Matio 8
8
1Ngelaṅ Yésu swe' num mbat là, bwoṅ benntùn yàm tam njam i. 2Tshù, mo' ngankin se' ntèl i, ngwù mbwe i, ntshob ndù: Tshùaben, a be z'o kô là, mb'o ku'ni neghù me làn. 3Yésu nyit bu i, nkwag i, ntshob ndù: Me kô, làne. Be kua' ndùse, a sôg ndàne, nkin mi mi. 4Yésu #Lev. 14.1-32tshob yi ndù: Bam nà, kà soṅ mèn, là nèn nda'te wul o ngale'te Nsi, mfà ju neghamte Nsi ze Mosé na' ntshob là, a be yub ju nekwé nta.
5Mba Yésu ke ntsho Kapernaum nà, mo' mfen ba soyé se' ntèl i, mbu' mbu yi, 6ntshob ndù: Tshùaben, mônke' àm num ntùm ndà ndù be'tewut tshùb i, a tshwèt njen nge' neshu. 7Yésu tshob yi ndù: Tu wul àm nsi kum bwe, yat'é. 8Mfen ba soyé bùnte ntshob ndù: Tshùaben, me ke' ku'ni mèn ze be o tsho tun ngàmndà màm nà. Là, tshob ta' ntshob ntshù', mônke' àm nsi yate. 9Nummbe tu wul àm, me b'a mènntùn njam ben ndùbndùb, ndù mba me bèn ngù ba soyé njam àm. Me num ntshob mo' ndù: Nène, a nèn; ntshob mo' ndù se'e, a se', ntshob ngafa' àm ndù: Ghù yen ju li, a ghù. 10Yésu be ju'u, ntshàme, ntshob ben tse bo ke mbwe i là ndù: Kua' nenùne, me tshob bin ndù: Mba ntùm ngô Israél, me ke' yoṅ mfon bamntù ndùb mba yen ni là. 11Là #Luk. 13.29me tshob bin ndù; benntùn yàm nsi fe bag ntumnyam mba bag mbinyam, tswe téblé boa Abraham, Isak mba Yakob ntùm nufen kamànyam. 12Là #Mat. 22.13; 25.30; Luk. 13.28bon nufen, bo nsi sô yube, ma' njù ntùm dù' njame. Nekua' mba nefèt nsô nsi be yen dù' là; 13Yésu tshob mfen ba soyé ndù: Nène, a ghù num o mb'o bam nà. Be ndùse, mônke' là yate.
Mba Yésu yate màntse Pétro là
(Mark. 1.29-34; Luk. 4.38-41)
14Yésu tsho ndà Pétro, njen màntse Pétro ndù a tshwèt ngon saṅtewut. 15Yésu kwag bu i, saṅtewut tum num i, a lo nsi mfa' yi.
16Njù be sène bo lo' ben tse bo ghù ywètkebwô là yàme, nse' yi mbwe Yésu. A lo' ta' ntshob ntshù', nta' ba ywètkebwô yi, a yate ben tse bo na' ntswe kebwô là. 17Ndùlala #Es. 53.4ndù men ntshob li mi Esaya ngatshob ntshob Nsi na' ntshob là, bumte ndù: Tu wul i kwé nge' be mbèn nket ngokèt be num i.
Mb'a bwô ndù mèn tam njam Yésu là
(Luk. 9.57-62)
18Yésu be yen bwoṅ benntùn yàm mbaṅ i, ntshob ndù bo dut nèn mo' yoṅ. 19Mo' ngalèn ṅwa'ni Nsi se' mbwe i, ntshob yi ndù: Ngatswite, m'a' ke mbwe o ntùm njoṅ dù' fa ts'o nsi ke nèn nà. 20Yésu tshob yi ndù: Ba mbàbndun ghù ntô tshobe, bon nsaṅ bèn ngù nkàn tshobe, là Mén mèn ke' ghù dù' neyab tu i bwe, mfite. 21Mo' mèn netèt ghazi'te nu i tshob yi ndù: Tshùaben, bam me ndù me bwôgmbwe nèn ntshoṅ tàa. 22Là Yésu tshob yi ndù: Tam njam àm, faṅ fe ben tshoṅ tshob fe ben.
23Ngelaṅ a tsho ntùm kenu là, ghazi'te nu i tam njam i. 24Tshù, mo' fetmbaṅ lo num dibantse, nyi'te ntse, tà ntse tsho ntùm kenu. Là tu wul i nke nzi. 25Ghazi'te nu i se' mbaṅ i, ntshob ndù: Tshùaben, yôg yage, bag tù' nebi. 26A tshob bo ndù: Numke bin mbwôg à, ghabamntù metsili? A lo nsi, ntshobte fetmbaṅ mba dibantse; dù' tswe ndù kam. 27Tshen ben nà tshàm yen nu là, ntshob ndù: Yen mèn ni b'a we kà mba fetmbaṅ nke nju'ni i à?
Ghaghù ywètkebwô ntùm ngô Gadara
(Mark. 5.1-20; Luk. 8.26-39)
28Ngelaṅ Yésu kum mo' yoṅ dibantse ntùm ngô ba Gadara là, tsemo' ghaghù ywètkebwô bàa tum ntùm ba' tufi, nse' mbwe i; bo lo ke ntshùag neshu kà sàm mèn ke be laṅte netshùa num yen nze là. 29Tshù, bo kua' ntshob ndù: Ke z'o ghù ntùm yag nu, Mén Nsi? O se' à neghùtni yag ke ngelaṅ yoṅ nku' ké? 30Là mo' bwoṅ, ngùnyàm lo be ngùanesà mbaṅ bo, nke njù dù'. 31Ba ywètkebwô bu' mbu yi ntshob ndù: A be z'o ta' yag là, o tum yag netèt yen bwoṅ ngùnyàm nà. 32A tshob bo ndù: Bin nène. Bo tum, nèn ntsho num ba ngùnyàm. Njoṅ bwoṅ ngùnyàm nà bùn tu mbale, nswe' ngwù ntse, mbite ntùm ntse. 33Ben tse bo ke mbéb yub là kù, nèn nkum ntùm ngô, nsoṅ njoṅ nu fa mba nu num nu ghaghù ywètkebwô. 34Tshù, njoṅ benntùn fa ntùm ngô tum, nèn mbwe Yésu. Ngelaṅ bo yen i là, bo bu' mbu yi ndù a tum ntùm ngô yub nène.
Currently Selected:
Matio 8: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.