هِظْڧِيَالْ 36
36
أَلْبَرْكَرْ اللَّهْ عَكَنْ إِسْرَٰٓءِيلَ
1 يَهْوٜىٰهْ يَثٜىٰ مِنِ «يَا كَيْ طَنْ مُتُمْ، كَيِ أَنَّبْثِ عَكَنْ تُدَّنْ إِسْرَٰٓءِيلَ، كَثٜىٰ، ‹يَا تُدَّنْ إِسْرَٰٓءِيلَ كُجِ مَغَنَرْ يَهْوٜىٰهْ؞ 2إِنْجِنِ عُبَنْغِجِ يَهْوٜىٰهْ، غَاشِ، أَبُواْكَنْ غَابَنْكُ سُنْثٜىٰ «مَادَلَّ! وَطَنَّنْ ڟُواْڢَڢِّنْ تُدَّيْ نَ إِسْرَٰٓءِيلَ سُنْ ذَمَ مَلَّكَرْمُ يَنْذُ؞» › 3تُواْ، سَيْ كَيِ أَنَّبْثِ كَثٜىٰ، ‹إِنْجِنِ عُبَنْغِجِ يَهْوٜىٰهْ، غَاشِ، أَبُواْكَنْ غَابَا سُنْ مَيْدَكُو كُڢَيْ، بُوسَشِّيَرْ ڧَسَا مَرَرْ أَمْڢَانِ، سُنْ مُرْڧُشٜىٰكُ عَتَكُواْوَثٜىٰ ڢُسْكَ، حَرْ كُنْ ذَمَ أَبِنْ مَلَّكَ نَسَوْرَنْ أَلْعُمَّيْ، كُمَ كُنْ ذَمَ أَبِنْ بَعَ دَ أَبِنْ مُوغُنْ ڢَتَ عَثِكِنْ مُتَنٜىٰ؞ 4سَبُواْدَ حَكَ، يَا تُدَّنْ إِسْرَٰٓءِيلَ، كُجِ مَغَنَرْ عُبَنْغِجِ يَهْوٜىٰهْ؞ غَا أَبِنْدَ عُبَنْغِجِ يَهْوٜىٰهْ يَكٜىٰ ڢَطَا مُكُ، يَا كُو مَنْيَ دَ ڧأَنَانً تُدَّيْ دَ مَٻُٻُّغَرْ ضُوَ دَ ݣُورُرُوَ دَ كُڢَيْ دَ بُوسَشِّيَرْ ڧَسَا مَرَرْ أَمْڢَانِ دَ غَرُضُوً دَ عَكَ يَاشٜىٰسُ، وَطَنْدَ سُكَ ذَمَ أَبِنْدَ عَكَ ݣُوسَ دَ أَبِنْ بَعَ غَ سَوْرَنْ دُكَنْ أَلْعُمَّنْ دَسُكٜىٰ كٜىٰوَيٜىٰ دَكُو؞ 5إِنْجِنِ عُبَنْغِجِ يَهْوٜىٰهْ، حَڧِيڧَ، نَيِ مَغَنَ ثِكِنْ ذَاڢِنْ كِيشِنَ نَيِنْ غَابَادَ سَوْرَنْ أَلْعُمَّيْ، مُسَمَّنْ دُكَنْ عٜىٰدُوامْ؞ أَلْعُمَّنَّنْ سُنْ طَوْكِ ڧَسَاتَ سُنْ مَيْدَ عِتَ أَبِنْ مَلَّكَرْسُ؞ دَ دُكَنْ ذُوثِيَارْسُ سُنَ ڢَضٍ ثِكِ دَ رٜىٰنِ ثٜىٰوَ سُنْ ݣُوشٜىٰ تَغَنِمَ؞›
