Mt 7
7
Taté'é vaa e mone jôm a ne wo dis
(Lk 6:37-38, 41-42)
1Te tyi'ane bôte mejô, ndembene mia fe mia ye bo te tyi'ibane mejô; 2amu avale mia tyi'i bôte mejô nde ba ye tyi'i mia, a aval ôvek mia belane de nde ba ye belane de asu denan. 3Amu jé wo fombô mone jôm a ne e dise monyoñ? Ve beta jôm a ne e dise dôé, wo te yene nye' 4Nge na amu jé wo ke jô monyoñe na: Yange'e! Me vaa e mone jôme ya e dise dôé? Ve da ô lôô: beta jôm a ne wo dis! 5A môta bebadu'u, taté'é vaa beta jôme ya dise dôé, mvus éte wo ye yeme vaa e mone jôm a ne e dise monyoñ.
Te veane bemvu a bengôé meko'o menan me ne édima
6Te veane bemvu jôm é n'étyi; te wuane bengôé metabe menan, be za tibi me a mebo a na éyoñe be kôñelaneya éfase mi né be za nyabe mia.
Mi bo'o mi ye'ela'ane ésoo wônan a ne yôp
(Lk 11:9-13)
7Sila'an, ba ye ve mia; jeñan, mia ye yen; kutane *mbé ba ye dii mia wô. 8Amu môt ase a sili a nyoñ, nyô a jeñ a yen, a ba dii nyô ase a kute *mbé mbé. 9Nge na, za ya be mia a ne bo na nge ndômane jé ja sili nye belet, a viane ve nye akok' 10Nge na nge a sili kos, a viane ve nye nyo'
11Ajô te nge mia mi ne mbia be bôt, mia yeme ve bone benane mbamba be biôm, abim avé ésoo wônan ya yôp a ye ve bôte ba sili nye mbamba be mam.
Môte mbok ane womien
(Lk 6:31)
12Ajô te, mam mese mia yi na bôte be bo mia, miabebien bo'one me asu dap: Metiñ me Zambe a bekulu mejô mbie le.
Mezene mebaé
(Lk 13:23-24)
13Nyi'ane *mbé ô ne ôfanefan, *mbé ô ne anen a e zene ja ke njañ é ne ndam, a ba ba tyii été be ne ézuk; 14v'aval ôfanefane *mbé ô né a avale tyôtyoé zene ja kui ényiñ é né a ba ba yene je teke mfañ abui.
Aval élé, avale bibuma
(Mt 12:3; Lk 6:43-44)
15Mi tabe'e bekulu mejô be ne minsos ntyee, mbe ba zu be mia be be'e mengômesan ane mintômba, ve minlem été be ne beze ba bi bôt. 16Mia ye yemelane be a bibuma biap. Ye ba kolé bibuma bi woon ésaé biyo, nge bibuma bi figié akoñ ngbwele' 17Nalé a ne na mbamba élé ase a wume mbamba bibuma, ve mbia élé ase ki a wume mbia bibuma. 18Mbamba élé a se nguleya be'e mbia bibuma nge mbia élé ki be'e mbamba bibuma. 19Elé ése é nji wume mbamba bibuma, ba ye ba'é je a wua je e nduan. 20Ajô te ñhe mia ye yemelane be a bibuma biap.
Sake ve na: A Nti, a Nti!
(Lk 6:46; 13:27)
21Sake môt ase a jô me na: A Nti, a Nti, a ye nyiin éjôé ya yôp, ve nyô a bo nkômban ésaa wom a ne yôp. 22Ezu'u bôt ja ye jô ma *môs ôte na: A Nti, a Nti! Ngaa bi nga kulu mejô a jôé dôé? Ngaa bi nga titane mbia minsisim a jôé dôé? Ngaa bi nga bo bitua bi mam a jôé dôé' 23Wôna ma ye jô be na: Me nji tame yeme mia; kôla'an ma mis, mia mia bo mbia be mam!
Nda ya akôme yôp
(Lk 6:47-49)
24Ajô te môt ase a wô'ô mejô me ndôme mane jô a bo me, be ne funane nye mfefe'e môt ñwô ô nga lôñe *nda jé akôme yôp. 25Mveñ é nga noñ, ndulu mendim a nga so, bivuñulu bi nga vuñ; bi nga jimbi *nda éte ve é nji ke ku amu mbôka'a wé ô mbe akôme yôp. 26A môt ase a wô'ô mejô me ndôme jô ve te bo me, be ne funane nye akute môt nde é nga lôñe *nda jé e nsele'e yôp. 27Mveñ é nga noñ ndulu mendim a nga so, bivuñulu bi nga vuñ; bi nga zu jimbi *nda éte, nde é nga ku si, a ntyambane wé ô mbe anen.
Yésus a ne njôô
(Mk 1:22; Lk 4:32)
28Nde da zu kui na éyoñe Yésus a maneya ve miñye'elane mite, bizu'u bi bôt bi nga kame ñye'elane wé; 29amu a mbe a ye'ele'e be ane môt a bili ngule njôan saa ke ane *beyeme bekalate bap.
Currently Selected:
Mt 7: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.