Nʋnʋlii 24

Zwiiföwaa yɛ Pɔɔlʋ ‑mä ‑gɔmla 'kɔdɔɔ Felisɩ yɔwʋ 'klɛnɩ

1'Ylɩ ngbï 'plɩɛ, Lagɔbʋbɔnyɔ 'kɔdɔɔ Ananiasɩ a'bhë, 'n ɔ yiɛ ‑mä Sezalee mö. Ɔ ‑su 'nɛɛnɩwa 'kädɩ ‑mumuë 'bɩwʋ, ɔ ‑su'ɛ avʋkaa, ɔ nglɩɛ Tɛtlusɩ. Wa ghlɛɛ ‑mä, 'n wa yiɛ ‑mä ‑gɔmla 'kɔdɔɔ Felisɩ ghlɩ, wa 'kä Pɔɔlʋ 'klɛ. 2'N ‑gɔmlaa yiɛ Pɔɔlʋ wäzɩ. Ɔ yiɛ, 'n Tɛtlusɩ yiɛ 'mö ‑sɛnɩ, ɔ lɛ naa:

«‑Atʋ Felisɩ, ‑na za ‑a kää mä'ä ‑tiamö a 'tɩɩglɩglɛ. ‑Na'a 'nɛɛnɔ 'mö, ‑nmö gïganɩɛ mä'ä 'bhlɩ nɩ 'wuë 'mö a ‑lii 'wlu. 3‑Na'a ‑li a ‑lii ‑n nʋä saa 'wuë, ‑n nʋʋnyɩɛ 'kwädlɩ 'wlu 'yize a za, ‑a bhälɩmö ‑këë. 4N'n‑ä 'yɩbhä n ‑kamö 'fʋ bʋanɩ, ‑maa ‑yaya nɛmanɩ dlɩ 'wʋ, 'saa n 'kää dɛ'ɛ bhïla, ‑n 'kɩ 'tikïyie 'wʋ 'yukwli ‑pʋnɩ. 5N nɛ naa, nɩkpɛ nɩ ‑a yiimöä dɛ'ɛ yɔwʋ 'klɛnɩɛ, 'bhlɩnyimanyɔ a 'kɔdɔ 'mö ɔ glɩnɩɛ. Bhlɩɩ 'wuë ‑gömö ‑mä ɔ nɛmöä, ‑glɔ ‑mu ɔ ‑kä 'mö ghlɛɛ, ‑mä a Zwiiföwaa 'mö ɔ nyimaa 'wlumö 'n wa sɛɛ ‑glɔ glu. ‑Zɩkpa ‑bhlʋ wa laa Nazalɛɛtɩyii a ‑zɩkpaa, mɔɔ glɩnɩɛ a 'kifi 'kɔdɔɔ. 6‑Mi'la miɛ da'a. ‑Mä Zeluzalɛɛmö 'yɛ, Lagɔbudu 'Kɔdʋʋ a'bhë, ɔ 'yɩbhä a ɔ 'kʋ gba 'wʋ ‑sɛnɩ, ɔ 'kʋ fɩ päla. ‑Sɩbhä a za, a‑a yoo köbhä. [‑A 'yɩbhä a ‑a 'kä ‑zijlea ‑a'bhisɛ plɛ. 7‑Maa 'kämanɩnyɔ 'kɔdɔ Liziasɩ mɔɔ yiɛ, ɔ ‑su 'slʋja a ‑bɛ, 'n wa ‑yinyɔɔ ‑glasɛ kä'mö ‑sɛ. 8Ɔ ‑sanyɔɔ kä'mö 'wëë, ɔ lɛ naa, ‑ɔ ‑kä ɔ 'kïbhë 'mlɩ ‑kää, ɔ nɩ yiimɔ yɔwʋ 'klɛnɩɛ, nza ‑a yiɛ.] ‑Maa nɩkpɛ nɩ a'bhë ‑n ‑kɔɔ ‑sɩkaa nimï 'yɩbhää, ‑na'bhë ‑n yi sɛ yɩbhlɩmanɩ nɩɩ, kïbhï nɩ 'wuë, ‑a zoo ‑gömö, ‑tiamö a ‑liɛ.» 9‑Maa ɔ gbää sa'aa, Zwiiföwaa ‑wa ‑nyɔɔ yi a‑a, wa 'wuë, ‑gömö wa piɛ sɛ, wa lɛ naa: «Wɛlɩɩ 'wuë 'mö ɔ bhïlaa da'a.»

Pɔɔlʋ yɛ ɔnyɩ a gbʋgömösɛwɛlɩ bhïla

10Tɛtlusɩ bhïlaa 'wëë, ‑gɔmla lɛ naa, Pɔɔlʋ nɩ bhïla, 'n Pɔɔlʋ yiɛ wɛlɩɩ 'wʋ 'libhï ɔ lɛ naa: «‑Atʋ ‑ayo, ‑maa ‑nmö Felisɩ, sɛ ‑n glɩnɩɛ mä'ä bhlɩ nɩ 'mö a ‑zijlitunyɔ 'kɔdɔɔ, ‑lɛ a 'ylʋbö, yɩ yɛ tenyii zumanɩ. ‑Sɩbhä a za, 'na dlɩ ‑bhɩɛ ‑mä 'lɩlɩlɩ, 'n n lɛ 'kää dɛ'ɛ ‑na 'yila 'klʋ nanyɩ gbʋ ‑gömö ‑sɛnɩ. 11N nɛ naa, n möä ‑mä Zeluzalɛɛmö Lagɔ bʋbɔɔ, ylɩɩ n ‑sɛɛ ‑mä, ‑na'bhë ‑n ‑kä nimï 'yɩbhää, ‑n yi sɛ yɩbhlɩmanɩ nɩɩ, yɩ'ɩɛ ‑bhlɛ 'ylɩ kʋgbä'sɔ yɛ'mö 'plɩ. 12‑Maa n ‑wʋä ‑mä, tɛkäsɛ wa ‑nɩɩɛ ‑mä Lagɔbudu 'Kɔdʋʋ 'mö ghlɩ 'n n ‑nyɛ nɩkpɛ 'kä kpɛnɩ dɔ'wʋ ‑wʋ. N'n‑ä 'yɛ ‑bhlɛ tɛkäsɛ Lagɔbudu 'mö a'bhë mö n 'kä nɩkpa 'wlumö nyima, ɛ ‑kä'ɛ ‑mä glɔ yɔwʋ ma‑a, ‑mä n'n‑ä mö 'n n 'kä nɩkpa 'wlumö nyima dɔ'wʋ ‑wʋ, wa ‑kaa ‑lɛ ghlɩnɩ. 13Nɩkpa nɩ a'bhë, wɛlɩ 'la 'wuë wa 'bhöööä da'a ‑gömö sɛ sluëë, dɛ wa 'yɩnɩɩɛ 'ylɩmö 'n n yiɛ ‑sɩbhä 'zʋʋ, wa 'naa ‑kamö ‑lɛ sʋlʋnɩ. 14‑Tiamö abhlɩ, 'yioluluu wa laa wabhlɩ da'a 'zokwëë, 'mö n ‑gänɩmöä. ‑Maa ‑amö naa, n ‑yi sɛ nɩɩ, Lagɔ ‑aa dɩbawa a dɩbawa bʋbɔ a‑a, 'mö n bʋbɔmöä. Moyizɩ 'a Gböö a 'bɔgʋʋ mu, Lagɔ 'a bhla'mö a 'möbhïlanɩwaa, 'wa Lagɔwɛlɩɩ a 'bɔgwɩɩ mi, yɩ 'wuë, 'saa cɛlɩɛ ‑mä yɩ 'möö, ‑sɩbhä n kɩɛ dlɩ 'wʋ. 15N ‑yi sɛ nɩɩ, nɩkpa ‑kä 'ku 'wëë, 'saa nɛnɩɛ Lagɔ dlɩ yɔwʋ, ɛ yi ‑wa nwiɛ muë oo, ɛ yi ‑wa 'niɛ nʋ muë oo, wa 'wuë Lagɔ yuë glu ‑sɛ, ɔ yuë ‑zijli tu. ‑Lɛ a wɛlɩ 'la, sɛ wa kɩɛ wa'bhï dlɩ 'wʋʋ, ‑sɩbhä n ‑kämiɛ dlɩ 'wʋ. 16‑Sɩbhä a za, ɛ yi Lagɔ a 'yila 'klʋ a dɔ'wʋ ma oo, ɛ yi nɩkpa a 'yila 'klʋ a dɔ'wʋ ma oo, 'na sɛ n nɛmöä, ‑sɩbhä ma‑a nɩɩ, n tɛlɩ 'kwädlɩ sɛ n tɩa nglipälɩli nʋ.

