Nesiaṅe 31
31
Neyagte mba' ba Madian
1Tshùaben tshob Mosé ndù; 2Yagte mba' ba Madian num nukebwô ze bo na' ngù num bon ba Israél là, o a' ghù ndùlala kà mbèn ntèt tunndà o. 3Mosé tshob ba ntùm ngô ndù: Benntùn tum netèt bin nabte wut tshob num ntsho. Bo nsi ma' ba Madian ntsho. Tshùaben nsi yagte mba' ba Madian. 4Bin nèn mba num zit tunndà lo, ntsho' benntùn ntsha' mbùm. 5Bo nèn num ba Israél ntsha'ntsha' nke nsô benntùn ntsha' mbùm num tunndà ntsha' ntshob bà gham, nelo' tshu, nèn ntsho yi. 6Mosé tum yub tshwèt ntsho, benntùn ntsha' mbùm num ta' tunndà, ntum yub boa ngale'te Finéas, nshum Eléazar, ze tshundà dù' nelàne na' mb'a mum mbu mi mba ba nta netô ntshob nu yi là. 7Bo lo nèn ma' ba Madian ntsho mba Tshùaben na' ntshob Mosé, a tshob bo là, zwite bandum fafa; 8mbèn ngù kà nzwite ba fenfen Madian: Evi, Rekem, Suhur, mba Réba, fenfen Madian tàn bo wat Balaam, nshum Béor ṅwi. 9Bon ba Israél lo' zwi Madian boa bon tshob ngù ghandàtsha yi, ṅwat nyàm tshob mba tshu tshob fa. 10Bo ton ngô Madian fa mba tshob mbàn. 11Bo lo' njoṅ bin ntsho mba nyàm nèn yi la' bo. 12Bo lo' ghandàtsha boa tshu fa nèn yi mbwe Mosé bo ngale'te Eléazar mba bwoṅ benntùn bon ba Israél, bo lo' yub nèn yi ntùm mbàn yub tômbo' Moab, kaṅntse Yordan, Yériko be mo' yoṅ ntse.
13Mosé, ngale'te Eléazar, mba ghakwé mbwe benntùn nèn ntèt yube, bo ke yoṅ ntsho ntùm mbàn. 14Mosé ya ntù ghakwé mbwe benntùn tse bo na' ntsho' yub ndù bo lo' bwoṅ ghama' ntsho, ghatô benntùn ntsha'ntsha' boa nkù nkù tse bo ke mfe tshwèt ntsho là. 15A tshob bo ndù: A b'a ke, bin faṅ bènnzwi ke zwite à? 16Nummbe #Nes. 25.1-9a na' mb'a bènnzwi, ngelaṅ ntsha Balaam bèn ntènte ba Israél ndù kà bo ju' ntshu Tshùaben, ngelaṅ ntsha' mà Péor, kà ngokèt ndùb tshùb ntse'te ben Tshùaben. 17Ndonni, bin zwite njoṅ bandum mba njoṅ bènnzwi fa tse bo lèn bandum nà. 18Kà bin zwite bonngon tse bo ke' lèn bandum nà, bin faṅ yub ndùlala, bo tù' kuan tsine. 19Zin tu wut, bin tswe à njam mbàn ke tsho ntùm mbàn num lé'njù sammbàa, bin ze, bin zwi mèn, ke nekwag fe mèn nà, bin nsi lànte wut num mbatte lé'njù tat bo mbatte lé'njù sammbàa; bin nsi ghù ndùlala mba ghandàtsha tsine. 20Bin nsi ghù be ndaṅndaṅ num ba nzwe ke tam, tshu ngub, tshu tse bo lo' à nyiaṅ mbwe kà mba' yi là, tshu tse bo lo' à tù kà nkom yi là, bin lànte mba tshen nà.
21Ngale'te Eléazar tshob ghama' ntsho tse bo fe tshwèt ntsho là ndù: Tshù mba ntshù' ze Tshùaben na' mfà Mosé tshwèt nke ntshob li ndù. 22A b'a nda' tùn gol, silba, tùn meba, fe, 23boa njoṅ tshu fa ts'a ke' be kù là, bin nsi lo' ntse nelànte ju, lànte yub yi. Njoṅ tshu fa' ts'a num nkù là, bin ma' ntse. 24Bin nsi sôg nzwe tsin num lé'njù sammbàa kà tù' ben nelàne, bin nsi ghù ndùlala kà tsho ntùm mbàn.
