Mfa' Ghantum 9

Mba Saulo kaṅ ntù i là

(Mfa' Gha. 22.6-16; 26.12-18)

1Saulo z'a ke nke' nkô netsho' nku ghazi'te nu Tshùaben kebàn, mbèn nzwite tsemo' là, nèn ju ngale'te Nsi ze ndùb, 2mbètt'é ṅwa'ni nenèn yi ntùm sinagogue ts'a be Damas là, ndù a be z'a yen ben tse bo tshwèt mbwe manze Yésu, bandum ke bènnzwi lo là, a kut yub nse' yi Yérusalém.

3Là ngelaṅ a be num manze nke ngebte Damas là, be ngelaṅ mbile, mo' nka' swe' mfe kamànyam, nké' mba beba'mbaṅ nà ndiaṅ i mbume. 4A vù nsi, nju' mo' nze nke ntshob yi ndù: Saulo, Saulo, numk'o nke ntsho' nku màm kebàn à? 5Saulo tshob ndù: Tshùaben, o b'a we? A bùnte ndù: Me b'a Yésu z'o num ntsho' nku mi kebàn nà. 6Là, lo tù ntsho ntùm ngô, bo nsi tshob ju z'a bwô ndù o ghù là wù. 7Benntùn tse bo à bo ke nèn nkatte là tsin, ntswe ntshu mi'i, mba bo ju' nze là, ke yôg njen sàm mèn. 8Saulo lo tù; mba mba miag mi gha' là, a ke yen nze; bo tshùb bu i, nsoṅt'é nèn yi mà Damas. 9Ntùm lé'njù tat a ke yen nze, ntswe ke jù ju, ke bèn nu.

Mba Anania yab mbu tu Saulo là

10Tshù, mo' ngazi'te nu Yésu lo be Damas, lén se Anania. Tshùaben tshob yi ntùm njem ndù: Anania! A bùnte yi ndù: Me li me Tshùaben. 11Tshùaben tshob yi ndù: Lo tù nèn num manze ze bo num ntsiaṅ ndù manze netsin nà, mbètte ntùm ndà Yuda, Saulo ze Tarsô, a tshwèt nde'te Nsi; 12a lo yen ntùm njem, mo' mèn lén se Anania tsho ndà, njab mbu mi num i ndù a bèn njen nze. 13Anania bùnte ndù: Tshùaben, me ju' benntùn yàm tshob ndù yen mèn nà ghù nukebwô yàm num ben tsho tse nelàn Yérusalém. 14Mba nsen ni a kwé ngù' ghale'te Nsi tse ndùbndùb ndù a kut njoṅ benntùn fa tse bo num ntsiaṅ lén so là. 15Là Tshùaben tshob yi ndù: Nène, yen mèn nà be m'a mba ketu' ze me tsho' ndù a ket lén sàm nèn yi mbwe ghakelèn Nsi, fenfen mba bon Israél là. 16M'a tswite njoṅ tshu fa ts'a bwô ndù a fènte num lén sàm nà yi. 17Anania nèn, ntsho ntùm yen ndà là, njab mbu mi num Saulo, ntshob yi ndù: Mfèl àm Saulo, Tshùaben tum àm, Yésu z'a lo ṅwag wù num manze z'o lo ntshùa bwe kà nse' nsen ni là, a tum àm à ndù o bèn njen nze; ndun Ywèt Nelàne. 18Be ngelaṅ mbile, mo' ju mba nga' ngontse là tsho' num miag mi, ngwù nsi; a yen nze, ndo tù; bo nyu' i ntùm ntse. 19A jù jujù, mbèn ngù neta.

Mbwe mfa' Saulo

A tswe boa ghazi'te nu Yésu tse bo be Damas là tsemo' bon lé'njù. 20Be ndùse, a to' netshob ntùm sinagogue ndù Yésu b'a Mén Nsi. 21Njoṅ benntùn fa tse bo ke nju' là tshàm, nke ntshob ndù: A ke b'a mèn z'a ke ngùtni ben tse bo ke ntsiaṅ sen lén nà mà Yérusalém nà ké? A ke se' nsen ni à num nekut yub ndo' nèn yi, mfà kamkam ghale'te Nsi ké? 22Mba Saulo là a nke nkagtùn nèn be mbwe, nke nkag tshu'tu netèt ba Yuda tse bo be Damas là, nummbe a lo ke ntshob ndù Yésu b'a Kristô.