6«دُواْمِنْ حَكَ ڢَا، سَيْ كَيِ أَنَّبْثِ عَكَنْ ڧَسَرْ إِسْرَٰٓءِيلَ، كَثٜىٰ وَ مَنْيَ دَ ڧأَنَانً تُدَّيْ دَ مَٻُٻُّغَرْ ضُوَ دَ ݣُورُرُوَ كَثٜىٰ، ‹إِنْجِنِ عُبَنْغِجِ يَهْوٜىٰهْ، إِنَ يِنْ مَغَنَ ثِكِنْ ذَاڢِنْ كِيشِنَ سَبُواْدَ ثِكَكِّيَرْ ڧَوْنَرْ دَ نَكٜىٰ دَ عِتَ دُواْمِنْكُ، غَمَا كُنْ شَا ذَاغِ أَوُرِنْ أَلْعُمَّيْ؞ 7إِنْجِنِ عُبَنْغِجِ يَهْوٜىٰهْ نَا ضَنْڟٜىٰ ثٜىٰوَ دُكَنْ أَلْعُمَّنْ دَسُكٜىٰ كٜىٰوَيٜىٰ دَكُو، سُو مَا ذَاسُ شَا ذَاغِ؞ 8عَمَّا كُو، يَا كُو تُدَّنْ إِسْرَٰٓءِيلَ، ذَاكُ مِيڧَ رَسَّنْكُ، كُبَادَ أَمْڢَانِ غَ مُتَنٜىٰنَ إِسْرَٰٓءِيلَ، غَمَا بَدَ دَطٜىٰوَبَ ذَاسُ دَاوُاْ غِدَا؞ 9غَاشِ ڢَا، ذَنْلُورَ دَكُو، ذَنْ جُويُواْ وُرِنْكُ دَ أَلْحٜىٰرِ؞ ذَاعَ نُواْمٜىٰ ڧَسَرْكُ عَيِ شُوكَ؞ 10ذَنْسَا دُكَنْ غِدَنْ إِسْرَٰٓءِيلَ سُيِ تَڧَارُوَ؞ ذَنْسَا غَرُرُوَ سُثِكَ دَ مُتَنٜىٰ حَرْ مَا أَ سَاكٜىٰ غِنَا وُرَارٜىٰنْ دَ سُكَ ذَمَ كُڢَيْ، بُوسَشِّيَرْ ڧَسَا مَرَرْ أَمْڢَانِ؞ 11ذَنْسَا سُيِ تَڧَارُوَ، بَمُتُمْ كَطَيْبَ، عَمَّا دُكْ دَ دَبُّواْبِنْكُ؞ ذَاسُ يَلْوَتَ سُواْسَيْ؞ ذَنْ كُمَسَا كُذَوْنَ عَثِكِ كَمَرْ دَا، سَعَنً ذَنْ نُونَ مُكُ أَلْحٜىٰرِ ڢِيٜىٰدَ دَا؞ تَهَكَ ذَاكُ سَنِ ثٜىٰوَ نِنٜىٰ يَهْوٜىٰهْ؞ 12عِ، ذَنْسَا مُتَنٜىٰ سُتَاكَ عَكَنْكُ، وَتُواْ جَمَعَرْتَ إِسْرَٰٓءِيلَ، ذَاسُ مَلَّكٜىٰكُ، ذَاكُ كُوَ ذَمَ أَبِنْ غَادُوانْسُ؞ بَذَاكُ ڧَارَ سَا سُرَسَ یَیَنْسُبَ كُمَ؞
13« ‹إِنْجِنِ عُبَنْغِجِ يَهْوٜىٰهْ، أَلْعُمَّيْ سُنْ ثٜىٰمُكُ «كُنْ ثِنْيٜىٰ مُتَنٜىٰ، كُنْ سَا سُنْ رَسَ یَیَنْ أَلْعُمَّرْكُ؞» غَسْكِيَ نٜىٰ؞ 14عَمَّا حَڧِيڧَ، بَذَاكُ ڧَارَ ثِنْيٜىٰ مُتَنٜىٰبَ كُمَ، بَكُوَ ذَاكُ ڧَارَسَا أَلْعُمَّرْكُ تَرَسَ یَیَنْتَبَ؞ نِے عُبَنْغِجِ يَهْوٜىٰهْ نَا ڢَطَا؞ 15بَذَنْ ڧَارَ بَرِنْكُ كُشَا ذَاغِ أَ حَنُّنْ أَلْعُمَّيْ بَ كُمَ، بَكُوَ ذَنْبَرْكُ، كُڧَارَ شَنْ ڧَسْڧَنْثِ أَغَبَنْ أَلْعُمَّيْبَ؞ بَذَاكُ كُوَ ڧَارَ ذَمَ دَلِيلِنْ تُنْتُٻٜىٰ غَ مُتَنٜىٰنْكَبَ؞ نِے عُبَنْغِجِ يَهْوٜىٰهْ نَا ڢَطَا؞› »
ذَاأَ غِرْمَمَ سُونَنْ يَهْوٜىٰهْ عَ إِسْرَٰٓءِيلَ
16 يَهْوٜىٰهْ يَسَاكٜىٰيِنْ مَغَنَ دَنِے ثٜىٰوَ 17«يَا كَيْ طَنْ مُتُمْ، سَعَدَّ غِدَنْ إِسْرَٰٓءِيلَ سُكَ ذَوْنَ عَثِكِنْ ڧَسَرْسُ، سُنْ ڧَظَنْتَرْدَ عِتَ تَوُرِنْ هَنْيُواْيِنْسُ دَ أَيُّكَنْسُ؞ هَنْيُواْيِنْسُ أَبِنْ ڨَمَ نٜىٰ أَغَرٜىٰنِ كَمَرْ ڨَمَرْ مَثٜىٰ أَ لُواْكَثِنْ أَلْعَادَرْتَ تَوَتَ؞ 18دُواْمِنْ وَنَّنْ ڢَا، نَظُبَ ڢُشِنَ عَكَنْسُ سَبُواْدَ جِنِنْ دَ سُكَ ظُبَرْ عَثِكِنْ ڧَسَرْدَ كُمَ سَبُواْدَ سُكَ ڧَظَنْتَرْدَ ڧَسَرْدَ غُمَكَنْسُ؞ 19نَوَرْوَاڟَرْ دَسُو عَثِكِنْ أَلْعُمَّيْ، سُكَ كُوَ وَرْوَڟُ كُواْعِنَ ثِكِنْ ڧَسَاشٜىٰنْ دُونِيَا؞ نَحُكُنْتَسُ بِسَغَ هَنْيُواْيِنْسُ دَ أَيُّكَنْسُ؞ 20عَمَّا دُكْ عِنْدَ سُكَ تَڢِے ثِكِنْ أَلْعُمَّيْ سُكَنْيِ بَنْظَ دَ سُونَنَ مَيْ ڟَرْكِے؞ غَمَا أَلْعُمَّيْ سُكَنْيِ مَغَنَ عَكَنْسُ ثٜىٰوَ ‹وَطَنَّنْ جَمَعَرْ يَهْوٜىٰهْ نٜىٰ، دُكْدَهَكَ بَيْ عِيَ كِيَايٜىٰسُ سُذَوْنَ عَڧَسَرْسَبَ؞› 21عَمَّا نِے نَا دَامُ سَبُواْدَ سُونَنَ مَيْ ڟَرْكِے وَنْدَ غِدَنْ إِسْرَٰٓءِيلَ سُكَيِ بَنْظَ دَشِ عَثِكِنْ أَلْعُمَّيْ عِنْدَ سُكَ تَڢِے؞
22«سَبُواْدَ حَكَ، سَيْ كَڢَطَا وَ غِدَنْ إِسْرَٰٓءِيلَ، ‹إِنْجِنِ عُبَنْغِجِ يَهْوٜىٰهْ، بَ دُواْمِنْكُ نٜىٰ، يَا غِدَنْ إِسْرَٰٓءِيلَ، ذَنْيِ وَنِ أَبُبَ، عَمَّا دُواْمِنْ أَغِرْمَمَ سُونَنَ مَيْ ڟَرْكِے نٜىٰ وَنْدَ كُكَيِ بَنْظَ دَشِ عَثِكِنْ أَلْعُمَّيْ عِنْدَ كُكَتَڢِے؞ 23ذَنْ ڟَرْكَكٜىٰ سُونَنَ مَيْغِرْمَ، سُونَنْ دَ كُكَيِ بَنْظَ دَشِ عَثِكِنْ أَلْعُمَّيْ، كُكَ كُمَ ٻَاتَشِ أَڟَكِيَرْسُ؞ سَعَنً أَلْعُمَّيْ ذَاسُ سَنِ ثٜىٰوَ نِنٜىٰ يَهْوٜىٰهْ؞ نِے عُبَنْغِجِ يَهْوٜىٰهْ نَا ڢَطَا ثٜىٰوَ ذَنْ نُونَ ڟَرْكِنَ تَوُرِنْكُ أَعِدُوانْسُ؞ 24ذَنْ تَتَّرَاكُ دَغَ ثِكِنْ أَلْعُمَّيْ دَغَ ثِكِنْ دُكَنْ ڧَسَاشٜىٰ ذَنْ طَوْكٜىٰكُ إِنْ دَاوُاْ دَ ڧَسَرْكُ؞ 25ذَنْ يَيَّڢَا مُكُ ضُوَ مَيْ ڟَبْتَ، ذَاعَ كُوَ ڟَبْتَثٜىٰكُ دَغَ دُكَنْ ڧَظَنْتَرْكُ، إِنْكُمَ ڟَبْتَثٜىٰكُ دَغَ دُكَنْ غُمَكَنْكُ؞ 26ذَنْ بَاكُ سَابُوَرْ ذُوثِيَا، إِنْكُمَسَا سَابُوانْ رُوحُ عَثِكِنْكُ؞ ذَنْ كَوَرْ مُكُ دَ ذُوثِيَا تَدُوڟٜىٰ دَغَ جِكِنْكُ، إِنْ بَاكُ ذُوثِيَا مَيْ لَوْشِ؞#هِظْ 11.19؛ 18.31؛ 2 كُوارْ 3.3 27ذَنْسَا رُوحُنَ عَثِكِنْكُ، إِنْكُمَسَا كُبِے ڧَٰعِدُواْدِنَ، كُكِيَايٜىٰ عُمَرْنَيْنَ ثِكِنْ أَمِنْثِ؞#هِظْ 37.14؛ 1 تَسْ 4.8 28سَعَنً ذَاكُ ذَوْنَ عَثِكِنْ ڧَسَرْدَ نَبَا كَاكَنِّنْكُ؞ ذَاكُ ذَمَ مُتَنٜىٰنَ، نِے كُمَ إِنْ ذَمَ اللَّهْ نْكُ؞ 29ذَنْثٜىٰثٜىٰكُ دَغَ دُكَنْ ڧَظَنْتَرْكُ، ذَنْ كُمَسَا حَڟِ يَيَلْوَتَ، بَكُوَ ذَنْ بَرْ يُنْوَ تَسَامٜىٰكُبَ؞ 30ذَنْسَا یَیَنْ عِتَتُوَنْكُ دَ أَمْڢَانِنْ غُواْنَرْكُ سُيَلْوَتَ، دُواْمِنْ كَدَ كُڧَارَ شَنْ وَهَلَ دَ كُنْيَا سَبُواْدَ يُنْوَ عَثِكِنْ أَلْعُمَّيْ؞ 31سَعَنً ذَاكُ تُنَ دَ مُوغَيٜىٰنْ هَنْيُواْيِنْكُ دَ أَيُّكَنْكُ مَرَسَ ݣَوْ؞ ذَاكُ كُوَيِ ڨَمَرْ كَنْكُ سَبُواْدَ لَيْڢُواْڢِنْكُ دَ أَيُّكَنْكُ نَبَنْ ڨَمَ؞#هِظْ 6.9؛ 20.43 32بَرِ كُسَنِ ڢَا، بَسَبُواْدَ كَنْكُ نٜىٰ ذَنْيِ وَنَّنْبَ؞ نِے عُبَنْغِجِ يَهْوٜىٰهْ نَا ڢَطَا؞ كُجِ كُنْيَا كُشَا ڧَسْڧَنْثِ سَبُواْدَ هَنْيُواْيِنْ رَايُوَرْكُ، يَا كُو غِدَنْ إِسْرَٰٓءِيلَ؞