17N 'bhööä ‑mä Zeluzalɛɛmö 'n n yiɛ lɛga 'mö möö, 'ylʋbö a ‑bɛ yɛ 'plɩ 'wë, 'n n yiɛ 'wʋ 'sɔ ‑mä yinɩ. N yiɛ ‑mä, moni ‑mumuë 'päpänɩɛ 'wʋ wa 'kä 'pʋawaa 'wʋ yii, 'mö n ‑suä. N 'kä'ɛ Lagɔ ‑li bʋbɔnɩ, nza n yiɛ. 18-19Zaa, bʋbɔbʋbʋ 'la a za, sɛɛ ‑a'a gböö gbää wa nɩ 'zʋ, wa 'kä 'wlɩlɩ plɛ Lagɔ a 'yila 'klʋ a dɔ'wʋ, n ‑wʋ ‑sɩbhä 'zʋ dɔ'wʋ, Zwiiföwa ‑mumuë ‑wa 'bhöönɩɛ ‑mä Azii‑bhölɩɩ 'möö, 'n wa ‑yiiɛ ‑mä Lagɔbudu 'Kɔdʋʋ 'mö ghlɩnɩ. ‑Maa wa ghlɩnɩɩɛ ‑mä, nɩkpa a ‑muë 'kää 'nglɩ ‑kä 'n bidibidi 'kää nuoo, n 'nuëë 'bɩwʋ ‑su. Nɩkpa 'la ‑wa ghlɩnɩɩ a‑a ‑mä, 'kïbhë ‑kä a ‑lɛ ‑wʋʋ, mʋa ‑kaa a‑a dɛ'ɛ ‑na yɔwʋ 'klɛnɩɛ yi. 20‑Maa, ‑muë nɩ, ‑wa ‑yiiiɛ dɛ'ɛ 'klɛɛ, ‑zlɩ ‑a'a ‑zijlituwa 'kädɩɩ tuuuä ‑zijle, lɛ a zlɩ 'la 'mö, 'kïbhëzokwë ‑maa wa ghlɩɩɩɛ ‑gömöö, wa nɩ sɩbhäna dɛ'ɛ. 21'N ɛ 'nɩ ‑bhö 'kïbhë ‑bhlʋ n bhïla a‑a ‑mä ‑zijlea 'wʋ ma‑a. Sɛ'ɛ n gbä a‑a nɩɩ: ‑A'bhɩanyɩ, Lagɔ 'a wɛlɩɩ ‑yɩ nʋä nɩɩ, nɩkpɛ ‑kä 'ku 'wë Lagɔ yo glu ‑sɛ, 'mö n kää dlɩ 'wʋ, yɩ za n 'nɩgböä dɛ'ɛ ‑zijle 'mö. Sa'a n gbä a‑a. Na 'bhlenɩdɛ.»

