Mt 26
26
Emo'o ya wôé Yésus
(Mk 14:1-2; Lk 22:1-2; Yo 11:47, 49, 53)
1A nga bo na, éyoñe Yésus a maneya kobô mam mete mese, a nga jô beyé'é bé na: 2Mia yeme na éyoñe môse mibaé mi lôteya, Pak a ye boban, a mona môt a ye koñeban asu ya na a tyeléban e *krôa.
3Ane bivete betuni bi nga sulan a bemvendé ya ayoñ e ndaa *ntuni nnen ba loone na Kaif, 4a bo ésok ane be ne bi Yésus e mvôle yôp a wôé nye; 5be mbe be jô'ô na: Saa ke éyoñ abôk é né, éngôngôm é za boban e be bôt.
Minga a wo'o Yésus Olobinda e nyô
(Mk 14:3-9; Yo 12:1-8; Lk 7:36-50)
6Yésus a mbe Bétani, e ndaa Simon nkone *zam, 7nde minga éziñ a subu nye bebé a bili nde'e albata é bili ôlobinda a ne beta tañ, nye ve sôé nye nye nlô a too tawôlô. 8Eyoñe beyé'é be nga yene jame te, be nga yene de *abé a jô na: Amu jé aval éndamane di' 9Ôlobinda nyô a be kuabane beta tañ asu bingôngole bi bôt. 10Eyoñe Yésus a yemeya ôsimesane viap, a nga jô be na: Amu jé mia dutu éndeñela'a e be minga nyô? Ke a te bo ma mbamba jam; 11mia be bingôngole bi bôt mi too éyoñ ése; ve bia be mia mi nji tabe éyoñ ése; 12a te sôé ôlobinda e nyôle jam asu njambane soñe wom. 13Ma jô mia bebela na e vôm ase Mbamba Foé nyô a ye kateban e si nyôna ése, ba ye fe kobô ajô ya jam a te bo a simesane nye.
Yudas a koñe Yésus
(Mk 14:10, 11; Lk 22:3-6; Nk 12:3)
14Ane wua ya beyé'é awôm a bebaé, jôé na Yudas Iskariôt a nga ke e be bivete betuni 15a jô na: Mia ye ve ma jé ane-me ne koñe mia nye? Nde be nga ve'e nye bifase bi moné mewôm melaa.
16Ataté éyoñe te a mbe a jeñek mbamba éyoñ ya koñe nye.
Nkômesane ndiane Pak
(Mk 14:12-21; Lk 22:7-18; 21-23; Yo 13:1-30)
17E *môs ôsu ya ba di belet é ne te mvusan, beyé'é be Yésus be nga sili nye na: Wo kômbô na bi ke kôme wo vôme ya di Pak e vé' 18Nye be na: Kelan e tison, be môt éziñ, a jô'ane nye na: Masa a jô na: Eyoñe jam é ntoo bebé, nne ma lôte Pak e be wo bia beyé'é bam. 19Ane beyé'é be nga bo ane Yésus a nga bendé be: be nga kôme Pak. 20Eyoñe ngô'é é nga kui, a nga too tawôlô ba be beyé'é awôm a bebaé. 21Be ja'ak, nde a jô be na: Ma bele ane ma jô mia na: Wua ya be mia a ye koñe ma. 22Njalan a abui ôlun, nde ba taté nye nsilan, môt ase mfa'a wé na: Ye ma a Nti' 23A nga yalan a jô na: E môt bia nye bia kee wo e be'e été, nye ate a ye koñe ma. 24Mona môt a ke ane e nga tiliban ajô dé ve bidim e be môt a be'e ayeme ya nkoñane mona môt: e nga ye dañe mvaé e be môt ate na a bo te bialé. 25Yudas, nyô a nga koñe nye a nga yalan a jô nye na: Ye ma a Rabi? Yésus na: Wo wo jô nalé.
Bidi bi Zambe
(Mk 14:22-25; Lk 22:15-20; 1Ko 11:23-26)
26Be ja'ak, nde Yésus a nyoñe fembé a éyoñ a maneya botane je, a nga be'e je a ve je beyé'é nye na: Nyoñan, ja'an, jôme jina é ne nyôle jam. 27Eyoñ a nyoñeya *élaé a ve akéva, a nga kalane be je a jô'ô na: Nya'an *élaé ji bese, 28jôme ji é ne metyi mam y'élat asu jama bôt, mme me nga sôéban asu njamane mam *abé. 29Ma jô mia bebela na: Ataté éyoñe ji, ma ye bo te beta nyu jôme ya ébuma ndi'i ji, akekui e môse bia be mia bia ye nyu je mfefé éjôé Esaa wom.
