लूका 2
2
येशू डीन्छ
(मत्ती १:१८-२५)
1येशू डीन्खी पाच बेलाङ रोम देशुङ कैसर अगस्टसै पट्ट न भर्मीकोलाक जनगणनौ लागि म्यार्मीन रीकाक्की डेम हुकुम याहा। 2इटजाट्न होसे ठावाङ जनगणनौ लागि म्यार्मीन रीकाक्की डेम पहिलो खेप हुकुम राम्हन्या। होडीक बेला सिरिया डेच ठावाङ कुरेनियस हाकिम लेया। 3हुकुम याछ न्हुइङ पट्ट न भर्मीको म्यार्मीन रीकाक्की डेम लाहा लहो पुर्ख्योली ठावाङ नुङा।
4होडीक बेला योसेफ म्यार्मीनौ भर्मी गालील डेच ठाऔ नासरताङ ङुमन्या। होच्यो बोइ बाज्युकुङ इम बेथलेहेमाङ लेचबाटै होसे र म्यार्मीन रीकाक्की डेम बेथलेहेमाङ नुङा। 5योसेफ र मरियमौ ब्याहा छान्की पक्का छान्चबाटै होचे मरियमकी र लाहाखाटा न आल्हा। होडीक बेला मरियमौ मीटुकाङ मीजा लेया। 6अनि होखुरीक बेथलेहेमाङ लेनाङ न मरियमौ मीजा डीन्छ बेला छाना। 7होटै मरियमै जेठा मीजाकी डीन्हा। होटै होखुरीकै मीजाकी बढीनाङ आर्फोकार गोठाङ लेच डोँडोवाङ मीसाका। हीजैडेनाङ होखुरीककी पौवाङ ङुच ठाउँ न मालेया।
स्वर्गदूतको र भेडा गोठ्लाको
8बेथलेहेम सहरौ चउराङ नाबीक गोठ्लाको भेडा रुङ्चै ङुम-ङुमन्या। 9प्रभुओ काट स्वर्गदूत होखुरीकुङ म्याहासाङ डाङार प्रभुओ ज्योति होखुरीकुङ वरिपरि चम्कडीसा। होटै होखुरीक साप्फी बीह्रीया। 10तब स्वर्गदूतै होखुरीककी डेया, “माबीह्रीनी, हीजैडेनाङ ङा नाखुरीककी बडो आनन्दौ सेछ समाचार सेटाक्ले। होसे चहिँ पट्ट न भर्मीकुङ लागि छान्ने। 11छीनी दाऊदौ सहराङ नाखुरीकुङ निम्ति काट मुक्तिदातौ जन्म छान्नने होसको न मुक्ति याछ ख्रीष्ट प्रभु हो। 12नाखुरीकै चाम-चाम डीन्छ मार्जा ङ्याल्डाङ मीजाकी बढीनै आर्फोकार डोँडोवाङ मीसाक्ङ डाच डुप्ले र इटजाट्न चीन्डीले।” 13होडीक बेला न मोसोमायाङ होसे स्वर्गदूतखाटा अरु वास्टै स्वर्गदूतको होला राहार परमेश्वरौ जय-जयकार जाट्चै इट डेयार ल्हीङ्की ठाला,
14“सर्वोच्चोवाङ परमेश्वरकी महिमा,
र पृथ्वीयाङ कुसे भर्मीकोखाटा होसको माह्राङ्ने, होखुरीककी शान्ति।”
15स्वर्गदूतको स्वर्गाङ ल्हेस्रखीङ गोठ्लाकै डेया, “रान्ही, काल्हाको परमप्रभुये डेच कुराको ङोस्की बेथलेहेमाङ नुइङ।” 16होटै होखुरीक बेथलेहेमाङ आतुरीखाटा नुङा। मरियम र योसेफ होटै मार्जा ङ्याल्डाङ मीजा मीस्न ङुच डुपा। 17जब होखुरीकै इसे डाङा तब इसे बालकौ बारेयाङ कुसे कुरा होखुरीककी डेमन्या होसे होखुरीकै सेटाक्ङ याहा। 18गोठ्लाकै डेच कुरा सेयार पट्ट न भर्मीको छक्क पर्या। 19तर मरियमै चहिँ होला छान्च पट्ट न कुराकी मीमनाङ न डार विचार जाट्की ठाला। 20होटै स्वर्गदूतकै डेच लेखा न भेडा गोठ्लाकै सेच र डाङ्चबाटै परमेश्वरकी प्रशंसा र स्तुति जाट्चै ल्हेसा।
