Nesiaṅe 4
4
Mfa' bon Lévi tunndà tunndà bon Kéhat
1Tshùaben tshob Mosé bo Aron ndù: 2Bin siaṅ bon Kéhat netèt bon Lévi, be mba tunndà yub be là, fe num tunndà ba tà tshob. 3Neto'te num ngu'njù ṅam ntat mba tse bo tshùate là tà nèn nkum num ngu'njù ṅam ntàn, njoṅ benntùn fa tse bo ku'ni nefa' metu fa' ntùm ndà mbumte là. 4Tshù mfa' bon Kehat ntùm ndà mbumte li: Men mfa' là b'a ntùm to'ndà nelàne kà miagte; 5ngelaṅ ne nène, netum ntùm mbàn. Aron boa bon tse nsi se' bote nzwe, ndo' nkabte Koṅ kwénta yi. 6Bo nsi yab ngub beloṅ num bwe mbèn nsate mo' nzwe nenàfi num bwe mbe miagte nsu mbwoṅ neket Koṅ yi bwe. 7Bo nsi nyitte mo' nzwe nenàfi num téblé bàn nele'te, ntete nka, ntu' nzenze num neghamte Nsi, bàn nele'te nsi tswe à be bwe njoṅ ngelaṅ fa. 8Bo nsi nyit mo' nzwe meba num bwe. Ndo' mo' nzwe ngub mbeloṅ ndo' ndàm yi nsu mbwoṅ neket téblé bwe. 9Bo nsi lo' mo' nzwe nenàfi, nkabte lambo ndùb yi mba ndambo nke'nke' boa nkab bwembwôge, mba njoṅ nkab mfèt mi bo nabte num nefa' fa' yi là. 10Bo nsi yab tshen tshu là ntùm mo' ngub mbeloṅ, ndo' nkabte tshen njoṅ tshu fa là yi, nket nte num ju nediaṅ ju. 11Bo nsi nyitte mo' nzwe meba num dù' neton tshu bwe z'a b'a gol là, ndo' ngub mbeloṅ nkabte yi, nsu mbwoṅ neket yen dù' neton tshu là bwe. 12Mbèn ndo' njoṅ tshu neghamte Nsi yi fa tse bo num ndo' mfa' yi num ndà Nsi là, njab ntùm mo' nzwe meba, ndo' ngub mbeloṅ nkabte yi nket nte num ju nediaṅ ju yi. 13Bo nsi so bwembwôg ntùm dù' neton tshu, nkabte mo' nzwe meba bwe. 14Nte njoṅ tshu nelo' mfa' fa' yi num bwe, ju nefèt nge'mbwôg yi, ndu'nsô, sofa', ka nesôg ju, njoṅ tshu nefa' yi num tômbwôg neton tshu, nyitte mo' ngub mbeloṅ nkabte yi, nso mbwoṅ neket ju yi bwe. 15Ngelaṅ ze Aron boa nshumnshum tse nsi miagte nekabte dù' nelàne boa njoṅ tshu fa' fa num dù' nelàn nà, nshumnshum Kehat nsi se'e, ngelaṅ ze bo nsi lo ne nèn nà, num nekele, nda' ndù bo ke nsi kwag tshu nelàne, mbwôg ndù kà bo kwù. Tshù mfa' nshumnshum Kehat là, fa' ze bo na' mbètte ndù bo ke mfa' num neket ndà mbumte là.
16Eléazar, nshum ngale'te Aron nsi ghù ze ju z'a ghù nte lag bwe là, a b'a: Mfèt lambo, labinda nelamte, ju nefa' njoṅ ngelaṅ fa, ngù mfèt neyo'o, a ghù mbèn ndôte ndà mbumte boa njoṅ tshu fa ts'a be ntùm bwe là, dù' nelàne mba tse tshu fa'.
17Tshùaben tshob Mosé bo Aron ndù: 18Kà bin te nzwit tunndà Kehat bo biagte yub netèt ben Lévi. 19Tshù ju z'o nsi ghù bo yôg ke bi li: Ngelaṅ ze bo nsi ghebte mbaṅ dù' nelàn nà, Aron boa nshumnshum tse nsi se'e, yab mba we lo mbwe se fa', mbwe ze ju nekele. 20Bo ke nsi tsho ndà, mbwôg neyen mba bo tshwèt nkabte tshu nelàn nà nkwù.