22Pɔɔlʋ bhïlaa 'wëë, Felisɩ, ɔ yi a‑a ‑Alowli 'a 'Yioo a wɛlɩɩ zaa, ɔ lɛ naa: «'A wɛlɩɩ 'wuë a 'bhööä da'a bhïlaa, n kɩ 'nʋ, ‑maa 'slʋjaa a 'kämanɩnyɔɔ Lisiasɩ, ‑zlɩ ɔ 'kä yii, n 'kɩ 'wlu ‑dɩ.» 23Felisɩ gbää sa'a 'wëë, 'n ɔ yiɛ 'slʋjeyii 'kɔdɔɔ ‑ɔ ‑kʋ a‑a Pɔɔlʋ 'dɩ 'nyɛ nɩɩ: «‑Jienyɔ ɔ glɩnɩɛ ‑bhlɛ zaa, ‑koo 'yize, ‑maa toa ‑tiamö a ‑jienyɔ a ‑li 'wlu nʋ. Ɔ 'bhɩa ‑mumuë ‑kä wa 'kɔ ‑li a ‑li 'wlu nʋʋ, 'tatinuë 'yi.»

24'Ylɩya 'plɩɛ, 'n ‑gɔmla Felisɩ yiɛ yi, ɔ ‑su ɔ 'lɛnglɛ. Zwiiföylikwii ɔ glɩnɩɛ ɔbhlɩ, ɔ nglɩɛ Dlusilɩ, 'n Felisɩ yiɛ nɩkpɛ tie, 'n ɔ yiɛ Pɔɔlʋ kie mö wa 'kɔ 'yukwli ‑pʋnɩ, sɛɛ nɩkpɛ 'kää Zezwii Kliisɩ dlɩ 'tɛɛnɩ a wɛlɩɩ, ɔ 'kʋänyɩ dlɩ ‑gömö ‑sɛsɛnɩ. 25Pɔɔlʋ yiɛ, 'n ɔ yiɛ Lagɔwɛlɩɩ bhïla. Sɛɛ nɩkpɛ 'kää nɛmö ɔ 'kä Lagɔ dlɩ yɔwʋ nɛnɩ, sɛɛ nɩkpɛ 'kää 'ɔ dlɩɩ 'wʋ pɩɛnɩ ɛ toa 'nyinyloli 'mö kwää, yɩ ‑nyɛ Lagɔ 'a ‑zijle 'kädaa 'sɔ, yɩ dɛ ɔ bhïlaa. ‑Maa Pɔɔlʋ bhïliiɛ ‑sɩbhää, nganɔɔ yinɩɛ Felisɩ 'wʋ, ɔ lɛ naa: «Pɔɔlʋ, 'bhlenɩa'a ‑bhlɛ da'a, mö, ‑maa n ‑kä zɩla'a 'tɛnyɩ ghlɩɩ, n ‑kamö 'wʋ 'sɔ wäzɩnɩ.» 26Ɔ ‑tɔnɩ Pɔɔlʋ yo moni 'nyɛ, nza ɔ tioo 'kwädlɩ nɩkpa 'wʋ 'n wa mɔɔ kie, 'n wa sɛɛ 'dɩ. 27Sa'a ‑këë 'n 'ylʋbö 'sɔ yiɛ 'plɩ, 'n ‑gɔmla ‑mɔmɔɔ wa laa Pɔkiusɩ Fɛtusɩ yiɛ ɔ 'bhle 'mö 'plɩ. ‑Maa Felisɩ lɛ 'kää ‑lɛ 'bhööä yii, Zwiiföwaa 'käa ɔ 'dɩ a dɩ ‑sɛ a za, ɔ'ɔɔ Pɔɔlʋ ‑jie 'mö ‑sɛ.

Currently Selected:

Nʋnʋlii 24: bet

Highlight

Copy

Compare

Want to have your highlights saved across all your devices? Sign up or sign in

Learn More About BdG2