23Lé'njù #2 Korin. 11.32-33yàm lo be tshùa, ba Yuda ghù tsham ndù bo zwi i. 24Là Saulo ju' fin sen tsham nà. Bo nke mbéb nze ngô mbwôgtshù mba tèttswe' ndù bo zwi i. 25Là ghazi'te nu i lo' i tèttswe', ma' i ntùm bàmtshe', ntshag i tù kàbngô, nte nsi.

26Ngelaṅ z'a kum Yérusalém nà, a nke ndiag netamte boa ghazi'te nu Yésu, là njoṅ yub fa bwôg ke bam ndù a b'a mo' ngazi'te nu Yésu. 27Là Barnaba lo' i bo yi nèn ntèt ghantum, a soṅ yub mb'a na' njen Tshùaben num manze là, nsoṅ yub ju ze Tshùaben na' ntshob yi là, mbèn nsoṅ yub mb'a na' ntshob nu num lén Yésu mà Damas ke bwôg là. 28A nke ntswe bo à bo, nke nèn ntùm dù' nzenze Yérusalém, nke ntshob nu num lén Tshùaben ke bwôg. 29A tshobte, mbèn nta ntshu boa ba Yuda tse bo fe Grikia là; là tshen ben ni diag nezwi i. 30Fètfèt lèn, ndo' i nèn yi Késaréa, ngù a nèn Tarsô.

31Ntùm njoṅ ngô Yudéa fa, Galiléa mba Samaria, ntse'te benkristô na' mb'a ntùm fite, Nsi nke nkul i; a nke njôg ntùm nebwôg Tshùaben, mbèn nke nkwi'te njam Ywèt Nelàn ngafitentù.

Mba Pétro yate Enéa là

32Pétro z'a ke nzin ntùm njoṅ ngô fa là nèn nkum netèt benkristô tse bo be Lida là, 33njen mo' mèn bwe, lén se Enéa, z'a tswe kun ngokèt ngu'njù fom nà; a na' mb'a kekale. 34Pétro tshob yi ndù: Enéa, Yésu Kristô yat'o, lo tù nabte kun so yu tu. Be ndùse a lo tù. 35Njoṅ benntùn fa tse bo ke ntswe Lida mba Saron nà yen i, nkaṅ ntù tshob ntam njam Tshùaben.

Mba Tàbità bam num vù là

36Netèt ghazi'te tse bo be Yôbé là, mo' mènnzwi lo be bwe, lén se Tàbità, yen nà bagt'a ndù Dôrkas. A lo ke mfa' mfa' mebwô yàme, mbèn nke njwimte ghange', mfà tshu bo. 37Ntùm tshen lé'njù là, ngokèt tshùb i, a kwù. Bo sôg fe i, njab i ntùm mo' to'ndà tù. 38Mba Lida b'a mbaṅ Yôbé là, ghazi'te be ju' ndù Pétro b'a Lida, ntum benntùn yi bàa, bo le't'é ntshob ndù: Kà ghubte nese' nkum ntùm yag ngô! 39Pétro lo nsi nèn bo à bo. Ngelaṅ bo zin nkum bwe là, bo lo' i nèn yi to'ndà tù. Njoṅ fôg bènnzwi fa se' mbwe i, nke nkua'a mbèn nke nda'te ba nzwe mba nkummbaṅ mi Dôrkas ke ntam bo, ngelaṅ bo à bo na' mbe là. 40Là Pétro ghù njoṅ yub fa tum njù, a kwim ntunkekwi' mi nsi, nde'te Nsi, nkaṅ wul i ndôte fe mèn, ntshob ndù:

Tàbità, lo tù! A gha' miag mi, njen Pétro, mbù' wul i, ntswe netswe. 41Pétro tshùb bu i, ngù a lo tù ntsiaṅ ben nelàn mba fôg bènnzwi nte i mbwe bo ntùn. 42Bo lèn yen nu là ntùm njoṅ ngô Yôbé fa, tsemo' benntùn yàm bam nu Tshùaben. 43Pétro tswe tsemo' bon lé'njù Yôbé ndà mo' nganabte ngub, lén se Simon.

Currently Selected:

Mfa' Ghantum 9: BMa

Highlight

Copy