Teu Maan Caoh 17

Tuhz weng Thessalonika

1Paul kaar Silas datz lan weng Amphipolis boh weng Apollonia, phraeoz weng Thessalonika. Tuhz weng an diz maang crawp rawz traz Yio. 2Ceun Paul tomz cih klawhz pawk ne kut tuhz crawp rawz traz, yawt kyaamz lik rae teur upz tang ihz keu diz kaai seu ngihz sinz waiz laehz. 3Hnhz leh kyaamz lik lao plaez ti loz rae khaam saak se Tahz Khris bawnz talz tukz khahz peur teuk, bawnz yam rae meu rae imz. Paul daz, “Tahz Yesuhz an ohz lao plaez pehz nahz ne naeh luat Tahz Khris.” 4Ihz Yio teur ka yum mony Paul lao rae cih bohz raen Paul kaar Silas. Keur meh Krik an koz kwaai Phraz Pen Caoh keui yum truz kaw heungz, keun nyah Krik an maang sre keui yum truz kaw nam lany.

5Keuiz daz ihz Yio teur ka keui seuk ke, teur cuhz ihz leungz tuhz teur laas, cih aez ihz wungz mawh ronyz tang weng. Keuh kut neung neung tuhz kaang Yason rae khahz Paul boh Silas ngaz botz kaar lae cu aacz ngaai wungz ihz. 6Meuz keuh nam awlz kaar ne botz leh nahz Yason boh kuanz mai yum yam teur ka rae lan cu aacz ngaai ihz mawh weng ne daz, “Ihz kaar ni naeh ihz ya kaoz klawhz ti, seu ni a wa truz phraeoz aarz ni. 7Yason kaw a wa saanyz rap kaar aez cih khaekz daehz. Keuh hacz aamz saan khatz pakz peung khunz longz rae daz, ‘Maang Khunz longz thaengz hawkz mus Hnhz raak Yesuhz da.’” 8Meuz wungz ihz boh ihz mawh weng keui ngarz keuh daz ceun diz ne keuh kreuk phawmz. 9Meuz ceun diz ihz mawh keui mawr leh paekz Yason boh bohz raen hnhz keui rae plawiz keuh weng.

Ihz weng Berea

10Meuz borz an diz luat kuanz mai keui cao Paul kaar Silas lae lan cu weng Berea. Meuz a wa phraeoz ne kaar kut tuhz crawp rawz traz Yio. 11Yio an naeh tuhz weng Berea keui phawmz pa lak Yio an naeh tuhz weng Thessalonika, takz phawmz teuk ngarz mony reu ma Phraz Pen Caoh. Keuh yawt rak rak kyaamz lik klawhz seu ngihz, aez daehz mas an Paul rawz ne anz anz boh nam anz. 12Ihz Yio keui heungz baaiz yum yam truz. Keun nyah kheuz Krik an maang sre boh keur meh Krik keui kaw yum yam truz heungz baaiz. 13Keuiz daz ihz Yio an naeh weng Thessalonika keui ngarz reu oiz Paul yeung rawz traz Phraz Pen Caoh tuhz weng Berea rae keuh truz srawz srawz thaengz ihz weng an diz boh. 14Meuz diz luat kuanz mai keui phuhz Paul lan waar paang laai. Silas boh Timothi samz kiutz tuhz weng Berea. 15Keuh phuhz Paul phraeoz weng Athens ne, keuh weng mial Berea rae leh mony an Paul seumz aez Silas boh Timothi truz tawiz daehz raamz rip.

Tuhz weng Athens

16Meuz Paul ngawm Silas boh Timothi tuhz weng Athens ne hnhz awlz pung raang saangz thuhz keui neuk boh tuhz weng an diz rae hnhz khamz phawmz. 17Kawp ceun diz hnhz teur upz tuhz crawp tang ihz Yio, tang ihz an nam anz kheuz Yio setz an koz kwaai Phraz Pen Caoh boh teur upz tuhz teur laas ihz an kai truz tuhz a diz klawhz seu ngihz. 18Ihz maang pinya Epikurean teur ka boh ihz maang pinya Stoc teur ka keui teur upz tang Paul. Ihz teur ka daz, “Ihz mony heungz ne krai boh lawng naehz lah?”

