Ghlɔɔmö a ‑nʋa 4

Sɛ'ɛ Lagɔbɔgʋʋ gbää ‑aa dɩba 'kɔdɔɔ Ablaamö a dɛ

1Sɛ ‑a 'kä bhä ‑aa dɩba 'kɔdɔ Ablaamö a dɛ gbä? 'Saa 'ɔ nʋnʋlii 'nyɔ a bhä? 2'Ɔ nʋnʋlii a za Lagɔ ‑kä a nɩɩ 'mö ɔ zlɔnɩɛ nʋʋ, ɔ bhɛnɩ a ɔ 'kä tɛkpɔ, ‑maa ɛ'ɛ ‑bhö a ‑lɛ Lagɔ a 'yila 'klʋ ma. 3Nyɩasɛ n'n‑ä ‑sɩbhä gbä, ‑maa Lagɔbɔgʋʋ 'mö, sɛ'ɛ yɩ cɛlɩɛ ‑mä ɔ dɛ nɩɩ: Ablaamö, Lagɔ 'a bhïlawɛlɩɩ, dlɩ ɔ 'tɛɛniiɛ, mɩɩ kää 'nglɩ 'n Lagɔ yoo 'mözlɔnɩnyɔ 'mö 'wʋ 'libhï.#4.3 Zenɛɛzɩ 15.6. 4‑A'bhï ‑a ‑yi sɛ nɩɩ, nɩkpɛ ‑kä libho nʋʋ, 'pɛnɩ wa 'pɛnɔɔ. ‑Lɛ a 'pɛna 'la, ɛ'ɛ ‑bhö 'fʋ a 'nyɛnyɛlu, ‑maa 'ɔ libhoo ɔ nʋä a za, wa kä wa 'kɔ 'pɛnɩ klɩpaa. 5‑Maa 'n nɩkpɛ 'nɩ ‑lu a ‑lu ‑bhlʋ a bhë nʋ ‑kë, Lagɔ ‑ɔ zlɔmanɩɛ 'nyinylolinʋnyɔ 'mö, ɔ ‑kɔɔ dlɩ a 'yize 'tɛɛnɩ, 'ɔ sɛ ɔ 'tɛɛnɔɔɔ da'a dlɩ a za, Lagɔ, 'mözlɔnɩnyɔ 'mö ɔ libhoo 'wʋ. 6Nɩkpɛ a ‑mɔ 'nɩɛ ‑lu a ‑lu ‑bhlʋ a'bhë nʋ, 'n Lagɔ libhoo 'mözlɔnɩnyɔ 'mö 'wʋʋ, ɔ dɛ, sɛ'ɛ Daviidɩ gbä a‑a nɩɩ:

7 Nɩkpaa ‑wanyɩɩ 'zoku a gbʋ Lagɔ 'tatinɩɛ 'yi,

'n ‑wanyɩ 'nyinylolii ɔ 'titliɛ 'wʋʋ, 'wa ‑jɔlʋ!

