Lévitiko 19

Mba Nsi kô bo fa' yi là

1Tshùaben tshob Mosé ndù: 2Tshob #Lev. 11.44-45; 1 Pét. 1.16njoṅ mbumte bon Israél fa ndù: Bin be nelàne, nummbe Tshùaben Nsi zin b'a nelàne.

3Mba #Netu. 20.8,12; Neb. 5.12,16we lo netèt bin nsi ghù nku'ni màab bo tàab, ke ze Sabbat tshàm. Me b'a Tshùaben Nsi zin. 4Bin #Lev. 26.1; Netu. 20.23; 34.17; Neb. 27.15ke nsi kaṅ wut tsin ke ndôte nsi neto, ke bèn nke ndo' ba nsi tse bo lo' à tùn nabte yi là ngù zin nsi yi. Me b'a Tshùaben Nsi zin.

5Ndùs'o tshwèt mfà jule'te z'a tshwèt nda'te ndù mèn tamte bo Tshùaben nà, o fà à num mat z'a bam nà. 6A bwô nefèt yen nyàm nà z'o fà là be lé' se, ke ndamnjù lo. A be ze ju tù' bwe, nkum mbatte lé'njù tat là, mb'a bwô neton mbwôge. 7A be ze bo bèn mfèt num mbatte lé'njù tat là, mb'a b'a ju z'a bagte là, ntshùa ndùlala jule'te be ndù Tshùaben ke' bam. 8Mèn z'a fèt lèn i là nsi ket lèt nukebwô i, nummb'a lo' ju ze bo fà Tshùaben nà mba ju banban nà. Bo nsi sô yen mèn nà netèt ze nzwit mèn.

9Ndùse #Lev. 23.22; Neb. 24.19-22bin nsi tsho' tshu ntùm ngô zin nà, o nsi faṅ mo' taṅ nà, ke tsho' tshu bwe, ke bèn ntswitte ntsha tshu ts'a bwô bo lag là. 10A ke' bèn mbwô ndù o kàb ba tsha ntàm ntù ndu' ts'a be bén o là; ke tswitte ntàm mi mi a vùte nsi là. O nsi ghua' yen nà ndù mbwoṅ bo ngùn tswitte. Me b'a Tshùaben Nsi zin.

11Bin #Netu. 20.15,16; Neb. 5.19,20ke nsi yi, ke ke ntshob tatte ke mfùm no netèt bin, bin bin. 12Kà #Netu. 20.7; Neb. 5.11; Mat. 5.33bin lo' lén sàm nsa' kam tatte yi, nummb'a be ndùlala mb'o lo' lén Nsi o mba ju banban nà. Me b'a Tshùaben.

13O #Neb. 24.14-15ke nsi fétte mèn a ghebte mbaṅ o là, ke lo' ntanta kwé ju mèn yi. Kà tshùb nkàbfa' ngafa' a zi bàm o. 14O #Neb. 27.18ke nsi so ndon tu mbu'ntoṅ, ke yab sàm ju mbwe mfùmiag z'a b'a fa'te bwe ngwù nsi là; nummb'a bwô ndù o bwôg Nsi o. Me b'a Tshùaben.

15O #Netu. 23.6-8; Neb. 16.19ke nsi fàn nu ntùm tsho nesa' kame. Kà lôte mba mbwoṅ be yi là, ke kabte mèn ndùb, là o nsi sa' kam mèn a ghebte mbaṅ o l'a ntùm netsine. 16O ke nsi ke sa ndàm netèt yu nzwit mèn. O ke nsi nya' tu mèn z'a ghebte mbaṅ o là. Me b'a Tshùaben.

17Kà #Mat. 18.15ke mbàn mfèl o ntù o. A bwô ndù o ke ntagte mèn z'a ghebte mbaṅ o là, là nzete netshùa njam i ntsho ntùm nukebwô. 18Kà #Mat. 5.43; 19.19; 22.39; Mark. 12.31; Luk. 10.27; Rom. 13.9; Gal. 5.14; Yako. 2.8yagte mba'a, ke ke ngù nkwate kebwô num bon yu nzwit mèn. O nsi kô mèn z'a ghebte mbaṅ o là mba yu tu wut là. Me b'a Tshùaben.

19Bin #Neb. 22.9-11nsi ke ze ntshù' màm. O ke nsi bam ndù nyàm ko' mo' nyàm z'a ke' b'a be lèn yen nà là. O ke nsi ywit nzwit tshu nze bàa ntùm nà o. O ke nsi ket nzwe ze bo lo' ndeb tshaṅ bàa mba' yi là.