Alu ebiene di wo ye kate ma
(Mk 14:26-31; Lk 22:33-34, 39; Yo 13:37-38)
30Eyoñ be maneya yia bia, be nga ke e nkole beôlivié. 31Ane Yésus a nga jô be na: Mia bese mia ye koleban ôbak alu di amu ma: Amu e nga tilibane fo'o na: Ma ye bibi mba'ale a mintômba ya mbam mia ye tyamelan.
32Eyoñe me wômeya, ma ye ke mia ôsu e Galilé. 33Pierre a nga yalan a jô nye na: Nge bese ba ye kolôban ôbak amu wo, ve ma ma ye bo te koleban ôbak. 34Yésus a nga kate nye na: Ma jô wo bebela na alu di, te na nnôme kup a loñé, wo ye kate ma biyoñe bilaa. 35Pierre a nga jô nye na: To'o na me nga yiane wu bia wo, teke fo'o na me nga ye kate wo. Bebé avale te fe beyé'é bese be nga jô.
Yésus a ye'elan e Gétsémané
(Mk 14:32-42; Lk 22:40-46)
36Ane ba be Yésus be nga kui e vôm ba loone na Gétsémané, nye beyé'é na: Taba'ane si valé, nté ma ke ôbe nté na me ye'elan. 37A nga nyoñe Pierre baa bone be Zébédé bebaé; a nga taté na a wô'ô ôlun a biyebe. 38Nye be na: Nsisime wom wo wô'ô ôlun étua abui a kui awu; lika'ane va a momba'an fufulu a ma. 39Nde a subu ôsu mone nté, ve ku asu dé é butu si, a nga ye'elan a jô'ô na: A Esaa wom, nge é ne ngule ya bo nalé na *élaé ji é ke ma ôyap; ve da saa ane ma kômbô ve ane wo kômbô. 40Ve zu mfa'a beyé'é be mbe a koone be ôyo, nye na: A Pierre nalé a ne na mi nji bi ngule ya mombô fufulu a na to'o ve awolo da' 41Momba'an a ye'ela'an, nalé mia ye bo te nyiin e *mebôbela'a été; mfa'a wu *nsisim ô ne ngu, mfa'a mbok minsôn mi ne atek. 42A nga beta ke éyoñe baa asu ya ye'elan a jô'ô na: A Esaa wom nge *élaé ji é se nguleya lôt te na me nya'a je, nkômbane wôé ô boba'an! 43Mvus éte a nga beta zu a koone be be too ôyo, amu mise map me mbe adit. 44Ve li'i be a beta ke ôyap asu ya ye'elan éyoñe lale, a ba'ala'ane ke avale bifia da. 45Ane a nga zu e be beyé'é a jô be na: Kelan ôsu *a ke ôyo a woka'an! Mi lôô éyoñ é ntoo bebé nje mona môt a yiane keeban e mo bebo *abé. 46Kôla'ane si! Nkean! Mi lôô môt a koñe ma a soya.
