JOHAN 1
1
Nunnak Bia
(Gen 1.1—2.4a)
1Vawlei hi ser a rak si hlanah Bia cu a rak um cang; cu Bia cu Pathian sinah a rak um i cu Bia cu Pathian a si. 2A hramthawk tein Bia cu Pathian he cun an um ṭi. 3Pathian nih zeizong vialte hi cu Bia thawng cun a ser hna i Bia thawng loin sermi zeihmanh an um lo. 4Bia cu nunnak hram a si i cu nunnak nih cun minung kha ceunak a pek hna. 5Ceunak cu mui lakah khan a ceu i muihnak nih khan zeitikhmanh ah a hmit bal lo.
6Pathian nih a lamkaltu Johan kha a run thlah i #Mat 3.1; Mar 1.4; Luk 3.1-2 7Johan nih cun mi kha ceunak kong cu a chimh hna. Mi vialte nih cu kong cu an theih i an zumh nakhnga annih chimh awk i a rat cu a si. 8Amah cu ceunak cu a si lo, ceunak kong chim i a rami tu kha a si. 9Ceunak taktak cu vawlei cungah a ra i mi vialte a ceuhtu ceunak kha a si.
10Cu caan ah cun Bia cu vawlei ah hin a rak um ko. Amah thawngin Pathian nih vawlei hi a rak ser; sihmanhsehlaw vawlei nih khan amah cu a rak hngal lo. 11Amah ram a simi ah khan a ra nain, amah mi ciacia nih khan an rak cohlang duh lo. 12Asinain tlawmpal nih cun an rak cohlan i an rak zumh i cu hna cu Pathian fa cannak nawl kha a pek hna. 13Pathian fa an can cu minung phung ningin a si lo; vawlei cung i hrinsor ningin a si lo, Pathian hrimhrim kha an Pa cu a si.
14Bia cu minung ah a cang i kan lakah khua a rung sa. A sunparnak cu kan hun hmuh i vel le biatak in a khat. Cu sunparnak cu Pa nih a Fapa ngeihchunte lawnglawng a pekmi sunparnak phun kha a si.
15Johan nih amah kong cu a rak chim i, “ ‘Amah cu ka hnu in a rami a si, sihmanhsehlaw ka chuah hlan in a rak um cangmi a si caah keimah nakin a ngan deuh,’ tiah ka rak in chimhmi hna kha amah hi a si,” tiah a au.
16A liam in a liammi a vel chung cun thluachuahnak kha pakhat hnu pakhat a kan pek lengmang. 17Pathian nih Phungbia cu Moses thawng khan a kan pek, sihmanhsehlaw vel le biatak cu Jesuh Khrih thawng khan a ra. 18Ahohmanh nih Pathian cu an hmu bal lo; sihmanhsehlaw Pathian Fapa bel nih Pathian cu mi kha a hngalhter hna. Cu Fapa cu Pathian Fapa ngeihchun, a Pa ṭang chung i aa pommi kha a si.
Tipil Petu Johan Chimmi Bia
(Mat 3.1-12; Mar 1.1-8; Luk 3.1-18)
19Jerusalem khua Judah upa hna nih tlangbawi hna le Levi mi hna cu Johan sinah khan an hei thlah hna i, “Ahodah na si?” tiah an va hal.
20Johan nih cun pheh lo tein, “Kei cu Messiah cu ka si lo,” tiah langhngan te le fiang tein a rak chimh hna.
21Cun annih nih cun, “Ahodah na si kun? Elijah tah na si maw?” tiah an hal. Johan nih cun, “Ka si lo,” tiah a leh hna. Annih nih, “Profet cu tah na si maw?” an ti. Anih nih, “Ka si lo,” tiah a ti hna. #Deu 18.15,18; Mal 4.5
22“Ahodah na si kha kan chim kun, zeicahtiah a kan fialtu hna kha bialehnak kan hei phorh hna awk a herh. Cucaah cun aho ka si, ti ah dah naa ti?” an ti.
23Johan nih cun a thawh hna i,
“Kei cu, Profet Isaiah nih,
‘Bawipa kalnak caah lam kha
ding tein rak ser u,’ tiah
thetse ram ah a aumi aw,
a timi kha ka si,”
tiah a ti hna. #Isa 40.3
24An thlahmi hna lak i aa tel vemi Farasi mi hna nih khan, 25“Nangmah cu Messiah zong na si lo, Elijah zong na si lo, profet zong cu na si fawn ṭung lo ahcun, zeicahdah tipilnak kha na pek len kun hna?” an ti. 26Johan nih cun, “Kei nih cun ti in tipilnak kan pek hna, sihmanhsehlaw nan lakah hin nan hngalh lomi, 27ka hnu in a ra dingmi cu a um ko. Kei hoi hna cu a kedan hri phoihtu hmanh ah kaa tlak lo,” tiah a leh hna. 28Hitihin bia an i halnak hmun cu Jordan tiva nichuahlei kam i a ummi Bethani khua, Johan nih tipil a pek hnanak ah khan a si.