33« ‹إِنْجِنِ عُبَنْغِجِ يَهْوٜىٰهْ، أَ رَانَرْدَ نَڟَبْتَثٜىٰكُ دَغَ دُكَنْ لَيْڢُواْڢِنْكُ، ذَنْسَا كُذَوْنَ عَثِكِنْ غَرُرُوَنْكُ، كُكُمَ سَاكٜىٰ غِنَا وُرَارٜىٰنْ دَسُكٜىٰ كُڢَيْ؞ 34ڧَسَرْ دَ تَذَمَ كُڢَيْ أَدَا، ذَاعَ سَاكٜىٰ نُواْمٜىٰتَ، مَيْمَكُواْ تَذَمَ كُڢَيْ كَمَرْ يَدَّ دَا تَكٜىٰ أَعِدُوانْ دُكَنْ مَاسُ وُثٜىٰوَ؞ 35مَاسُ وُثٜىٰوَ ذَاسُثٜىٰ «وَنَّنْ ڧَسَرْدَ تَكٜىٰ كُڢَيْ أَدَا يَنْذُ تَكُواْمُواْ كَمَرْ غُواْنَرْ عَيْدَنْ؞ بِرَنٜىٰنْ دَ سُكَ رُرُّشٜىٰ، سُكَ ذَمَ كُڢَيْ، ڧَسَا مَرَرْ أَمْڢَانِ أَدَا، يَنْذُ سُنْ سَامِ مَاسُ ذَمَ عَثِكِ دَ كَتَنْغَ كٜىٰوَيٜىٰ دَسُو؞» 36سَعَنً دُكَنْ أَلْعُمَّنْ دَ سُكَ رَغُ كٜىٰوَيٜىٰ دَكُو ذَاسُ سَنِ ثٜىٰوَ نِے يَهْوٜىٰهْ نٜىٰ نَسَاكٜىٰ غِنَا وُرَارٜىٰنْ دَ عَكَ رُرُّشٜىٰ، نَسَاكٜىٰ تَادَ وُرَارٜىٰنْ دَ سُكَ ذَمَ كُڢَيْ؞ نِے يَهْوٜىٰهْ نَا ڢَطَا، ذَنْ كُوَ عَيْكَتَ؞
37« ‹إِنْجِنِ عُبَنْغِجِ يَهْوٜىٰهْ، ذَنْ كُمَ يَرْدَ غِدَنْ إِسْرَٰٓءِيلَ سُضُواْڧٜىٰنِ؞ نِے كُوَ ذَنْسَا سُيِيَوَ كَمَرْ غَرْكٜىٰنْ تُمَكِ؞ 38كَمَرْ يَدَّ غَرْكٜىٰنْ تُمَكِ سُكَنْ ثِكَ عُرُوشَلِيمَ أَ لُواْكَثِنْ بُكُكُوَ، حَكَ غَرُضُوً دَ سُكَ ذَمَ كُڢَيْ ذَاسُثِكَ دَ مُتَنٜىٰ؞ سَعَنً ذَاسُسَنِ ثٜىٰوَ نِنٜىٰ يَهْوٜىٰهْ؞› »
Currently Selected:
هِظْڧِيَالْ 36: hauAS
Highlight
Copy
Compare
Share
Want to have your highlights saved across all your devices? Sign up or sign in
Hausa Common Language Ajami Bible © The Bible Society of Nigeria, 2020
