Mt 22
22
Abô'ô aluk
(Lk 14:16-24; Mt 20:16)
1A yala'ane be, nde Yésus a beta kobô a minkana a jô'ô na: Avale di nde me ne beta funane dee éjôé ya yôp: 2ja funane jame njô bôt éziñ a nga bo éyoñe ya a nga bo ésulan alu'u mone wé; 3a nga lôme bebo bisaé bé be loone bôt a nga bañete ésulan aluk: ve be nga bene zu. 4Ane a nga beta lôme bebo bisaé befe nye na: Katane bôt me nga bañete na: Yenan ane me maneya kôme dina wom: beyôme benya'a bam, a mevoñ biyem biam bi nga tyi'iban, a mam mese me ntoo nkôman, za'an abô'ô aluk. 5Be nji kee kee melo wé, ve viane tube tup: nyina a ke afube dé li, nyô mbok e makite mé; 6ba be nga li'i ve bi bebo bisaé bé a taa be, a wôé be. 7Nde njô bôt a nga yaa a lôme minsamba bezimbi mié na mi wôé bewôé bôt bete a di'i tisone jap. 8Nye bebo bisaé bé na: Jam ôsu é ne na abô'ô aluk é ntoo nkôman, di baa ke na bôt me nga bañete be litiya na be nji yian, 9ajô te ñhe kelan e ma'ane mezen a loone bôte bese mia ye yene na be zu abô'ô aluk. 10Ane bebo bisaé be nga ke mezen a kôane ba bese be nga koone be: mbia a mbamba be bôt; abô'ô aluk ve jaé ne lut a bôt. 11Eyoñe njô bôt a nyiine na a yene bôt be nga looban, ve yene mbo'o éziñ a too tee ngômesan ya abô'ô aluk, 12a nga sili nye na: A mvôé jam, wo te nyiine vana aya tee ngômesan ya abô'ô aluk? Nye ke ve ane ba te loé nye anyu. 13Ajô te njô bôt a nga jô bebo bisaé na: Ka'ane nye mebo a mo, a wu'ane nye e dibi é ne atan, e wé a ye bo ve ñyôn a nlatane mesôñ. 14Amu abui bôt e ne nlooban, ve ba be ne ntoban be ne tyôtyoé.
Va'ane kéza biôme bié a Zambe émbié
(Mk 12:13-17; Lk 20:20-26)
15Eyoñe Befarizieñ be keya, be nga tebe éso'o ya bi Yésus ôlam ya bifia bié. 16Nde ba lôme beyé'é bap a bôte ya ngame Hérôde e be nye be jô'ô na: A Nye'ele, bia yeme na ô ne bebela a é ne fe bebela na wo ye'ele bôt zene Zambe teke ko môt éziñe woñ, amu ô nji semé ngume môt: 17Kate ñhe bia, wo yen aya, ye da yiane na be ya'ane kéza *toya ye momo' 18Amu Yésus a mbe a yemek nsisime *nkpwala ô ne be be, nye be na: Amu jé mia bôbôlô ma a bebadu'u be bôt' 19Lita'ane ma moné *toya, nde ba liti nye denié wua. 20A nga jô be na: Fôtô za nyô a za a nee ntilane wu' 21Be nga yalane nye na: Sézar. Nde a jô be na: Bula'ane ñhe Sézar biôme bi Sézar a Zambe biôme bi Zambe. 22Eyoñe be nga wô'ô nalé, be nga semé ve li'i nye a ke ôyap.
Nsili ajô ñwômane miñwuan
(Mk 12:18-27; Lk 20:27-38)
23Môs ôte, Besadusieñ be nga zu be nye, mbe ba jô na ñwômane miñwuan ô nji bo, nde ba sili nye na: 24A Nye'ele, Môze a nga jô na: Nge môt éziñ a wu tee *bon, monyañe wé a ye lu'u minga wé a biaé monyañe wé ate mvoñe bôt. 25Bobenyañe zamgbwale b'éziñ be nga too be bia, ntôl ve luk a wu te li'i mvoñe bôt, ane a nga li'i monyañe wé e minga wé; 26avale te fe e nga kui e be monyañe baa, nyô lale a kui nyô zamgbwale. 27Mvus éte minga fe a nga wu. 28Nde ñhe éyoñe ya ñwômane miñwuan, minga nyô a ye bo nga za ya bobenyañe zamgbwale ba? Amu bese be nga lu'u nye. 29Yésus a nga yalan a jô be na: Mia fu'u fé amu te yeme mintilan a ngule Zambe; 30éyoñe ya ñwômane miñwuan, befam ba ye bo te luk a binga ba ye bo te lu'uban, ve ba ye bo ane beéngele ya yôp. 31Mfa'a ya ajô ñwômane miñwuan ye mi nji lañ ane Zambe a jô mia na: 32Ma me ne e Zambe Abraham, e Zambe Izak a e Zambe Yakob? A nji bo e Zambe miñwuan ve nyôa bevevee. 33Eyoñe jama bôt a nga wô'ô nalé be nga bi ébu'a anyu a mo amu ñye'elane wé.
Atiñe da dañe metiñe mese
(Mk 12:28-34; Lk 10:25-28)
34Eyoñe Befarizieñ be wô'ôya na a feteya Besadusieñ menyu, be nga sulan e vôme wua ate. 35Wua ya été, a too ñyeme metiñ, a nga sili nye nsili asu ya bôbôlô nye: 36A nye'ele, abendé avé da dañ anen e metiñ été' 37Yésus a nga yalane na: Wo ye nye'e Nti e Zambe wôé a nleme wôé ôse, a nsisime wôé ôse a ôsimesane viôé ôse; 38abendé e ne anen a e tele ôsu nde le. 39Di baa da funane fe di ôsu nde di: Wo ye nye'e môt a ne wo bebé ane womien. 40Metiñ mese me tyele e mebendé mana mebaé nalé fe bekulu mejô.
Nsili ajô mone David
(Mk 12:35-37; Lk 20:41-44)
41Eyoñe Befarizieñ be sulaneya, Yésus a nga sili be 42na: Mia simesane aya ajô Krist? A ne e mona za? Be nye na: Mona David. 43A nga jô be na: Amu jé ñhe David, e Nsisim été, a loone nye Nti a jô'ô na: 44Nti a nga jô Nti wome na: Tabe'e si e mbo nnôme wom akekui me futiya besiñe bôé e mebo môé si' 45Nge David a loone nye Nti, nne a ne bo mone wé aya' 46Teke môt a mbe nguleya yalane nye to'o ve ajô da, a ataté éyoñe te, teke môt a nga beta bi ayo'o nleme ya sili nye nsili.
Currently Selected:
Mt 22: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.