Abharuumi 1

Amakëërani

1Anyaarubha ino neyandëkiri eni Bhawuro, omutamishi o Kirisito Yesu. Eni nebherekiiru nibhe omotomu waache, nyahwiru ne Eryobha nibhe neraraghani Angʼana yaache Anchömu.#1:1 Mööhi Amaköri gha Bhatomu 9:15; Abhagharatiya 1:1, 15. 2Angʼana Anchömu iyo, niyo ino Eryobha ꞉riiraghiri korwera kare, kohetera mo‑bharööti bhaache mo‑Mandëkö Amatööbhiyu. 3Angʼana Anchömu iyo n‑angʼana ighoro e Moona waache. Omoona uyo, ꞉niibhwiru kinya omooto mo‑rwibhoro ro mutëmi Tawuti, 4amare gho kohetera Akörö ino enyi Intööbhiyu, Eryobha ꞉ndeemwahwire kubha Omoona o Ryobha uno anyi no obhotoro bhoose, hano remoryokiri koru mo‑bhaku. Yesu Kirisito uyo niwe Omutëmi wiito. 5Gho kohetera ghokooche Eryobha ndeheere aghareeya e kubha omotomu o Mutëmi Yesu, kubha nebharaghaneri Angʼana Anchömu abhaato bhoose bha matöngö, bhabhönë komokumi na komosooka. 6Inyu bhoose moonyi ghate yaabho na mobherekiiru kubha abhaato bha Yesu Kirisito.

7ˆNekabhaandëkëra inyu abhakumi bhoose bhano moonyi iyo Ruumi. Eryobha ndebhasiighiri chwee, na ꞉ndeebhabherekiire kubha mubhe abhaato bhaache abhatööbhiyu.

Nëköbhëëndëra aghareeya no omurëmbë koru kwo Waryobha Taata wiito, na kwo Mutëmi wiito Yesu Kirisito, ghibhe haghirohamu na niinyu.

Bhawuro ˆaghiighomba ghutaarera abhakumi bha Ruumi

8Nisëëmë gho kobhugha kubha, nekoriitabheri Eryobha kohetera kwo Yesu Kirisito, gho ghiri yaanyu bhoose, gho kubha amangʼana ighoro e bhokumi bhoonyu ngamënyuru mo‑se yoose. 9Eryobha rino nekorihökëri kwo mukörö waane woose gho kuraghaneri abhaato Angʼana Anchömu e Moona waache, ndyeche kebhuno nekobhasabhera eriibhagha ryose. 10Neghusabha eriibhagha ryose kubha, Eryobha rerasiigha nyaghwisha, riihë omweya ibheere o kuucha bhowaanyu. 11Neghusabha hangʼu, gho kubha neenyi na amiigha chwee gha korighani na niinyu, kubha niköngʼi obhokumi bhoonyu gho kobhaha orubhango ro mo‑chaakörö. 12Kino nekwënda n‑kubha, obhokumi bhoonyu bhunköngʼi eni, no obhokumi bhoone bhobhaköngʼi inyu.

13Abhahiiri bhaane, nekwënda mumënyë kubha, mara kaaru neere nërëënda kuucha bhowaanyu, amare mbagha ibheere nihööchëriiru. Nekwënda niiche bhowaanyu, kubha nerute abhaato bha bhowaanyu hayo bhatambane Omutëmi Yesu, kinya bhuno ꞉niiköriri kwo bhaato abhande bha matöngö. 14Eryobha ndihatëkiri nibhe neraraghani Angʼana Anchömu kwo bhaato bhoose, kwo Bhayunaani na kwo bhano bhataanyi Abhayunaani,#1:14 Abhayunaani na kwo bhano bhataanyi Abhayunaani. Eriibhagha rino anyaarubha ino yandëkuru, eghighambo ghe Keyunaani na asughara yaabho ꞉mbiimënyuru mo‑chaase chaaru. Abhaato bhano ꞉bhaamënyiri ghosiikëra eghighambo ghe Keyunaani mbaare bharabhataraaha abhaato bhoose bhano bhateeche ghosiikëra eghighambo kiyo na ghuköra amangʼana ghano gharëngʼiine na asughara iyo. na kwo bhasömi na kwo bhano bhatasömiri. 15Gho ghayo, neghwighomba chwee niiche kuraghani Angʼana Anchömu koru na ghokoonyu bhano moonyi iyo Ruumi.

Obhotoro bho Ngʼana Anchömu e Ryobha

16Eni nteekorighi chaasoni kuraghani Angʼana Anchömu iyo, gho kubha nibho obhotoro bho Ryobha bhuno bhoghotoori abhaato bhoose bhano bhakomokumi Yesu, korwera mo‑Bhayahuuti mbagha mo‑bhaato bha matöngö. 17Angʼana Anchömu iyo nekwërëki haheero kinya bhuno Eryobha rekubharera abhaato kubha abhahëënë ambërë yaache. Abhaato mbakubhareru kubha abhahëënë ambërë e Ryobha gho nchëra e ghokumi okwene. N‑kinya bhuno Amandëkö Amatööbhiyu ghakobhugha kubha, “Uno anyi omuhëënë, nakumanya kwo bhokumi.”#1:17 Mööhi Habhakuki 2:4.