8 Nɩkpɛɛ ‑ɔnyɩɩ nyinylolii Lagɔ 'nɩ yɩlɩɛ 'klʋ 'lɩlɩlɩɩ, 'ɔ ‑jɔlʋ! # 4.7‑8 Soomö 32.1‑2.

9‑Jɔlʋ 'la a wɛlɩɩ, Zwiiföwaa, wa 'yize a ‑li bhä ‑a, ‑maa ‑waaa Zwiiföwa glɩnɩɩ, wa ‑li yɩ'ɩɛ bhä glɩnɩmö ‑a? Sɛ'ɛ n gbä'ɛ ‑sɩkaa nɩɩ, Ablaamö, Lagɔ 'a bhïlawɛlɩɩ dlɩ ɔ 'tɛɛniiɛ, mɩɩ kää 'nglɩ 'n Lagɔ yoo 'mözlɔnɩnyɔ 'mö 'wʋ 'libhï. 10‑Maa 'tɛnyɩ ‑mɛ 'mö Lagɔ 'libho bhä 'mözlɔnɩnyɔ 'mö 'wʋ 'nɩ? Ɔ yɛ 'wʋ 'doo 'wë ma bhä 'nɩɩ, ‑maa ɔ'ɔɔ ‑bhlɛ 'wʋ 'doo 'wë ma bhä ‑a? Ɔ'ɔɔ ‑bhlɛ 'wʋ 'doo a'bhë 'lɩlɩlɩ 'n Lagɔ yiɛ nɩɩ, 'mö ɔ zlɔnɩɛ nʋ. 11Lagɔ nʋä sa'aa, ‑lɛ yɛ 'mö gwälɛ 'wë 'n Ablaamö yia'aa bhäla 'wʋ 'doo. 'Wʋdɩɩdɛ 'la, yɩbhlɩnɩdɛ a ‑mämaa a‑a. Sɛ'ɛ ɛ sɛ a‑a zɛmö nɩɩ, Ablaamö, 'ɔ sɛ ɔ 'tɛɛnɩɛ Lagɔ dlɩ a za, 'mö ɔ zlɔnɩɛ Lagɔ a 'yila 'klʋ a dɔ'wʋ. ‑Sɩbhä a za, nɩkpaa ‑waaa 'wʋ dɩ‑ɩ, ‑wa 'tɛɛnɩɛ Lagɔ dlɩɩ, wa 'wuë, Ablaamö mɔɔ glɩnɩɛ wa dɩba. Zaa, sɛɛ Ablaamö zlɔmanɩɛ 'mö Lagɔ a 'yila 'klʋ a dɔ'wʋʋ, ‑sɩbhä wa zlɔmanɩmöä 'mö. 12‑Wa dɩ‑ɩɛ 'wʋʋ wabhlɩ, Ablaamö, wa dɩba ɔ glɩnɩmöä. Miɛ abhlɩ, ‑maa ‑tiamö a dɔ'wʋ, ɛ'ɛ ‑bhö Zwiiföwaa a 'yize muë. ‑Maa ‑aa gla'mö a ‑nʋa ‑waaa 'wa 'wʋdɩɩdɛ dlɩ 'tɛɛnɩ, ‑wa ‑gänɩɛ ‑aa dɩba Ablaamö 'a gbäpöö, miɛ nɩɩ, 'ɔ sɛ ɔ'ɔ a‑a 'wʋ dɩ‑ɩ a'bhë ‑kë 'n ɔ 'tɛɛnɩ a‑a Lagɔ dlɩɩ, ‑wa 'tɛɛnɩmɔɔ ‑sɩbhä dlɩɩ, wa 'yize, mʋa glɩnɩɛ ‑tiamö Ablaamö a 'yuë.

Lagɔ ‑kä nɩkpɛ wɛlɩ 'yukwli 'mö zʋʋ 'yli yɩ 'wlʋnɩɛ klɩpaa

13Lagɔ, sɛ'ɛ ɔ 'nyɛ a‑a Ablaamö 'dɩ nɩɩ, ɔ'bhë ɔ yi gbä, Ablaamö a 'yuë a 'yuë, wa yi 'ylɩ ‑bhlʋ 'mö dʋdʋkpätaa 'wuë ‑kälɩ. Wɛlɩ 'la, sɛɛ Ablaamö 'zʋä Moyizɩ 'a Gböö 'klʋkpamö a za, nza ɔ 'nɔnyɩɛ 'nyɛ, ‑maa 'ɔ sɛ ɔ 'tɛɛnɩɛ Lagɔ dlɩ 'n ɔ yiɛ ‑sɩbhä a za 'mö zlɔmanɩ a za, nza ɔ 'nyɔnyɩɛ. 14Wɛlɩɩ Lagɔ 'zʋa a‑a Ablaamö 'yukwli 'möö, ɛ ‑kä a ‑wa zʋä 'ɔ gböö 'klʋkpamö a 'yize a ‑lii, Lagɔ a dlɩtɛɛnɩtɛnɛ 'naa 'kä a dɛsɛ ‑kä, wɛlɩ 'la 'naa kä a ‑lu 'yli 'mö ‑kä.

15'Lɩlɩlɩ a dɔ'wʋ 'n Lagɔ 'a Gböö 'nɩ a ‑bhölɩ, yɩ 'klʋkpamösɛsʋ 'naa 'kä a ‑bhölɩ. Zaa, Lagɔ 'a Gböö, Lagɔ 'a klɛɛ a 'yize 'mö yɩ jlinɩnyɩɛ 'wʋ.

