Nʋnʋlii 22

1Ɔ lɛ naa: «‑A'bhɩanyɩ, ‑atʋwanyɩ, a 'wuë a ‑pʋnɩ 'yukwli n 'kä ‑gömö ‑sɛ.» 2Ɔ bhïlanɩɛ wa 'bhigbʋ 'mö, wa 'nʋä, 'n wa yiɛ 'yukwli 'mö ngäla. Pɔɔlʋ lɛ naa: 3«Na'bhë, Zwiiföyi n glɩnɩɛ, ‑Mä Silisii‑bhölɩɩ 'mö a ‑glɔɔ wa laa Taasɩ, ‑mä wa gwälɩnɩɩɛ. ‑Maa mä'ä Zeluzalɛɛmö ‑mä n 'bhʋɔnɩɛ. 'Nɛɛnɩnyɔ 'kɔdɔɔ wa laa Gamaliɛlɩ, mɔɔ glɩnɩ a‑a na 'cɩanyɔ. Moyizɩ 'a Gböö, sɛɛ ‑aa dɩbawa 'nyɩɛ 'wa yuëa a yuëa, yɩ 'wuë mɔɔ sʋlʋnɩ'miɛ ‑sɩbhä 'tɩɩ. 'A sɛ a ‑suä ku 'mö a 'käa Lagɔ 'a libhoo nʋ a za‑a, na'bhë ‑sɩbhä n ‑wʋmö a‑a. 4Nɩkpaa ‑wa ‑gänɩɛ Zezwii 'a 'yioo a wɛlɩɩ, 'kukusɛ n ‑gbïluë a‑a. 'Ngwlɩ, nyɩbhɛlɩ, n köbhʋä 'n n pʋää ‑jie 'mö. 5N bhïlaa dɛ'ɛɛ, Lagɔbʋbɔnyɔ 'kɔdɔɔ, ɔ ‑nyɛ Zwiiföwa a 'nɛɛnɩwa 'kädɩɩ 'wuë 'sɔ, a ‑kʋä nimï 'yɩbhää, wa yi nɩɩ ‑tiamöä nʋ. N lɛ 'kää Damasɩ möä yii, wa'bhï n nɛ wa nɩ 'cɛlɩ 'bɔgwɩ, 'n wa yiɛ 'cɛlɩ, 'n wa ‑yi'miɛ yowʋ 'nyɛ, Zwiiföwaa a ‑zɩkpöö ‑yɩ ‑wʋä ‑mä, n 'kä mö n 'kʋänyɩ yowʋ 'nyɛ, nzɩɩ n 'kä Zezwii a ‑nʋa ‑wa ‑wʋä ‑mä köbhä n 'kʋä gwa, n ‑nyʋä 'kä mä'ä Zeluzalɛɛmö yi wa 'kʋä 'klɩ 'yɩa.

