Philemon 1
1
1Christ Jesus atu a, thong a taak Paul le ih suapuipa Timothy in —
koma ngualtamh le ka nasep puipa uh Philemon tungah, 2Tuaciang Philemon le na inn ah a kikhawm pawlpi le koma suapuinu Apphia le ngalkap bang a ka seppui uh Archippus tungah lai kong thaak uh hi: #Col 4:17
3Ih Pa Pathian le ih Topa Jesus Christ in thuthiamna le thinnopna hong pia tahen.
Philemon ii Itna le Upna
4Suapui Philemon awng, thu ka nget simin na min kong lo a, ka Pathian tungah lungdam ka ko hi. 5Banghang ziam cile, Pathian mihing a kici peuma na itna le Topa Jesus sungah upna na neina thute ka za hi. 6Ka thungetna sia, thu umte ih hina taw ih kipawl khopna in Christ taw kipumkhat a, ih nuntakna sungah ih nei thupha a minpiang a thuk zaw in hong telsak thei natu ahi hi. 7Suapui awng, nong itna in, kei atu lungdamna lianpi le hanthotna tam ma hong pia hi! Pathian ii mihingte theampo ii thin nong nuamsak hi.
Onesimus atu Ngetsakna
8Hi thu hu in, Christ sungah na suapui khat ka hina taw, sep tu a kul khat sia hangsan takin kong sawl ngam hi. 9Ahihang nang hong it ka hikomin, kong thuum zaw hi. Keima Paul sia Christ Jesus ii tongciin hi a, ama hu in tu laitak mama in thongtaak zongh hi napi, hi bangin thuumna kong zangh zaw hi. 10Tua ahikom, Onesimus luangin ngetsakna khat kong nei hi, ama sia Christ sungah ka tapa hi zo hi; banghang ziam cile thong sungah ka om sung ma in, thaa vai ah ama ii a pa ka suak zo hi. #Col 4:9 11Hun khat lai in ahile ama sia nang atu in, a kimanna om ngawl hi, ahihang tu in, ama sia nang le kei atu in a kizangh thei khat hong suak hi.
12Tu in nang kungah ama kong puak kik a, ka thinsung theampo taw ka phawk nginge hi. 13Lungdamna thu hu in, luangta in ka om laitak, nangma luangin kei hong hu thei tu, ama sia hi sungah ka keam nuam hi. 14Ahitazong, nong hu natu kong sawl hamtang nuam bua hi; tua sangin, nangma thu in na ngamtat tu kong dei zaw hi. Tua ahikom, na thukim ngawl po bangma ka vawt buatu hi.
15Onesimus sia nang kung panin tawmvei sung a tai sia, a tawntungin na omkhop kik thei natu uh hang hizaw tha tu hi. 16Tu in ama sia sila khat lel po hi nawn ngawlin, sila dinmun tungsia ah om zo hi: ama sia Christ sungah ih it suapuipa khat hi zo ta hi. Ama sia kei atu in bangza in, manpha ziam! Tuaciang nang atu zonghin, sila khat a hina le, Topa sungah suapuipa khat a hina taw bangza in manpha zaw lai tu ziam!
17Tua ahikom nangma ii na naseppui bangin, kei nong ngaisun le, keima nong saan tu bangin, ama na saang kik in. 18Nang tungah ngamtat khialna hong nei a, ahibuale, leiba hong nei le zong, keima ii kong bat bangin na ciamtee in. 19Hi sungah keima khut tatak taw ma in lai hong at tu khi hi: Keima Paul in, kong lo kik vateei tu hi. (A tatakin ci leang, nangma pumpi mama kei tungah hong ba nginge na hi sia, kong phawsak tu kul ngawl hi.) 20Tua ahikom suapui awng, Topa atu in, thupha hi sia hong seam ta'n; Christ sungah suapui khat hina taw ka thin hong nuamsak ta'n!
21Lai hi sia kong at laitakin, kong sawl bangin vawt hamtang tu in kong muang hi — a tatakin kong sawl za sangin a tamzaw vawt tu ci in kong he hi. 22Tuaciang kei atu in inn doituam khat, na koi kholsak in, banghang ziam cile note theampo ii thungetna sia, Pathian in hong saang tu a, note kungah kei hong zuansak kik tu hi, ci in lametna ka nei hi.
A khakbel Vaithakna
23Christ Jesus atu in ka thongtaakpui Epaphras in note hong paupui hi, #Col 1:7; 4:12 24tuabang ma in ka naseppui Mark, Aristarchus, Demas le Luke in note hong nukset uh hi. #Sawl 12:12,25; 13:13; 15:37-39; 19:29; 27:2; Col 4:10,14; 2 Tim 4:10,11
25Topa Jesus Christ ii thuthiamna sia note theampo taw hong omkhawm tahen.
Currently Selected:
Philemon 1: SCB2
Highlight
Share
Copy
Want to have your highlights saved across all your devices? Sign up or sign in
Siyin Chin Bible © Bible Society of Myanmar, 2016