20A be ze ta' mandum nô num kunndà se bo mènnzwi z'a b'a nkuan ndù mo' mèn yà ka i, là ke yoṅ njun i ke netshu' i lo là, mba bo ke zwi yube, là mba mandum a' fà ju num bwe, nummbe bo ke' tshu' nkuan ze mènnzwi là. 21Mandum nà nsi lo' ta' komnjù se' fà Tshùaben num nukebwô i mbwe ndà mbumte, num netamte fa yi num mfànnu mi. 22Ngale'te nsi tamte fa num tu i mbwe Tshùaben, num nukebwô z'a ghù là. Ngale'te nsi lo' sen komnjù là fà jule'te mfànnu yi, a tshùa ndùlala Tshùaben lagte nukebwô z'a ghù là yi.

23Ndùse bin nsi tsho ntùm ngô bwe nzenze ntù neyam ntàm fa là, bin nsi lo' mbwe ntàm mi à mba tshoṅ nà. Bin ke nsi kab men ntàm tù là num njù ngu' tat, ke jù men ntàm tù là. 24A nsi be num mbatte ngu'njù kuà bin fà njoṅ ntàm tù fà Tshùaben mba jule'te z'a tshwèt nda'te ndù mèn tamte bo Tshùaben nà. 25A nsi be kum mbatte ngu'njù tàn bin jù ntàm tù, ndùlala ndù tù bèn nke njam ntàm mi bin. Me b'a Tshùaben Nsi zin.

26Kà #Net. 9.4; Lev. 7.26-27; 17.10-14; Neb. 12.16,23; 15.23; 18.10bin jù sàm ju dù' ze lem fètte bwe là. Kà bin fà wut tsin num ngàme, ke num ka lo. 27A #Lev. 21.5; Neb. 14.1ke' bwô ndù bin tsinte tu zin ndiaṅ mbume; kà kom mbaṅ nyiaṅ ntshu tsho. 28Bin ke nsi tshebte mfaṅ num bin num lén mèn z'a kwù là; bin ke nsi vèn tshu num bin. Me b'a Tshùaben.

29Kà #Neb. 23.18lo' ngon o mba ju banban nà, mfà i ntùm kat, mbwôg ndù kà ngô tsho ntùm kat ke ntùm yôg kebwô lo. 30Bin #Lev. 26.2ke nze Sabbat tshàm, nke ngù nku'ni num dù'ntswe àm. Me b'a Tshùaben.

31Kà #Neb. 18.11; 1 Sam. 28.3; 2 Fen. 23.4; Es. 8.19bin te lag num ben tse bo be ntshobte boa ywèt là, ke ghatshaṅ ngàm no; kà bin ke ndiag yube, mbwôg ndù kà bin tshùa njam bo nsagte wut tsine. Me b'a Tshùaben Nsi zin.

32O nsi ke lo nsi mbwe nyiaṅtu fôgtab, ke ghù nku'ni njwèn mèn. O nsi ke bwôg Nsi o. Me b'a Tshùaben.

33A #Netu. 22.20; Neb. 24.17-18; 27.19be ze ta' ngùn se' nke ntswe bin à bo ntùm zin ngô là, mba bin ke nsi fétt'é. 34Bin lo' ngùn z'a be netèt bin nà mba ménla' là; bin nsi kô i mba tu wut tsin nà. Tu wut tsin lo be ghùn ntùm ngô Egipto. Me b'a Tshùaben Nsi zin.

35A #Neb. 25.13-16; Tànk. 20.10; Ez. 45.10ke' bwô ndù bin fàn nu ntùm tsin nesa' kame, ntùm nelo' mfi' nefi' ju yi, ntùm nelo' kilô mfi' ju yi ke ntùm nelo' ntu' mfi' ju yi lo. 36A bwô nkilô min tsine, ndoṅ mi tsine, nkesoṅ min boa ntu' tsin be mi netsine. Me b'a Tshùaben Nsi zin, z'a na' nsô zin ntùm ngô Egipto là.

37Bin nsi ze njoṅ ntshù' màm fa boa njoṅ nkàn màm fa, ketshùb njoṅ i fa kua' mebwô. Me b'a Tshùaben.

Currently Selected:

Lévitiko 19: BMa

Highlight

Copy

Compare