Nʋnʋlii 11

Piɛlɩ yɛ Zezwii a ‑nʋa a ‑zɩkpaa ‑a ‑wʋä ‑mä Zeluzalɛɛmö 'tɩtɩ 'nyɛ

1 Zezwii 'a tietiewaa ‑nyɛ ɔ ‑nʋa ‑muë'la ‑wa ‑wʋä ‑mä Zwidee‑bhölɩɩ 'mö 'sɔ, 'n wa yiɛ 'nʋ nɩɩ, nɩkpaa ‑waaa Zwiiföwa glɩnɩ, wa yɛ Lagɔ 'a wɛlɩɩ 'wʋ nglumö. 2-3Zaa, Piɛlɩ yiɛ ‑mä Zeluzalɛɛmö 'bɩwʋʋ, Zezwii a ‑nʋä 'la ‑wa glɩnɩ a‑a wabhlɩ Zwiiföwa 'wë 'n wa yiɛ Zezwii a ‑nʋä 'zʋʋ, wa lɛ naa: «Piɛlɩ, ‑a yɛ 'nʋ nɩɩ, nɩkpa ‑waaa Zwiiföwa glɩnɩɩ, 'wa 'ligbï 'mö ‑mä ‑n plɛɛ, n‑n ‑nyʋä yiɛ 'wʋ linɩ. Sɛ ‑n zʋä da'a, ‑sɩbhä 'nɩɛ nɛnɩ.» 4Wa gbää sa'aa, wɛlɩɩ 'wuë, sɛ yɩ 'plɩ a‑a 'wʋʋ, 'n Piɛlɩ yuëë ‑sɩbhä 'tɩtɩ 'nyɛ. Ɔ lɛ naa:

5«'Ylɩ ‑bhlʋ 'mö, ‑mä Zopee glɔ 'mö, n ‑wʋ Lagɔ bhibhe dɔ'wʋ, 'n 'na yilaa yiɛ do, ɛ 'kä bhɩɛ sɛ'ɛ 'yɛla 'mö. 'N n yiɛ lekwi 'kädɛ a sɛ a ‑lu 'ylɩmö. Wʋ 'bhöönɩ ‑mä ghäyɩ 'wʋ, wʋ ‑lɛlɩ 'mö, ɛ 'kä ‑bhɩɛ sɛ'ɛ 'likpï 'mö wa 'kwïlanu, 'n wʋ yiɛ dʋdʋ 'wʋ 'yize. 6‑Mä wʋ 'mö, 'n n yiɛ ‑mä pöplɛ, 'saa ‑wʋä ‑mä n 'kʋ 'ylɩmö. Nɩma a kii 'wuë, ‑yɩ kää bhɩ ‑mʋäna mi, gbisogbisonɩma mi, 'n zɩ a kii 'wuë mɩɩ ‑wʋä ‑mä. 7'N n yiɛ wɛlɩ 'nʋ, yɩ lɛ naa: Piɛlɩ, ‑sɔ 'wʋ, 'lɩbhä ‑n 'kä li. 8'N n yiɛ nɩɩ: ‑Atʋ! 'Naa nglu, ɛ'ɛ ‑bhö nyɩasɛ, ‑maa sɛ n 'maa 'kä'ɛ 'wlʋʋ, 'saa ‑plɛɛ fɩ Lagɔ a 'yila 'klʋ a dɔ'wʋʋ, wʋ'ʋä ‑bhlɛ tɛkäsɛ mä'ä na ngli plɛ. 9'N wɛlɩɩ yi'ɛɛ nɩɩ: 'Saa Lagɔ gbää ‑wʋ ‑wʋ 'wlɩlɩɩ, tɩ nɩɩ fɩ wʋ ‑plɛɛ nʋ. 10Wɛlɩ 'la n 'nʋni 'wʋ ta 'wë, 'n ‑lu 'la ‑yiiɛ ‑mä zlɩ 'mö 'yli zizonɩ. 