Est 2
2
Esthe a bo nga njô bôt
(1 Sam 2:7-8; Mink 15:33)
1Eyoñe mam mete me maneya, nleme njô bôt Asuérus ô nga voé. Nde a simesane Vasti, e jam a nga bo a ntyi'an ô nga nyoñeban ajô dé. 2Ane bôt ba saane nye be nga jô nye na: Ke ba yiane jeñe wo bindune bengo be binga bia dañ abeñ. 3Ajô te njô bôt a ntoo ve telé bôt e mebôta mesi mese y'éjôé jé, be bo ésaé ya zuu bengo be binga bese ba dañ abeñ e *nda jé é ne e Suz, Egué, mba'ale binga ya *nda njô bôt a ye ba'ale be a ve be mimbone mi nyanga. 4Ngone minga njô bôt a ye nye'e nje ja ye bo nga njô bôt, éjiane Vasti. Ane njô bôt a nga nye'e fe? éte, a kañese je, ane e nga bo nalé.
5Mone Beyude éziñ a nga too e nlô tison ba loone Suz jôé na Mardôsé, e mone Yahir, e mone Shimeyi, e mone Kis ya mvô'ô Bényamin, 6a mbe wua ya nsamba bôte Nébukatnétzar, njô bôte ya Babilôn a nga bi Yérusalém a zuu wô minkôm ba be Yékônia, njô bôte ya Yuda. 7Mardôsé a nga nyoñ a yale Adasa, a mbe jôé afe na Esthe, mona ndômenyañ, a nga ba'ale nye ane mone wé mvus awu bebiaé bé. Esthe a mbe étua abeñ.
8Eyoñ atiñe njô bôt e kuiya, be nga sulan abui bengo be binga e tisone Suz, Esthe a too wua y'été, be nga kee nye nda njô bôt ane bengo be binga bevok, Egué, mba'ale binga a ba'ale nye. 9Egué a nga yen Esthe mvaé a ji'a ve nye biôme bise bia yian asu nyanga a nkôman émien. A nga ve nye bebo bisaé be binga zamgbwa ntoban e bebo bisaé ya *nda njô été ba be be be tabe éfase *nda ja dañ abeñ e nlame binga. 10Esthe a nji kulane na a ne ngone Beyude, amu Mardôsé a nga ve nye de *atiñ. 11Wôna *môs ôse, Mardôsé ki a mbe a za'a wulu e nseñe nlame binga asu ya yemelan nge Esthe a ne *mvo'é a yemelane fe jam da ye kui be nye.
12Bengo be binga ya nlame binga be nga yiane tôñe mboone nyanga be nga tiñeti binga na be bo tañe ngume mbu: ngon ésaman y'ôsu be nga wobane mbone mir; ngon ésamane fok be nga wobane mebôndé me ne mbamba menyum a mimbone mi binga mife asu nyanga. Jam da tôñe valé e ne na ngone minga ése é mbe é bili éyoñ a yiane ke be njô bôt Asuérus. 13Eyoñe ngon minga ja ke be njô bôt, be nga ve nye jôm ése a sili a kee je akôlô nlame binga a ke *nda njô bôt; 14a nga ke be njô bôt mamengô'é, tyé kpwaa be nga kee nye nlame binga, a ba'aleban e be Shakgaz, mmiak ô ne mba'ale bibon bi njô bôt. A mbe nguleya beta ke be njô bôt vengevenge ve njô bôt a kômbô nye nge loone nye a jôé dé.
15Eyoñ éyoñe jé ya ke be njô bôt é nga kpwaan, Esthe, ngon Abikaé, a mbe ndômenyañe Mardôsé nje a nga nyoñ a yale ane mone wé, a nga nyoñ fo'o ve biôme Egué nkalan *élaé njô bôt a mba'ale binga a nga bendé nye na a nyoñ. Bôte bese be nga yen Esthe mvaé. 16Nde be nga zu nyoñ Esthe naa ba kee nye be njô bôt Asuérus e *nda njô bôt, e ngon awômô é ne jôé na Tébét, mbu zamgbwale ya njôane wé. 17Ane njô bôt a nga nye'e Esthe a lôte binga bevo'o bese a Esthe a nga yene mvaé a mvame be nye a dañe bengo be binga bevo'o bese. Nde a nga jalé ékate njô bôt e nlô wé yôb a ve nye éto nga njô bôt éjiane Vasti. 18Ane njô bôt a nga bo beta dina asu bivet a bebo bisaé bé, dina Esthe. A nga ve bôte ya bifase bi si y'éjôé nguleya bo te ya'ane *toya a ve bôte memvaka a ésôs ése ja yiane njô bôt.
19Be nga sulane bengo be binga éyoñe baa, Mardôsé a nga bili éto e bisaé bi njô bôt. 20Esthe ki teke kulane tine jé ya Beyude amu a nga ba'ale atiñe Mardôsé a nga ve nye; a nga ke ôsu a bo nye mewôk aval'ane éyoñe Mardôsé a mbe a ba'ale'e nye.
21Môs éziñ, valé Mardôsé a bo'o bisaé bié e *nda njô bôt, nde Bigtan a Terék, bebo bisaé be mbe beba'ale mimbé mia nyiine menda me njô bôt, be nga bôndé fe'e ya wôé njô bôt Asuérus amu a nga bo be na be wô'ôlun. 22Ane Mardôsé a nga yeme jame te, ve kate de Esthe nga njô bôt, nde Esthe ki a nga kate njô bôt e mam Mardôsé a nga kulan. 23Eyoñ be maneya fas ajô, be nga yene na ajô ba bo'olô e n'été. Nde be nga tyelé bebo bisaé bana bebaé yôp, a tili jame te e kalate ba tili mba'alane mame y'éjôé, avale njô bôt émien a nga bendé.
Currently Selected:
Est 2: BDCB
Highlight
Copy
Compare
Share
Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.