Eryobha ndekurööna abhaato gho ghiri e masari ghaabho

18Eryobha eryene ndëhëërëki haheero koru Mwishaaro kubha, ndehaarööna abhaato bhano bhakoryanga na ghuköra amabhe. Abhaato bhayo mbahaanga obhuhëënë bhooche, kurëngʼaana na amabhe ghaabho, 19amare taanyi kubha bhateeche amangʼana gha Ryobha. Eryobha eryene ndëbhëërëkiri haheero amangʼana ghaache, gho ghayo ngamënyuru mo‑bhaato. 20Simoka e se, Eryobha ꞉ndiitëëmiri ebheghiro bhyose. Korwera eriibhagha riyo, abhaato mbaghotora korimënya Eryobha kebhuno reenyi, koru nangabha bhataakorerighi. Ebheghiro bhino ꞉riitëëmiri mbëköbhëërëki kubha Eryobha ndeenyi na changuru choose, wiiki kubha iryo niryo Eryobha eryene, retaanyi‑ho erende. Gho ghayo, abhaato bhataaghotora kobhugha kubha bhataryeche Eryobha. 21Nangabha bharyeche Eryobha kinya reenyi, amare bhataakoreghongi koru koriitabheri kinya Eryobha reebho. Amiihëëbhö ghaabho ghaakabha amabhe, ghaghakundekeru ne ekengʼuuri. 22Mbakwihacha kubha nibho bhaanyi na amangʼiini, amare m‑bhaghëëghë. 23Mbatighiri korisëngëra Eryobha Eritööbhiyu rino reenyi‑ho emiishe ghyose, bhaghikareerera ghusëngëra chasanaamu che misambu chino chetuubhiine na abhaato bhano bhaaghoku, hamu chatyenyi, hamu ebhinyönyi hamu ebhetyenyi bhino bhekwingʼuurera chanda.

24Gho ghiri iyo, Eryobha ndebhatighiri bhabhe bharatambana amiigha ghaabho amabhe, bharakörërana amangʼana gha chaasoni mo‑mebhere gheebho. 25Mbatighiri ghokumi obhuhëënë bho Ryobha, bhaghatambana obhuröngö. Mbaghusëngëra ebhetyenyi na kobhihökëri, amare mbatighiri ghusëngëra Waryobha Ghitëëmi uno arëngʼaaniire ghoghongibhu emiishe ghyose. Hawubhaabha.

26Gho ghiri iyo, Eryobha ndebhatighiri bhabhe bharaköra amangʼana gha chaasoni kinya bhuno bhakwënda. Abhakari mbatighiri kuhökëri emebhere gheebho kinya bhuno bhatëëmuru, mbagharwire na ghoghihökëri bhuno etaakwëndëru.#1:26 Abhakari mbatighiri kuhökëri emebhere gheebho kinya bhuno bhatëëmuru, mbagharwire na ghoghihökëri bhuno etaakwëndëru. Egheteemoro gheeche n‑kubha, abhakari mbatighiri komisi na abhasubhe bhaabho, na mbakomisi na abhakari bhaghëndi bhaabho. 27Hangʼu hangʼu abhasubhe bhoose, mbatighiri kuhökëri emebhere gheebho kinya bhuno bhatëëmuru, omosubhe no omukari. Abhasubhe mbaghwighombana abheene kwo bheene, mbaghuköra amangʼana gha chaasoni. Gho ghuköra hangʼu, ꞉mbiiyaahuriire abheene anchagho ino ekurëngʼaana na amaköri ghaabho amabhe.

28Mbe, gho kubha abhaato mbaangiri korimënya Eryobha, ryose ndebhatighiri bhabhe bharatambana amiihëëbhö ghaabho ghano ghakobharumeeri. Ibheere mbaghuköra amangʼana ghano ghataakurëngʼaanera ghuköru. 29Mbiichwire amasari gha manga maaru, mbaghuköra amabhe haghare haghare, wiiki m‑bhiighombi bha bheghiro, na mbaanyi ne eriihari. Mbasiighiri eriihë, obhwiti no obhokobhooshani. Mbaghosiikëra obhuröngö na mbaanyi no omukörö mobhe. M‑bhari bha bhaato, 30na m‑bha amatoki, na mbahaarirëgha Eryobha. Bhataaghotereera amangʼana gha bhaghëndi bhaabho, wiiki n‑abhaato bha mitu miköngʼu na mbiihachi. Eriibhagha ryose mbaghutabhara anchëra ahë e ghuköra amabhe. Bhataaghosooka abhiibhori bhaabho, 31m‑bharaghaanu, na bhataakohikeerani eriiraghano reebho, bhataanyi no obhosiighi koru changori kwo bhande. 32Abhaato bhayo mbeeche bhoheene kubha, omooto araköra amaköri amabhe kinya ghayo, naakubha arëngʼaaniire ghosireekereru ne Eryobha. Koru hangʼu, bhataaghotereera! Mbakwëndërëra ghuköra amabhe kinya ghayo, wiiki mbaghwishererani na abhaato bhano bhaghoghaköra!

Currently Selected:

Abharuumi 1: ntk

Highlight

Copy

Compare