Nesiaṅe 16
16
Tatu Koré, Datân mba Abirâm
1Koré, #Yu. 11nshum Yiseha, nshum Kehat, nshum Lévi, tènte Datân bo Abirâm, nshum Eliaf bo Ona, nshum Perét, tunndà Rubèn. 2Bo lo boa bon ba Israél benntùn bon tàn nkù bàa, bo nèn ntshobte Mosé. Bo na' mb'a ghalôte ntse'te, benntùn tse ntse'te na' ntsho' yub ndù bo ke ndo' yub nèn yi mbwe là, mbe ghalèn. 3Bo tshobte Mosé bo Aron ndù: Yen njoṅ nu là ku'u. Njoṅ ba ntse'te fa b'a benntùn nelàne, Tshùaben bèn mbe netèt bo. A tshùa à ndù ke, bin nke nko'te wut tsine, nke ndiag netshùa ntse'te Tshùaben à?
4Mosé ju' men ntshob là, ngwù nsi kabkab. 5Ntshob Koré boa bwoṅ benntùn tse bo be njam i là ndù: Nkebnjù ndamnjù, Tshùaben la'te mèn z'a be nkum mèn nà, mèn z'a tsho' i là, mèn z'a ku'ni neghebte mbaṅ i là, mba mèn z'a tsho' i, a ke ngebte mbaṅ i là. 6Tshù ju ze bin nsi ghù li, Koré boa tse ben nsi lo' ka mbwôge, 7ndamnjù, bin yab mbwôg bwe, naṅ ju ze ywèt tse num ndamte là bwe mbwe Tshùaben. Mèn z'a nsi tsho' i là, mb'a b'a mèn ze bo tsho' i là, njoṅ nu fa ku' ndùlala me nshum Lévi.
8Mosé bèn ntshob Koré ndù: Bin ju'u, me bon Lévi. 9A kag bin mba Nsi ba Israél na' ntsho' zin neke ngebte mbaṅ i, num neke mfa' num dù' nelàne, Tshùaben mbèn nke ntsin num tu ntse'te ngelaṅ ze bin fa' fa' num tu yub fa là ké? 10A lo tsho' zin ndù bin ke ngebte mbaṅ i, wù bin à fèt tsho ntô Lévi. Bin tshwèt nke mbètte mo' fa', netù' ghale'te Tshùaben. 11Ndùlala, bèn ngù, kà yu tu wut bin à bwoṅ benntùn tsho, nke nkutte se' kam Tshùaben. Aron b'a we kà bin nke ntshobt'é à?
12Mosé tsiaṅ Datân bo Abirâm bon Eliaf, là bo tshob ndù: Bag ke nsi ko' tshag nèn ntùm ngô. 13A ke' ku' wù mb'o na' sô yag ntùm ngô ze mbùn na' mba ṅwa'a tshwèt nke nswe' bwe mba ntse là, ndo' yag nse' yi bag kwù num kônkwa là ké? O ke' fite netô yag ké? 14Kua' nenùne, nga, o ke' lo' yag nse' yi ntùm ngô ze mbùn na' mba ṅwa' num nke nswe' bwe mba ntse là. O lo ke fà yag ju ntsi', mba nà, mba nkùa. O tshwèt nke ndo' tshen ben ni mba mfùmiag là ké? Bag ke nsi ko'o. 15Mosé ya ntù neshu ntshob Tshùaben ndù: Kà lôte yub ju nefà ngamt'o yi miag mebwô. Me ke' kwé mba nda' kekwèn bo, ke ghù nu z'a bag là mba num ta' mèn ntshù' netèt bo.
Ndon tu Koré, Datân mba Abirâm
16Mosé tshob Koré ndù: Ndamnjù yu tu wut, mba bwoṅ ben tsho, ngù Aron, bin a' be mbwe Tshùaben. 17Mba we lo lo' ze ka mbwôge, bin nsi ma' ju nelamte ntùm bwe, mba we lo tsin mbwe Tshùaben bo ze ka mbwôge. Bo nsi tamte fà ba ka mbwôge bon tàn nkù bàa. Mba wù, ngù Aron, ta' mèn nsi ghù ze ka mbwôge. 18Mba we lo, lo' ze ka mbwôge, njab mbwôg bwe, naṅ ju nelamte ntùm bwe, nèn ntsin ntshundà ndà mbumte boa Mosé mba Aron. 19Koré tse'te tse bwoṅ benntùn mbaṅ i, ntshundà mbumte. Kuni Tshùaben ṅwag njoṅ ntse'te fa. 20Tshùaben tshob Mosé bo Aron ndù: 21Bin sô wut tsin mbaṅ tshen ben ni, me nsi ghù bo mi be ndonni. 22Bo kabte se yub nsi ntshob ndù: O Nsi, ze zwiag njoṅ tshu nenabte fa b'a tô bu o là, ta' mèn ntshù' ghù nukebwô, o ya ntù num njoṅ ntse'te fa ké?
23Tshùaben tshob Mosé ndù: 24Tshob ndù ntse'te lo mbaṅ mbàn Koré, Datân, mba Abirâm. 25Mosé lo nenèn Datân bo Abirâm ba kamkam Israél tam njam i. 26A tshob ntse'te ndù: Bin lo mbaṅ ntàb tshen ghaghù ntù kebwô li, kà bin kwag sàm ju z'a b'a yub là, mbwôg nekwù bin à bo num nukebwô tshobe. 27Benntùn kù mbaṅ dù'ntswe Koré, Datân mba Abirâm. Datân bo Abirâm lo tum ntsin nzendà bo, zwi tshobe, mba bon tshobe, ngù bon bon tshobe. 28Mosé tshob ndù: A nsi tshùa num yen nu li, bin lèn ndù Tshùaben bèn ntum àm, ndù me ghù yen nu li, me ke' ghù à yàm tu. 29A be ze tshen ben ni kwù à vù njoṅ benntùn fa, a be ze nu tsho yube, ntsho num tu njoṅ benntùn fa là, mb'a ke' b'a Tshùaben bèn ntum àm. 30A be ze Tshùaben to' mo' nukebwô, yen a be ze tsha' mi yub boa njoṅ tshob tshu fa là, a be ze bo swe' ntùm nka' nèn ntùm ngô fe ben nà, mba bin nsi lèn ndù tshen ben ni wag Tshùaben. 31Ngelaṅ z'a ke miagte netshob men ntshob li là, tsha' fagte tun nku mube. 32Nga' ntshu i mi yub boa yub tunndà, boa ben Koré mba tse tshu fa. 33Bo swe' nèn ntùm ngô fe ben ntùn boa tshob tshu fa, tsha' kabte yube. Bo mi yub ndùlala netèt ntse'te. 34Njoṅ ba Israél fa ju' mba bo kua' là, nèn nke ntshob ndù: Bag bin kù ndù kà tsha' se' mi be. 35Mbwôg Tshùaben bèt, nkù benntùn bon tàn nkù bàa, ngelaṅ ze bo ke mfà ju nelamte mbwe Nsi là.
Currently Selected:
Nesiaṅe 16: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.