Nkoñan a mbiane Yésus
(Mk 14:32-42; Lk 22:39-46; Yo 18:1; Héb 5:7)
47A ngenan a kobô'ô, éyoñe te Yudas, wua ya beyé'é awôm a bebaé a nga suan a ngume nsamba bôt be be'e minkpwaté mekôn a mimbeñ. Bivete betuni a bemvendé ya ayoñe beyude mbe be nga lôme be. 48E môt a nga koñe nye, a nga ve be ndem a jô'ô na: Môt ma ye latane nye anyu, nye le, biane nye. 49Eté été a nga subu Yésus bebé a jô na: Mbôlô a Rabbi, ve latane nye anyu. 50Yésus a nga jô nye na: A Mvôé jam, ô ne va amu nalé. Ane be nga zu bebé a wua Yésus mo nyô a bi nye. 51Ane wua ya ba ba be Yésus be mbe a nga same wo a té nkpwaté mekône wé abam a ba'é mbo ésaé njôô betuni a tyi'i nye alo. 52Nde Yésus a nga jô nye na: Some nkpwaté mekône wôé e vôme wé; amu ba bese ba nyoñe nkpwaté mekôn, ba ye fe wu ve a nkpwaté mekôn. 53Nge na ye wo simesane na me se nguleya ye'elan Esaa wom éyoñ ébiene ji, nye ke a telé fefele jam éto ji beéngele mewosan a dañe bizu'u awôm a bibaé' 54Nne mintilan mi ne nguleya tôéban aya te na avale di da boban' 55Awolo te nde Yésus a nga jô minsamba mi bôte na: Mia te kui mi bili minkpwaté mekôn a mimbeñ asu ya bi ma ane zee mimfaka. Môs ôse, e *nda Zambe été, me mbe me tabe'e si a ye'ele, mi nji bi ma. 56Jame dina ese é kuiya asu ya na mintilane bekulu mejô mi tôéban. Ane beyé'é bese be nga li'i nye a tup.
Yésus a tele asu betyi'i mejô
(Mk 14:53-65; Lk 22:54, 63-65; Yo 18:12, 13, 19-24)
57Eyoñe be biya Yésus, be nga kee nye e be Kayif, *ntuni nnen, e vôme beyeme bekalate a bemvendé be nga too nsulan. 58Pierre, nye a mbe a za'a ôyap a kui e nseñe *ntuni nnen, a éyoñ a nyineya mfa'a ya été, a mbe a too ba be ayôme bôt asu ya yen asu'ulan ya mam. 59Betuni benen a ékôan ja kobô mejô ése be mbe be jeñek ékotekote jame ya bo'olô Yésus ane be ne wôé nye. 60Ve be nji yen, akôsa bo na bikotekote bengaa bi mbe valé. Ayap é lôteya, nde bebaé ya été ba subu bebé a jô 61na: Môte nyô a mbe a jô'ô na: Me ne tyame *nda Zambe, a beta lôñe je môse milaa. 62Ntuni nnen a nga tebe tetele a jô nye na: Ye wo te yalan to'o jame da ya mam ba bo'olô wo nga' 63Yésus a nga too évô. Ntuni nnen a nga jô nye na: Ma vuu wo soñ ane Zambe a vee na ô kate bia nge ô ne Krist e mona Zambe. 64Yésus a nga jô nye na: Wo wo jô. Ve da ma jô mia na: ataté éyoñe ji, mia ye yene mona môt a too e mbo nnôme ya éto njôan a a za'a minkute ya yôp. 65Eyoñe te *ntuni nnen a nga nyap mengômesane mé a jô na: A kobôya ébiasé nkobô, amu jé bia beta yi bengaa? Mi lôô éyoñe ji, mi maneya wô'ô nkobô ébiasé. 66Mia yen aya? Be nye na: A yiane wu. 67Nde be nga tui nye menden asu a bibi nye mebaé. Bevok be nga bibi nye minkasa 68be jô'ô na: Kuli'i bia mejô a Krist, za a te bibi wo'
Pierre a kate Yésus
(Mk 14:66-72; Lk 22:55-62; Yo 18:25-27)
69Pierre a nga too si atan, e nseñ été; nde mbo ésaé minga éziñ, a zu nye bebé a jô na: Wo fe ô mbe nsamba Yésus môte ya Galilé. 70Nde a nga kat asu bese a jô'ô na: Me nji yeme jam wo jô. 71Eyoñ a kui atan a kele mfa'a *mbé akak ô mbe, nde minga mfe a yene nye a jô na: Môte nyô a mbe nsamba Yésus môte ya Nazarét. 72A nga beta kat a kane'e ngana na: Me nji yeme môt ate; 73Ôbe nté ô lôteya, bôte be nga tele valé be nga subu Pierre bebé a jô nye na: Bebela na wo fe ô ne wua ya be be, nkobô wôé ôbien wo liti vôme wo so. 74Nde a taté na a fôtan a kane mengana na: Me nji yeme môt ate. Eté été ane nnôme kup a nga loñ. 75Ane Pierre a nga simesane nkobô Yésus a nga kobô na: Te na nnôme kup a loñ, wo ye kate ma biyoñe bilaa; nde a nga kui atan a dañe yi.
Currently Selected:
Mt 26: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.