बालकौ म्यार्मीन येशू डाच
21आठ याक ओल्छ न्हुइङ इस्राएली चलन अनुसार बालककी खतना जाटार होसकुङ म्यार्मीन “येशू” डा। होसे म्यार्मीन चहिँ होसको मरियमौ मीटुकाङ राखी डेनाङ अगाडि न स्वर्गदूतै डेमन्या।
परमेश्वरौ मन्दिराङ येशूकी अर्पण जाट्च
22मोशौ व्यवस्था अनुसार जब होखुरीक चोखडीस्न भ्यारखीङ, होसकोकी बोइ-मोये परमेश्वराङ अर्पण जाट्की यरूशलेमुङ मन्दिराङ राका। 23हीजैडेनाङ परमेश्वरौ व्यवस्थाङ रीक्ङने, “पट्ट न जेठा मीजा परमेश्वरौ लागि पवित्र छान्ने।”#प्रस्थान १३:२,१२,१५ 24होटै परमेश्वरौ व्यवस्थै डेनाङ लेखा न ढुकुर वा परेवौ काट जोर मीजा लार बलि याखी राहा।#लेवी १२:८ 25होडीक बेला शिमियोन डेच भर्मी यरूशलेमाङ ङुमन्या। होसे धार्मिक भर्मी लेया। होसे इस्राएलीकोलाक मुक्ति याछ मसिहौ लाम ङोस्न ङुमन्या। पवित्र आत्मा होसेखाटा लेया। 26“परमप्रभुये मुक्ति याछ ख्रीष्टकी माडाङ्ठर नाको मासीले” डेम पवित्र आत्मै अगाडि न होसकी थाहा याम्हन्या। 27पवित्र आत्मै अगुवाइ जाटार शिमियोन परमेश्वरौ मन्दिराङ नुङा। होडीक बेला न व्यवस्था पूरा जाट्की डेम बोइ-मोये बालक येशूकी लार मन्दिराङ राका। 28होटै शिमियोनै बालक येशूकी मीहुटाङ लार परमेश्वरकी धन्यवाद याछै डेया, 29“हे प्रभु, नाकै नाखोलौ वचन पूरा जाट्नने,
अब नाकुङ नोकरकी शान्तिखाटा बिदा यान्ही।
30हीजैडेनाङ ङौ मीमीकै नाकुङ उद्धार डाङ्नने।
31होसे नाकै पट्ट न भर्मीकुङ म्याहासाङ तयार जाट्नने।
32अन्यजाति भर्मीकोलाक प्रकाशौ लागि ज्योति र नाकुङ जाति इस्राएलीकोलाक महिमौ ज्योति।”
33शिमियोनै बालकौ बारेयाङ डेच कुरा सेयार होसकुङ बोइ-मोइ छक्क पर्या। 34शिमियोनै होखुरीककी आशिष याहा, र होसकुङ मोइ मरियमकी डेया, “ङोस्नी, इसे बालक इस्राएलाङ वास्टै भर्मीकुङ पतन र उत्थानौ निम्ति र वास्टै लकीङ विरोधाङ ङाक्च काट चिन्हौ निम्ति नियुक्ती जाट्नने। 35वास्टै भर्मीकै मेखुरीकुङ हृदयुङ कुरा पाखा छ्युक्ख्यो। अनि नाकुङ मीगीन ह्रेट्च तरवारै झ्वाक याछ लेखा न बीक्ले।”
