Matio 14
14
Vù Yohané nganyu' benntùn ntse
(Mark. 6.14-29; Luk. 9.7-9)
1Num yen ngelaṅ nà, mfen Hèrodé ju' tshô Yésu, ntshob tshe' tse ndù: 2Yen mèn ni b'a Yohané nganyu' benntùn ntse; a lo num vù, a ndùlala bèn ngù k'a nke ngù tshen nsà ndùbndùb là.
3Nummbe #Luk. 3.19-20Hèrodé na' mbèn ngù bo tshùb Yohané, nkul i, ma' ndàtsha num nu Hèrodia, nzwi Filibo mfèl i. 4Nummbe #Lev. 18.16; 20.21Yohané lo ke ntshob yi ndù: Ntshù' ke' bam ndù o so i. 5Hèrodé lo ke ndiag nezwi i, là nke mbwôg benntùn, nummbe bo ke ndo' Yohané à mba ngatshob ntshob Nsi là. 6Mum lé'njù bo tsiaṅte lé'njù bo bwe Hèrodé là, ngon Hèrodé nyiaṅ netèt bo, a bwô Hèrodé neshu. 7K'a kàn mfe ntshob ndù a nsi fà mba ke lo z'a bètt'é là yi. 8Màab tènt'é a tshob ndù: Fà tu Yohané nganyu' benntùn ntse me ntùm ka nsen ni. 9Mfen nywin, là mb'a kàn mfe bo mba benntùn be nsi là, a tshob ndù bo fà yi, 10a tum bo nèn nkeb tu Yohané ndàtsha. 11Bo yab tu i ntùm ka, nse' mfà ménngon nà, ménngon lo' nèn mfà màab. 12Ghazi'te nu Yohané se' ndo' fe i, nèn ntshoṅe; bo nèn nsoṅ Yésu.
Mba Yésu kém benntùn ntsha' tàn bàn nà
(Mark. 6.30-44; Luk. 9.10-17; Yoha. 6.1-14)
13Là Yésu be ju' yen tshô là, ntum yen dù' là, ntsho kenu, nèn dù' banban tù' i. Bwoṅ benntùn be ju'u, ntum ntùm ngô, mbwe i nku. 14Yésu be tum kenu, njen mo' mà bwoṅ benntùn, ndèn mub ko i, a yate ghangokèt tshobe. 15Njù be sène, ghazi'te nu i se' mbaṅ i, ntshob ndù: Yen ni b'a dù' banban, ngelaṅ à nebèn ntshùa. Lé'te benntùn ndù bo nèn ntùm ntaṅla' njun jujù yub tu. 16Là Yésu tshob bo ndù: A ke' bwô ndù bo nène; bin bèn fà jujù bo. 17Là bo tshob yi ndù: Bag ghù nda' ntu' bàn ntàn mba ngontse ndô bàa nsen ni. 18Là, a tshob ndù: Bin lo' nse' yi nsen ni mfà me. 19A ghù bwoṅ benntùn tswe nsi num nenà, a lo' men ntu' bàn ntàn nà mba ngontse ndô bàa là, mbù' miag mi mfe kamànyam, nde'te Nsi, mbe'te bàn, nke mfà ghazi'te nu i; ghazi'te nu i nke mfà bwoṅ benntùn. 20Njoṅ yub fa jù, mbèn njwèle, ntse'te mbe'te mi mi a tù' là, a dun nkag ntshob bàa gham. 21Ben tse bo na' njù là na' mb'a nguan bandum ntsha' tàn ke kwa bènnzwi mba bônke'.
22Be ndùse, a nànte ghazi'te nu i ndù bo tsho ntùm kenu, mbwôg dut ntse, nèn mo' yoṅ dibantse, ngelaṅ a lé'te bwoṅ benntùn nà. 23A be miagte nelé'te bwoṅ benntùn, nko' num mbat tù' i nele'te Nsi. Njù be sène, Yésu ke' bwe tù' i. 24Là kenu be à tà netèt dibantse, ntse nke nshùm i, nummbe fetmbaṅ na' nke mfe à mbwe i. 25A na' mb'a ngelaṅ njù tù' nelàn nà, a zin num dibantse, nse' mbaṅ bo. 26Là ngelaṅ ghazi'te nu i yen a nke nzin num dibantse là, tu tshob tshu', bo bwôg, ntshob ndù: A b'a ghamèn, bo kua' kua' bwôg; 27là Yésu tshob bo ndende ndù: Bin fèn ntù, a b'a me, kà bin bwôg! 28Là Pétro bùnte yi ndù: Tshùaben, a be z'a b'a wù là, o tshob me se' mbaṅ o num ntse. 29A tshob ndù: Se'e! Pétro tum ntùm kenu, nzin num ntse num nenèn mbaṅ Yésu. 30A ju' fetmbaṅ, mbwôge; mb'a ke nto' nevù ntùm ntse là, a kua' neta, ntshob ndù: Tshùaben yôg àm; 31be ndùse, Yésu nyit bu i, ntshùb i, ntshob yi ndù: Ngabamntù metsili, numk'o nke ngwù bag bag à? 32Ngelaṅ bo tsho ntùm kenu là, fetmbaṅ tsin. 33Ben tse bo be ntùm kenu là se' ngwù nsi mbwe i, ntshob ndù: Kua' nenùne, o b'a Mén Nsi.
34Bo be miagte nedule, nkum kaṅ ntse mbaṅ ngô Gènèsarèt. 35Ba ntùm yen dù' là lèn i, ntum bo soṅ benntùn ntùm njoṅ ngô fa ts'a ghebte mbaṅ bo là, bo lo' njoṅ ghangokèt fa, nse' yi mbaṅ i, 36mbu' mbu yi ndù a faṅ bo kwag nda' tôg nzwe i. Njoṅ benntùn fa tse bo kwag i là yate.
Currently Selected:
Matio 14: BMa
Highlight
Copy
Compare
Share
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.