Pɔɔlʋ yɛ sɛ ɔ 'zʋmözʋmöä Zezwii a ‑nɔ 'mö a 'tɩtɩ ‑sɛ

6‑Maa n nɛmö 'yio 'wʋ, n lɛ 'kä ‑mä Damasɩ ghlɛɛ yi, ylʋ ‑wʋ 'du 'mö, n lɛ zʋ a sɛ'ɛ cuu, ‑mä zlɩ 'mö 'n lɩlɛ 'kädɛ yiɛ ‑mä 'bhöönɩ, 'n ɛ ‑yiiɛ binɩ. 7'N n yiɛ bhli. N pö ‑lɛ dʋdʋ 'wʋ, 'n n yiɛ wɛlɩ ‑bhlʋ 'nʋ, yɩ lɛ naa: Sɔɔlʋ, Sɔɔlʋ, sɛ yɩ ‑wʋ ɔ 'mö, n‑n 'yɩa bhä 'klɩ 'nɩ? 8Wɛlɩ nʋä sa'a, n nɛ naa: ‑Alowli, ‑nmö ‑mɔ bhä nɩ? Ɔ lɛ naa: ‑Amö Nazalɛɛtɩ a Zezwii ‑n 'yɩa 'klɩɩ, ‑amöö. 9Yɩ 'plɩɛ sa'a 'wʋʋ, nɩkpaa ‑wa ‑nya'mö ‑bhlinɩ a‑a 'wʋʋ, wa 'yɩ ‑tiamö lɩlɛ 'kädɛɛ 'la 'ylɩmö, ‑maa wa'aa wɛlɩ 'la 'nʋ. 10‑Maa wɛlɩɩ nʋä sa'aa, n nɛ naa: ‑Alowli, sɛ n 'käa'aa ‑sɩkaa 'zʋʋ, nyɩaa ‑sɩbhä 'dɩ. Ɔ lɛ naa: ‑Sɔ 'wʋ, ‑n 'kä ‑mä Damasɩ mö, ‑n ‑kä ‑mä ghlɛɛ, sɛɛ Lagɔ 'yɩbhää ‑n nɩ 'zʋʋ, wa ‑yimö ‑sɩbhä yɩ 'wuë 'nyɛ 'tɩɩ. 11‑Maa lɩlɛ 'kädɛ 'la, sɛ ɛ 'tɛmanɩɛ tenyii 'mö a za, n lɛ lɩa a 'na yilaa, n'n‑a'a sɛ yɩlɩ. Zaa, na 'bhɩa n ‑nyɛ ‑bhlinɩɛ 'wʋʋ, mʋa köbhänɩɛ sɔ, a‑a yiɛ ‑mä Damasɩ mö.

12‑Maa ‑mä Damasɩ, nɩkpɛ ‑bhlʋ ‑wʋ a ‑mä, ɔ nglɩɛ Ananiasɩ. Sɛɛ a'a gböö gbää, ɔ bʋbɔ ‑sɩbhä Lagɔ 'tɩɩ. ‑Mä a Zwiiföwaa 'wuë wa sɛ ɔ 'dɩ a dɩ. 13N ‑wʋ ‑mä Damasɩ, nɩkpɛ 'la mɔɔ ghlɩɩɩɛ ‑mä, ɔ lɛ naa: ‑Atʋayu Sɔɔlʋ, ‑na'a yilaa, yɩ nɩ do. Ɔ gbää ‑sɩbhä cuu, 'n 'na yilaa yiɛ do, 'n n yoo 'ylɩmö. 14Ɔ lɛ naa: Lagɔ ‑aa dɩbawa a dɩbawa bʋbɔ a‑a ‑këë zɩ'ɛ, ɔ ‑kamö a ‑pa ‑lɛ sɛ, 'ɔ 'saa ɔ yɩbhää, ɔ ‑kami kɛ 'klʋ kälɩnɩ, nɩkpɛ ‑bhʋlʋ ‑kpɔ ‑ɔ zlɔnɩɛ 'möö, ‑n 'kɔ 'ylɩmö, ‑n 'kä ɔ ngli a wɛlɩ 'nʋ, 15‑n 'kä nɩkpabhë a 'yila 'klʋ ɔ dɛ bhïla, 'saa ‑n 'yɩɛ 'ylɩmö, 'saa ‑n 'nʋää, ‑n 'kʋä yɩ 'dɩ 'nyɛ. 16Zaa, 'saa 'kä bhäa'a 'nglɩ ‑kä n‑n 'kä bʋanɩ 'nɩ? ‑Sɔ 'wʋ ‑a 'kä mö wa ‑kamö 'wlu wɔlʋ, ‑n 'kä ‑Alowli ‑bɛlɩ 'pä ɔ 'kä ‑na'a 'nyinylolii a gbʋ 'yi 'tatinɩ.

