Tànkùt 2
2
Zenu b'a tùn nkàb ndù a leme
1Nshum àm, tshùb ntshob màm,
lé' ntag màm kua'
mebwô,
2nke nkù' ntoṅ num
zenu,
nke mfà ntù o num neju'ni,
3diag zenu,
tsiaṅ zenu,
4diag i mba mèn be ndiag nkàb là,
yoṅ i mba mèn be njoṅ tshunkàb là,
5a be z'o ghù njoṅ tshen nà fa là, mb'o nsi lèn
ju ze nebwôg Nsi be yi là,
mbèn fon ju ze nelèn Nsi be yi là.
6Nummbe nelèn bo zete ke ntum à
ntshu Mbom, z'a be mfà zenu là.
7A be ndem yôg ben tse bo be ben ndaṅndaṅ nà,
ndem tshètntsho ben tse bo be nzin ntùm
nenùn nà.
8A num nkabte tse manze
nunetsine,
nke ntshètte manze tse ben nenùn fa.
9Ndùlala o nsi ju' ju ze
nunetsine, nunenùn bo nu ndaṅndaṅ be yi là;
mba njoṅ manze fa ts'a be nkum num
numebwô là.
Zenu num ntshèt nze nukebwô
10Ndùse zenu nsi se' tu o,
nelèn se ka ntù o nke ndùmt'o là.
11Mba nkwate nsi be num o,
zete ke mbéb o.
12Nkwate tshu'u num manze nukebwô,
ze mènntùn z'a tshwèt ntshob tshô kebwô là,
13ntshu' o mbu ben tse bo ghua' ba manze nu ndaṅndaṅ
num nezin num manze ts'a tam njam nà,
14tshen ben nà be ntsiaṅte ntùm neghù nukebwô,
nke ṅwate ntùm tshùagntù:
15Bo ke nzin à num manze tse neṅu'te,
num manze tse nelamte.
16Nkwat'o bo zenu o nsi kabt'o
num nzwi tum,
num ngon tum z'a ghù ntshob batte là,
17a be ngua' mandum ze bo yi lo ngon nà,
ndagte kàn se bo Nsi i wat là.
18A be z'o nèn num i là mb'o nèn à ntùm vùkob,
ze manze nke nèn à ju
fe ben.
19Sàm mèn netèt ben bo nèn bwe là ke' bèn njam,
ke bèn mfon manze yôg.
20Ndùlala o nsi zin num manze ghaghù
nukebwô,
o nsi tam à num manze ben netsine.
21Nummb'a b'a ben ndaṅndaṅ nsi
bèn tswe ntùm ngô,
ben nenùn nsi bèn ghô bwe.
22Là, bo nsi sô ghatshùagntù
ntùm ngô,
tsho' ghatatu bwe à netsho'o.
Currently Selected:
Tànkùt 2: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.