Nesiaṅe 10

Nta tùn nkàb

1Tshùaben tshob Mosé ndù: 2Ghù bo lo' tùn silba nabte nta yi bàa, bo tswe tùn kà nabte yi; a sage, a ywimte netô ntsiaṅ ntse'te yi, mba netô ngelaṅ nelo ntam manze. 3Ngelaṅ ze bo nsi tô ba nta là, njoṅ benntùn fa tse'te mbaṅ ntshundà mbumte. 4A be ze bo tô nta nda' ntshu ntshù' là, mba nda' ba tà ntse'te tse bo num ntô benntùn ntsha'ntsha' là bèn bumte mbaṅ o. 5Ngelaṅ ze bo tô nta nz'é ta là, mba ba tswe bag ntumnyam bèn nène. 6Ngelaṅ ze bin bèn tô nta mbatte bàa, nz'é ta là, ba tswe bag mà ntèn nèn, ngelaṅ ze bin bèn tô nta mo' yoṅ i nz'é ta là, mb'a ba lèn bo ndù bo bèn nène. 7Mbe se' netsiaṅ mbumte, bin tô nta ke tsin, nz'é ke ta.

8A b'a nshumnshum Aron, ghale'te bèn tô nta. Yen ni b'a ntshù' ke bate ze bin nsi ke ghù netèt bin num njoṅ zwiaṅ benntùn fa là.

9Ngelaṅ ze bin tswe ntùm ngô zine, ntsho kamte zin nà, bin tô nta, nz'é ta, ndo' ngù lèn yi. Ndùlala b'a nekwimte Tshùaben Nsi zin, ndù a kwé zin bu ghakeban tsine. 10Num ba lé'njù tsiaṅte mba lé'njù njùa tsine, bin tô ba nta kà bo ndo' tshu neton a kù, mba tshule'te num fite nèn yi, a ghù Nsi kwimte zine. Me b'a Tshùaben Nsi zin.

NELO SINAÏ NKUM NDÙNSI MOAB

Mba ntôndà nsi lo' zin yi là

11Num mbatte ngu'njù bàa, num lé'njù ṅam mbàa, num maṅwù bàa ndot lo num tu ndà Nsi. 12Bon ba Israél lo tun mbat Sinaï, mba we lo, be mba bo na' nabte là, ndo nèn nkum num kônkwa Aram. 13A na' mb'a mbwe i, mba ba Israél na' ntum nke nèn mba Tshùaben na' ntshob Mosé ndù a tshob bo là.

14Mbwe benntùn nenène na' mb'a mbàn bon Yuda boa tse ntshu ntsho; ze ngatshagte na' mb'a Nason nshum Aminadab. 15Ngatshagte ntshu ntsho tunndà Isakar na' mb'a Nétanél, nshum Suar. 16Ngatshagte ntshu ntsho tunndà Zabulon na' mb'a Eliaf, nshum Hélon. 17Bo tsho'te ndà mbumte bon Gerson boa bon Méhari, ket. 18Benntùn ntùm mbàn Rubèn nèn bo ze ntshu ntsho, ngatshagte ntshu ntsho na' mb'a Elisur, nshum Seder. 19Ngatshagte ntshu ntsho tunndà Siméon na' mb'a Shelumiél nshum Suridaï. 20Ngatshagte ntshu ntsho tunndà Gad be Eliasaf, nshum Deul. 21Bon Kéhat ket yub ndà mbumte, tsemo' nke mbote tshu kà bo nse'e. 22Benntùn ntùm mbàn Efraim boa tse ntshu ntsho lo yub, ze ngatshagte ntshu ntsho tunndà na' mb'a Elishama nshum Aminadab. 23Ngatshagte ntshu ntsho tunndà Manasé na' mb'a Gamliél, nshum Pédatsur. 24Ngatshagte ntshu ntsho bon Benjamin na' mb'a Avidan, nshum Geodoni. 25Nemiagte ndo, num njoṅ mbàn fa na' mb'a Ahiazar, nshum Amisadaï. 26Ngatshagte ntshu ntsho tunndà Aser na' mb'a Pagiel, nshum Akran. 27Ngatshagte ntshu ntsho bon Néftali na' mb'a Ahira, nshum Enan. 28Tshù nka ze njoṅ bon ba Israél na' ndo nke nène, mba tshob ntshu ntsho là. Bo lo nke nène.

Mosé diag ngatshagte yub manze

29Mosé tshob Hodab, nshum Reuél, ze Madian, ntse i ndù; Bag nèn à ntùm ngô ze Tshùaben na' ntshob ndù: Me nsi fà bin nà. Se' bag bin nène. Mba wù yu nsi ghù yu bag ntswe mebwô ntùm yen ngô là ze Tshùaben bù bag là.

30Hodab bùnte yi ndù: Me ke nsi nène. Me nsi nèn à ntùm ngô yage, ntùm tunndà yage. 31Mosé tshob yi ndù: Kà faṅ yage, nummbe o lèn dù' ze bag kut mbàn yag bwe num kônkwa là, o a' be ngatshagte yage. 32A be z'o bam ndù bag bin nèn nà, mb'o nsi ghù yu bag fu' ntùm ntswe mebwô ze Tshùaben bam nefà bag là.

33Bo lo num mbat Tshùaben nezin num lé'njù tat. Koṅ Tshùaben bèn ndo nke mbe mbwe bo num tshen lé'njù tat là, num nelèn dù' ze bo nsi kut mbàn yub bwe là. 34Tshùaben lo nke nkabte yube, mbwôgtshù ngelaṅ ze bo ke ndo ntùm mbàn nà.

35Ngelaṅ #Yobk. 68.2ze bo ke nèn nà, Mosé tshob ndù: Tshùaben lo tù, ghakeban tsho nsi sate, ghamaṅt'o nsi kù mbwe o. 36Ngelaṅ ze bo ke nte Koṅ nsi là, a tshob ndù: Bèn se'e. Bon Israél ba njoṅ kesiaṅ nze bo yàm ntshùa ntambia' bo mba ntshu'ntshu'.

Currently Selected:

Nesiaṅe 10: BMa

Highlight

Copy

Compare