17Yɩ 'plɩɛ sa'a 'wëë, 'n n yiɛ ‑mä Zeluzalɛɛmö 'bɩwʋ mö, n ‑wʋ ‑mä, sɛ'ɛ 'ylɩ ‑bhlʋ 'mö, ‑mä Lagɔbudu 'Kɔdʋʋ 'mö, n ‑wʋ ‑mä bhibhenɩ dɔ'wʋ 'n 'na yilaa yiɛ do, 18'n n yiɛ ‑Alowli 'ylɩmö, ɔ lɛ naa: Sɔɔlʋ, 'päpänɩ 'wʋ, ‑n 'kä mä'ä ‑glɔ nɩ 'mö 'wlʋ, ‑maa mä'ä a nɩkpaa, 'saa ‑n 'kää na dɛ bhïlaa, wa 'naa 'kɩ dlɩ 'wʋ ‑kä. 19Ɔ gbää sa'aa, n nɛ naa: ‑Alowli, mä'ä a ‑nʋa, sɛ n zʋ a‑a ‑na ‑nʋa, mʋa ‑yiɛ ‑sɩbhä. ‑Mä Lagɔbïdii 'mö, ‑amöö mö a‑a ‑mä, ‑na ‑nʋa ‑wa ‑wʋä ‑mä 'n n köbhʋää, 'n n gbää 'n wa lɩbhʋää, 'n wa pʋää ‑jie 'mö. 20‑Na'a nɩkpɛ Etiɛnɩ a'bhë, ‑zlɩ wa 'lɩbhɔɔ, 'n ɔ yiɛ 'kuu, n ‑wʋmö a ‑lɛ. Wa 'lɩbhɔɔ, yɩ nɛmanɩ a dlɩ yɔwʋ. ‑Wa 'lɩbhɔɔ, 'wa 'möpälalii, ‑amöö ‑kʋniiɛ 'klʋ. 21N gbää sa'aa, ɔ lɛ naa: ‑Sɔ 'wʋ ‑n 'kä mö, ‑maa 'yuku n ‑kamöä tie, nɩkpaa ‑waaa Zwiiföwa glɩnɩɩ, 'mö n ‑kamöä 'wʋ tie.»