36होसे मन्दिराङ हन्ना डेच काट बुढी अगमवादिनी लेया। होसे आसेर कुलुङ फनुएलौ मास्टो मीजा लेया। ब्याहा छान्च सात वर्ष छान्नाङ न विधवा छानन्या। 37होसे चौरासी वर्ष टाम्हन्या। होचे सेन र परमेश्वरौ मन्दिर माडास्नन्या र नाबीक नाम्सीन उपवास र प्रार्थना जाट्चै आराधना जाट्नन्या। 38होडीक न बेला होचे मरियम र योसेफ छीनी राहार परमेश्वरकी धन्यवाद याहा। होटै यरूशलेमुङ छुटकारौ लाम ङोस्चकोलाक बालकौ बारेयाङ सेटाका।
39परमप्रभुओ व्यवस्थै डेच लेखा जाट्की पर्च काम जाट्न भ्याच न्हुइङ योसेफ र मरियम बालक येशूकी लार मेखुरीकुङ सहर गालीलौ नासरताङ ल्हेसा। 40बालक येशू ल्होङ्चै, बल र बुद्धियाङ न्हेप्चै नुङा र परमेश्वरौ अनुग्रह होसको मीटाक लेया।
बालक येशू परमेश्वरौ मन्दिराङ
41येशूओ बोइ-मोइ छुटकारौ चाडाङ सालै पिच्छे यरूशलेमाङ नुङ्च जाट्नन्या। 42जब येशू बाह्र वर्ष टाहा, होखुरीकुङ चलन अनुसार होखुरीकै येशूकी लार चाड मन्डीकी डेम नुङा। 43चाड मन्डीम भ्यारखीङ होखुरीक इमाङ ल्हेस्न न लेया। येशू चहिँ यरूशलेमाङ न ङुवा। तर होसकुङ बोइ-मोइकी इसे कुरा थाहा माछाना। 44येशू लाफाकोखाटा ले डेम आर्मीटार होखुरीक कायाकौ लाम ह्वाम भ्यामन्या। होटै नामबीक्रखीङ लाफाकुङ मीघ्याङ मीजाकी पाकी ठाला। 45तर होखुरीकै मीजाकी होला माडुप्चबाटै फेरि होसकोकी पाकी डेम यरूशलेमाङ न ल्हेसा। 46सोम याक न्हुइङ मट्टै येशूकी मेकुङ बोइ-मोये परमेश्वरौ मन्दिराङ ङुम-ङुच डुपा। होडीक बेला येशू धर्मगुरुकोखाटा ङुवार होखुरीकुङ कुरा सेचै र गीन्चै ङुमन्या। 47होसकुङ बुद्धि र उत्तर याछ डाङार होला लेच पट्ट न सेच भर्मीको छक्क पर्नन्या। 48होटजाट्न मीजाकी होला डाङार होसकुङ बोइ-मोइ छक्क पर्या। होटै होसकुङ मोये डेया, “मीजा नाकै कानकी याङ्च ही जाट्च? नाकुङ बोइ र ङा आटडीस्चै नाकोकी पाम ह्वा” 49येशूये होखुरीककी डेया, “नाखुरीकै ङाकी हीजै पाच? ही ङा ङाल्हौ बोयो इमाङ छान्की पर्ले डेम नाखुरीककी थाहा मालेया?” 50तर येशूये डेच कुरा मरियम र योसेफै हीर माबुझडीसा। 51होटै येशू बोइ-मोइखाटा नासरताङ ल्हेसा। र बोइ मोयो कुरा मन्डीयार आज्ञाकारी छानार ङुवा। होसकुङ मोइ मरियमै चहिँ इसे पट्ट न कुरा मीमनाङ डा। 52अनि येशू बुद्धियाङ, शरीराङ र परमेश्वर र भर्मीकुङ अनुग्रहाङ ल्होङ्चै नुङा।
Currently Selected:
लूका 2: EMGP
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.