Ihz teur ka kaw daz, “Kiungz hnhz krai lawng phraz prih ihz.” Kawp daz Paul krai lawng Yesuhz boh lawng meu rae imz. 19Kawp ceun diz keuh raak Paul lan cu rumz paang kum kaai rang Areopakus rae daz, “Aez ehz mas traz teun mehz an mih krai ne luz. 20Mih krai traz an ehz nam ti ngarz, ehz sunz mas ti loz an keu diz.” 21Ihz weng Athens boh ihz nawk an thangz tuhz weng an diz keui nam cih kaanz naehz neuz lak an krai boh an teuk ngarz lawng traz teun mehz keutz keutz klawhz seu ngihz. Kraao keuh hacz tawiz an keuh ngaz krai boh ngaz teuk ngarz traz an teun mehz.

22Paul ceng tuhz rumz Areopakus daz keuh nahz, “Ihz weng Athens keui aez, ohz mas pehz naeh ihz phraz traz baaiz tawiz klawhz ceu klawhz meoz. 23Meuz ohz khahz yawt tawiz an pehz koz kwaai ne awlz khrengz tucz seu ti taemz mok lik daz, ‘Ta Phraz an ehz nam mas.’ Seu ni ohz ngaz krai aez pehz nahz lawng Phraz an pehz nam mas samz koz kwaai boh ne. 24Phraz Pen Caoh phaan cih mok prih keu tehz boh an naeh klawhz ceu klawhz meoz tuhz an diz, Hnhz naeh Tahz kaang raaoz boh keu tehz, Hnhz nam moh tawiz wat an leh tihz ihz cih. 25Hnhz nam lo leh tih ihz kawr Daehz, Hnhz nam lo naehz. Kawp daz Hnhz naeh Tahz an aez phawmz ihz hacz aamz, phawmz kut phawmz lae boh klawhz ceu klawhz meoz keui. 26Hnhz phaan cih ihz hawkz, tae leh kaanz hnhz penz truz klawhz kheuz kheuz rae aez moh sirz tuhz prih keu tehz. Hnhz maaiz mok teuk aacz kraao boh ti ihz moh ta klawhz kheuz kheuz nahz. 27An Hnhz cih ceun diz ne aez ihz keui khahz Hnhz, doz caang khahz seuk Hnhz rae awlz Hnhz. Beuk daz mawn mawn Phraz Pen Caoh nam yaan yaeh teun akz.

28Kawp Hnhz rae ehz imz, ehz keusz, penz ehz. Naeh ceun mony ihz mawz mony khraepz tuhz pehz ne daz, ‘Ehz naeh kuanz kheuz Hnhz.’

29Ceun ehz naeh kuanz kheuz Phraz Pen Caoh ne ehz nam lo thaang Hnhz naeh ceun pung raang saangz thuhz khamz, ron boh reu aangz an naeh reung ceuk kuz boh reung kyahz ihz cih. 30Phraz Pen Caoh nam mok a poi kraao ihz nam mas Daehz daz kaw, seu ni Hnhz a wa lao ihz hacz aamz klawhz ti mas reung dengz kawi daehz rae aez ihz keui caanz daehz eunz. 31Kawp daz Hnhz tam mok seu seu ngihz, kaai seu ngihz an diz Hnhz ngaz tatz traz ihz tuhz prih keu tehz phrengz phrengz tawiz Tahz an Hnhz khaanz mok. An diz Hnhz cih aez ihz hacz aamz tam phawmz kaai Tahz meu rae imz thaz reung dengz yam.”

32Meuz keuh ngarz lawng ihz yam keui meu rae imz ne teur ka tahz ngot keulz. Teur ka kaw daz, “Ehz sunz ngarz thaengz lawng an ni.” 33Waaiz daz ceun diz Paul praasz lae keuh. 34Ihz teur ka raen Paul rae penz truz ihz yum yam. Tuhz keuh ne pa Dionisius an naeh ihz mawh hawkz tuhz cumz rumz Areopakus, boh Damaris an naeh keun nyah hawkz tang ihz aarz diz an naeh kawmz keuh.

Currently Selected:

Teu Maan Caoh 17: ril

Highlight

Compare

Copy