٜىٰنْ عٜىٰدُوامْ، ذُرِيَرْ إِسُوَ،
أَنْهَلَكَاكِ،
دُكَنْ أَرْزِڧِنْكُ أَنْݣُوشٜىٰ!
7دُكَنْ أَلْعُمَّنْ دَ كُكَيِ حَطِنْ ڠُوِوَ،
ذَاسُ جُويَا مِكِ بَايَ؞
ذَاسُ كُواْرٜىٰكِ حَرْ كَنْ إِيَاكَرْ ڧَسَرْكِے؞
أَبُواْكَنْكِ دَ كِكَڢِے يَرْدَ دَسُو،
سُنْ رُوطٜىٰكِ سُنْثِنْيٜىٰكِ دَ يَاڧِ،
وَطَنْدَ سُكَثِ عَبِنْثِ دَكٜىٰ،
سُنْ كَڢَ مِكِ تَرْكُواْ سُنَ ثٜىٰوَ
‹إِنَ دُكَنْ وَيُواْنَّنْ نَاتَ؟› »
8إِنْجِ يَهْوٜىٰهْ،
«أَ رَانَرْ نَنْ دَ ذَنْ هَلَّكَ عٜىٰدُوامْ،
ذَنْ هَلَّكَ مَاسُ حِكِمَرْتَ؞
ذَنْ كَوَرْدَ مَاسُ ڢَهِمْتَ
دَغَ تُدَّنْ ڧَسَرْ إِسُوَ؞
9يَا بِرْنِنْ تٜىٰمَنْ،
مَاسُ عِيَ يَاڧِنْكِ ذَاسُڟُواْرَتَ،
حَرْ كُواْوَ عَتُدَّنْ ڧَسَرْ إِسُوَ، ذَاعَ كَشٜىٰشِ؞»
ذُنُوبِنْ عٜىٰدُوامْ
10«سَبُواْدَ حَلِنْ مُغُنْتَارْ دَ كِكَ نُونَ
وَ یَنْعُوَنْكِ مُتَنٜىٰنْ إِسْرَٰٓءِيلَ،
كُنْيَا ذَاتَ رُڢٜىٰكِ،
ذَاعَ كُمَ كَوَرْدَكٜىٰ حَرْ أَبَدَا؞
11أَ رَانَرْ نَنْ كِنْجَا بَايَ دَغَ یَنْعُوَنْكِ،
دَ بَاڧِ سُكَ شِغَ ڧُواْڢُواْڢِنْسُ؞
كٜىٰ عٜىٰدُوامْ، كِنْ ذَمَ كَمَرْ طَيَ
دَغَ ثِكِنْ أَبُواْكَنْ غَابَا
سَعَدَّ سُكَ ݣُوشِ أَرْزِڧِنْ عُرُوشَلِيمَ
سُكَ كُمَ جٜىٰڢَ ڧُرِعَ عَكَنْسُ!
12«بَدَيْدَيْ بَنٜىٰ،
كِكَ ڟَيَ كِنَيِ وَیَنْعُوَنْكِ كَلُّوانْ رٜىٰنِ،
أَ رَانَرْ دَ عَكٜىٰ كَيْسُ بَوْتَا أَوَتَ ڧَسَا؞
بَدَيْدَيْ بَنٜىٰ،
كِكَيِ ڢَضٍ ثِكِ
عَكَنْ وَهَلَرْ مُتَنٜىٰنْ يَهُودَ،
أَ رَانَرْ دَ عَكَ هَلَكَاسُ؞
بَدَيْدَيْ بَنٜىٰ،
كِكَيِ مَغَنَرْ دَارِيَا أَ رَانَرْ وَهَلَرْسُ؞
13بَ دَيْدَيْ بَنٜىٰ،
كِكَ شِغَ بِرْنِنْ مُتَنٜىٰنَ إِسْرَٰٓءِيلَ،
كِكَ ݣُوشِ كَايَ أَ لُواْكَثِنْ مَسِيڢَرْسُ؞
لَلَّيْ بَدَيْدَيْ بَنٜىٰ،
كِكَيِ مُرْنَ أَ رَانَرْ مَسِيڢَرْسُ؞
بَدَيْدَيْ بَنٜىٰ،
كِكَ ݣُوشِ كَايَنْسُ أَ رَانَرْ وَهَلَرْسُ؞
14بَدَيْدَيْ بَنٜىٰ،
كِكَ ڟَيَ أَ عِنْدَ هَنْيُواْيِ سُنْ حَطُ
كِنَ كَكَّشٜىٰ مَاسُ ڧُواْڧَرِنْ غُدُ؞
بَدَيْدَيْ بَنٜىٰ،