लूका 2
2
येशू डीन्छ
(मत्ती १:१८-२५)
1येशू डीन्खी पाच बेलाङ रोम देशुङ कैसर अगस्टसै पट्ट न भर्मीकोलाक जनगणनौ लागि म्यार्मीन रीकाक्की डेम हुकुम याहा। 2इटजाट्न होसे ठावाङ जनगणनौ लागि म्यार्मीन रीकाक्की डेम पहिलो खेप हुकुम राम्हन्या। होडीक बेला सिरिया डेच ठावाङ कुरेनियस हाकिम लेया। 3हुकुम याछ न्हुइङ पट्ट न भर्मीको म्यार्मीन रीकाक्की डेम लाहा लहो पुर्ख्योली ठावाङ नुङा।
4होडीक बेला योसेफ म्यार्मीनौ भर्मी गालील डेच ठाऔ नासरताङ ङुमन्या। होच्यो बोइ बाज्युकुङ इम बेथलेहेमाङ लेचबाटै होसे र म्यार्मीन रीकाक्की डेम बेथलेहेमाङ नुङा। 5योसेफ र मरियमौ ब्याहा छान्की पक्का छान्चबाटै होचे मरियमकी र लाहाखाटा न आल्हा। होडीक बेला मरियमौ मीटुकाङ मीजा लेया। 6अनि होखुरीक बेथलेहेमाङ लेनाङ न मरियमौ मीजा डीन्छ बेला छाना। 7होटै मरियमै जेठा मीजाकी डीन्हा। होटै होखुरीकै मीजाकी बढीनाङ आर्फोकार गोठाङ लेच डोँडोवाङ मीसाका। हीजैडेनाङ होखुरीककी पौवाङ ङुच ठाउँ न मालेया।
स्वर्गदूतको र भेडा गोठ्लाको
8बेथलेहेम सहरौ चउराङ नाबीक गोठ्लाको भेडा रुङ्चै ङुम-ङुमन्या। 9प्रभुओ काट स्वर्गदूत होखुरीकुङ म्याहासाङ डाङार प्रभुओ ज्योति होखुरीकुङ वरिपरि चम्कडीसा। होटै होखुरीक साप्फी बीह्रीया। 10तब स्वर्गदूतै होखुरीककी डेया, “माबीह्रीनी, हीजैडेनाङ ङा नाखुरीककी बडो आनन्दौ सेछ समाचार सेटाक्ले। होसे चहिँ पट्ट न भर्मीकुङ लागि छान्ने। 11छीनी दाऊदौ सहराङ नाखुरीकुङ निम्ति काट मुक्तिदातौ जन्म छान्नने होसको न मुक्ति याछ ख्रीष्ट प्रभु हो। 12नाखुरीकै चाम-चाम डीन्छ मार्जा ङ्याल्डाङ मीजाकी बढीनै आर्फोकार डोँडोवाङ मीसाक्ङ डाच डुप्ले र इटजाट्न चीन्डीले।” 13होडीक बेला न मोसोमायाङ होसे स्वर्गदूतखाटा अरु वास्टै स्वर्गदूतको होला राहार परमेश्वरौ जय-जयकार जाट्चै इट डेयार ल्हीङ्की ठाला,
14“सर्वोच्चोवाङ परमेश्वरकी महिमा,
र पृथ्वीयाङ कुसे भर्मीकोखाटा होसको माह्राङ्ने, होखुरीककी शान्ति।”
15स्वर्गदूतको स्वर्गाङ ल्हेस्रखीङ गोठ्लाकै डेया, “रान्ही, काल्हाको परमप्रभुये डेच कुराको ङोस्की बेथलेहेमाङ नुइङ।” 16होटै होखुरीक बेथलेहेमाङ आतुरीखाटा नुङा। मरियम र योसेफ होटै मार्जा ङ्याल्डाङ मीजा मीस्न ङुच डुपा। 17जब होखुरीकै इसे डाङा तब इसे बालकौ बारेयाङ कुसे कुरा होखुरीककी डेमन्या होसे होखुरीकै सेटाक्ङ याहा। 18गोठ्लाकै डेच कुरा सेयार पट्ट न भर्मीको छक्क पर्या। 19तर मरियमै चहिँ होला छान्च पट्ट न कुराकी मीमनाङ न डार विचार जाट्की ठाला। 20होटै स्वर्गदूतकै डेच लेखा न भेडा गोठ्लाकै सेच र डाङ्चबाटै परमेश्वरकी प्रशंसा र स्तुति जाट्चै ल्हेसा।