Bon Gerson
21Tshùaben tshob Mosé ndù: 22Siaṅ tunndà Gerson mba tunndà tà yub na' mbe là, mba ze tunndà. 23O nsi siaṅ yub neto'te num ngu'njù ṅam ntat mba tse bo tshùate là, tà nèn nkum num ngu'njù ṅam ntàn, njoṅ benntùn fa tse bo ku'ni nefa' metu fa' ntùm ndà mbumte là. 24Tshù mfa' tunndà Gerson ni, ju ze bo nsi ghù là mba ju ze bo nsi ket là. 25Bo nsi ket nzwe ndà Tshùaben mba ndà mbumte mba ju nelamte; mba ju nekabte num i yi, z'a b'a ngub mbeloṅ nà, mba nzwe nzendà mbumte. 26Nzwe bam ntshundà mba ze nelo' ndiaṅ ndà yi mbume, mba tômbwôg neghamte Nsi, ndeb netaṅ ju yi boa njoṅ tshundà fa ts'a bwô ndù a be là. Bo nsi fa' njoṅ fa' fa z'a bwô ndù bo fa' num tshen dù' là. 27Ntùm mfa' mube, nzwit Gerson nsi ke nju' ntshu Aron boa nshumnshum tse, num njoṅ tshu fa tse bo nsi ket là, mba tse bo nsi fa' là, bin nsi la'te njoṅ tshu fa tse bo nsi ket là. 28Tshù mfa' ntô Gerson nà ntùm ndà mbumte mba njoṅ tshu fa tse bo ke ndôte njam Itamar, nshum ngale'te Aron nà.
Ben Méhari
29O nsi siaṅ tunndà Méhari, be mba tunndà yub lo' mbe yi là, neto'te num tunndà ba tà tshobe. 30O nsi siaṅ yube neto'te num ngu'njù ṅam ntat mba tse bo tshùate là tà nèn nkum ngu'njù ṅam ntàn, tse bo ku'ni nefa' metu fa' ntùm ndà mbumte là. 31Tshù ju ze bo fà ndù bo nke mfa' mbèn nke nket li, num njoṅ mub mfa' num ndà mbumte: Ntù nekut ndà yi, mbwoṅ nediaṅ ju yi, ntom ba', ntun mi. 32Ntom z'a be num sag-ba' bam ntshundà là, ntun mube, ntom netshùb tu ba', ndeb, mba njoṅ tshu fa num ndà ts'a bwô ndù a be là, mba ke lo z'a bwô ndù a be num dù' mfa' mub là. Bin nsi la'te ndèn njoṅ tshu fa tse bo nsi ke ndôte bèn ke nket là. 33Tshù mfa' mi tunndà Méhari ghù mfa' là, njoṅ mfa' mub fa mum ndà mbumte; mbe fa' ndùlala Itamar, nshum ngale'te Aron nke ndôte. 34Mosé ngù Aron mba tàndà ntse'te siaṅ benntùn num tunndà Kehat, tunndà tunndà , neto'te be mba tà tshob na' ntum nà. 35Neto'te num ngu'njù ṅam ntat, mba tse bo tshùate, tà nèn nkum ngu'njù ṅam ntat tse bo ku'ni nefa' metu fa' num ndà mbumte là. 36Benntùn tse bo na' nsiaṅ be tunndà tunndà là lo tum benntùn ntsha' bàa ngù bon tàn nkù sammbàa. 37Gerson: Tshù benntùn ntùm tunndà Kehat ze bo siaṅ nà, tse bo ku'ni nefa' metu fa' num ndà mbumte là. Mosé bo Aron siaṅ benntùn mba Tshùaben na' mbètte Mosé ndù a ghù là. 38Bon Gerson ze bo na' nsiaṅ be tunndà tunndà neto'te num ba tà tshob là, 39neto'te num ngu'njù ṅam ntat mba tse bo tshùate là, tà nèn nkum num ngu'njù ṅam ntàn, tse bo ku'ni nefa' metu fa' num ndà mbumte là. 40Njoṅ benntùn fa tse bo na' nsiaṅ tunndà tunndà; be mba tà tshob na' ntum yi là, ntsha' bàa ngù nkù ntôge. 41Tshen nà b'a benntùn num tunndà Gerson ze bo na' nsiaṅ nà, tse bo na' nku'ni nefa' ntùm ndà mbumte, Mosé bo Aron siaṅ, mba Tshùaben na' mbètte ndù a ghù là. 42Benntùn num tunndà Méhari, tse bo siaṅ tunndà tunndà, 43neto'te num tunndà ba tà tshob, neto'te num ngu'njù ṅam ntat mba tse bo tshùate là, tà nèn nkum ngu'njù ṅam ntàn, njoṅ benntùn fa tse bo ku'ni nefa' num ndà mbumte là, 44tse bo na' nsiaṅ njen be mba tunndà be yi là, ntum ntsha' tat nkù bàa. 45Tshen ni b'a mba bo na' nsiaṅ tunndà Méhari njen nà, Mosé bo Aron siaṅ mba Tshùaben na' ntshob yi là.
46Njoṅ benntùn fa, ntô Lévi, tse Mosé bo Aron na' nsiaṅ be tunndà tunndà, be mba ba tà tshob na' ntum yi là, 47neto'te num ngu'njù ṅam ntat, mba tse bo tshùate là, tà nèn nkum ngu'njù ṅam ntat, tse bo ku'ni nefa' ntùm ndà mbumte là. 48Njoṅ benntùn fa tse bo na' nsiaṅ njen nà na' mb'a benntùn ntsha' fome ngù bon fom nkù tàn. 49Mosé siaṅ benntùn mba Tshùaben tshob yi là, nke ndôte mba se fa' we lo z'a nsi fa' là, mba ju z'a nsi ket là, nsiaṅ benntùn be mba Tshùaben na' ntshob yi ndù a ghù là.
Currently Selected:
Nesiaṅe 4: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