Neghabte ntsi' ntsho
25Tshùaben tshob Mosé ndù: 26Yu tu wut mba ngale'te Eléazar, mba ghakwé mbwe ntùm tunndà, bin siaṅ njoṅ benntùn mba njoṅ tshu fa tse bo fe yi tshwèt ntsho là, benntùn mba nyàm. 27O nsi ghabte tshen ntsi' ntsho là ghama' ntsho tse bo fe ntsho là mba ntse'te. 28O nsi kwé ze ju Tshùaben ghama' ntsho, ta' mèn num tu ben nkù tàn, nyàm nkù tàn, nyàmna', kekwène, mba nyàm nke'nke'e. 29Bin nsi kwé yen ju là, bo lo' à num ju ze bo kwé là. Bin fà ngale'te Eléazar; a be ze ju Tshùaben z'a num nkwé num ju ze mèn ghù là. 30Mbe se' num ze ju bon ba Israél, bo nèn num benntùn ṅam ntàn, ndo' ta' mèn, nèn num nyàmna', kekwène, nyàm nke'nke'e, num njoṅ i fa, bin lo' ta' i ntshù' num ṅam ntàn mfà tunndà Lévi, tse bo num mfa' num ndà Tshùaben nà.
31Mosé bo ngale'te Eléazar ghù ju ze Tshùaben na' ntshob Mosé ndù a tshob benntùn nà. 32Tshu tse bo na' ngom tshwèt ntsho là, tse bo na' ngabte a tù' là, tse nke'nke'e 675 000. 33Tse ndùbndùb 72 000, 34kekwène be 61 000; 35nse' num benntùn, yen nà la't'a ndù bènnzwi tse bo nandà là, bo be 32 000, 36bo ghabte tshen tshu nze bàa, bag i z'a na' nèn ghama' ntsho là na' mb'a nyàm nke'nke' 337 000; 37ze ju Tshùaben ze bo na' nsô num tshen tshu là tum nyàm 675; 38nyàmna' 36 000; ze ju Tshùaben tum nyàmna' 72, 39kekwène 30 500; ze ju Tshùaben tum 61; 40num benntùn 16 000; tse Tshùaben z'a ghù bwe là be benntùn 32. 41Mosé fà ju z'a na' ndo' num bwe là ngale'te Eléazar; mba Tshùaben na' ndiag là. 42Mo' bag ju ze bo na' ngabte ghama' ntsho a tù' là be benntùn, ntse'te ba ntùm ngô, ze Mosé na' nsô là. 43Yen bag i là z'a na' ntù' mbe ze ba ntùm ngô là na' mb'a: Nyàm nke'nke'e 337 000; 44nyàmna' 36 000, 45kekwène 30 500; 46ngù benntùn 16 000; 47Mosé lo' ze ju Tshùaben num tshu bon ba Israél ta' mèn num benntùn ṅam ntàn, ta' nyàm num nyàm ṅam ntàn mfà tunndà Lévi ze bo num mfa' num ndà Tshùaben, be mba Tshùaben na' ntshob yi là.
Nefà ju bwôntù Nsi
48Benntùn tse bo na' mbe tshwèt ntsho nke ntshagte ghama' ntsho ntsha' mbùm, nkù nkù là, ghebte mbaṅ Mosé ntshob yi ndù. 49Kuan tsho siaṅ benntùn tse bag na' nke ntô tshwèt ntsho là, mba ta' i ke tsi bwe. 50Ndùlala, tshù tshu tse bag se' yi mbwe Tshùaben ndù bo biagte nukebwô ben tshag yi mbwe Tshùaben ni: Tshù tùn gol, mbwô, kwa ntu bu, mba'ntoṅ boa tshu neghette tù, tse mba we lo fon nà. 51Mosé bo ngale'te Eléazar kwé gol là bo, a na' mb'a tshu ndù bo ndo' a mbu kà nabte yi là. 52Tshu tùn gol, tse bo na' nkwé a be tse Tshùaben nà na' mb'a: Ndô nkàb 16 750, tse ghatô ghama' ntsho ntsha'ntsha' mba nkù nkù, na' mfà là. 53Ba soyé nke ndo' ntsha', a nke ntsho be bam mba zit mèn no netèt bo. 54Mosé bo ngale'te Eléazar kwé sen tùn gol là bu ghatô ghama' ntsho ntsha'ntsha' mba nkù nkù, ndo' nèn yi ntùm ndà mbumte a be ju nekwimte bon ba Israél mbwe Tshùaben.
Currently Selected:
Nesiaṅe 31: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
