Nesiaṅe 29
29
Num lé'jùa nefà ku'u
(Lev. 23.23-25)
1Num mbwe lé'njù ntùm maṅwù sammbàa, bin nsi ghù ntse'te nelàne, kà bin fa' sàm fa' neta. A b'a lé'njù netô nta mfà ku'u. 2Bin nsi fà ju neton a kù, z'a lamte là Tshùaben, a nsi b'a: Ta' ndu mfô, ta' kekomnjù, bon njùmbwe sammbàa tse bo tswe tamngu' là, ze mbit ke' be num bo là, 3ngù ju nefà mbab bàn, ndù bo tshwibte bo mfèt, nze tat num nze gham num ndu mfô, nze bàa num nze gham num kekomnjù. 4Num bon njùmbwe sammbàa, bo nke ndo' nze ntshù' num nze gham num ta' mén njùmbwe, 5nkwi'te num ta' fot mbwe num nebiagte nukebwô, num mat nebiagte yi num lén sine. 6Ke tamte num ju neton a kù mba tshu nefà, mba tse nemiag tse bin num ngù num ntshùa maṅwù là, a be ju neghù num njoṅ ngelaṅ fa là, ngù be mat ze bin num nto' ngù là. A b'a jujù ze ywèt tse num ndamte Tshùaben nà.
Num mà lé'njù nefà lagte
(Lev. 23.26-32)
7Num #Lev. 16.29-34lé'njù gham, be num yen maṅwù là, bin ghù lé'njù nelàne, ntswe ke jù ju, ke fa' sàm fa' neta. 8Bin nsi ton nyàm tse nelamte Tshùaben, a b'a ta' ndu mfô, ta' kekomnjù, ngù bon njùmbwe ke mbit sammbàa, tse bo tswe tamngu' là, 9ngù ju nefà, mbab bàn ndù bo tshwibte mfèt, nze tat num nze gham num ta' ndu mfô, nze bàa num nze gham, 10num ta' mén njùmbwe num bon njùmbwe sammbàa. 11Kà ngù ta' fot mbwe num nele'te num nukebwô, kà mbèn ngù ju nele'te num nukebwô num lé'njù nelagte nukebwô ze ndùb, mba ju neton a kù, bo ju nefà num nemiage.
Num lé'njù jùa ntùm ntàb
(Lev. 23.33-44)
12Num lé'njù ntshob tàn gham, num maṅwù sammbàa, bin nsi ghù ntse'te nelàne. Kà bin fa' sàm fa' neta. Bin nsi tsiaṅte num lén Tshùaben num lé'njù sammbàa. 13Bin nsi fà ju nelamte Tshùaben, a b'a du mfô ntshob tat gham, nkekomnjù mbàa, bon njùmbwe ntshob kuà gham, nyàm tse bo ke' ghù mbit là; 14ngù ju nefà mbab bàn, ndù bo tshwibte mfèt, nze tat num nze gham mba num zit ta' ndu mfô lo; nze bàa num nze gham mba num zit ta' kekomnjù lo, 15nze ntshù' num nze gham mba num zit mén njùmbwe lo num bon njùmbwe ntshob kuà gham. 16Kà ngù ta' fot mbwe num nelagte nukebwô, ke lagte ju neton a kù, z'a b'a ju neghù njoṅ ngelaṅ fa là, mba ju nefà num nemiag nsi.