बालकौ म्यार्मीन येशू डाच
21आठ याक ओल्छ न्हुइङ इस्राएली चलन अनुसार बालककी खतना जाटार होसकुङ म्यार्मीन “येशू” डा। होसे म्यार्मीन चहिँ होसको मरियमौ मीटुकाङ राखी डेनाङ अगाडि न स्वर्गदूतै डेमन्या।
परमेश्वरौ मन्दिराङ येशूकी अर्पण जाट्च
22मोशौ व्यवस्था अनुसार जब होखुरीक चोखडीस्न भ्यारखीङ, होसकोकी बोइ-मोये परमेश्वराङ अर्पण जाट्की यरूशलेमुङ मन्दिराङ राका। 23हीजैडेनाङ परमेश्वरौ व्यवस्थाङ रीक्ङने, “पट्ट न जेठा मीजा परमेश्वरौ लागि पवित्र छान्ने।”#प्रस्थान १३:२,१२,१५ 24होटै परमेश्वरौ व्यवस्थै डेनाङ लेखा न ढुकुर वा परेवौ काट जोर मीजा लार बलि याखी राहा।#लेवी १२:८ 25होडीक बेला शिमियोन डेच भर्मी यरूशलेमाङ ङुमन्या। होसे धार्मिक भर्मी लेया। होसे इस्राएलीकोलाक मुक्ति याछ मसिहौ लाम ङोस्न ङुमन्या। पवित्र आत्मा होसेखाटा लेया। 26“परमप्रभुये मुक्ति याछ ख्रीष्टकी माडाङ्ठर नाको मासीले” डेम पवित्र आत्मै अगाडि न होसकी थाहा याम्हन्या। 27पवित्र आत्मै अगुवाइ जाटार शिमियोन परमेश्वरौ मन्दिराङ नुङा। होडीक बेला न व्यवस्था पूरा जाट्की डेम बोइ-मोये बालक येशूकी लार मन्दिराङ राका। 28होटै शिमियोनै बालक येशूकी मीहुटाङ लार परमेश्वरकी धन्यवाद याछै डेया, 29“हे प्रभु, नाकै नाखोलौ वचन पूरा जाट्नने,
अब नाकुङ नोकरकी शान्तिखाटा बिदा यान्ही।
30हीजैडेनाङ ङौ मीमीकै नाकुङ उद्धार डाङ्नने।
31होसे नाकै पट्ट न भर्मीकुङ म्याहासाङ तयार जाट्नने।
32अन्यजाति भर्मीकोलाक प्रकाशौ लागि ज्योति र नाकुङ जाति इस्राएलीकोलाक महिमौ ज्योति।”
33शिमियोनै बालकौ बारेयाङ डेच कुरा सेयार होसकुङ बोइ-मोइ छक्क पर्या। 34शिमियोनै होखुरीककी आशिष याहा, र होसकुङ मोइ मरियमकी डेया, “ङोस्नी, इसे बालक इस्राएलाङ वास्टै भर्मीकुङ पतन र उत्थानौ निम्ति र वास्टै लकीङ विरोधाङ ङाक्च काट चिन्हौ निम्ति नियुक्ती जाट्नने। 35वास्टै भर्मीकै मेखुरीकुङ हृदयुङ कुरा पाखा छ्युक्ख्यो। अनि नाकुङ मीगीन ह्रेट्च तरवारै झ्वाक याछ लेखा न बीक्ले।”