كِكَ بَادَ وَطَنْدَ سُكَ غُدُ
أَ حَنُّنْ أَبُواْكَنْ غَابَنْسُ،
أَ رَانَرْ دَ مَسِيڢَ تَسَامٜىٰسُ؞»
ذَاعَ حُكُنْتَ أَلْعُمَّيْ
15«رَانَرْ دَنِے يَهْوٜىٰهْ
ذَنْ شَرْعَنْتَ دُكَنْ أَلْعُمَّيْ تَيِكُسَ؞
يَدَّ كِكَيِ وَ إِسْرَٰٓءِيلَ، حَكَ ذَاعَيِ مِكِ،
دُكَنْ مُغُنْتَارْكِ ذَاتَكُواْمَ عَكَنْكِ؞
16كَمَرْ يَدَّ مُتَنٜىٰنَ
سُكَشَا عَݣُوڢْ نَحُكُنْثِ مَيْ طَاثِ
عَكَنْ تُدُنَ مَيْ ڟَرْكِے،
حَكَ سَوْرَنْ أَلْعُمَّيْ ذَاسُ شَا وَهَلَ،
ذَاسُيِ تَشَا حَرْ سُٻَثٜىٰ دَغَ دُونِيَا؞»
نَصَرَرْ إِسْرَٰٓءِيلَ عَڧَرْشٜىٰ
17«عَمَّا عَتُدُنْ سِهِيُواْنَ،
ضَغُواْوَرْ مُتَنٜىٰ ذَاسُ ڟِيرَا،
ذَيْ كُمَ ذَمَ وُرِے مَيْ ڟَرْكِے؞
ذُرِيَرْ يَعْڧُوبَ ذَاسُ سَاكٜىٰ مَلَّكِ
أَبِنْ غَادُوانْسُ؞
18ذُرِيَرْ يَعْڧُوبَ ذَاتَ ذَمَ كَمَرْ وُتَا،
غِدَنْ يُوسُڢَ كَمَرْ هَرْشٜىٰنْ وُتَا؞
عَمَّا عٜىٰدُوامْ ذَاتَ ذَمَ بُوسَشِّيَرْ ثِيَوَ،
إِسْرَٰٓءِيلَ ذَاتَ ڧُواْنٜىٰسُ تَثِنْيٜىٰسُ؞
بَابُ مُتُمِنْ دَ ذَيْ ضَغٜىٰ دَغَ غِدَنْ إِسُوَ؞
نِے يَهْوٜىٰهْ نَا ڢَطَا؞»
19«مُتَنٜىٰنْ نٜىٰغٜىٰبْ عَكُدُ
ذَاسُ مَلَّكِ تُدَّنْ إِسُوَ؞
وَطَنْدَ سُكٜىٰ عَڧأَنَانً تُدَّنْ يَهُودَ،
ذَاسُ مَلَّكِ ڢِيلَيٜىٰنْ ڢِلِسْتِيَاوَا،
سُكُمَ مَلَّكِ ڧَسَرْ إِڢْرَيِمْ دَ سَمَرِيَ؞
ذُرِيَرْ بِلِيَامِنُ كُمَ
ذَاسُ مَلَّكِ يَنْكِنْ غِلٜىٰيَدْ؞
20طُمْبُنْ مُتَنٜىٰنْ إِسْرَٰٓءِيلَ
وَطَنْدَ عَكَ كَيْ بَوْتَا،
ذَاسُ دَاوُاْ سُمَلَّكِ ڧَسَرْ كَنْعَنِيَاوَا
حَرْ ذُوَا يَنْكِنْ ظَرٜىٰڢَتْ؞
مُتَنٜىٰنْ عُرُوشَلِيمَ
وَطَنْدَ عَكَ كَيْ بَوْتَا أَ سٜىٰڢَرَدْ
ذَاسُ دَاوُاْ سُمَلَّكِ غَرُضُوً نٜىٰغٜىٰبْ عَكُدُ؞
21وَطَنْدَ سُكَثِ نَصَرَا
ذَاسُ هَوْرَ تُدُنْ سِهِيُواْنَ أَ عُرُوشَلِيمَ
سُمَلَّكِ تُدَّنْ إِسُوَ،
يَهْوٜىٰهْ دَ كَنْسَ نٜىٰ ذَيْ ذَمَ مَيْ مُلْكٍ!»
Currently Selected:
عُواْبَدِيَ 1: hauAS
Highlight
Copy
Compare
Share
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
