Matio 19
19
Nefagte nandà
(Mark. 10.1-12)
1Ngelaṅ Yésu miagte netshob men ntshob li là, a tum Galiléa nèn ntùm bag ngô Yudéa mo' yoṅ Yordan. 2Bwoṅ benntùn yàm tam njam i, a yate yub bwe. 3Tsemo' ba Férésia se' mbaṅ i, ndaṅt'é ntshob ndù: Ntshù' bam ndù mèn sô nzwi i mba num zit nu lo ké?
4Là, #Net. 1.27; 5.2a bùnte, ntshob ndù: Bin lo ke siaṅ ndù: Fe neto'te, Mbom mèn lo nabte yube, a nabte mandum mba mènnzwi, 5ntshob #Net. 2.24ndù: A ndùlala mén nsi faṅ tàab mba màab, lat num nzwi i, ntu tshob bàa tù' ta' mbàb wut ntshù'; 6ndùlala bo ke bèn mb'a bàa, là nda' ta' mènntùn ntshù'. Ndùlala, ju ze Nsi tamte là, kà mèn fagte. 7Bo #Neb. 24.1-4; Mat. 5.31tshob yi ndù: Kà numke Mosé na' ntshob ndù be mèn fà ṅwa'ni nefagte nandà, nsô nzwi i à?
8A tshob bo ndù: Mosé bam ndù bin sô zwi tsin à num sagntù tsine; a lo ke b'a ndùlala fe neto'te. 9Là #Mat. 5.32; 1 Korin. 7.10-11me tshob bin ndù: Mèn z'a sô nzwi i k'a ke b'a nda' num kat, mbèn nso mo' là, mb'a ghù màndà.
10Ghazi'te nu i tshob yi ndù: A be z'a b'a ndùlala num mandum bo nzwi i là, mb'a ke' bwô neghù nandà. 11Là, a tshob bo ndù: A ke b'a njoṅ benntùn fa ke mbam yen nu li, là nda' ben tshen nà tse bo fà bo là. 12Nummbe tsemo' ben b'a mbantshù' fe bam mà tshobe, tsemo' bèn mbe tse benntùn lo' yub ngù mbantshù' yi là; mbèn ngù tse bo kô netù' mbantshù' yub tu num nufen kamànyam nà. Mèn z'a ku'ni nebam nà, a bam.
Yésu boa bônke'
(Mark. 10.13-16; Luk. 18.15-17)
13Bo lo' bontsit bônke' nse' yi ndù a yab mbu mi num bo, mbèn nde'te Nsi. Là ghazi'te nu i nke ntshobte ben tse bo lo' yub nse' yi là. 14Là Yésu tshob ndù: Bin faṅ bontsit bônke' là, kà bin tshèt yub nese' ntèl àm; nummbe nufen kamànyam b'a ze ben tse bo be ndaṅndaṅ mba bo là. 15A yab mbu mi num bo, ntum yen dù' là, nène.
Ménnshum ngankàb
(Mark. 10.17-31; Luk. 18.18-30)
16Tshù, mo' mèn se' mbaṅ i, ntshob ndù: Ngatswite, me nsi ghù à zit numebwô kà ghù yôg matmal à? 17Là, a tshob yi ndù: Numk'o bètt'àm nu num numebwô à? Ta' mèn mebwô num bwe. A be z'o kô netsho ntùm yôg là, o nke nze ntshù' Nsi. A tshob yi ndù: Mil à? 18Là #Netu. 20.13-16; Neb. 5.17-20Yésu tshob ndù: Kà zwi mèn, kà ghù màndà, kà yi tshô, kà kwé nta tatte. 19Ke #Netu. 20.12; Neb. 5.16; Lev. 19.18nku'ni tàan mba màan, mbèn nkô mèn z'a ghebte mbaṅ o là mba tu wul o là. 20Ménnshum nà tshob yi ndù: Me lo à ze men ntshù' là, ke z'a bèn mbwoṅ m'à? 21Yésu tshob yi ndù: A be z'o kô nemiagte nku'ni là, o nèn, nswèn tshu tsho, mfà bwoṅbwoṅ, o nsi se' ghù junkàb tanjoṅ mfe kamànyam, mbèn nse' ntam njam àm. 22Là ménnshum nà be ju' men ntshob là, nyamte se i, nèn nenywine, nummbe a lo ghù tshu yàme. 23Là Yésu tshob ghazi'te nu i ndù: Kua' nenùne, me tshob bin ndù netsho ntùm nufen kamànyam ta ngankàb kua' neshu. 24Me bèn ntshob bin ndù a fùag kamél netôg ntùm tô nto ntshùa mb'a be ngankàb tsho ntùm nufen Nsi là. 25Ghazi'te nu i be ju' yen nu là, ntshàm nga' mbu, ntshob ndù: Kà we z'a ku'ni neyôg à?
26Là Yésu te miag num bo, ntshob bo ndù: Yen nu là tshùa à benntùn, là Nsi ku'ni neghù njoṅ nu fa. 27Pétro bùnte, ntshob yi ndù: Tshù, mba bag là, bag lo faṅ njoṅ tshu fa, ntam njam o. A nsi se' be ndùke num bag à? 28Là #Mat. 25.31; Luk. 22.30Yésu tshob bo ndù: Kua' nenùne, me tshob bin ndù: Ngelaṅ ze nebèn nabte njoṅ tshu fa nsi se'e, Mén mèn tswe num ko'mfen nkuni mi là, bin tse bin na' ntam njam àm nà, bin nsi tswe num ndiaṅfen ntshob bàa gham, ke tsho'te ntsha tunndà ba Israél ntshob bàa gham. 29Mba we lo z'a na' mfaṅ mba' mi, ke fèt tse bandum ke tse bènnzwi, ke tàab ke màab, ke bon tse, ke nà i lo num lén sàm nà, a nsi kwé tshen tshu là yoṅ yàme, bèn ghù ze bag i num yôg matmat. 30Là #Mat. 20.16; Luk. 13.30benntùn yàm netèt mbwe benntùn a' ghù ntshèt njam, benntùn yàm netèt njam benntùn bèn nkwé mbwe.
Currently Selected:
Matio 19: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.