16Nza n gbää nɩɩ, 'saa Lagɔ gbä a‑a ɔ 'kä Ablaamö a 'yuë a 'yuë 'nyɛɛ, nɩkpaa 'wuë ‑wa 'tɛɛnɩɛ Lagɔ dlɩ cuu, wa ‑luä. 'Fʋ a 'nyɛnyɛlu wʋ glɩnɩɛ. ‑Lɛ a dɔ'wʋ Ablaamö a 'yuë a 'yuë 'wuë 'saa Lagɔ gbää ɔ 'kʋä 'nyɛɛ, wa yu ‑tiamö ghlɩ. 'Ɔ yuëa ‑wa ‑gänɩɛ Lagɔ 'a Gböö a 'yioo, ɛ'ɛ ‑bhö wa 'yize muë, ‑maa ‑muë'la 'wuë ‑wa 'tɛɛnɩ Ablaamö a sɛ Lagɔ dlɩ cuu, wa yu ghlɩmö. Nza n gbä a‑a nɩɩ, ‑abhʋaa 'tɛɛnɩɛ Lagɔ dlɩɩ, ‑aa dɩba Ablaamö glɩnɩɛ. 17Sɛ'ɛ yɩ cɛlɩɛ ɔ dɛ ‑mä Lagɔbɔgʋʋ 'mö nɩɩ, Lagɔ lɛ naa: Ngäya a ‑bɛ a dɩba n 'zʋamöä 'wʋ.#4.17 Zenɛɛzɩ 17.5. ‑A 'wuë, Ablaamö a yuë ‑a glɩnɩɛ ‑mä Lagɔ ɔ 'tɛɛnɩɛ dlɩ a 'yila 'klʋ. Lagɔ, mɔɔ gälaa 'kuduwaa, mɔɔ sʋä gluu, 'saa 'nɩɛ 'kɔ 'wʋ ‑wʋʋ, mɔɔ lɛmuä 'kɔ 'wʋ. 18Wɛlɩɩ Lagɔ 'nyɛɛ Ablaamö, 'mö ɔ 'kää dlɩ 'wʋ a za, dɛɛ nɩkpɛ a dlɩ 'naa 'kä'ɛ 'wʋ 'tɛɛnɩɩ, ‑lɛ 'ɔ dlɩɩ 'tɛɛnɩɛ 'wʋ, ‑sɩbhä a za 'n ɔ yiɛ ngäya 'kɔkɔmlɛ a dɩba 'zʋ. ‑Sɩbhä Lagɔ 'nyɔ a‑a 'dɩ, nɩɩ: Sa'a ‑sɩbhä ‑na 'yuë a 'yuë 'kää 'wʋ ‑di. #4.18 Zenɛɛzɩ 15.5. 19‑Lɛ a 'tɛnyɩ 'mö, Ablaamö kä a 'ylʋbö a gwlɩ ngbï a sɛ, ɔ yɛ gɔ 'wë, ɔ 'lɛnglɛ Salaa, ɔ yɛ'ɛ gɔ, zaa, ɔ'ɔa'a 'yughlɩsɛ ‑wʋ. ‑Maa ‑sɩbhä yɩ ‑wʋ 'mö, Ablaamö 'a dlɩ'wʋkänɔɔ 'nɩɛ nimï yinɩ. 20-21Sɛ'ɛ n gbää nɩɩ, Ablaamö, ɔ ‑yi a sɛ nɩɩ, Lagɔ ‑kä bhïlaa, 'ɔ 'saa ɔ bhïlaa da'aa, ɔ bhɛnɩ ɔ 'kɩ 'yli 'wälanɩ klɩpaa. Zaa, Lagɔ 'nyɔɔ wɛlɩ 'la, ɔ'ɔɔ gʋgɔ 'lɩlɩlɩ, ‑maa dlɩ ɔ 'tɛɛniiɛ, mɩɩ pälɔɔɔ tenyii swɩ yɔwʋ 'n ɔ yiɛ Lagɔ a 'nglɩ 'ghlimanɩ. 22Zaa, Ablaamö 'ɔ sɛ ɔ 'tɛɛnɩɛ Lagɔ dlɩ a za, nza Lagɔ 'libhoo 'mözlɔnɩnyɔ 'mö 'wʋ.#4.22 Zenɛɛzɩ 15.6. 23Wɛlɩ 'la, Ablaamö a 'yize a za yɩ'ɩɛ ‑mä Lagɔbɔgʋʋ 'mö cɛlɩ nɩɩ, Lagɔ kɔ 'mözlɔnɩnyɔ 'mö 'wʋ 'libhï. 24‑Maa ‑abhʋa 'lɛ, ‑abhʋa 'tɛɛnɩɛ Lagɔ ‑ɔ gälaa ‑Alowli Zezwii 'n ɔ yoo glu ‑sɛ dlɩɩ, ‑aa za yɩ cɛlɩmöä ‑mä. 25Zezwii, 'mö Lagɔ 'wlʋä ‑aa 'nyinyloli a za 'mö 'n ɔ yiɛ 'ku. 'Mö ɔ gälaa 'n ɔ yoo glu ‑sɛ, nzɩɩ ɔ ‑kanyɩ 'mözlɔnɩwa 'wʋ 'zʋa.

Currently Selected:

Ghlɔɔmö a ‑nʋa 4: bet

Highlight

Copy

Compare

Want to have your highlights saved across all your devices? Sign up or sign in

Learn More About BdG2