Pɔɔlʋ lɛ Ghlɔmɛɛyi ɔ glɩnɩɛ

22Nɩkpa a ‑bʋbʋʋ, wa ‑pʋnɩɛ Pɔɔlʋ 'yukwli ‑këë ɔ ghlɛ 'gbëbhlenɩkïbhë nɩ 'wʋʋ, wa 'wuë 'n wa yiɛ 'mö 'kpa, wa lɛ naa: «Nɩkpɛ 'la, ɔ nɩ 'lɩbhɔ ɔ 'kä 'ku, ɔ'ɔɔ ‑kä ɔ 'kä ‑bhölɩ.» 23Wa 'wuë 'n wa kluä 'n wa sɛɛ 'wa ‑banɩɩ 'mö 'n wa pɩɛ 'kwlɛ 'mö 'n wa pää bhuukwëa ghäyɩ. 24Wa 'zʋä sa'aa, 'slʋja a 'kämanɩnyɔ 'kɔdɔɔ, ɔ lɛ 'slʋjaa nɩ päla Pɔɔlʋ ‑mä 'ligbë 'mö, wa 'kɔ 'sɛlɩ, nzɩɩ kïbhëa ‑a kää sɛ'ɛ 'nglɩ 'tɩɩ a'bhë, 'n nɩkpaa 'pänɔɔ sa'a 'klɛ yɔwʋʋ, ɔ 'ka sɩbhänɩ. 25‑Maa 'slʋjaa gwaa Pɔɔlʋ 'wëë, wa lɛ 'kɔ 'sɛlɩɛ yi, 'n ɔ yiɛ 'slʋjeyi 'kɔdɔɔ ‑ɔ 'nɩgböä ‑lɛ nimï 'yɩbhä nɩɩ: «Nɩkpɛ a ‑mɔɔ glɩnɩɛ ‑lɔ 'mö a dɔ'wʋ Ghlʋmɛɛyii, 'n a 'nɩ ‑bhlɛ ɔ wɛlɩ sasɛ 'ylɩmö 'wëë, a kä bhä a 'kɔ 'sɛlɩ ‑a?» 26Pɔɔlʋ gbää sa'aa, 'n 'slʋjeyi 'la yiɛ ‑mä 'wa 'kämanɩnyɔɔ ghlɩ, ɔ lɛ naa: «Yɩɛ, nɩkpɛɛ ‑n gbää da'a wa nɩ 'sɛlɩɩ, ‑mä ‑lɔ 'mö a dɔ'wʋ, Ghlʋmɛɛyii ɔ glɩnɩaa. Zaa, sɛ ‑a 'käa bhälɛ 'zʋ 'nɩ?» 27'Slʋjeyii 'nyɔɔ sa'a 'dɩ cuu, 'n ɔ yiɛ yi. Ɔ ghlɛɛ ‑lɛ Pɔɔlʋ yɔwʋ 'n ɔ yoo nimï 'yɩbhä, ɔ lɛ naa: «‑Aa, Ghlʋmɛɛyii ‑n glɩnɩɛ.» Pɔɔlʋ lɛ: «Nn Ghlʋmɛɛyii n glɩnɩɛ.» 28Ɔ lɛ naa: «Na'bhë ‑amö glɩɛ dɛ'ɛɛ, n 'kä ‑lɔ 'mö a dɔ'wʋ Ghlʋmɛɛyi 'zʋä yii, moni a ‑bɛ n 'pɛnɩɛ.» Pɔɔlʋ lɛ naa: «‑Amö na a, Zwiiföyi a ‑mɔ 'zʋ a‑a ‑lɔ 'mö a dɔ'wʋ Ghlʋmɛɛyii, mɔɔ gwälɩɩɛ, nza n glɩnɩmöä Ghlʋmɛɛyi.» 29Pɔɔlʋ gbää sa'a cuu, 'slʋjaa ‑wa 'kɔ a‑a 'sɛlɩ ɔ 'kä bhïla a za‑a, wa 'wuë 'n wa yoo kɛ yɔwʋ ‑sɛ. 'Kämanɩnyɔɔ a'bhë, 'n nganɔ yoo 'wʋ yinɩ. Ɛ'ɛ ‑bhö nyɩasɛ, ‑maa mɔɔ gbää 'n wa yiɛ Pɔɔlʋ 'gogwi gwanɩ. ‑Maa 'lɩlɩlɩ a dɔ'wʋ wa'aa ‑kä wa 'kä sa'a Ghlʋmɛɛyi 'zʋ.

Pɔɔlʋ yɛ ‑lɛ Zwiiföwaa a ‑zijlituwaa 'kädɩɩ a 'yila 'klʋ ghlɛ

30‑Maa ‑sɩbhä yɩ ‑wʋ 'mö, wɛlɩɩ ‑yɩ ‑wʋä Zwiiföwaa ‑nyɛ Pɔɔlʋ 'sɔ a jijo'wʋʋ, 'kämanɩnyɔɔ yɩbhä ɔ 'kɩ klɩpaa yɩbhlɩnɩ 'tɩɩ. ‑Sɩbhä a za, zlɩ zɩɛ, ɔ lɛ wa nɩ bulonɩ Pɔɔlʋ, Zwiiföwaa 'a Lagɔbʋbɔwaa a 'kifiea, wa ‑nyɛ 'wa ‑zijlituwa 'kädɩ ‑muë'la 'sɔ, 'n ɔ yuëë 'wlu 'yɩbha, 'n ɔ yiɛ Pɔɔlʋ ‑mä ‑zijle 'mö kwä ɔ 'kä 'mö ‑sɛnɩ.

Currently Selected:

Nʋnʋlii 22: bet

Highlight

Copy

Compare

Want to have your highlights saved across all your devices? Sign up or sign in

Learn More About BdG2