Matio 20
20
Tànkùt ghafa' ntùm nkùà ndu'
1Nummbe nufen kamànyam fut'a mo' tàndà z'a tum nkebnjù num nelo' ghafa' ntùm nà i là. 2Ngelaṅ boa ghafa' tamte mbe ntshu ntshù' num ta' denario mum lé' fa' là, a tum yub ntùm nà i. 3A bèn ntum num nyam bwe'e, njen tsemo' ndù bo tswe mfagte manze ke ke mfa' sàm ju. 4A tshob mba bo yub ndù: Mba bin zin, bin nèn ntùm nà àm, me nsi fà ju z'a ku'ni là bin. 5Bo nèn. A bèn ntum num njagnyam mba nyam tat ngù be ndaṅndaṅ. 6Num nyam tàn mfetnjù, a bèn ntume, mfon tsemo'o, ndù bo tswe bwe, a tshob bo ndù: Numke bin tswe nsen ni fe nkebnjù ke ke mfa' sàm ju à? 7Bo tshob yi ndù: Nummbe sàm mèn ke' lo' yag fa'. A tshob bo ndù: Mba bin zin, bin nèn ntùm nà àm.
8Njù #Lev. 19.13; Neb. 24.15be sène, tà yen nà là tshob ngatshagte fa' ndù: Tsiaṅ ghafa', mfà nkàbfa' bo, nto' num ba njam nèn nkum num ba mbwe. 9Ben tse bo lo' yub nyam tàn nà se', nkwé denario ntshù' ntshù'. 10Ngelaṅ ba mbwe se' là, bo kwate ndù bo a' kwé ntshùate; là mba bo yub kwé à be denario ntshù' ntshù'. 11Bo be kwé, nke nzwete tun ntô num tàndà, 12ntshob ndù: Tshen ben ni tse bo se' à njam nà fa' à nda' nyam ntshù', o lo' yag bag à bo be ndaṅndaṅ, bag tse bag fènte nge' mba nyam fe nkebnjù là. 13Là, a bùnte mo' ta' i netèt bo ndù: Nshun àm, me ke' ghù ju z'a ke' ku'ni là wù; be lo ke be ntshu ntshù' à num ta' denario ntshù' ké? 14Lo' ju z'a be yu là, nène. Là me kô nefà yen njam mèn ni be ndaṅndaṅ mba wù là. 15Me ke' ku'ni neghù ju ze me kô là tshu ts'a b'a tshàm nà ké? O lôt'àm lag kebwô à mba me be mèn kebwô là ké? 16Ndùlala #Mat. 19.30; Mark. 10.31; Luk. 13.30ba njam nsi tù' ba mbwe, ba mbwe bèn ntù' ba njam.
Mba Yésu bèn nsoṅ vù se là
(Mark. 10.32-34; Luk. 18.31-34)
17Num ngelaṅ Yésu ke nko' nèn Yérusalém nà, a lo' tse ntshob bàa gham tù' bo, ntshob bo num manze ndù: 18Bag bin tshwèt nko' nèn Yérusalém; bo nsi fà Mén mèn mbu ghale'te Nsi tse ndùbndùb mba ghalèn ṅwa'ni Nsi; bo nsi keb ntsha ndù bo zwi i, 19mfà i mbu ghakelèn Nsi ndù bo tshabt'é, ndab i, nkwimt'é num fanta'tù, a be be mbatte lé'njù tat, a lo num vù.
Bon Zèbèdéo
(Mark. 10.35-45)
20Mà bon Zèbèdéo se' mbaṅ Yésu boa bon tse, ngwù nsi kabkab mbwe i, ndon i ju. 21Là Yésu tshob yi ndù: Ke z'o kô à? A tshob yi ndù: Tshob ndù tshen bon tshàm bàa li tswe ntùm nufen su, mo' num bag bu o ze zwim, mo' num ze kwéb. 22Là Yésu bùnte, ntshob ndù: Bin ke' lèn ju ze bin lon nà. Bin ku'ni nenu ntu' ze me nsi nu là ké? Bo tshob yi ndù: Bag ku'ni! 23A tshob bo ndù: A nenùne, bin nsi nu ntu' àm; là, mbe se' mba netswe num bag bu àm ze zwim mba ze kwéb là, a ke' b'a me bèn fà yen nà, là, a b'a ju ben tse Tàa na' nabte num bo là. 24Tse gham lo be ju'u, nja ntù tshen fètfèt bàa là. 25Là #Luk. 22.25-26Yésu tsiaṅ yub mbaṅ i, ntshob ndù: Bin lèn ndù ghatô ngô num ntô i neta, ben ndùbndùb nke ndo' ngù' ngùtni yub yi. 26A #Mat. 23.11; Mark. 9.35; Luk. 22.26ke' b'a ndùlala netèt bin; là mèn z'a kô netù' mèn ndùb netèt bin nà, nsi tù' ngafa' zin. 27Mèn z'a kô nebe mbwe mèn netèt bin nà, nsi tù' nkuan zine. 28Be ndaṅndaṅ, Mén mèn lo ke se' à ndù benntùn fa' yi, là ndù a fa' benntùn, mbèn mfà yôg se ndo' ntshu' benntùn yàm yi.
Mfùmiag bàa Yériko
(Mark. 10.46-52; Luk. 18.35-43)
29Ngelaṅ bo ke ntum Yériko là, mo' bwoṅ benntùn yàm tam njam i. 30Tshù, tsemo' mfùmiag bàa tswe nsi kaṅ manze, mbe ju' ndù Yésu tshwèt ntshùa, nkua' neta, ntshob ndù: Tshùaben Mén David, ko ndèn mage. 31Bwoṅ benntùn tshobte yub ndù bo mi ntswe. Là bo bèn nkua' neta, ntshob ndù: Tshùaben Mén David, ko ndèn mage. 32Yésu tsin, ntsiaṅ yube, ntshob ndù: Ke ze bin kô ndù me ghù bin à? 33Bo tshob yi ndù: Tshùaben, ghù miag mag gha'a. 34Ndèn mub ko Yésu, a kwag miag mube, be ndùse bo yen nze, ntam njam i.
Currently Selected:
Matio 20: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.