36होसे मन्दिराङ हन्ना डेच काट बुढी अगमवादिनी लेया। होसे आसेर कुलुङ फनुएलौ मास्टो मीजा लेया। ब्याहा छान्च सात वर्ष छान्नाङ न विधवा छानन्या। 37होसे चौरासी वर्ष टाम्हन्या। होचे सेन र परमेश्वरौ मन्दिर माडास्नन्या र नाबीक नाम्सीन उपवास र प्रार्थना जाट्चै आराधना जाट्नन्या। 38होडीक न बेला होचे मरियम र योसेफ छीनी राहार परमेश्वरकी धन्यवाद याहा। होटै यरूशलेमुङ छुटकारौ लाम ङोस्चकोलाक बालकौ बारेयाङ सेटाका।
39परमप्रभुओ व्यवस्थै डेच लेखा जाट्की पर्च काम जाट्न भ्याच न्हुइङ योसेफ र मरियम बालक येशूकी लार मेखुरीकुङ सहर गालीलौ नासरताङ ल्हेसा। 40बालक येशू ल्होङ्चै, बल र बुद्धियाङ न्हेप्चै नुङा र परमेश्वरौ अनुग्रह होसको मीटाक लेया।
बालक येशू परमेश्वरौ मन्दिराङ
41येशूओ बोइ-मोइ छुटकारौ चाडाङ सालै पिच्छे यरूशलेमाङ नुङ्च जाट्नन्या। 42जब येशू बाह्र वर्ष टाहा, होखुरीकुङ चलन अनुसार होखुरीकै येशूकी लार चाड मन्डीकी डेम नुङा। 43चाड मन्डीम भ्यारखीङ होखुरीक इमाङ ल्हेस्न न लेया। येशू चहिँ यरूशलेमाङ न ङुवा। तर होसकुङ बोइ-मोइकी इसे कुरा थाहा माछाना। 44येशू लाफाकोखाटा ले डेम आर्मीटार होखुरीक कायाकौ लाम ह्वाम भ्यामन्या। होटै नामबीक्रखीङ लाफाकुङ मीघ्याङ मीजाकी पाकी ठाला। 45तर होखुरीकै मीजाकी होला माडुप्चबाटै फेरि होसकोकी पाकी डेम यरूशलेमाङ न ल्हेसा। 46सोम याक न्हुइङ मट्टै येशूकी मेकुङ बोइ-मोये परमेश्वरौ मन्दिराङ ङुम-ङुच डुपा। होडीक बेला येशू धर्मगुरुकोखाटा ङुवार होखुरीकुङ कुरा सेचै र गीन्चै ङुमन्या। 47होसकुङ बुद्धि र उत्तर याछ डाङार होला लेच पट्ट न सेच भर्मीको छक्क पर्नन्या। 48होटजाट्न मीजाकी होला डाङार होसकुङ बोइ-मोइ छक्क पर्या। होटै होसकुङ मोये डेया, “मीजा नाकै कानकी याङ्च ही जाट्च? नाकुङ बोइ र ङा आटडीस्चै नाकोकी पाम ह्वा” 49येशूये होखुरीककी डेया, “नाखुरीकै ङाकी हीजै पाच? ही ङा ङाल्हौ बोयो इमाङ छान्की पर्ले डेम नाखुरीककी थाहा मालेया?” 50तर येशूये डेच कुरा मरियम र योसेफै हीर माबुझडीसा। 51होटै येशू बोइ-मोइखाटा नासरताङ ल्हेसा। र बोइ मोयो कुरा मन्डीयार आज्ञाकारी छानार ङुवा। होसकुङ मोइ मरियमै चहिँ इसे पट्ट न कुरा मीमनाङ डा। 52अनि येशू बुद्धियाङ, शरीराङ र परमेश्वर र भर्मीकुङ अनुग्रहाङ ल्होङ्चै नुङा।
Currently Selected:
:
Highlight
Copy
Compare
Share
Want to have your highlights saved across all your devices? Sign up or sign in
© 2025 by Mother Tongue Translators Society and Wycliffe Bible Translators, Inc.