1 THESALON 1
1
1Paul, Silas le Timote nih,
Thesalonika khua i a ummi Khrih-fabu,
Pathian kan Pa le Bawipa Jesuh Khrih ta a simi kha, ca kan in kuat hna.
Vel le daihnak cu nan ta si ko seh. #Lam 17.1
Thesalon Mi Hna Nunnak le Zumhnak
2Nanmah kong ah Pathian kha kan lawmh zungzal i thla kan cam fate nanmah kha kan in campiak zungzal hna. 3Nan zumhnak cu rianṭuannak ah nan langhterning le dawtnak nan ngeihmi nih fak piin rian an ṭuanter hna ning le kan Bawipa Jesuh Khrih chung i ruahchannak nan ngeihmi a fehning kha Pathian kan Pa hmaiah kan philh lo. 4U le nau hna, Pathian nih an dawt hna i amah mi si awkah an thim hna kha kan hngalh. 5Thawngṭha kha nan sin kan phakpi tikah bia lawnglawng in si loin, ṭhawnnak le Thiang Thlarau le biatak a si fiang tein kan hngalhnak he khan a si. Nan sin kan um ah khan zeitindah kan umtuzia a si cu nan hngalh; nanmah ca ṭhatnak ding caah kha ti kan um kha a si. 6Kanmah le Bawipa kha kan nawl nan kan cawn i temhinnak tampi nan huah nain Thiang Thlarau sinin a rami bia kha lawm tein nan cohlan. #Lam 17.5-9 7Cucaah Masidonia le Grik ram i a ummi Khrihfa hna caah nannih cu zohchun awk nan rak si. 8Zeicahtiah nanmah sinin a chuakmi thawngpang Bawipa kong kha Masidonia le Grik ram leng a phan i Pathian nan zumhnak thawng nih khan khuazakip a cul. Cucaah kan khualtlawnnak kong cu kanmah nih chim a herh ti lo, 9anmah tu nih khan nanmah kan in tlawn hna ah khan zeitindah nan kan conglawmh ti kha an chim ko. 10Pathian taktak a simi Pathian nung biak awk le vancung in a ra laimi a Fapa hngah awkah siasal biaknak in Pathian leiah nan i mer kha an chim i cu a fapa Jesuh cu thihnak in a thawhtermi le a ra liomi Pathian thinhunnak in a kan chanhtu kha a si.
Currently Selected:
1 THESALON 1: HCL06
Highlight
Share
Copy
Want to have your highlights saved across all your devices? Sign up or sign in
Lai (Hakha) Common Language Bible © Bible Society of Myanmar 2006