17Num mbatte lé'njù bàa, a b'a du mfô ntshob bàa gham, nkekomnjù mbàa, bon njùmbwe tamngu', ke mbit, ntshob kuà gham, 18ngù ju nefà mba tse nemiag num tu ndu mfô, nkekomnjù mba bon njùmbwe, kà bo be be ndù ke lo, ntùm mat neghù; 19ngù ta' fot mbwe num nele'te num nukebwô, ke siaṅ ju neton a kù, mba tshu nefà, mba tse tshu nemiag ts'a num mbe njam bwe là. 20Num lé'njù tat, du mfô ntshob ntshù' gham, nkekomnjù mbàa, bon njùmbwe ntshob kuà gham, tse bo tswe tamngu' là, nyàm ke mbit. 21Ngù ju nefà, mba ju nemiag num du mfô, nkekomnjù, mba bon njùmbwe, ke bo be be ndù ke lo, ntùm mat neghù, 22ngù ta' fot mbwe num nele'te num nukebwô, ke siaṅ tshu neton a kù, ju neghù njoṅ ngelaṅ fa, ngù ju nefà mba ze nemiage, z'a num ntum njam bwe là. 23Num mbatte lé'njù kuà, du mfô gham ntùm mat neghù. Nkekomnjù mbàa, bon njùmbwe ntshob kuà gham, tse bo kum tamngu' là, nyàm ke mbit. 24Ngù ju nefà mba ju nemiag nsi num du mfô, nkekomnjù mba bon njùmbwe; kà bo be be ndù ke lo, ntùm mat neghù. 25Kà ngù ta' fot mbwe num nele'te num nukebwô, ke siaṅ ju neton a kù bo ju nefà mba ze nemiag nsi z'a num mbe njam bwe là ntùm mat neghù là. 26Num mbatte lé'njù tàn, du mfô bwe'e, nkekomnjù mbàa, bon njùmbwe ntshob kuà gham tse bo tswe tamngu' là, nyàm ke mbit. 27Ngù ju nefà mba tshu nemiag nsi num du mfô, nkekomnjù, bon njùmbwe, ke bo be be ndù ke lo, ntùm mat neghù. 28Kà ngù ta' fot mbwe num nele'te num nukebwô, ke siaṅ ju neton a kù, bo ju nefà mba tshu nemiag nsi, ts'a be mbe njam bwe là. 29Num lé'njù ntôge, du mfô fome, nkekomnjù mbàa, bon njùmbwe ntshob kuà gham, tse bo kum tamngu' là, nyàm ke mbit. 30Ngù ju nefà mba ju nemiag nsi num du mfô, nkekomnjù, bon njùmbwe kà bo be be ndù ke lo, ntùm mat neghù. 31Kà ngù ta' fot mbwe num nele'te num nukebwô, ke siaṅ ju neton a kù, bo ze ju nefà mba tshu nemiag nsi z'a num mbe njam bwe là, ntùm mat neghù. 32Num lé'njù sammbàa, du mfô sammbàa, nkekomnjù mbàa, bon njùmbwe ntshob kuà gham, tse bo kum tamngu' là, nyàm ke mbit. 33Ngù ju nefà, mba tse nemiag nsi num du mfô, nkekomnjù, bon njùmbwe ke bo be be ndù ke lo ntùm mat neghù. 34Kà nkwi'te ta' fot mbwe num nele'te num nukebwô, ke siaṅ ju neton a kù, ju ke tag, bo ze ju nefà mba tshu nemiag nsi, ts'a num mbe njam bwe là.
35Num lé'njù fome, a b'a miagte lé'njù ndùb, kà bin fa' sàm fa' neta. 36Bin nsi lo' ju neton a kù, ju nelamte, nèn yi mbwe Tshùaben, a b'a: Ndu mfô, ta' kekomnjù, bon njùmbwe tamngu' sammbàa, nyàm ke mbit. 37Kà ngù ju nefà mba tse nemiag nsi num ndu mfô, kekomnjù boa bon njùmbwe, ke bo be be ndù ke lo, ntùm mat neghù. 38Kà ngù ta' fot mbwe num nele'te num nukebwô, ke siaṅ ju neton a kù, ke bate, ngù ze ju nefà mba ju nemiag nsi, ts'a be njam bwe là.
39Tshù ju ze bin nsi fà Tshùaben num lé'njù ze bo nsi la'te bin nà, ke tamte num tsin tshu nefà num nele'te ntùm zin nekô, ntùm bwôntù; tshu neton a kù, tshu nefà mba mbab bàn, mba tshu nefà num nemiag nsi mba ndu' là, mba tshu nele'te num fite.
Currently Selected:
Nesiaṅe 29: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
