Netume 39

Nekwit nzwe fa'

(Netu. 28.1-14)

1Bo lo' nzwe nto'nto' nenàfi, meba, z'a ba nziage là ntam nzwe fa' yi num fa' dù' nelàne, ntam nzwe nelàn Aron yi mba Tshùaben na' ntshob Mosé là.

2Bo lo' gol nke ntam kum nesag se bo ke nkel à num ngelaṅ fa' là yi, ndo' nzwe z'a ba mba tsinkém, nzwe z'a ba, nzwe z'a ba nzwe'nzwe' nziag là, bo mbwô nzwe z'a fùag là kà ntam kum nà yi. A bwô ndù a b'a fa' ta' ngave. 3Bo nsi lo' gol tswe ba mbab tshu yi, tote yub mfémfé, fate mum ba nzwe nto'nto' nenàfi, ts'a ba mba tsinkém nà, ts'a ba nziag là, ts'a ba nzwe'nzwe', mbe mbwô nzwe là. A bwô ndù a b'a fa' ta' ngave. 4Bo nabte nkém mi mi a ke ntshùb i là, njoṅt'é num ntôg mi mbàa. 5A bwô ndù kob s'a be num kum nà zin bo kum à ntam: A na' mb'a gol, nzwe z'a ba mba tsinkém nà, nzwe meba, nzwe z'a ba nzwe'nzwe' mba nziag là, bo mbwô nzwe z'a fùag là. Bo ghù ndaṅndaṅ mba Tshùaben na' ntshob Mosé là. 6Bo lo' ndoṅ onix ndoṅ ntùm gol, ntshebte ndèn nshumnshum Israél num bwe, mba bo num ntshebte ba màkwa là. 7Bo yab yub nkém kum nesag se bo ke nkel à num ngelaṅ fa' là, num neke ndo' nkwimte bon Israél yi, ndaṅndaṅ mba Tshùaben na' ntshob Mosé là.

8Bo tam kum s'a ke nswe' nkabt'a nda' ntù mèn nà. Bo lo' ve mfa' i yi a be mba kum nesag se bo ke nkel à num ngelaṅ fa' là. A b'a nzwe gol, nzwe z'a ba mba tsinkém, nzwe meba, nzwe z'a ba nzwe'nzwe' nke nziage, bo mbwô nzwe z'a fùag là. 9Kum s'a be nswe' nkabt'a nda' ntù mèn nà, na' mb'a ndaṅndaṅ num kum tse kuà fa. Nesag bo bam se na' mb'a njoṅ mfi' z'a be ndo num màdu' mèn nkum num nkét ntu bu i là. A na' mb'a tshub tse bàa. 10Bo lo' ndoṅ ntshab num bwe nka tse kuà.

Mbwe nka: sardonik, topaze, emerode; 11mbatte nka bàa: eskarbukle, safir, tùn ndù a ta neshu mbèn nta neshu; 12mbatte nka tat: opale, agate, amétistô; 13mbatte nka kuà: loṅ tanjoṅ, onix, yaspi.

Bo loṅ men ndoṅ nà ntùm nkwa gol. 14Njoṅ i fa na' mb'a ntshob bàa gham, mba ndèn nshumnshum Israél be là. Bo tshebte men ndoṅ nà mba ba màkwa là; lén ta' tunndà netèt tse ntshob bàa gham be num ta' loṅ. 15Bo lo' gol nelàn ntswe ba tshan yi, mba' i mba mvèt là, njab num kum s'a ke nswe' nkabt'a ntù mèn nà. 16Bo tswe nkwa gol mba bo mbwô gol mbàa, njab mbwô mbàa là num ntôg kum mbàa, kum s'a ke nswe' nkabt'a ntù mèn nà. 17Bo lo' mvèt bàa là ntôg yi ntùm nkwa mbàa, num ntôg kum mbàa, kum s'a ke nswe' nkabt'a ntù mèn nà. 18Bo tsin tu mvèt bàa mbwe ntô nkém mi bo te num kum nesag se bo ke nkel à ngelaṅ fa' là. 19Bo nsi bèn tswe nkwa gol mbàa mi ntôg kum s'a ke nswe' nkabt'a ntù mèn nà. A bwô ndù a b'a num ngoṅ i ze ntùm bwe z'a be njab num kum nesag se bo ke nkel à ngelaṅ fa' là. 20Bo bèn nabte memo' nkwa gol mbàa, njab num tun nkém kum nesag se bo ke nkel à ngelaṅ fa' là, bo yab à mbwe bwe, num ngelaṅ dù' ze yoṅ i be là; a b'a mfe tu kob kum nesag se bo ke nkel à ngelaṅ fa' là. 21Bo lo' mvèt num mi nkwa kum s'a ke nswe' nkabt'a ntù mèn nà, à tsho ntùm mi nkwa kum nesag se bo ke nkel à ngelaṅ fa' là. Tun mbwe kum tsin tu kob mbatte kum, ngô bwe ndùlala, ke fiag num mo'o.

