Nesiaṅe 20
20
Ntse Mériba
(Netu. 17.1-7)
1Njoṅ *gi*ntse'te ba Israél fa zin nkum Sin, ntùm mbwe maṅwù, nte ndà Kadèsh. A b'a bwe ze Miriam na' nkwù là, bo tshoṅ i bwe.
2Ntse bwoṅ benntùn, bo tshobte Mosé bo Aron. 3Bo diag Mosé ntsha ntshob ndù: Bag na' nkwù yag mba fèt tshag là, mbwe Tshùaben mb'a bwô. 4Bin na' ndo' ntse'te ben Tshùaben nse' yi num kônkwa numke? Ndù bag kwù mba bwoṅ nyàm tshag ké? 5O na' nsô yag Egipto, nse' yi num yen kebwô dù' li numke? A ke' b'a dù' neywit ju, ke neywit tù neyàm ntàme, ke nebwe nkùa, mba nda' ntse nenu ke bwe. 6Mosé bo Aron faṅ ntse'te, nse' ntshundà mbumte, ngwù nsi kabkab, kuni Tshùaben ṅwag bo. 7Tshùaben tshob Mosé ndù:
8Lo' kôg so, mba mfèl o Aron, ntse'te njoṅ ntse'te fa. Bin nsi tsin mbwe bo, tshob gholoṅ a nsi fà ntse, bin nu. O a' ghù ntse tum num gholoṅ bo nu, mba bwoṅ nyàm tshobe. 9Mosé lo' kôg se s'a na' mbe mbwe Tshùaben nà, ngù be ndaṅndaṅ mb'a tshob là. 10Mosé bo Aron tse'te bwoṅ benntùn mbwe gholoṅ ntshob bo ndù: Bin ju'u me ghatatu, bag ku'ni neghù ntse tum num sen gholoṅ ni ké? 11Mosé bù' bu i tù, ndab gholoṅ yoṅ bàa, ntse tum yàme, bwoṅ benntùn nu, mba bwoṅ nyàm tshobe. 12Tshùaben tshob Mosé bo Aron ndù: Mba bin lo mbe ke ju' ntshu àm, ngamt'àm mbwe ba Israél là, a nsi tshùa ndùlala, bin ke bèn ntshagte yen ntse'te li ntùm ngô ze me na' mfà yi là. 13A b'a ntse Mériba là. Ntse ntsha dù' ze ba Israél na' nkam Tshùaben bwe, a la'te ze nelàn bwe là.
Mfen Edom ke bam ndù Israél tshùa
14Mosé tsin Kadèsh, ntum benntùn mfen Edom ndù: Tshù mba mfèl o Israél tshob li ndù: O lèn njoṅ nge' fa ze bo yen nà. 15Ba tà tshage lo swe' nèn mà Egipto ntswe bwe ngu'njù yàme, ba Egipto ghùtni yage, bag mba tà tshage. 16Bag lo kua' Tshùaben, a ju' nze yag ntum ta' Angél ndù a se' nsô yage. Tshù bag li Kadèsh, ngô z'a be ndù yu ngô là. 17Faṅ yag bag tshùa ntùm yu ngô. Bag ke nsi tshùa ntùm ba nà ke bèn ntshùa ntùm ba nkùa. Bag ke nsi nu tshag ntse tô. Bag nsi zin à be num koṅnze ndùb ndaṅndaṅ, ke nèn bu kwéb, ke nèn bu zwim kà ntôg yu ngô ntshùa.
18Là Edom bùnte yi ndù: O ke nsi tshùa à me la'. O ne ntshùa, mba m'a' sô tshu ntsho bag wù le'. 19Ba Israél tshob yi ndù: Bag nsi ko' à be num manze, a be ze bag nu ntse mu bag à bwoṅ nyàm tshàm nà, mba m'a' fà njoṅ nkàb i wù. Me tshwèt ndon ta' ju wù nda' ntshù': Nezin nku ntshùa. 20Là Edom bùnte ndù: O ke nsi tshùa. Ntshob ndùlala, ntum boa bwoṅ benntùn nke ntshètt'é. 21Edom ghù be ndùlala kà nga mbe kà Israél tshùa ntùm ngô i, ndùlala, Israél kù i nèn ngùanesà.
Vù Aron
22Bo lo Kadèsh, boa mbumte bon Israél, nzin nkum kônga Hor. 23Nkum kônga Hor, ndùngô Edom, Tshùaben tshob Mosé bo Aron ndù: 24Bo nsi sô Aron netèt bin tum i ju ba tà tse, nummb'a ke nsi tsho ntùm ngô ze me nsi fà bon Israél là, mfe nummbe bin na' gha ntshu àm nkaṅ ntse Mériba. 25Lo' Aron bo mén i Eléazar ngù bo ko' nèn kônga Hor. 26O nsi kwé nzwe Aron, ma' num mén i Eléazar. Yen nà be mi, Aron tum netèt bin, ntù' bwe nkwù. 27Mosé ghù be ndaṅndaṅ mba Tshùaben na' bètte yi là, bo lo be mbwe njoṅ mbumte fa nko' nèn kônga Hor. 28Mosé #Netu. 29.29; Nes. 33.38; Neb. 10.6kwé nzwe tse Aron, ma' num mén i Eléazar. Aron tù' nkwù num tu mbat bwe. Ndo, Mosé bo Eléazar bèn nswe' tu mbale. 29Njoṅ mbumte fa yen mbe ze nu Aron yà mi, njoṅ tunndà Israél fa làn i num lé'njù ṅam ntat.
Currently Selected:
Nesiaṅe 20: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