Pathian Tuufa
29A thaizing ah Johan nih cun Jesuh cu a sin i a rat kha a rak hmuh i, “Zohhmanh u, Pathian Tuufa, vawlei sualnak a kalpitu khi! 30Amah hi pei, ‘Ka hnu in mipa pakhat a ra lai, sihmanhsehlaw amah cu keimah nakin a ngan deuhmi a si, zeicahtiah ka chuah hlan in amah cu a rak um cang,’ tiah ka rak chimmi kha a si cu. 31Amah cu ahodah a si lai ti kha ka hngal lo, sihmanhsehlaw ti in tipilnak ka rak pek lengmang hna cu amah kha Israel mi nih an hngalh khawh nakhnga caah a si,” tiah a ti.
32Cun Johan nih cun, “Vancung in Thlarau cu ṭhuro bantukin a rung ṭum i a cung i aa fut kha ka hmuh. 33Amah cu ka rak hngal ṭhiamṭhiam lo, sihmanhsehlaw ti in tipilnak va pe hna tiah a ka thlahtu nih khan, ‘Mi pakhatkhat cungah Thiang Thlarau kha a rung ṭum i aa fut kha na hmuh tikah, cu pa cu Thiang thlarau in tipilnak a petu hna ding cu a si ti kha na hngalh lai,’ a ka ti. 34Cucu keimah hrimhrim nih ka hmuh i tehte ka khaan. Amah hi Pathian Fapa cu a si ko,” tiah a ti.
Jesuh Zultu Hmasa Bik Pawl
35A thaizing ah Jesuh cu aa chawk i cu lioah cun Johan le a zultu pahnih nih an dirnak khan an hmuh ṭhan. 36Johan nih cun a hei zoh i, “Pathian Tuufa khi zohhmanh u,” tiah a ti. 37Cu bia a chim cu a zultu pahnih nih khan an theih i Jesuh cu an zulh. 38Jesuh cu a hnulei ah a hun i mer i an zulh kha a hmuh hna tikah, “Zeidah nan kawl?” tiah a hal hna. Annih nih, “Rabbi, khuazei ah dah na um?” tiah an leh. (Rabbi a sullam cu cawnpiaktu saya tinak a si).
39“Ra u law ra zoh tuah ngat u,” tiah a leh ve hna. Cucaah amah sinah khan an kal i a umnak cu an va hmuh, cu ni cu amah sinah cun an cam. (Cu caan cu zanlei suimilam pali hrawng khi a si).
40Johan bia a thei i Jesuh sinah a kalmi pahnih hna lak i pakhat cu Simon Peter nau Andru kha a si. 41Andru nih a tuah hmasa bikmi thil cu a u Simon va kawl kha a si i, “Messiah cu kan hmuh cang,” tiah a ti. (Messiah cu Khrih tinak a si). 42Cun Simon cu Jesuh sinah khan a kalpi.
Jesuh nih cun a rak zoh i, “Nangmah cu Johan Fapa Simon na si. Na min cu Sefas a si cang lai,” tiah a ti. (Sefas ti cu Peter ti he khan aa khat i a sullam cu “lungpi” tinak a si).
Jesuh Nih Filip le Nathanael Kha A Auh Hna
43A thaizing cu Jesuh cu Galilee ram kal kha aa tim. Filip kha a hei hmuhpah i, “Ka zul,” tiah a ti. 44(Filip cu Andru le Peter bantukin Bethsaida khuami kha a si ve). 45Filip nih cun Nathanael kha a va hmuh i, “Phungbia cauk chungah a kong Moses nih a ṭialmi pa, profet hna zong nih a kong an ṭialmi pa kha kan hmuh cang. Amah cu Josef fapa Jesuh, Nazareth khuami kha a si,” tiah a ti.
46Nathanael nih cun a rak i thawh i, “Nazareth khua cun thil ṭha zeital a chuak kho hnga maw?” tiah a ti.
Filip nih cun, “Ra law ra zoh hen aw,” tiah a leh.
47Jesuh nih cun Nathanael cu amah lei i a rat kha a rak hmuh i, “Israel mi taktak a simi khi zoh hmanh u; amah khi hlenthawinak lungthin zeihmanh a ngei lomi a si,” tiah a ti.
48Nathanael nih cun aa thawh i, “Zeitindah na ka hngalh?” tiah a ti. Jesuh nih cun, “Filip nih an kawh hlanah khan, theipi kung tangah ka rak in hmuh cang,” tiah a leh.
49Nathanael nih cun, “Saya, nangmah cu Pathian Fapa na si. Israel mi Siangpahrang na si,” tiah a ti.
50Jesuh nih cun, “Theipi kung tang i na um lio kha kan hmuh, ka ti caah cun maw na zumh? Hi nakin a ngan deuh ngaingaimi thil na hmuh len hna lai,” tiah a ti. 51Cun annih cu a thawh hna i, “Hi biatak hi kan chimh hna: Van kha aa hun i Pathian vancungmi hna cu Mi Fapa cung i an ṭum le an kai kha nan hmuh lai,” tiah a ti. #Gen 28.12
Currently Selected:
JOHAN 1: HCL06
Highlight
Share
Copy
![None](/_next/image?url=https%3A%2F%2Fimageproxy.youversionapi.com%2F58%2Fhttps%3A%2F%2Fweb-assets.youversion.com%2Fapp-icons%2Fen.png&w=128&q=75)
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006