11‑Lɛ a 'tɛnyɩ 'la ‑bhlʋ ‑kpɔ 'mö, 'ligbëa 'mö dɛ n glɩnɩ a‑a, 'n nɩkpa ta yiɛ ‑lɛ yi. Nɩkpa 'la Sezalee wa 'bhöönɩɛ, ‑amö wa yiɛ kie. 12'N 'Wugɔmʋʋ 'Wlɩlɩ ‑yiiɛ 'dɩ 'nyɛ nɩɩ, n nɩ tɩ gʋgɔ, ‑maa n ‑nyʋä 'sɔ ‑a nɩ mö. ‑Aa ‑daayuë ‑muë nɩ gbʋplʋ ‑kpɔ 'mämö. ‑A ghlɛɛ ‑mä, nɩkpɛ ‑bhlʋ wa laa Kɔnɛyɩ a 'ligbë 'mö ‑mä ‑a plɛɛ. 13Nɩkpɛ 'la 'n ɔ yiɛ 'tɩtɩ ‑sɛ, ɔ lɛ Lagɔzuzukwë ɔ 'yɩɛ ‑mä 'ɔ ‑budu 'mö 'ylɩmö, ma‑a 'nyɔɔ 'dɩ nɩɩ, ɔ nɩ tie ‑mä Zopee glɔ 'mö nɩkpa, nɩkpɛ ‑bhlʋ wa laa Simɔɔ Piɛlɩ, wa 'kɔ kie mö. 14Ɔ ‑kä yii, Kɔnɛyɩ ‑nyɛ 'ɔ ‑kosu yɔwʋ a ‑nʋa 'sɔ, wɛlɩɩ ‑yɩ 'kʋä puëë, Simɔɔ Piɛlɩ 'kʋänyɩ 'nyɛ. 15‑A ghlɛɛ ‑mä, n ‑wuuë Lagɔwɛlɩɩ 'nyɛ dɔ'wʋ, cuu, 'n 'Wugɔmʋʋ 'Wlɩlɩ yuëë ‑gömö yi. Sɛ ‑bhlʋ ‑kpɔ sɛ ɔ yiinyɩ a‑a 'lɛ tɛkädɔ'wʋ ‑a'bhï ‑gömöö, ‑sɩbhä ma‑a sɛ'ɛ 'tɩɩ. 16Ɔ yuëë sa'a ‑gömö 'n na dlɩɩ yiɛ ‑lɛ bhlinɩ nɩɩ, ‑Alowli Zezwii, ɔ gbä a nɩɩ: Zaa Batisɩ, 'nyu 'mö ɔ wɔlʋnɩ a‑a nɩkpa 'wlu. ‑Maa abhʋa abhlɩ, 'Wugɔmʋʋ 'Wlɩlɩ 'mö Lagɔ 'kanyɩɛ 'wlu wɔlʋnɩ. 17'Nyupälɩɩ Lagɔ ghälanyɩɛ a‑a 'wʋ, sɛ ‑a 'tɛɛnɩɛ ‑Alowli Zezwii Kliisɩ dlɩ a za‑a, 'n Lagɔ ‑kʋä 'nyupälɩ ‑bhʋlʋ ‑kpɔ 'la 'wʋ ghälamö, 'saa n glɩnɩ bhä na a 'n n 'kä ɔ ‑lii 'yila 'klʋ 'yula 'nɩ?» Sa'a Piɛlɩ 'nyʋää 'tɩtɩ. 18‑Maa ɔ gbää sa'a 'wëë, wa 'wuë 'n wa dilaa yia'aa sɛ sɩbhɔ 'n wa yiɛ Lagɔ a 'nglɩ 'ghlimanɩ, wa lɛ naa: «‑Aa zaa nɩkpaa ‑waaa Zwiiföwa glɩnɩɩ, Lagɔ kʋä ‑tiamö ‑lɛ ‑sɛmö wa 'kä ligba, wa 'kä 'wa ‑lizokuu kɛ'mö ‑sɛ, ‑mä 'ɔ 'pɩwʋlelea 'wʋ, wa 'kä ‑mä 'bhle ghlɩmö.»