22Bo tam kum nesag se bo ke nkel à ngelaṅ fa' là, ndù bo lo' à ndeb nenàfi mba' nzwe i fa yi. 23Tô dù' netshag tu be netèt bwe, ndù bo tam ngoṅ i, a tswe à mba ngaba' nzwe bèn mba' là, ndùlala ndù kà kum nà fagte. 24Bo taṅte memo' ntàm tshu num ngoṅ kum tun nsi, men ntàm tshu là b'a nenàfi, mbe meba, mba nzwe'nzwe', ngù ndeb mbwô nzwe nefùage. 25Bo tswe ba ṅwa gol, taṅ tàm ju ntaṅ ta' ṅwa, ngù ndùlala ndiaṅ mbume, num ngoṅ kum fa: 26Bo taṅ ṅwa, ntaṅ ta' tàm ju, ndo' ndiaṅ ngoṅ kum yi mbume. Yen nà b'a num fa', mb'a ndaṅndaṅ mba Tshùaben na' ntshob Mosé là.

27Bo lo' nzwe mebwô ntam nkum yi, mba' men nkum n'a num Aron boa nshumnshum tse; 28ndo' nzwe mebwô ntam tshe' bo memo' ntshé' be mi nzwe mebwô num neke nkwi wut yi. Bo lo' nzwe mebwô là ntam ba kut mba yi, tshen nzwe mebwô là b'a fùag tse. 29Bo lo' mbwô fùag nzwe ntam nkob yi, vène, ndeb i b'a nenàfi, mba, mba nzwe'nzwe', kua' mba Tshùaben na' ntshob Mosé là.

30Bo lo' gol nelàn ntswe ta' bàb ju yi, a be mbwô nelàne, ndù bo kite bwe mba bo num ntshebte ta' màkwa là ndù: Tshùaben b'a Nelàne. 31Bo lo' nkù z'a be nenàfi là ntaṅ i yi num tshe', mfe tu mba Tshùaben na' ntshob Mosé là.

32Bo miagte njoṅ mfa' fa num dù'ntswe, mba num ntàb mbumte. Bon Israél ghù tshu fa tse Tshùaben na' ntshob Mosé là.

Netaṅte Dù'ntswe

(Netu. 35.10-19)

33Bo lo' dù'ntswe nèn yi mbwe Mosé: Ntàb boa njoṅ tshundà tse fa, ba ngub, ba ntù, ba mbwoṅ, ba ntom boa ba tun tse; 34ngub nkomnjù tse bo se' a ba là boa ngub mbeloṅ tse nekabte na' mbèn mbe nzwe fagte. 35Koṅ Kàn boa mbwoṅ tse, bo kabte; 36téblé, njoṅ bon tshu tse fa, bo bàn ju bwôntù; 37ju neghette nka' bwe z'a b'a gol nelàn nà, boa ndambo mi, ndambo mi bo nabte là, njoṅ bon tshundà tse fa, bo mfèt mi nema' ntùm ndambo; 38tômbwôg gol, mfèt yo', labinda ze bo ton nà bo nzwe nzendà z'a ntshu ntàb là; 39tômbwôg tùn meba, ke'te ze tùn meba, mbwoṅ tse boa tshundà tse fa; kab tshaṅ bo tun i, nzwe bam ntshundà, ntom tse, tun tse; 40nzwe nzendà bam ntshundà, mvèt tse, nsaṅ mi boa njoṅ tshundà tse fa, num neke mfa' yi ntùm dù'ntswe, ntùm ndà mbumte, ba nzwe neke mfa' yi ntùm dù' nelàne, 41ba nzwe nelàn tse ngafà tshule'te, Aron ghù nket là, boa nzwe nshumnshum tse num neke mfa' fa' sàm yi.

42Bon Israél fa' men mfa' là fa, ngù kua' mba Tshùaben na' ntshob Mosé ndù bo fa' là. 43Mosé lôte fa', njen ndù bo fa'a, mfa' kua' mba Tshùaben na' ntshob là. Mosé naṅ mbotni num bo.

Currently Selected:

Netume 39: BMa

Highlight

Copy

Compare