Zezwii a ‑nʋä a ‑zɩkpaa ‑a ‑wʋä ‑mä Atiɔsɩ

19Lagɔnɩkpɛ Etiɛnɩ, 'tɛnyɩ 'mö wa 'lɩbhɔ a‑a 'n ɔ yi a‑a 'kuu, ‑lɛ a 'tɛnyɩ 'la 'mö a zwɩɩ wa ziaa Zezwii a ‑nʋa a za, wa 'wuë yɔwʋ wa ‑sɛnɩɛ. Wa gla'mö a ‑mumuë mö ‑këë, bhlɩɩ wa laa Fenisii, 'n wa yiɛ ‑mä ghlɛ, gïnyɛlekpë 'käda ‑bhlʋ wa laa Siiplɩ, a 'klʋ a bhlɩɩ 'mö, 'n ‑mumuë yiɛ ‑mä mö, ‑glɔ 'kɔdʋ ‑bhlʋ wa laa Atiɔsɩ, 'n ‑mumuë yi'ɛɛ ‑mä mö. ‑Maa mä wa möä a dɔ'wʋ, Lagɔ 'a wɛlɩɩ, wa ‑kɩɩ biaa, wa 'niɛ käbönɩkpɛ 'nyɛ, ‑maa Zwiiföwaa a 'yize 'mö wa nyɩɛ. 20‑Sɩbhä yɩ ‑wʋ 'mö, ‑maa wa gla'mö a ‑mumuë ‑wa glɩnɩɛ Siiplɩ a nɩkpa, wa ‑nyɛ ‑muëë glɩnɩɛ glɔ ‑bhlʋ wa laa silɛɛnɩ a nɩkpa 'sɔ, wa ghlɛɛ ‑mä Atiɔsɩ, nɩkpa ‑waaa Zwiiföwa glɩnɩɩ, 'mö wa 'nyɛɛ Zezwii 'a 'Mänatɩtɩɩ, nɩɩ mɔɔ glɩnɩɛ nɩkpaa 'wuë a ‑lowli. 21Wa 'zʋä ‑sɩbhä, Lagɔ a'bhë ‑wuë ‑gömö zaa, ‑mä a nɩkpa a ‑bɛ nglu Lagɔ 'a wɛlɩɩ 'wʋ, 'n Zezwii yiɛ wa ‑lowli 'zʋ. 22‑Maa Zezwii a ‑nʋa ‑wa ‑wʋä ‑mä Zeluzalɛɛmö, wa 'nʋä 'tɩtɩ 'laa, 'n wa yiɛ Banabasɩ ‑mä Atiɔsɩ tie. 23Ɔ ghlɛɛ ‑mä sɛɛ Lagɔ 'pää ‑mä a ‑nʋa 'nyu, sɛ ɔ nʋä 'ɔ libhoo, ɔ 'yɩɛ ‑sɩbhä 'ylɩmöö, ɔ 'wuë 'mäna 'n ɔ yuëë swɩ nyɛmʋ 'mö 'pä, ɔ lɛ naa: «A nɩ nyɔnʋ ‑Alowli 'a wɛlɩɩ kɛ 'a dilaa 'wuë 'mö.» 24Banabasɩ, nɩkpɛ a ‑mɔɔ ‑gää kɛ 'mö ɔ glɩnɩɛ. 'Wugɔmʋʋ 'Wlɩlɩ ‑wɔɔ tenyii ‑gömö, ɔ 'tɛɛnɩ ‑tiasɛ Zezwii dlɩ. Zaa, ɔ bhïlaa ‑mä Lagɔwɛlɩɩ, 'n nɩkpa a 'kɔkɔmlɛ yi'ɛɛ Zezwii a ‑nʋä 'zʋ. 25Banabasɩ 'bhööä ‑mä Atiɔsɩ, 'n ɔ yiɛ ‑mä Taasɩ glɔ 'mö mö, 'n ɔ yiɛ Sɔɔlʋ kie mö. 26Ɔ 'bhooo kie, ɔ ‑nyɔɔ 'sɔ, 'n wa yiɛ ‑mä Atiɔsɩ 'bɩwʋ mö. Zezwii a ‑nʋa ‑wa ‑wʋä ‑mä, wa jijo'wʋ, wa ‑sɛ ‑mä 'ylʋba a ‑gëgëbhë 'n wa yiɛ wa gla'mö a ‑nʋä a ‑bɛ Lagɔ 'a wɛlɩɩ 'cɩa. Wa ‑kä zɩ'ɛ Zezwii 'a ‑gänɩwaa klɩtɩɛwa laa, ‑mä Atiɔsɩ 'la, ‑mä yɩ tɛɛnɩɛ. 27‑Lɛ a 'tɛnyɩ 'la ‑bhʋlʋ ‑kpɔ 'mö, Lagɔ a 'möbhïlanɩwa ‑mumuë, wa 'bhöönɩ ‑mä Zeluzalɛɛmö 'n wa yiɛ ‑mä Atiɔsɩ yi. 28Wa gla'mö a ‑nɔ ‑bhlʋ wa laa Agabusɩ, 'n ɔ yiɛ ‑mä Zeluzalɛɛmö a ‑nʋa jijo'wʋ 'wʋ ‑sɔ, 'n Lagɔ 'a 'Wugɔmʋʋ yoo 'mö bhïlanɩ, ɔ lɛ nɩɩ: «Lagɔ lɛ naa, mä'ä 'bhlɩbhë nɩ 'wuë ‑gömö, ngɔmʋgupegupe yia'a ‑pa ‑mä yi.» ‑Tiamö a ‑tiamö ‑lɛ a wɛlɩ 'la, 'bhlɩlowli 'kɔdɔɔ wa laa Klodɩ, ɔ 'kämanɩtɛnyɩ 'mö, ‑lɛ yɩ 'wlʋnɩɛ 'yli. 29‑Lɛ a 'tɛnyɩ 'la 'mö, Zezwii 'a ‑gänɩwaa ‑wa ‑wʋä ‑mä Atiɔsɩ, wa lɛ naa: «‑A 'wuë, ‑a nɩ 'zʋ bhʋlʋbhlʋ ‑li, sɛɛ ‑mɔ kää, ɔ nɩ 'nyɛ ‑sɩbhä, ‑a 'bhɩa, Zezwii 'a ‑gänɩwaa ‑wa ‑wʋä ‑mä Zwidee‑bhölɩɩ 'möö, ‑a 'kʋä 'wʋ yi.» 30'N wa yiɛ ‑sɩbhä 'zʋ, 'n wa yiɛ Banabasɩ ‑nyɛ Sɔɔlʋ 'sɔ ‑mä Zeluzalɛɛmö tie, ‑mä a ‑zɩkpaa a 'yukugänɩwaa, 'n wa yuëë ‑li 'la yowʋ 'nyɛɛ mö.

Currently Selected:

Nʋnʋlii 11: bet

Highlight

Copy

Compare

Want to have your highlights saved across all your devices? Sign up or sign in

Learn More About BdG2